1 Ne mpindiewu biakalua ne pavua Alama wenza luendu kumbukila ku bulaba bua Gideona mutangila ku sude, kula ku bulaba bua Manti, monayi, wakakema, bualu wakasambakena ne bana ba baluma ba Mosiya mu njila benza luendu batangila ku bulaba bua Zalahemela.

2 Mpindiewu bana ba baluma ba Mosiya aba bavua ne Alama tshikondu tshiakamumuenekela muanjelu diambedi; bua nanku Alama wakasanka bikola menamena bua kumona bana babu; ne tshiakasakidila kabidi disanka dienda kupita, tshivua ne batshivua bikala bana babu mu Mukalenga; eyowa, ne bavua bakolakana mu dimanya dia bulelela, bualu bavua bantu ba ngumvuilu muakana ne bavua bakebulula mifundu ne dinanukila, bua bamanya dîyi dia Nzambi.

3 Kadi ebi ki bionsu to; bavua badifila ku disambila divula, ne dijila dia biakudia; bua nanku bavua ne nyuma wa buambi, ne nyuma wa dibuluila, ne pavuabu balongesha, bavua balongesha ne bukola ne bukôkeshi bua Nzambi.

4 Ne bavua bikala balongesha dîyi dia Nzambi bua mutantshi wa bidimu dikumi ne binayi munkatshi mua Bena Lamana, ne bavua bapeta bipeta bimpa bia kuluisha ba bungi ku dimanya dia bulelela; eyowa, ku bukola bua mêyi abu ba bungi bavua bakalua kumpala kua tshiôshelu tshia Nzambi, bua kubila dîna dienda ne kutonda mibi yabu kumpala kuenda.

5 Mpindiewu â adi malu akabaluila mu ngendu yabu, bualu bakapeta ntatu ya bungi; bakakenga bikola, mu mubidi ne mu meji, bu mudi ne nzala, nyota ne dipungi, ne kabidi dikuata mudimu muvula wa mu nyuma.

6 Mpindiewu ngendu yabu ivua nanku awu: Kunyima kua kushiyangana ne tatuabu, Mosiya, mu tshidimu tshia kumpala tshia balumbuluishi; kunyima kua kubengabu bukalenga buvua tatuabu mujinga kubambikila, ne etshi tshivua kabidi meji a bantu;

7 Nansha nanku bakashiya bulaba bua Zalahemela, ne bakangata miela yabu ya mvita, ne mafuma abu, ne mata abu, ne miketa yabu, ne bieledi biabu; ne bakenza nanku bua kupetabu biakudia pavuabu mu tshipela.

8 Ne bakabuela mu tshipela nanku ne bungi bua bantu bavuabu basungula, bua kubanda ku bulaba bua Nefi, bua kuyisha dîyi dia Nzambi kudi Bena Lamana.

9 Ne biakalua ne bakenza luendu matuku a bungi mu tshipela, ne bakajila bikola ne bakasambila bikola bua Mukalenga tshitupa tshia Nyuma wenda kuyayi nabu, ne kushala nabu, bua bikala tshiamu tshia mudimu mu bianza bia Nzambi bu kuluishabu, bu biobi bua kukumbana, bana babu, Bena Lamana, ku dimanya dia bulelela, ku dimanya dia bushadila bua ngikadilu ya batatuabu, ivua kayiyi miakana to.

10 Ne biakalua ne Mukalenga wakabakumbula ne Nyuma wenda, ne wakabambila ne: Ikalayi basambibua. Ne bakasambibua.

11 Ne Mukalenga wakabambila kabidi ne: Ndayi munkatshi mua Bena Lamana, bana benu, ne shikikayi dîyi dianyi; kadi nenuikala bena ditukija mu bulekelelu ne ntatu, bua nubaleja tshilejilu tshimpa tshianyi, ne nennuenza tshiamu tshia mudimu mu bianza bianyi bua lupandu lua bantu ba bungi.

12 Ne mitshima ya bana ba baluma ba Mosiya, ne kabidi bavua nabu, yakapeta bukola bua kuya kudi Bena Lamana bua ku bamanyisha dîyi dia Nzambi.

13 Ne biakalua ne pakafikabu ku mikalu ya bulaba bua Bena Lamana, bakabulukangana ne bakashiyangana, ne bavua batekemena kudi Mukalenga ne nebamonangana kabidi ku ndekelu kua dinowa diabu; bualu bakatshinka ne mudimu uvuabu bitaba uvua munena.

14 Ne bushuwa uvua munena, bualu bavua bitaba bua kuyisha dîyi dia Nzambi kudi bantu bavua kabayi ne nshidimukilu to ne bapapa ne ba tshikisu; bantu bavua basankila mu dishipa dia Bena Nefi, ne dibanyenga bintu biabu, ne dibapawula dia bintu biabu; ne mitshima yabu ivua miteka ku mabanji, anyi ku ngolo ne mpalata, ne mabua a mushinga mukola; kadi bavua bakeba bua kupeta bintu ebi ku dishipa dia bantu ne dipawula dia bintu bia benda, bua kabenji mudimu ne bianza biabu to.

15 Nanku bavua bantu bafuba, ba bungi babu bavua batendeledi ba mpingu, ne mutshipu wa Nzambi wakapona pa mutu pabu bua ngikadilu ya batatuabu; nansha nanku malaya a Mukalenga avua mafidibua kudibu bikalabu bakudimuna mitshima.

16 Bua nanku, etshi tshivua tshiena bualu tshiakenzela bana ba baluma ba Mosiya mudimu, ne pamuapa bavua bua kubafikisha ku dikudimuna dia mutshima; ne pamuapa bavua bua kubafikisha ku dimanya dia dilongolola dia disungila.

17 Bua nanku bakabulukangana, ne bakaya munkatshi muabu, muntu yonsu nkayenda, bilondeshila ku dîyi ne bukola bua Nzambi bivua bimupesha.

18 Mpindiewu Amona muikala kapita munkatshi muabu, anyi muikala ubakuatshisha, ne wakabashiya, kunyima kua mumana kubabenesha bilondeshila ku midimu yabu mishilangana, mumana kubayisha dîyi dia Nzambi, anyi kubakuatshisha kumpala kua kuya kuenda; ne nanku bakenza ngendu yabu mishilangana mu bulaba bonsu.

19 Ne Amona wakaya ku bulaba bua Yishemaela, bulaba buvua bubikidibua mu dîna dia bana ba baluma ba Yishemaela, bakalua pabu Bena Lamana.

20 Ne pakabuela Amona mu bulaba bua Yishemaela, Bena Lamana bakamukuata ne bakamusuika, bu muvua tshibidilu tshiabu tshia kusuika Bena Nefi bonsu bavua bapona mu bianza biabu, ne kulua nabu kumpala kua mfumu; ne bivua nanku ku disua dia mfumu bua kubashipa, anyi bua kubalama mu bukuatshibu, anyi bua kubela mu buloko, anyi bua kubipata mu bulaba buenda, bilondeshila ku disua ne disanka dienda.

21 Ne bakaya ne Amona nanku kumpala kua mfumu uvua ku mutu kua bulaba bua Yishemaela; ne dîna dienda divua Lamoni; ne uvua kankanunuina ka Yishemaela.

22 Ne mfumu wakebeja dijinga dienda nedivua dia kusomba mu bulaba munkatshi mua Bena Lamana, anyi munkatshi mua bantu benda.

23 Ne Amona wakamuambila ne: Eyowa, ndi njinga kusomba munkatshi mua bantu aba bua mutantshi wa diba mukesa; eyowa, ne pamuapa tô ne dituku dingafua.

24 Ne biakalua ne mfumu Lamoni bikola ne Amona, ne wakasuluisha mionji yenda; ne wakasua ne Amona angata umua wa ku bana benda ba bakaji bu mukaji wenda.

25 Kadi Amona wakamuambila ne: To, kadi nengikala musadidi weba. Bua nanku Amona wakalua musadidi wa mfumu Lamoni. Ne biakalua ne bakamuteka munkatshi mua basadidi bakuabu bua kulama bisumbu bia bimuna bia Lamoni, bilondeshila ku tshibidilu tshia Bena Lamana.

26 Ne kunyima kua pavuaye muikala matuku asatu ku disadila dia mfumu, pavuaye muikala ne basadidi bakavua balua Bena Lamana baya ne bisumbu bia bimuna biabu ku muaba wa mâyi, uvua ubikidibua ne mâyi a Sebuse, ne Bena Lamana bonsu badi basaka bisumbu bia bimuna biabu koku, bua binua mâyi—

27 Bua nanku, pavua Amona ne basadidi ba mfumu basaka bisumbu bia bimuna biabu ku muaba wa mâyi ewu, monayi, bungi kampanda bua Bena Lamana, bakavua ne bisumbu bia bimuna biabu ku mâyi, bakimana ne bakatangalaja bisumbu bia bimuna bia Amona ne basadidi ba mfumu, ne bakabitangalaja mua ne biakanyema ku nseka ya bungi.

28 Mpindiewu basadidi ba mfumu bakabanga kunungana, bamba ne: Mpindiewu mfumu neatushipa, bu muvuaye mushipa bana betu bualu bisumbu bia bimuna biabu biakatangalajibua kudi bubi bua bantu aba. Ne bakabanga kudila bikola, bamba ne: Monayi, bimuna bietu bikadi bisumbu bia bimana kutangalaka.

29 Mpindiewu bakadila bua bôwa bua kushipibua. Mpindiewu pakamona Amona nanku mutshima wenda wakuwula munda muenda ne disanka; bualu, wakamba ne, nendeja basadidi nanyi aba bukola buanyi, anyi bukola budi munda muanyi, mu dipinguluja dia bisumbu bia bimuna ebi kudi mfumu, bua mema kupeta mitshima ya basadidi nanyi aba, bua kubasaka bua kuitabuija mêyi anyi.

30 Ne mpindiewu, â avua meji a Amona, pakamonaye ntatu ya bavuaye ubikila bana babu.

31 Ne biakalua ne wakababomba ne mêyi enda, wamba ne: Bana betu, sangalayi ne tuyayi mu dikeba dia bisumbu bia bimuna, ne netubisangisha pamua ne netubipingaja ku muaba wa mâyi; ne nanku netukuba bisumbu bia bimuna bua mfumu ne kakutushipa to.

32 Ne biakalua ne bakaya mu dikeba dia bisumbu bia bimuna, ne bakalonda Amona, ne bakaya lukasa ne lubilu lukola ne bakimanyika bisumbu bia bimuna bia mfumu, ne bakabisangisha pamua kabidi ku muaba wa mâyi.

33 Ne bantu abu bakimana kabidi bua kutangalaja bisumbu bia bimuna biabu; kadi Amona wakambila bana babu ne: Nyungululayi bisumbu bia bimuna bua kabinyemi to; ne ndi nya ne kukokangana ne bantu aba badi batangalaja bisumbu bia bimuna bietu.

34 Bua nanku, bakenza bu muakabambila Amona, ne wakasemena ne wakimana bua kukokangana ne bavua bimana pabuipi ne mâyi a Sebuse; ne kabavua bungi bukesa to.

35 Bua nanku kabakatshina Amona to, bualu bakatshinka ne umua wa ku bantu babu uvua mua kumushipa bilondeshila ku dijinga diabu, bualu kabavua bamanya ne Mukalenga uvua mulaya Mosiya ne neapatuisha bana benda mu bianza biabu to; anyi kabavua bamanya tshintu nansha tshimua bitangila Mukalenga to; bua nanku bavua basanka mu dinyanguka dia bana babu; ne bua tshiena bualu etshi bavua bimana bua kutangalaja bisumbu bia bimuna bia mfumu.

36 Kadi Amona wakasemena ne wakabanga kubâsa mabua ne tshieledi tshienda; eyowa, wakâsa mabua munkatshi muabu ne makanda a bungi; ne nanku wakashipa bungi kampanda buabu mua ne bakabanga kukema bukola buenda; nansha nanku bakafîka tshiji bua bana babu bavuaye mushipa, ne bakapangadika ne uvua ne bua kupona; bua nanku, bakalua ne bibonga bua kumushipa, bualu bakamona ne kabavua mua kumutûta ne mabua abu to.

37 Kadi monayi, muntu yonsu wakajula tshibonga tshienda bua kumutûta, Amona wakamukosa maboku enda ne muela wenda wa mvita; bualu wakakandamena mitûtu yabu mu dibakosa maboku ne menu a muela wenda wa mvita, mua ne bakabanga kukema, ne bakabanga kunyema kumpala kuenda; eyowa, ne kabavua bungi bukesa to; ne wakabanyemesha ne makanda a diboku dienda.

38 Mpindiewu basambombo babu bakapona ku tshieledi, kadi kakashipa nansha umua ku muela wenda wa mvita to, pa kumbusha amu mulombodi wabu; ne wakakosa maboku onsu avua majula bua kumutûta, ne ka’avua bungi bukesa to.

39 Ne pakabipataye kula, wakapingana ne bakanuisha bisumbu bia bimuna biabu mâyi ne bakabipingaja mu mashinda a mfumu, ne bakabuela kumvua mfumu, bambula maboku avua Amona mukosa ne muela wenda wa mvita, a bavua bakeba bua kumushipa; ne bakalua nawu kudi mfumu bu tshijadikilu tshia bintu bivuabu benza.