Buka ’e ha’api’ira’a
Pene 27: Te Ohipa e te Hopoi‘a a te Taata Tata‘itahi

Pene 27

Te Ohipa e te Hopoi‘a a te Taata Tata‘itahi

A man working indoors on a lathe.

E Parau Tumu Mure Ore te Ohipa

  • Eaha te iteraa tei roaa ia outou tei faaite mai ia outou i te faufaa o te ohipa ?

Ua faaite mai to tatou Metua i te Ao ra e o Iesu Mesia ia tatou, na roto i to raua iho mau hi‘oraa e ta raua mau haapiiraa e, e mea faufaa mau te ohipa i te ra‘i e i te fenua nei. Ua rave te Atua i te ohipa no te hamani i te mau ra‘i e te fenua. Ua haaputu Oia i te mau pape no te moana i te hoê vahi, e ia itea te repo maro. Ua faatupu oia i te mau aihere, e te mau raau i ni‘a i te fenua. Ua hamani Oia i te mahana, te marama e te mau feti‘a. Ua hamani Oia i te mau mea ora atoa i roto i te moana e aore râ, i ni‘a i te fenua nei. E ua tuu a‘e ra Oia ia Adamu e ia Eva i ni‘a i te fenua no te haapa‘o i te reira e no te faatere i ni‘a i te mau mea ora atoa. (A hi‘o Genese 1:1–28).

Na ô a‘e ra Iesu, « Te ohipa noa nei â tau Metua, e ohipa atoa ho‘i au » (Ioane 5:17). Ua parau atoa Oia e, « E rave au i te ohipa a tei tono mai ia‘u nei ra » (Ioane 9:4).

Ua Faauehia Tatou ia Rave i te Ohipa

Ua riro te ohipa ei faanahoraa no te oraraa i ni‘a i te fenua nei mai te tau a faaru‘e atu ai Adamu e o Eva i te Ô i Edene. Na ô atu ra te Fatu ia Adamu, « E amu oe i ta oe maa ma te hou i ni‘a i to rae » (Genese 3:19). Ua rave o Adamu e o Eva i te ohipa i roto i te faaapu ia roaa te mau mea no to raua iho oraraa e no te oraraa o ta raua mau tamarii (a hi‘o Mose 5:1).

Ua parau te Fatu i to Iseraela, « E ti‘a ia oe ia haa, e ia rave i ta oe mau ohipa atoa i na mahana e ono ra » (Exodo 20:9).

I te mau mahana matamua o te faaho‘i-raa-hia mai te Ekalesia nei, ua parau mai te Fatu i te Feia Mo‘a i te mau Mahana Hopea nei, « I teie nei, aore au o te Fatu, i mauruuru roa i to Ziona ra, no te mea te vai nei te feia faatau noa i rotopu ia ratou ra » (PH&PF 68:31).

Ua parau mai te hoê peropheta na te Atua, « E mea ti‘a ia fariihia te ohipa ei arata‘i i te oraraa o te mau melo o ta tatou Ekalesia » (Heber J. Grant, Te mau Haapiiraa a te mau Peresideni o te Ekalesia: Heber J. Grant [2002], 115).

Hopoi‘a no te Utuafare

  • Eaha te tahi mau hopoi‘a na te mau metua tane, te mau metua vahine e te mau tamarii no te tape‘a maite i te hoê utuafare ? Eaha te ti‘a i te mau melo o te utuafare ia rave amui i te ohipa ?

E rave amuï te mau metua i te ohipa no te maitai i te pae tino, te maitai i te pae varua e te maitai o te feruriraa o to ratou utuafare. Eiaha roa ratou e tia‘i na te tahi e haapa‘o i teie hopoi‘a. Ua papa‘i te Aposetolo Paulo e, « O te taata hoi aore e hamani maitai i to’na ihora, e rahi atu â i to’na iho utuafare, ua faaru‘e ïa oia i te faaroo » (1 Timoteo 5:8).

E imi te mau taata faaipoipo i te faaururaa no ô mai i te Fatu ra e e pee ho‘i i te a‘oraa a te mau peropheta a faataa ai i te mau hopoi‘a a te taata tata‘itahi. E mea faufaa ia patu i te hoê utuafare i reira ho‘i e haapiihia ai te mau parau tumu o te evanelia i te mau mahana atoa e i reira te here e te nahonaho e vai ai, mai te faufaa o te imiraa i te maa e te ahu.

E haapa‘o te mau tamarii i ta ratou tuhaa i roto i te ohipa a te utuafare. E mea faufaa ia horo‘ahia te ohipa e au i te tamarii ia rave. E ti‘a ia haamauruuruhia ratou no to ratou mau manuïaraa. E haapiihia te peu maitai o te ohipa, te peu matau e te ite na roto i te mau iteraa manuïa i roto i te utuafare.

I te tahi taime e farerei te taata i te fifi a tamata ai ratou i te imi i te ora no to ratou utuafare. E nehenehe te ma‘i tamau, te poheraa te hoê hoa faaipoipo, e aore râ, te metua ruhiruhia, e faateimaha atu â i te mau hopoi‘a i roto i te utuafare. Eita e mo‘ehia i to tatou Metua i te Ao ra te mau utuafare i roto i taua mau huru ra, e e horo‘a Oia ia ratou i te puai no te rave i ta ratou mau ohipa. E haamaitai tamau oia ia ratou mai te mea e, e ani ratou Ia’na ma te faaroo.

E Ti‘a ia Tatou ia Oaoa i ta Tatou Ohipa

  • Nahea to tatou huru i te faauru i ta tatou ohipa ?

No te tahi mau taata, e mea fiu te ohipa. Area no te tahi ra, ua riro ïa te ohipa ei tuhaa oaoa no te oraraa. Hoê rave‘a no te fana‘o i te îraa o te mau maitai o te oraraa o te haapiiraa ïa ia here i te ohipa.

Aita e ti‘a ia tatou paatoa ia ma‘iti i te huru ohipa ta tatou e rave. Te tahi pae o tatou te rave nei i te ohipa e rave rahi hora te maoro no te hoo mai i te mau mea tumu o te oraraa. E mea fifi ia oaoa i te reira huru ohipa. Tera râ, ua haapii te mau taata oaoa ia oaoa i ta ratou ohipa, noa’tu te huru o te ohipa.

E nehenehe ta tatou e tauturu te tahi e te tahi i roto i ta tatou ohipa. E mama ïa te hopoi‘a teimaha roa a‘e ia operehia te reira.

E mea faufaa roa to tatou huru i roto i te ohipa. Teie te hoê aamu e faaite nei e mea nahea te hoê taata i te iteraa i ô atu i ta’na ohipa i te mau mahana atoa. Ua haere te hoê taata na mua i te hoê vahi tupairaa ofa‘i; e ua ite atu oia e toru na taata te rave ra i te ohipa. Ua ui atu oia i te taata tata‘itahi i te ohipa ta’na e rave ra. Na te pahonoraa a te taata tata‘itahi i faaite mai i te huru taa ê to te tahi i to te tahi i ni‘a i te ohipa. « Te tapu nei au i te ofa‘i », te pahono ïa a te taata matamua. Pahono mai nei te piti e, « Te imi nei au ia roaa ia‘u e toru tara auro i te mahana hoê ». Ua ataata a‘e ra te toru o te taata e ua parau maira, « te tauturu nei au i te paturaa i te hoê fare no te Atua ».

I roto i te mau huru ohipa maitai atoa e nehenehe ta tatou e tavini i te Atua. Ua parau te Arii Beniamina, hoê peropheta ati Nephi, « A tavini ai outou i te taata nei, te tavini ra ïa outou i to outou Atua ra » (Mosia 2:17). Àhiri e ua roaa mai to tatou iho ora e aore râ, to to tatou mau utuafare na roto i ta tatou ohipa, te tauturu noa ra ïa tatou i te tahi pae o te mau tamarii a te Atua.

  • Nahea tatou ia haamaitai i to tatou huru no ni‘a i te ohipa ?

Te Faahapa nei te Atua i te Hupehupe

Aore te Fatu e au i te feia hupehupe e aore râ, te feia faaea ohipa ore noa. Ua parau oia e, « E ore ho‘i te taata faaea noa e roaa te vahi i roto i te Ekalesia, maori râ ia tatarahapa oia e ia faaafaro ho‘i i to’na haereraa » (PH&PF 75:29). Ua faaue atoa mai Oia e, « Eiaha e faaea ohipa ore noa; no te mea e ore roa oia o te taata faaea ohipa ore noa e amu i te faraoa e aore râ, e oomo i te ahu o te feia rave ohipa ra » (PH&PF 42:42).

Mai te mau mahana matamua mai o te Ekalesia, ua haapii mai te mau peropheta i te Feia Mo‘a i te mau Mahana Hopea nei ia vai ti‘amâ noa ratou e ia faarava‘i ia ratou iho e ia haapae i te faaea ohipa ore noa. Eita te Feia Mo‘a haapa‘o no te mau Mahana Hopea nei e faaru‘e i ta ratou hopoi‘a no te imi i to ratou iho maitai. Mai te mea e, e maraa, e imi ratou i te ora no ratou iho e no to ratou utuafare.

Mai te mea e, e maraa ia ratou, e farii te mau melo taatoa o te Ekalesia i te hopoi‘a ia haapa‘o i to ratou mau fetii o te ore e ti‘a ia haapa‘o ia ratou iho.

  • Nahea te ohipa ore i te haape‘ape‘a i te hoê taata ? i te hoê utuafare ? i te hoê oire ?

Te Ohipa, te Faaanaanataeraa e te Faafaaearaa

  • No te aha e mea faufaa ia vai noa te au maite i roto i te oraraa nei i rotopu i te ohipa, te faaanaanataeraa e te faafaaearaa ?

E mea ti‘a ia tatou tata‘itahi ia imi i te faito au i rotopu i te ohipa, te faaanaanataeraa e te faafaaearaa. Te na ô ra te hoê parau tahito e: « Te ohipa teimaha roa a‘e i te mau ohipa atoa, o te oreraa ïa e rave i te hoê mea, no te mea eita roa’tu te hoê taata e faaea i te faafaaea ». Aita e ohipa, aita atoa ïa e faufaa to te faafaaearaa e te tamărûraa.

E mea au roa e e mea titauhia te faafaaearaa, tera râ, ua faauehia ia tatou ia faafaaea i te mahana Sabati (a hi‘o Exodo 20:10; PH&PF 59:9–12). Na taua mahana faafaaearaa ra i muri a‘e i na mahana ohipa e ono e hopoi mai i te haumărû no te mau mahana i muri a‘e. Ua fafau atoa mai te Fatu i te « îraa o te fenua nei »i te feia e haapa‘o i te mahana Sabati (a hi‘o PH&PF 59:16–20; a hi‘o atoa i te pene 24 i roto i teie buka).

I te tahi atu mau mahana o te hepetoma, taa ê atu te raveraa i te ohipa, e ti‘a ia tatou ia faataa i te taime no te haamaitai i to tatou mau taleni e ia rave i te mau ohipa i au roahia e tatou, te faaanaanataeraa, e aore râ, te tahi atu mau ohipa e haamaha i to tatou rohirohi.

  • Eaha ta tatou e rave ia vai noa te au maite i rotopu i te ohipa, te faaanaanataeraa e te faafaaearaa ? Nahea te mau metua ia tauturu i ta ratou mau tamarii ia tape‘a i te reira au-maite-raa ?

Te Haamaitairaa o te Ohipa

  • Eaha te tahi mau haamaitairaa e roaa mai na roto i te ohipa maitai ?

Ua heheu te Atua ia Adamu e, « E amu oe i ta oe maa ma te hou i ni‘a i to rae » (Genese 3:19). E ture teie no te oraraa tahuti nei, e ture atoa râ no te faaora i te varua o Adamu. Aita e taa-ê-raa i rotopu i te ohipa varua, te ohipa roro, e te ohipa tino. E mea faufaa te ohipa no tatou tata‘itahi no to tatou tupuraa i te rahi, no te hoturaa o to tatou huru, e no te mau oaoaraa rau e ore i iteahia i te taata faatau.

Ua parau mai te Peresideni David O. McKay e, « Ia ite maitai tatou e, ua riro te haamaitairaa o te raveraa i te ohipa ei horo‘a, te mana no te rave i te ohipa ei haamaitairaa, te here i te ohipa ei manuiaraa» (Pathways to Happiness [1957], 381).

« Te vai nei te mau taata ia noaa to ratou oaoa » (2 Nephi 2:25). Te ohipa e taviri ïa no te îraa o te oaoa i roto i te faanahonahoraa a te Atua. Mai te mea e, e feia parau ti‘a tatou, e ho‘i faahou ïa tatou e ora i piha‘i iho i to tatou Metua i te Ao ra, e e rave tatou i te ohipa. Ia riro tatou mai Ia’na te huru, e riro ïa ta tatou ohipa mai Ta’na atoa ra. Teie ho‘i Ta’na ohipa « te faatupuraa i te tahuti ore e te ora mure ore o te taata nei » (Mose 1:39).

Te Tahi atu mau Papa‘iraa Mo‘a