“Kini mao ang Kinabuhing Dayon”

Unsa ang misyon sa Espiritu Santo? (Tan-awa ang Juan 14:26; 15:26: 16:7–14.) Unsaon nato sa pag-ila sa impluwensya sa Espiritu Santo? (Tan-awa ang Mga Taga-Galacia 5:22–23; D&P 6:15, 23; 11:13.) Sa unsa nga paagi nga ang pagdawat sa gasa sa Espiritu Santo nakatabang kanimo?
Si Jesus miingon ngadto sa iyang mga Apostoles, “Dinhi sa kalibutan kamo adunay kagul-anan: apan sumalig kamo; gidaug ko na ang kalibutan” (Juan 16:33). Sa unsa nga paagi nga ang kahibalo nga si Jesus mibuntog na sa kalibutan makatabang kanato nga magmadasigon kon kita magsagubang uban sa kagul-anan? Ngano nga mahinungdanon nga magmadasigon?
Sa iyang pag-ampo, ang Manluluwas miingon, “Mao kini ang kinabuhing dayon, nga sila unta makaila kanimo nga mao ang bugtong tinuod nga Dios, ug kang Jesukristo, kinsa imong pinadala” (Juan 17:3). Sa unsa nga paagi nga ang pagkaila sa Langitnong Amahan ug ni Jesukristo lahi gikan sa pagkaila lamang mahitungod kanila? Sa unsang paagi nga kita makaila kanila?

Sugyot alang sa Panaghisgut sa Banay

Sa usa ka kahon, pagbutang og usa ka piraso nga papel nga minarkahan og Ang Gasa sa Espiritu Santo. Sa ikaduhang kahon, pagbutang og usa ka piraso nga papel nga minarkahan og Kinabuhing Dayon. Pusta ang mga kahon aron daw mga gasa. Ipasabut nga sa Juan 16–17, si Jesus gahisgut og duha sa mga labing mahinungdanon nga mga gasa nga atong madawat. Paablihi sa usa ka sakop sa banay ang unang kahon og basaha ang piraso nga papel sa sulod niini. Basaha ang Juan 16:13, ug ipasabut nga sa niini nga bersikulo “ang Espiritu sa kamatuoran” nagpasabut sa Espiritu Santo. Paablihi sa laing sakop sa banay ang ikaduhang kahon ug basaha ang piraso nga papel sa sulod niini. Basaha ang Juan 17:1–3. Ipadayag ang imong pagpasalamat alang sa gasa sa Espiritu Santo ug sa kahigayunan nga makadawat og kinabuhing dayon.