1 Ne biakalua ne kunyima kua yeya mujikija kuakula kudi bantu ba bungi babu bakitabuija mêyi enda, ne bakabanga kukudimuna mutshima, ne kukebulula mifundu.

2 Kadi tshitupa tshinena tshiabu tshivua tshijinga ne bashipa Alama ne Amuleke; bualu bavua bafîkila Alama tshiji, bua butoka bua mêyi enda avuaye muambila Zêzeloma; ne bavua bamba kabidi ne Amuleke uvua mubashima, ne uvua mupenda mikenji yabu ne kabidi balumbuluidi ne babalumbuluishi babu.

3 Ne bavua kabidi bafîkila Alama ne Amuleke tshiji; ne bakakeba bua kubashipa mu musokoku, bualu bavua babajadikila bubi buabu patoka.

4 Kadi kabakabashipa to; kadi bakabakuata ne bakabasuika ne mionji mikola, ne bakaya nabu kumpala kua mulumbuluishi munena wa mu bulaba.

5 Ne bantu bakalua ne bakabashiminyina—bajadika ne bavua bapenda mikenji, ne balumbuluidi ne balumbuluishi babu ba mu bulaba, ne kabidi bantu bonsu bavua mu bulaba; ne kabidi bavua bajadika ne kuvuanu Nzambi umua, ne neatuma Muanenda munkatshi mua bantu, kadi kakubapandisha to; ne bantu bakashiminyina Alama ne Amuleke bintu bia bungi bia mushindu ewu. Mpindiewu biakenzeka nanku kumpala kua mulumbuluishi munena wa mu bulaba.

6 Ne biakalua ne Zêzeloma wakakema mêyi avuabu bamba; ne uvua mumanya kabidi bitangila bumpofu bua meji, buvuaye mubueja munkatshi mua bantu ne mêyi enda a mafi; ne anyima wenda wakabanga kupandika pakamanyaye dipîla dienda; eyowa, makenga a ngena akabanga kumunyungulula.

7 Ne biakalua ne wakabanga kuela lubila kudi bantu, wamba ne: Monayi, ndi mupîla, ne bantu aba kabena ne katoba kumpala kua Nzambi to. Ne wakabanga kubakuila katshia ku diba adi; kadi bakamupenda, bamba ne: Udi peba ne diabulu anyi? Ne bakamutuila mata, ne bakamuipata munkatshi muabu, ne kabidi bonsu bavua bitabuija mêyi avua Alama ne Amuleke bamba; ne bakabipata, ne bakatuma bantu bua kubasabu mabua.

8 Ne bakasangisha bakaji ne bana babu pamua, ne bonsu bavua bitabuija anyi bavuabu balongesha bua kuitabuija dîyi dia Nzambi bakabimanshisha mu kapia; ne bakalua kabidi ne miandiku ivua mikala ne mifundu ya tshijila, ne bakayimansha kabidi mu kapia, bua yôshika ne ibutuka mu kapia.

9 Ne biakalua ne bakakuata Alama ne Amuleke, ne bakaya nabu ku muaba wa dishipibua bua ditaba, bua kumonabu dibutuka dia bavua bavingutuka mu kapia.

10 Ne pakamona Amuleke makenga a mubidi a bakaji ne bana bavua bavingutuka mu kapia, Amuleke wakumvua penda dikenga; ne wakambila Alama ne: Munyi mutudi mua kutangila bualu budi butshingisha ebu nanku? Lekela tôlola bianza bietu, ne tuenzela bukola bua Nzambi budi munda muetu, ne tubapandisha ku ndimi ya kapia.

11 Kadi Alama wakamuambila ne: Nyuma udi ungenzeja ne ntshiôlodi tshianza tshianyi to; bualu mona Mukalenga udi ubakidila kudiye, mu butumbi; ne udi ulekela ne benza nanku, anyi ne bantu babenza tshintu etshi, bilondeshila ku bupapa bua mitshima yabu, bua bitungu bienzaye pa mutu pabu mu tshiji tshienda bikala biakana; ne mashi a ba munda mutoka neikala bu njadikilu bua kubaluisha, eyowa, ne neabila ne bukitu bua kubafunda ku dituku dia ndekelu.

12 Mpindiewu Amuleke wakambila Alama ne: Mona, pamuapa nebatôsha petu.

13 Ne Alama wakamba ne: Bienzeka bilondeshila ku disua dia Mukalenga. Kadi, mona, mudimu wetu kawena mujika to; bua nanku kabena batôsha to.

14 Mpindiewu biakalua ne pakavingutuka mibidi ya bavuabu bela mu kapia, ne kabidi miandiku ivuabu belamu pamua nabu, mulumbuluishi munena wa mu bulaba wakalua ne wakimana kumpala kua Alama ne Amuleke, pavuabu babasuika; ne wakabatûta mapi pa matama, ne wakabambila ne: Kunyima kua binuamonyi ebi, nenuyisha kabidi bantu aba, ne nebimanshibua mu dijiba dia kapia ne dia nsufulu anyi?

15 Monayi, nudi numona kanuvua ne bukola bua kupandisha bavua bimanshibua mu kapia to; anyi Nzambi kena mubapandisha to nansha muvuabu bena ditabuija dienu. Ne mulumbuluishi wakabatûta kabidi mapi pa matama, ne wakabebeja ne: Nudi nuamba tshinyi bua bualu buenu?

16 Mpindiewu mulumbuluishi ewu uvua wa ku mulongu ne ditabuija bia Neholo, ewu wakashipa Gideona.

17 Ne biakalua ne Alama ne Amuleke kabakamuandamuna tshintu to; ne wakabatûta kabidi, ne wakabafila kudi bampulushi bua kuedibua mu buloko.

18 Ne pakabelabu mu buloko ne pakenzabu mu matuku asatu, balumbuluidi, ne balumbuluishi, ne bakuidi ne balongeshi ba bungi bavua bikala bena ditabuija dia Neholo bakalua; ne bakalua mu buloko bua kubamonabu, ne bakabela nkonku bitangila malu a bungi; kadi kabakandamuna tshintu to.

19 Ne biakalua ne mulumbuluishi wakimana kumpala kuabu, ne wakamba ne: Bua tshinyi kanuena nuandamuna ku mêyi a bantu aba to? Kanuena bamanya ne ndi ne bukôkeshi bua kunufila mu ndimi ya kapia anyi? Ne wakabatumina dîyi bua kuakula; kadi kabakandamuna tshintu to.

20 Ne biakalua ne bakumbuka ne bakendela yabu njila, kadi bakalua kabidi pakatshiabu; ne mulumbuluishi wakabatûta kabidi mapi pa matama. Ne ba bungi bakalua kabidi kumpala, ne bakabatûta bamba ne: Nenuimana kabidi ne nenulumbuluisha bantu aba, ne nudiwula mikenji yetu anyi? Bu nuenu bikala ne bukola bua bungi nanku bua tshinyi kanuena nudipatuisha to?

21 Ne bakabambila bintu bia bungi bia buena ebi, babasumakena menu abu, ne babatuila mata, ne bamba: Netulua munyi patudi bapîshibua?

22 Ne bakabambila bintu bia bungi bia buena ebi, eyowa, mishindu yonsu ya bintu bia buena ebi; ne babaseka nanku matuku a bungi. Ne bakabapala biakudia bua bumvua nzala, ne mâyi bua bumvua nyota; ne bakabanyenga bilamba biabu ne bakashala butaka; ne nanku bakasuikibua mionji mikola, ne bakakangidibua mu buloko.

23 Ne biakalua ne kunyima kua kukengabu matuku a bungi nanku, (ne divua dituku dia dikumi ne dibidi, mu ngondu wa dikumi, wa tshidimu tshia dikumi tshia dikôkesha dia balumbuluishi pa mutu pa bantu ba Nefi) ne mulumbuluishi munena wa mu bulaba bua Amoniha ne balongeshi babu ne balumbuluidi babu ba bungi bakaya munda mua buloko muvuabu basuika Alama ne Amuleke mionji.

24 Ne mulumbuluishi munena wakimana kumpala kuabu, ne wakabatûta kabidi, ne wakabambila ne: Bu nuenu ne bukola bua Nzambi dipatuishayi mu mionji eyi, ne pashisha netuitabuija ne Mukalenga neabutula bantu aba bilondeshila ku mêyi enu.

25 Ne biakalua ne bakaya bonsu kumpala ne bakabatûta, bamba mêyi a momumua awu, mena tô ne ku muntu wa ndekelu; ne pakakula muntu wa ndekelu bukola bua Nzambi buakalua kudi Alama ne Amuleke, ne bakajuka ne bakimana pa makasa abu.

26 Ne Alama wakabila, wamba ne: Mutantshi bula kayi utuakenga ne ntatu mikola eyi, Ô Mukalenga? Ô Mukalenga, tupesha makanda bilondeshila ku ditabuija dietu didi munda mua Kilisto, mena bua dipatuishibua. Ne bakakosa mionji ivuabu basuikibua nayi; ne pakamona bantu nanku, bakabanga kunyema, bualu bôwa bua lufu buakalua kudibu.

27 Ne biakalua ne bualu bôwa buabu buvua bupita bikola bakakuluka pa buloba, ne kabakafika ku tshibi tshia kupatukila pambelu pa buloko to; ne buloba buakanyungana bikola, ne bimanu bia buloko biakapandika mu bipesa bibidi, bu ne biakupuka pa buloba; ne mulumbuluishi munena, ne balumbuluidi, ne bakuidi, ne balongeshi bakatûta Alama ne Amuleke bakashipibua kudi diupuka diabi.

28 Ne Alama ne Amuleke bakapatuka mu buloko, ne kabavua bua kubenzela bibi to; bualu Mukalenga uvua mubapesha bukola, bilondeshila ku ditabuija diabu divua mu Kilisto. Ne bakapatuka buludi mu buloko; ne bavua basuludibua ku mionji yabu; ne buloko buakupuka pa buloba, ne muntu yonsu uvua munda mua bimanu biawu wakashipibua, pa kumbusha amu Alama ne Amuleke; ne bakalua buludi mu tshimenga.

29 Mpindiewu bantu, bualu bakumvua mutoyi mukola, bakalua banyema lubilu pamua ku bisumbu bia bantu bua kumanya tshiena bualu; ne pakamonabu Alama ne Amuleke bapatuka mu buloko, ne bimanu biawu bivua bipuka pa buloba, bôwa bukola buakabakuata, ne bakanyema kumpala kua Alama ne Amuleke mena bu mudi mbuji unyema ne bana benda kumpala kua ntambua ibidi; ne bakanyema nanku kumpala kua Alama ne Amuleke.