Pasiuna

Si Jesus miingon, “Pagtuon kamo gikan kanako” (Mateo 11:29). Ang pagkat-on mahitungod sa Manluluwas ug sa iyang mga kamatuoran usa ka mahinungdanong parte sa pagpuyo sa iyang ebanghelyo. Ang imong mga pagpaningkamut sa pagsiksik sa mga kasulatan matag adlaw makatabang kanimo pagpaduol ngadto kaniya, kay “kining ania gisulat, aron motoo kamo nga si Jesus mao ang Kristo, ang Anak sa Dios; ug nga sa pagtoo makabaton kamog kinabuhi diha sa iyang ngalan” (Juan 20:31).

Kini nga giya sa pagtuon gibahin-bahin ngadto sa dinumero nga mga seksyon nga nahiuyon sa mga leksyon diha sa Kurso sa Doktrina sa Ebanghelyo sa Bag-ong Tugon. Ang matag seksyon naghatag sa basahonon ug mga pangutana sa semana aron sa pagpausbaw sa imong pagtuon. Ikaw mahimong mogamit sa mga pangutana aron sa pagpauswag sa personal nga paggamit sa mga kasulatan, aron sa pag-agda og gisentro sa ebanghelyo nga mga panaghisgut tali sa mga sakop sa banay, ug sa pag-andam sa paghimo og makahuluganong mga pagtampo ngadto sa mga panaghisgut sa klase.

Kini nga giya sa pagtuon usa ka bililhong kapanguhaan alang sa mga banay. Matag seksyon naglangkob og usa ka sugyot alang sa usa ka kalihokan o panaghisgut aron sa pagdugang og tinguha ug kalainan sa pagkat-on sa ebanghelyo diha sa panimalay.

Usab giapil sa matag seksyon ang usa ka kadena nga kasulatan—usa ka listahan sa mga tudling sa kasulatan nga may kalabutan sa basahonon. Ikaw mahimong buot mosulat niini nga mga listahan sa likod sa imong balaang mga kasulatan. Ikaw mahimo usab nga buot mopalambo sa imong kaugalingong mga kadena nga kasulatan pinaagi sa pagpili og mga tudling gikan sa mga listahan diha sa Giya ngadto sa mga Kasulatan.

Aron sa pagpatigbabaw sa usa ka kadena nga kasulatan diha sa imong balaang mga kasulatan, markahe diha sa imong balaang kasulatan ang unang tudling nga anaa sa lista. Tupad niana nga tudling isulat ang pakisayran alang sa ikaduhang tudling nga anaa sa lista. Ipakli ngadto sa ikaduhang tudling, markahe kini, ug isulat ang pakisayran alang sa ikatulo nga tudling. Padayon hangtod imong namarkahan ang katapusang tudling sa lista, ug kompletoha ang kadena pinaagi sa pagsulat sunod niana nga tudling ang pakisayran alang sa una nga tudling. Imong magamit kini nga mga kadena nga kasulatan sa dali nga pagpangita sa mga tudling sa balaang kasulatan sa usa ka hinatag nga baruganan sa ebanghelyo.

Usa ka dugang nga seksyon sa katapusan sa giya sa pagtuon naglangkob sa mga panultihon sa mga propeta sa ulahing adlaw mahitungod sa mga panalangin sa pagtuon sa balaang kasulatan.

Ipakigbahin uban sa imong magtutudlo sa Doktrina sa Ebanghelyo ang katungdanan sa pagtabang sa klase nga mamahimong malampuson. Ang Ginoo miingon nga ang mga magtutudlo kinahanglan “mosangyaw …pinaagi sa Espiritu sa kamatuoran” ug nga kadtong kinsa modawat sa “pulong sa kamatuoran” kinahanglan “modawat niini pinaagi sa Espiritu sa kamatuoran” (D&P 50:17, 19). Adto ngadto sa klase nga andam sa pagtampo og mga panabut, pangutana og mga pangutana, pakigbahin og mga kasinatian, padayag og pagpamatuod, ug paminaw nga matalagdon sa magtutudlo ug sa ubang mga sakop sa klase. Kon imo nang natun-an ang basahonon ug nakapamalandong sa mga pangutana dinhi niini nga giya sa pagtuon, ikaw mamahimong labaw nga maandam nga mosinati sa katumanan sa mga pulong sa Ginoo sa diha nga siya miingon, “Siya nga nagsangyaw ug siya nga nakadawat, nakasabut sa usag usa, ug ang duha makadawat og kaayohan ug maglipay nga maghiusa” (D&P 50:22).