“Alaot Kamo…Mga Maut”

Unsa ang nakapadani kanimo mahitungod sa asoy ni Jesus nga mapainubsanong nagsakay apan madaugon ngadto sa Jerusalem? (Tan-awa ang Mateo 21:1–11.) Unsa sa imong hunahuna ang imong bation kon didto pa ikaw niadtong higayona?
Ngano sa imong hunahuna nga ang mga sugo diha sa Mateo 22:37–40 mahinungdanon kaayo? Unsa ang imong mahimo aron sa hingpit nga paagi labaw ka nga makasunod niini nga mga sugo?
Ang Manluluwas mibalik-balik og pahayag og pagkaalaot sa mga escriba ug mga pariseo tungod kay sila mga maut. Sila mihatag og dakong pagtagad ngadto sa dayag nga mga ordinansa ug mga lihok nga mopakita kanila nga ingon nga matarung, apan sila wala kaayo magtagad sa tinuoray nga pagkamatarung diha sa ilang mga kasingkasing (Mateo 23:13–33). Unsa ang imong mahimo aron makalikay sa pagminaut?

Sugyot alang sa Panaghisgut sa Banay

Pagdibuho sa usa ka papel og hulagway sa usa ka kahoy nga may mga dahon apan walay bunga. Sa luyong bahin sa papel, pagdibuho og usa ka hulagway sa usa ka kahoy nga may mga dahon ug bunga. Ipakita sa mga sakop sa banay ang hulagway sa kahoy nga walay bunga, ug hangyoa ang usa ka sakop sa banay nga basahon ang Mateo 21:17–20. Ipasabut nga kon kita magpakaaron-ingnon nga kita matarung apan wala magpuyo nga matarung, kita sama ra sa usa ka kahoy nga adunay daghang mga dahon apan walay bunga. Pakit-a ang mga sakop sa banay sa hulagway sa kahoy nga may bunga, ug awhaga sila sa pagpuyo nga matarung—sa pagbuhat og labaw pa kaysa pagpakaaron-ingnon nga matarung.