“Unaha Ninyo Pagpangita ang Gingharian sa Dios”

Unsa ang mahimong ganti sa mga tawo kinsa mobuhat og maayo nga mga butang aron makit-an sa uban? (Tan-awa sa Mateo 6:2, 5, 16.) Unsa nga mga butang nga malagmit atong buhaton aron makit-an sa uban kaysa pagpahimuot sa Dios? Sa unsa nga paagi nga kita makalimpyo sa atong mga tinguha sa pag-alagad ug paghimo og uban nga maayong mga buhat?
Ang pagtulun-an diha sa Mateo 7:12 sa kasagaran gitawag og Bulawanon nga Lagda. Unsa nga mga kasinatian ang nakapakita kanimo sa bili niini nga baruganan? Sa unsa nga paagi nga sa pagsunod sa Bulawanon nga Lagda makahimo kanato nga labaw nga maayong mga tinun-an ni Jesukristo?
Si Jesus misaad nga kon kita “mangita …pag-una sa gingharian sa Dios,” kita pagahatagan sa tanan nga uban nga mga butang nga atong gikinahanglan (Mateo 6:33). Unsa nga mga kasinatian ang nakatabang kanimo sa pag-angkon og pagpamatuod niini nga saad?

Sugyot alang sa Panaghisgut sa Banay

Pakita og usa ka bato ug pinundok nga balas. Pangutana sa mga sakop sa banay unsa nga materyal ang ilang gamiton para sa tukuranan sa usa ka balay. Basaha ang Mateo 7:24–27, ug tukia unsaon sa pagtukod sa atong mga kinabuhi ibabaw sa mga pagtulun-an sa Manluluwas susama sa pagtukod og usa ka balay ibabaw sa lig-on nga tukuranan nga bato.
Pakita og mapa. Pangutana sa mga sakop sa banay unsaon sa usa ka mapa nga makatabang kanila sa pagplano og usa ka biyahe. Kon ang imong banay bag-ohay pa lamang nagbiyahe o sa dili madugay mobiyahe, paghisgut giunsa paggamit sa mapa o unsaon paggamit ang mapa alang sa biyahe. Ipatin-aw nga sa atong pagpanaw padulong sa kinabuhing dayon, ang mga balaang kasulatan ug ang mga panudlo sa mga buhing propeta sama sa usa ka mapa, nagtabang kanato nga makahibalo unsaon pag-uli ngadto sa atong Langitnong Amahan.