“Maghigugmaay Kamo sa Usag Usa, Maingon nga Ako Nahigugma Kaninyo”

Sa dihang si Jesus ug ang iyang mga Apostoles nagtigum aron sa pagpangaon sa kan-unon sa Pagpalabay, si Jesus mipaila sa ordinansa sa sakramento (Tan-awa sa Lucas 22:19–20). Nganong mahinungdanon man nga kita moambit sa sakramento matag semana? Sa unsa nga paagi nga ikaw makaandam sa espirituhanon nga paagi sa imong kaugalingon sa dili pa moambit sa sakramento?
Unsa ang gisulti ni Jesus sa iyang mga Apostoles mahitungod nganong iyang gihugasan ang ilang mga tiil? (Tan-awa sa Juan 13:12-17.) Sa unsang paagi nga ang pag-alagad sa uban nakahatag kanimo og kalipay?
Si Jesus miingon, “Ang tanang tawo makaila nga kamo mga tinun-an ko pinaagi niini, kon kamo maghigugmaay ang usa sa usa” (Juan 13:35). Ang imo bang pagtagad sa uban nagpakita nga ikaw usa ka tinun-an, o sumusunod, ni Kristo? Unsa ang pipila ka mga piho nga mga butang nga imong mabuhat aron pagsunod sa panig-ingnan sa gugma ni Kristo?

Sugyot alang sa Panaghisgut sa Banay

Paghangyo og usa ka sakop sa banay nga basahon ang Doktrina ug mga Pakigsaad 20:77. Hisguti ang ipasabut sa pan sa sakramento. Paghangyo og lain nga sakop sa banay nga basahon ang Doktrina ug mga Pakigsaad 20:79. Hisguti ang ipasabut sa tubig sa sakramento, pagmatngon nga karon gagamit kita og tubig imbis bino. Ipasabut nga kon kita moambit sa sakramento, kita nagsaad sa paghinumdum kanunay kang Jesus. Pagsulti mahitungod sa mga butang nga mahimo sa mga sakop sa banay nga makatabang kanila sa paghinumdum ni Jesus.

Isip kabahin sa panaghisgut sa banay, kamo mahimong buot manganta og himno sa sakramento.