“Panunod sa Gingharian nga Giandam alang Kaninyo”

Ang sambingay sa napulo ka mga birhen (Mateo 25:1–13) maoy usa ka paglarawan sa Ikaduhang Pag-anhi. Ang pamanhonon nagrepresentar sa Manluluwas, ang napulo ka mga birhen nagrepresentar sa mga sakop sa Simbahan, ug ang lana diha sa mga lamparahan nagrepresentar sa pagpangandam alang sa Ikaduhang Paganhi. Unsay pipila ka mga paagi nga kita makadugang og “lana” ngadto sa atong “mga lamparahan”?
Sa Mateo 25:14–30, ang mga talanton nagrepresentar sa mga gasa gikan sa Dios. Matag tawo nahatagan og labing ubos usa ka gasa gikan sa Dios (D&P 46:11–12), apan ang uban nga mga gasa mas sayon ilhon kay sa uban. Unsa ang pipila ka mga gasa nga malagmit malisud ilhon apan kana magamit aron pag-alagad sa uban ug paghimaya sa Dios?
Unsa sa imong hunahuna ang gipasabut sa Manluluwas sa dihang siya miingon, “Tungod kay gibuhat ninyo kini ngadto sa usa sa labing gagmay niining akong mga igsoon, gibuhat usab ninyo kini kanako”? (Mateo 25:40; tan-awa usab sa Mosiah 2:17).

Sugyot alang sa Panaghisgut sa Banay

Basaha ang sambingay sa mga talanton (Mateo 25:14–30), ug ipasabut nga ang mga talanton nagrepresentar sa mga gasa gikan sa Dios. Hangyoa ang matag sakop sa banay sa pagsulti kabahin sa usa o duha ka mga talanton o mga gasa nga siya napanalanginan. Dayon pasultiha ang matag sakop sa banay mahitungod sa mga talanton o mga gasa nga ang matag usa sa ubang mga sakop sa banay napanalanginan. Paghisgut og mga pamaagi nga ang mga sakop sa banay makagamit niini nga mga gasa aron sa pagtabang sa katukuran sa gingharian sa Dios sa yuta.