“Hatagan Ko Ikaw sa mga Yawe sa Gingharian”

Si Jesus miingon ngadto kang Pedro, “Sa ibabaw niining bato pagatukoron ko ang akong iglesia” (Mateo 16:18). Si Propeta Joseph Smith mitudlo nga ang bato nga gipasabut ni Jesus mao ang pagpadayag (Teachings of the Prophet Joseph Smith, sel. Joseph Fielding Smith [1976], 274). Sa unsa nga paagi nga ang pagpadayag mao ang tukuranan sa Simbahan sa Ginoo?
Si Elder David B. Haight mitudlo nga ang Transpigurasyon ni Jesus “alang sa atong espirituhanon nga kahayag ug ingon man alang niadto kinsa mga personal nga mga saksi” (diha sa Conference Report, Abr. 1977, 8; o Ensign, Mayo 1977, 7). Unsa ang imong makat-unan gikan sa Transpigurasyon aron sa pagtabang kanimo kon ikaw nagkinahanglan og espirituhanong kalig-on? (Tan-awa sa Mateo 17:1–5.)

Sugyot alang sa Panaghisgut sa Banay

Basaha ang Mateo 16:13–17. Ipatin-aw nga si Pedro nakabaton og pagpamatuod kang Jesukristo pinaagi sa pagpadayag ug nga kita makabaton og pagpamatuod mahitungod sa Manluluwas sa sama nga paagi. Sultihi ang mga sakop sa banay mahitungod sa giunsa nimo pagkadawat og pagpamatuod kang Jesukristo ug unsa ang imong padayon nga gihimo aron malig-on ang imong pagpamatuod. Kon angayan, hangyo-a ang mga sakop sa banay sa paghatag sa ilang mga pagpamatuod. Awhaga sila sa pagpalig-on sa ilang mga pagpamatuod pinaagi sa adlaw-adlaw nga pag-ampo, pagtuon sa balaang kasulatan, ug masulundon sa mga kasugoan sa Dios.