“Wala Na Siya Dinhi, Kay Siya Nabanhaw”

Nganong mahinungdanon man nga mahibaloan nga si Jesus nabanhaw gikan sa pagkapatay? Unsa ang impluwensya niini nga balita nganha sa mga katawhan? Unsa ang impluwensya niini nganha kanimo?
Ang nabanhaw nga Ginoo mipakita sa iyang kaugalingon ngadto sa pito sa iyang mga Apostoles samtang sila nangisda ug mihatag kanila sa milagroso nga paagi og daghan kaayo nga mga isda (Tan-awa sa Juan 21:4–7). Human sila nakakaon, unsa ang gihangyo ni Jesus nga buhaton ni Pedro ug sa uban nga mga Apostoles? (Tan-awa sa Juan 21:15–17.) Sa unsa nga paagi nga kita makapakaon sa mga karnero sa Ginoo?
Unsa ang katarungan ni Juan sa pagsulat sa uban nga mga butang nga gisulti ug gibuhat sa nabanhaw nga Jesus? (Tan-awa sa Juan 20:30–31.) Sa unsa nga paagi nga kamo nahatagan og kaayohan gikan sa pagtuon sa mga asoy sa kasulatan mahitungod sa Pagkabanhaw ni Jesus?

Sugyot alang sa Panaghisgut sa Banay

Pasul-oba ang usa ka sakop sa banay og gwantis ug ipalihok-lihok ang iyang mga tudlo. Ipasabut nga ang gwantis nagrepresentar sa atong mga lawas ug ang kamot nagrepresentar sa atong mga espiritu. Ang espiritu inubanan sa usa ka lawas gahimo sa usa ka buhi nga tawo. Ipahubo ang gwantis sa sakop sa banay. Ipasabut nga inig kamatay nato, ang atong mga espiritu mobulag gikan sa atong mga lawas. Dayon ang atong mga lawas mamatay, apan ang atong mga espiritu buhi lang gihapon. Ipasul-ob og balik ang gwantis sa kamot sa sakop sa banay. Ipasabut nga ang pagkabanhaw mao ang paghiusa pag-usab sa espiritu uban sa lawas. Kon kita mabanhaw, dili na gayud kita mamatay o masakit pag-usab. Ipamatuod nga tungod sa Pagkabanhaw ni Jesukristo, ang tanang mga tawo mabanhaw. (Kini nga leksyon nga maggamit og butang usa ka pagpahiangay sa usa ka pasundayag ni Elder Boyd K. Packer [sa Conference Report, Abr. 1973, 79–80; o Ensign, Hulyo 1973, 51,53].)

Isip kabahin niini nga panaghisgut sa banay, kamo mahimong buot nga magawit og “Siya Nabanhaw” (31110 853, Mga Baruganan sa Ebanghelyo, p. 366).