Mga Panudlo sa mga Propeta sa Ulahing mga Adlaw mahitungod sa mga Panalangin sa Pagtuon sa Kasulatan

“Siksika ang mga kasulatan—siksika ang mga padayag nga atong gipangmantala, ug hangyoa ang inyong Langitnong Amahan, sa pangalan sa Iyang Anak nga si Jesukristo, sa pagpakita sa kamatuoran nganha kaninyo, ug kon kamo mobuhat niini uban sa bug-os nga tinguha ngadto sa Iyang himaya sa walay pagduhaduha, Siya motubag kaninyo pinaagi sa gahum sa Iyang Espiritu Santo. Inyo dayong mahibaloan sa inyong mga kaugalingon ug dili gikan sa uban. Kamo dili na dayon magsalig sa tawo alang sa kahibalo sa Dios; ni wala na gayud magkinahanglan nga mamasin pa. Dili; kay kon ang mga tawo gadawat sa ilang mga panudlo gikan Kaniya kinsa nagbuhat kanila, sila kahibalo unsaon Niya pagluwas kanila” (Joseph Smith, Teachings of the Prophet Joseph Smith, pin. Joseph Fielding Smith [1976], 11–12).

“Ako mapasalamaton alang sa paghatag og gibug-aton mahitungod sa pagbasa sa mga kasulatan. Manghinaut ako nga alang kaninyo mahimo kini nga labaw ka makalingaw kaysa usa ka katungdanan; nga, mas maayo pa, kini mahimong usa ka butang sa gugma uban sa pulong sa Dios. Ako mosaad kaninyo nga sa inyong pagbasa, ang inyong mga hunahuna mahayagan ug ang inyong mga espiritu mabayaw. Sa sinugdanan morag lisud, apan kana mausab ngadto sa usa ka kahibulongang kasinatian uban sa mga panumduman ug mga pulong sa mga butang nga balaan” (Gordon B. Hinckley, “The Light within You,” Ensign, Mayo 1995, 99).

“Samtang kamo magbasa sa kinabuhi ug panudlo ni Ginoong Jesukristo, kamo mapaduol ngadto Kaniya kinsa ang tigsulat sa atong kaluwasan” (Gordon B. Hinckley, “Rise to the Stature of the Divine within you,” Ensign, Nob. 1989, 97).

“Kon kita mosunod sa mga tambag sa atong mga pangulo sa pagbasa ug pagtuon sa mga kasulatan, mga benepisyo ug mga panalangin sa daghang mga klase moabut kanato. Kini mao ang pinakamapuslanon sa tanan nga pagtuon nga mahimo natong sudlan” (Howard W. Hunter, sa Conference Report, Okt. 1979, 91; o Ensign, Nob. 1979, 64).

“Kon ang mga matag sakop ug mga banay mosubsob sa ilang mga kaugalingon diha sa mga kasulatan ingon nga gibatasan ug makanunayon, … ubang mga natad sa kalihokan awtomatiko nga moabut. Mga pagpamatuod mousbaw. Pasalig mapalig-on. Mga banay mapakusgan. Personal nga padayag modagayday” (Ezra Taft Benson, “The Power of the Word,” Ensign, Mayo 1986, 81).

“Dili nato sayon-sayonon sa pagtagad ang mahinungdanong mga butang nga atong nadawat gikan sa kamot sa Ginoo! Ang iyang pulong usa sa pinakabililhong mga gasa nga Iyang nahatag kanato. Ako moawhag kaninyo sa pagpasalig pag-usab sa inyong mga kaugalingon ngadto sa pagtuon sa mga kasulatan. Isubsob ang inyong mga kaugalingon kanila matag adlaw aron kamo makabaton og gahum sa Espiritu aron sa pag-uban kaninyo sa inyong balaang mga tawag. Basaha sila diha sa inyong mga banay ug tudloi ang inyong mga anak sa paghigugma ug sa pagmanggad kanila” (Ezra Taft Benson, “The Power of the Word,” Ensign, Mayo 1986, 82).

“Akong nabantayan nga kon ako dili manumbaling sa akong pakigrelasyon uban sa pagkadiosnon ug kon maorag walay balaang dalunggan nga naminaw ug walay balaang tingog nga nagsulti, nga ako layo, layo kaayo. Kon akong isubsob ang akong kaugalingon sa mga kasulatan ang gilay-on mopitos ug ang pagkaespirituhanon mobalik. Akong mabantayan ang akong kaugalingon nga magmahal og samot niatong kinsa ako gayud nga mahalon uban sa tibuok nakong kasingkasing ug hunahuna ug kusog, ug labaw nga magmahal kanila, akong nabantayan nga mas sayon sa pagpuyo sa ilang tambag” (Spencer W. Kimball, The Teachings of Spencer W. Kimball, ed. Edward L. Kimball [1982], 135).

“Ako nagtuo gayud nga ang matag usa kanato, sa labing minos adunay panahon sa atong mga kinabuhi, kinahanglan mokaplag sa mga kasulatan sa atong kaugalingon—ug dili lang sa pagkaplag kanila sa makausa, apan sa pagkaplag pag-usab kanila balik ug balik” (Spencer W. Kimball, “How Rare a Possession—the Scriptures!” Ensign, Sept. 1976, 4).

“Ako naghunahuna nga ang mga tawo kinsa magtuon sa kasulatan makaangkon og aspeto ngadto sa ilang kinabuhi nga walay laing makaangkon ug nga dili maangkon sa bisan unsa nga paagi gawas lamang pinaagi sa pagtuon sa mga kasulatan. Adunay pagusbaw sa pagtuo ug sa tinguha sa pagbuhat unsa ang matarung ug usa ka pagbati sa pagkadasig ug pagkasabut nga moabut ngadto sa mga tawo kinsa gatuon sa ebanghelyo—nagpasabut sa tino nga ang mga Sumbanan nga mga Kasulatan—ug kinsa gapamalandong sa mga baruganan, nga dili moabut sa laing paagi” (Bruce R. McConkie, sa Church News, 24 Ene. 1976, 4).

“Ako mohagit sa matag Santos sa Ulahing mga Adlaw sa pagduol ngadto sa kahibalo ug pagsabut sa mga kasulatan. Kini nga sagrado nga mga basahon mao ang atong balwarte sa depensa batok sa maliputon nga kaaway” (Marvin J. Ashton, sa Conference Report, Okt. 1977, 110; o Ensign, Nob. 1977, 73).

“Ako mosaad kaninyo nga ang inadlaw nga pag-ampo sa banay ug pagtuon sa kasulatan motukod sulod sa mga bongbong sa inyong panimalay og kasiguroan ug panaghugpong nga makapabuhong sa inyong mga kinabuhi ug moandam sa inyong mga banay sa pagatubang sa mga hagit sa karon ug sa mga kahangturan nga moabut” (L. Tom Perry, sa Conference Report, Abr. 1993, 113; o Ensign, Mayo 1993, 92).