Leksiyon 7 Materyal sa Pagpangandam sa Klase: Ang Mahangtoron nga Kinaiyahan ug Katuyoan sa Pagkalalaki ug Pagkababaye [Gender]
“Leksiyon 7: Materyal sa Pagpangandam sa Klase: Ang Mahangtoron nga Kinaiyahan ug Katuyoan sa Pagkalalaki ug Pagkababaye [Gender],” Materyal sa Magtutudlo sa Ang Mahangtoron nga Pamilya (2022)
“Leksiyon 7 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
grupo sa mga young adult diha sa baybayon
Leksiyon 7 Materyal sa Pagpangandam sa Klase
Ang Mahangtoron nga Kinaiyahan ug Katuyoan sa Pagkalalaki ug Pagkababaye [Gender]
Si Elder David A. Bednar sa Korum sa Napulog Duha ka Apostoles mitudlo nga ang atong pagkalalaki ug pagkababaye [gender], gigamit dinhi ug sa mosunod nga mga leksiyon nagpasabot sa atong biyolohikanhong sekso nga natawhan (gawas kon gipahibalo), “sa dakong bahin nagpaila kinsa kita, nganong ania kita sa kalib[o]tan, ug unsay atong pagabuhaton ug unsay mahitabo nato” (“Ang Kaminyoon Mahinungdanon sa Iyang Mahangt[o]rong Plano,” Liahona, Hunyo 2006, 51). Samtang ikaw magtuon sa materyal niini nga leksiyon, ikonsiderar kon sa unsa nga paagi nga ang plano sa Langitnong Amahan sa kaluwasan makatabang kanimo nga mas makasabot sa kaimportante sa imong mahangtoron sa pagkatawo ug katuyoan isip anak nga lalaki ug anak nga babaye sa langitnong mga ginikanan.
Pahinumdom: Ang pagkalalaki ug pagkababaye [gender] usa ka sensitibo nga isyu alang sa daghang tawo. Kini nga mga materyal gitumong aron sa pagtabang nimo nga makasabot sa doktrina sa Langitnong Amahan kabahin sa pagkalalaki ug pagkababaye [gender] ug pagsuhid kon sa unsa nga paagi kini magamit sa lain-laing mga sirkumstansiya sa atong kalibotan karon. Pagtinguha sa tabang sa Espiritu sa pagsabot sa mga mensahe sa Dios nga gitumong kanimo samtang ikaw magtuon.
Seksiyon 1
Sa unsa nga paagi nga ang akong pagsabot sa pagkalalaki ug pagkababaye [gender] mapalig-on samtang ako mas makasabot sa plano sa Langitnong Amahan?
Ang pamahayag sa pamilya nagsulti: “Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios. Ang pagkalalaki ug pagkababaye [gender] usa ka mahinungdanon nga kinaiya sa tagsa-tagsa sa kinabuhi sa wala pa dinhi sa yuta, sa pagkamortal, ug sa walay katap[o]san nga pag-ila ug katuyoan” (“Ang Pamilya: Usa ka Pamahayag sa Kalib[o]tan,” ChurchofJesusChrist.org).
Ang pulong pagkalalaki o pagkababaye [gender] adunay lain-lain nga mga kahulogan alang sa lain-laing mga tawo. Sumala sa gipasabot sa tamdanan nga basahon sa Simbahan, “Ang gipasabot nga kahulogan sa pagkalalaki o pagkababaye [gender] diha sa pamahayag sa pamilya mao ang biyolohikanhong sekso nga natawhan” (Kinatibuk-ang Tamdanan nga Basahon sa Simbahan: Pagserbisyo diha Ang Simbahan ni Jesukristo sa mga Santos sa Ulahing mga Adlaw, 38.6.23).
Si Elder Richard G. Scott sa Korum sa Napulog Duha ka Apostoles mihisgot bahin sa atong pagkalalang:
Imahe
Elder Richard G. Scott
Kini nga [paglalang sa lalaki ug babaye] nahimo sa espirituwal nga paagi sa inyong premortal nga kahimtang sa dihang kamo nagpuyo diha sa presensya sa inyong Amahan sa Langit. Ang inyong pagkalalaki ug pagkababaye [gender] diha na sa wala pa kamo moanhi sa yuta. (“The Joy of Living the Great Plan of Happiness,” Liahona, Nov. 1996, 73)
Si Presidente Dallin H. Oaks sa Unang Kapangulohan mitudlo og dugang nga ang “duha ka gilalang nga [lalaki ug babaye] importante sa plano sa kaluwasan” (sa “General Conference Leadership Meetings Begin,” Okt. 2, 2019, newsroom.ChurchofJesusChrist.org).
Ang pagsabot sa atong langitnong ginikanan makatabang nato nga mas makasabot sa plano sa Dios alang nato ug makatabang nato nga mas makakita pag-ayo sa kaimportante sa atong pagkalalaki ug pagkababaye [gender] niana nga plano.
Imahe
icon, pagtuon
Pagtuon agi og Pagpangandam alang sa Klase
Basaha ang Genesis 1:26–27, ug hunahunaa kon unsay gipasabot nga nalalang diha sa dagway sa atong langitnong mga ginikanan.
Ikonsiderar ngano nga ang pagkalalaki ug pagkababaye [gender] importante sa plano sa Langitnong Amahan. Ania ang pipila ka kamatuoran nga imong pamalandongan:
Ang mahangtoron nga kaminyoon sa usa ka lalaki ug usa ka babaye importante aron mahimong sama sa atong langitnong mga ginikanan. Ang matang sa kinabuhing dayon, o kahimayaan, mao ang pagpadayon sa mga pamilya alang sa kahangtoran. Kini nga potensyal makab-ot lamang “pinaagi sa mga gahom sa paglalang nga anaa sa kombinasyon sa lalaki ug babaye nga gihiusa sa mahangtoron nga kaminyoon (tan-awa sa Doktrina ug mga Pakigsaad 132:19)” (Dallin H. Oaks, sa “General Conference Leadership Meetings Begin”).
“Sa balaang plano, ang lalaki ug ang babaye gikinahanglan sa pagdala sa mga bata nganhi sa mortalidad ug sa paghatag sa pinakamaayo nga kahimtang sa pagpadako ug pag-amuma sa mga bata” (David A. Bednar, “Ang Kaminyoon Mahinungdanon sa Iyang Mahangt[o]rong Plano,” Liahona, Hunyo 2006, 52; tan-awa usab sa Genesis 1:28).
Ang Langitnong Amahan mituga sa mga lalaki ug mga babaye uban sa talagsaon nga mga kapasidad aron sa pagtabang nila nga matuman kini ug ang ubang balaan nga mga responsibilidad sa Iyang plano. Ang mga lalaki ug mga babaye nagkinahanglan sa usag usa aron mouswag ug makab-ot ang ilang hingpit nga mahangtoron nga potensyal. Sama sa gitudlo ni Elder Bednar:
Imahe
Elder David A. Bednar
Ang mga kinaiya sa mga espiritu sa lalaki ug babaye nagkompleto ug naghingpit sa usag usa, ug busa ang mga lalaki ug babaye gituyo nga mouswag og dungan ngadto sa kahimayaan. …
Alang sa balaanong mga katuyoan, ang lalaki ug babaye nga mga espiritu lahi, tataw, ug magtinabangay sa usag-usa.
… Ang talagsaong kombinasyon sa espirituhanon, pisikal, mental, ug emosyonal nga mga kapasidad sa mga lalaki ug mga babaye gikinahanglan alang sa pagpatuman sa plano sa kalipay. Mag-inusara, ang lalaki o babaye dili makatuman sa mga katuyoan sa iyang pagkalalang. …
… Ingon nga ang talagsaong mga kinaiya sa mga lalaki ug mga babaye nakadugang sa kahingpitan sa relasyon sa kaminyoon, mao usab kana nga mga kinaiya importante kaayo sa pagpatubo, pag-amuma, ug pagtudlo sa mga bata. (“Ang Kaminyoon Mahinungdanon sa Iyang Mahangt[o]rong Plano,” 51–52)
Si Elder Dale G. Renlund sa Korum sa Napulog Duha ka Apostoles ug si Sister Ruth L. Renlund mitudlo usab:
Imahe
Elder Dale G. Renlund ug Sister Ruth L. Renlund
Gilalang ang mga espiritu sa lalaki ug babaye aron mokompleto sa usag usa. Mao kana nganong ang sekso [gender] dili mag-usab-usab diha sa kahangt[o]ran—tungod kay kini naghatag sa kapasikaran alang sa hingpit nga gasa nga mahatag sa Langitnong Amahan, ang Iyang matang sa kinabuhi. (“Ang Balaanong mga Katuyoan sa Sekswal nga Kasuod,” Liahona, Ago. 2020, 14)
Imahe
icon, pamalandong
Pamalandong agi og Pagpangandam alang sa Klase
Ikonsiderar ang tahas sa pagkalalaki ug pagkababaye [gender] gikan sa usa ka mahangtoron nga panglantaw. Sa unsa nga paagi nga ang plano sa kaluwasan makatabang nimo nga makasabot nga ang “pagkalalaki ug pagkababaye [gender] usa ka mahinungdanon nga kinaiya sa tagsa-tagsa sa kinabuhi sa wala pa dinhi sa yuta, sa pagkamortal, ug sa walay katap[o]san nga pag-ila ug katuyoan”? (“Ang Pamilya: Usa ka Pamahayag ngadto sa Kalib[o]tan”).
Seksiyon 2
Sa unsa nga paagi nga ako mas makasabot sa mga pangutana kabahin sa pagkalalaki ug pagkababaye [gender]?
Tingali ikaw nakamatikod nga sa atong panahon adunay daghan nga nagkalain-lain nga mga ideya mahitungod sa pagkalalaki ug pagkababaye [gender] ug pagkatawo. Ang pipila ka tawo molahi sa pulong gender [pagkalalaki ug pagkababaye] gikan sa biyolohikanhong sekso. Sila maghisgot sa ilang gender nga pagkatawo, nga nagpasabot ngadto sa kinaugalingon nga pagbati sa usa ka tawo sa ilang pagkalalaki ug pagkababaye [gender] bisan kon kini butang nga lahi gikan sa ilang biyolohikanhong sekso. (Hibaloi nga kini lahi gikan sa sekswal nga kahilig, nga naglakip sa pisikal, emosyonal, ug sekswal nga pagkaibog ngadto sa uban. Ang sekswal nga kahilig pagahisgotan sa sunod nga leksiyon.)
Ang pagsabot sa tawo sa pagkalalaki ug pagkababaye mahimong maimpluwensiya sa kultura, sosyal nga mga lagda, ug pagpadako. Tungod niini ug sa ubang mga rason, ang estrikto nga pag-ila sa pagkalalaki ug pagkababaye [gender] usahay makalibog alang sa pipila ka tawo ug gani mahimong makadaot. Pananglitan, ang pipila ka tawo mabalaka nga ang ilang mga tinguha ug mga abilidad wala mohaom sa pipila ka gidahom sa kultura ug sa sosyal tungod sa ilang biyolohikanhon nga sekso. Kana wala gayod magpasabot nga adunay panaglahi tali sa ilang biyolohikanhon nga sekso ug sa matang sa ilang gender [gender identity]. Importante nga mahinumdom nga pipila ka elemento naghimo sa atong kompleto nga indibidwal nga pagkatawo, lakip sa atong balaan nga pagkatawo, biyolohikanhon nga sekso, mga gasa, mga hilig, mga tinguha, ug mga pagpili.
Bisan kon kita nakasabot sa mahangtoron nga mga kamatuoran mahitungod sa pagkalalaki ug pagkababaye [gender], ang komplikado nga mga kamatuoran sa atong kinabuhi makaresulta sa mahagiton nga mga pangutana o mga sirkumstansiya. Ikonsiderar ang mosunod nga mga punto:
Tungod sa mga rason nga wala masabti sa hingpit, ang pipila ka indibidwal sa usa ka punto sa ilang kinabuhi, “makasinati og wala magkatakdo nga mga pagbati tali sa ilang biyolohikanhon nga sekso ug sa matang sa ilang gender [gender identity]. Isip usa ka resulta, sila mahimong mokonsiderar sa ilang kaugalingon isip transgender. Ang Simbahan walay gihuptan nga posisyon kalabot sa mga hinungdan sa mga tawo nga mikonsiderar sa ilang kaugalingon isip transgender” (Kinatibuk-ang Tamdanan nga Basahon, 38.6.23).
Ang pipila ka tawo mobati nga dili komportable o nahasol sa mga gidahom sa kultura ug sosyal nga may kalabotan sa ilang biyolohikanhon nga sekso.
Sumala sa gisulti sa Kinatibuk-ang Tamdanan nga Basahon, “Sa talagsa ra kaayo nga mga sirkumstansiya, ang usa ka masuso matawo nga ang kinatawo dili klaro nga lalaki ba o babaye” (38.7.7). Kini sa kasagaran gipasabot nga intersex. Kini nga sirkumstansiya, ug giunsa kini pagtagad sa mga ginikanan o sa medikal nga mga tigtambag, mahimong adunay epekto o wala sa matang sa gender sa indibidwal [gender identity].
Sama sa gisulat sa usa sa mga gimantala sa Simbahan bahin sa hilisgotan sa transgender, ang mga indibidwal kinsa miila nga transgender “nag-atubang og komplikado nga mga hagit.” Sila “sama lang nga anagayan sa Kristohanong gugma sama lang sa bisan kinsa sa mga anak sa Dios ug kinahanglang tagdon uban ang pagkasensitibo, kamabination, ug kapuangod” (“Transgender: Do I Belong as a Member of the Church?,” ChurchofJesusChrist.org). Imbis sa pagtugot sa kakulang sa pagsabot o dili matarong nga paghukom sa pagdiktar unsaon nga kita adunay inter-aksyon sa uban, kita “makapaningkamot sa pagtan-aw sa uban pinaagi sa Kristohanon nga mga mata” (“Transgender: What Can I Do to Show Christlike Love?,” ChurchofJesusChrist.org).
Sa unsa nga paagi nga ako mahimong mas mahunahunaon ug sensitibo kon maghisgot sa pagkalalaki ug pagkababaye [gender] ngadto sa uban ug kon mokonsiderar sa pagkakomplikado sa mga reyalidad sa uban nga akong nailhan o nahimamat?
Seksiyon 3
Unsa kaha kon ako adunay mga pangutana mahitungod sa akong matang sa gender [gender identity]?
Kon ikaw adunay mga pangutana mahitungod sa imong pagkalalaki ug pagkababaye [gender] o makasinati og mga pagbati sa kalainan sa gender [gender incongruence], hibaloi nga ikaw gimahal sa imong Langitnong Amahan ug sa imong Manluluwas. Sila anaa kanunay alang kanimo. Ikonsiderar kon sa unsa nga paagi si Jesukristo ug ang Iyang ebanghelyo makatabang ug makapalig-on kanimo. Ang mga kapanguhaan sa Transgender nga gimantala sa Simbahan nagpaambit niini nga importante nga mga kamatuoran ug mga pahinumdom:
Ang Manluluwas adunay hingpit nga pagsabot sa atong talagsaon nga mga sirkumstansiya. Isip mga mortal, ang atong pagsabot limitado. Kita makapamahayag uban ni Nephi nga kita “nasay[o]d nga [ang Dios] nahigugma sa iyang mga anak; bisan pa niana, [kita] wala masay[o]d sa kahul[o]gan sa tanan nga mga butang” (1 Nephi 11:17). (“Transgender: Does the Savior Really Understand What I’m Going Through?,” ChurchofJesusChrist.org)
Dili ang tanan sa inyong palibot ang hingpit nga mopadayag og gugma, kapuangod, o pagkasensitibo. Sa kalibotan karon, sayon ang pagpangita og kasiloan ug makasilo. Ang dagko nga mga hagit makahimo nato nga mabantang sa wala tuyoa nga mga kasiloan tungod sa wala matarong nga paggamit sa mga pulong o wala magiyahe nga mga komentaryo. Isip mga miyembro sa Simbahan, kitang tanan nagkat-on ug nag-uswag. (“Transgender: Do I Belong as a Member of the Church?,” ChurchofJesusChrist.org)
Si Sister Michelle D. Craig, Unang Magtatambag sa Kinatibuk-ang Kapangulohan sa Young Women, mitudlo usab:
Imahe
Sister Michelle D. Craig
Ang mga Santos sa Ulahing mga Adlaw naggikan sa daghang porma o gidak-on, apan “ang tanan managsama ngadto sa Dios” [2 Nephi 26:33]. … Bisan kinsa ka man o unsay imong giatubang, gidapit ikaw sa lamesa sa Ginoo. (“Espirituhanong Kapasidad,” Liahona, Nob. 2019, 21)
Aduna kay kasiguroan nga ang tanan nga mga panalangin sa ebanghelyo anaa ngadto ni bisan kinsa nga mopili sa pagsunod sa mga sugo sa Dios. Ikaw “makahimo ug makatuman sa mga saad ngadto sa Dios” ug “maglakaw diha sa Iyang kahayag ug moapil sa Iyang Simbahan” makasinati man ka o dili sa mga pagbati sa kalainan sa gender [gender incongruence] (“Transgender: How Can I Contribute to the Lord’s Kingdom?,” ChurchofJesusChrist.org).
Ang tamdanan nga Basahon sa Simbahan misulat nga “ang transgender nga mga indibidwal kinsa dili mohimo og mga kausaban pinaagi sa medikal, pagpaopera, o sosyal nga pagtransisyon ngadto sa kaatbang nga sekso ug takos mahimong modawat og mga calling sa Simbahan, mga rekomend sa templo, ug mga ordinansa sa templo” (Kinatibuk-ang Tamdanan nga Basahon, 38.6.23). (Pahinumdom: “Ang sosyal nga transisyon naglakip sa pag-usab sa sininaan o pamustura, o pag-usab og ngalan o mga pulingalan [pronoun], sa pagpresentar sa kaugalingon nga lahi kay sa iyang biyolohikanhong sekso nga natawhan.” [Kinatibuk-ang Tamdanan nga Basahon, 38.6.23].) Kon gusto ikaw nga makasabot pa, pakigsulti sa imong bishop o presidente sa branch.
Bisan og dili supak sa polisiya o doktrina sa Simbahan, ang pagbutang og label sa imong kaugalingon nga usa ka transgender makahatag og kinutuban sa imong abilidad sa pagkab-ot sa imong mahangtoron nga mga tumong. Si Presidente Oaks mipasidaan:
Imahe
Presidente Dallin H. Oaks
Pagmatngon kon giunsa ninyo pagpaila ang inyong kaugalingon. … Ang mao lamang nga nag-inusarang kinaiya nga kinahanglang mopaila kanato mao nga kita usa ka anak nga lalaki o anak nga babaye sa Dios. Kana nga kamatuoran molabaw sa tanang uban nga mga kinaiya. (“How to Define Yourself,” New Era, Hunyo 2013, 48)
Ang matag usa kanato usa ka anak sa Dios uban sa potensyal nga kapalaran sa kinabuhing dayon. Ang matag laing pagtagad … temporaryo lang o dili importante nga kabahin sa kahangt[o]ran. Ayaw pilia ang pagtagad sa inyong kaugalingon o paghunahuna sa inyong kaugalingon sa mga paagi nga nagbutang og kinut[o]ban sa usa ka tumong nga inyong gipaningkam[o]tan. (“Unsa ang Sangputanan Niini?” Liahona, Mayo 2019, 62)
Si Elder D. Todd Christofferson sa Korum sa Napulog Duha ka Apostoles mihatag usab sa mosunod nga kasiguroan:
Imahe
Elder D. Todd Christofferson
Ang tanan adunay gasa; [ang tanan adunay] mga talento; ang tanan makatampo sa pagpadayag sa balaang plano sa matag henerasyon. … Daghan kaayo ninyo ang naghimo sa inyong pinakamaayo. Ug kon kamo [kinsa] magdala sa kinabug-atan nga palas-anon sa mortalidad [mo]bar[o]g agig pagdepensa sa plano sa Dios sa paghimaya sa Iyang mga anak, andam kami nga mosuporta ninyo. Uban sa pagsalig kami mopamatuod nga ang Pag-ula ni Jesukristo nagpaab[o]t ug, sa katap[o]san, mobayad sa tanang paghikaw ug nawala alang niadtong modang[o]p ngadto Kaniya. Walay usa nga gitakda nang daan nga makadawat og min[o]s pa kay sa tanan nga aduna ang Amahan alang sa Iyang mga anak. (“Nganong Kaminyoon, Nganong Pamilya,” Liahona, Mayo 2015, 52)
Imahe
icon, pamalandong
Pamalandong agi og Pagpangandam alang sa Klase
Sa unsa nga paagi ang mga pagtulon-an niini nga leksiyon ug ang hugot nga pagtuo ni Jesukristo makatabang nimo o sa usa ka tawo nga imong nailhan makatubag sa mga pangutana mahitungod sa gender?
