1 Ne biakalua ne mfumu Lamoni wakasemeja basadidi benda ne wakabenzeja bua bajadika bintu bionsu bivuabu bamona bitangila bualu ebu.

2 Ne pavuabu bonsu bajadikabu bitangila bintu bionsu bivuabu bamona, ne pavuaye mumvua bua lulamatu lua Amona mu dikuba bisumbu bia bimuna bienda, ne kabidi bukola buenda bua bungi bua kukokangana ne bavua bakeba bua kumushipa, wakakema bikola, ne wakamba ne: Bushuwa, ewu udi mupita muntu. Monayi, ewu kena Nyuma Munena udi utumina bantu aba manyoka manena, bua mashipa abu a bantu anyi?

3 Ne bakandamuna mfumu, ne bakamba ne: Ne Nyuma Munena anyi muntu, katuena bamanya to; kadi tshitudi bamanya tshidi ne bena lukuna ba mfumu kabena mua kumushipa to; anyi kabena mua kutangalaja bisumbu bia bimuna bia mfumu padiye netu to, bua bupiluka buenda ne makanda enda a bungi; bua nanku, tudi bamanya ne udi mulunda wa mfumu. Ne mpindiewu, Ô mfumu, katuena tuitabuija ne muntu udi mua kuikala ne bukola bua bungi bua buena ebu to, bualu tudi bamanya ne kabena mua kumushipa to.

4 Ne mpindiewu, pakumvua mfumu mêyi â, wakabambila ne: Mpindiewu ndi mumanya ne nyuma Munena; ne mmupueka panshi diba edi bua kupandisha mitshima yenu, bua ntshinushipi bu mumvua mushipa bana benu to. Mpindiewu ewu nyuma Munena uvua batatuetu bamba.

5 Mpindiewu etshi tshivua ngikadilu wa Lamoni, uvuaye muangata kudi tatuenda, ne kuvua Nyuma Munena. Nansha bu muvuabu bitabuija Nyuma Munena, bavua batshinka ne bionsu bivuabu benza bivua biakana; nansha nanku, Lamoni wakabanga kutshina menamena, ne bôwa ne uvua muenza bibi bua dishipa basadidi benda;

6 Bualu uvua mushipa ba bungi babu bualu bana babu bavua batangalaja bisumbu bia bimuna biabu ku muaba wa mâyi; ne nanku, wakabashipa bualu bavua batangalajija bisumbu bia bimuna biabu.

7 Mpindiewu tshivua ngenzelu wa Bena Lamana bua kuimana pabuipi ne ku mâyi a Sebuse bua kutangalaja bisumbu bia bimuna bia bantu, nanku bua banyemesha ya bungi ivua mitangalaka batangila ku bulaba buabu, bualu tshivua ngenzelu wabu wa kupawula bintu bia benda munkatshi muabu.

8 Ne biakalua ne mfumu Lamoni wakebeja basadidi benda, wamba ne: Muntu ewu udi ne bukola bua bungi nanku udi penyi?

9 Ne bakamuambila ne: Mona, udi udisha tubalu tueba. Mpindiewu, kumpala kua diba dia kunuisha bisumbu bia bimuna biabu, mfumu uvua mupesha basadidi benda mukenji ne balongolola tubalu tuenda ne makalu enda, ne baya nenda ku bulaba bua Nefi; bualu tatuenda wa Lamoni, uvua mfumu ku mutu kua bulaba bonsu, uvua mupangadika didia dinena dia disanka ku bulaba bua Nefi.

10 Mpindiewu pakumvua mfumu Lamoni Amona uvua ulongolola tubalu tuenda ne makalu enda wakakema kupita, bua lulamatu lua Amona, wamba: Bushuwa kakutu kuanji kuikala musadidi nansha umua munkatshi mua basadidi banyi bonsu uvua muikala mutumikidi bu mudi muntu ewu to; bualu udi uvuluka mena mikenji yanyi yonsu bua kuyenzela.

11 Mpindiewu ndi mumanya bushuwa ne udi Nyuma Munena, ne ndi njinga ne alua kundi, kadi nstshiakakima to.

12 Ne biakalua ne pakalongolola Amona tubalu ne makalu bua mfumu ne basadidi benda, wakabuela kumvua mfumu, ne wakamona ne mpala wa mfumu uvua mushintuluka; bua nanku uvua pabuipi ne kumbuka kumpala kuenda.

13 Ne umua wa ku basadidi ba mfumu wakamuambila ne, Rabana, tshidi mu diandamuna dia miakulu tshiamba ne mfumu wa bukola anyi munena, bualu bavua bamona ba mfumu babu bu bantu ba bukola bua bungi; ne nanku wakamuambila ne: Rabana, mfumu udi ujinga ne ushala.

14 Bua nanku Amona wakakudimuka kudi mfumu, ne wakamuambila ne: Ô mfumu, udi musua ne nkuenzela tshinyi? Ne mfumu kakamuandamuna to bua mutantshi wa diba dimua, bilondeshila ku diba diabu, bualu kavua mumanya tshivuaye ne bua kumuambila to.

15 Ne biakalua ne Amona wakamuambila kabidi ne: Udi ujinga tshinyi kundi? Kadi mfumu kakamuandamuna to.

16 Ne biakalua ne Amona, bualu uvua muwula ne Nyuma wa Nzambi, bua nanku wakamona meji a mfumu. Ne wakamuambila ne: bualu udi mumvua ne mvua muluangena basadidi beba ne bisumbu bia bimuna bieba, ne mvua mushipa bantu muanda muteketa ba ku bana babu ne tshieledi ne ne muela wa mvita, ne mvua mukosa maboku a bakuabu, bua kusungidila bisumbu bia bimuna bieba ne basadidi beba; mona, ki tshidi tshikukemesha anyi?

17 Ndi nkuambila ne, ntshinyi tshidi tshikukemesha bikola nanku? Mona, ndi muntu, ne ndi musadidi weba; bua nanku, nengenza tshionsu tshiwudi ujinga tshidi tshiakana.

18 Mpindiewu pakumvua mfumu mêyi â, wakakema kabidi, bualu wakamona ne Amona uvua mua kujingulula meji enda; kadi nansha muvuabi nanku, mfumu Lamoni wakunzulula mukana muenda, ne wakamuambila ne: Udi nganyi? Udi Nyuma Munena, udi mumanya bintu bionsu anyi?

19 Amona wakamuandamuna ne wakamuambila ne: Ntshiena Nyuma Munena to.

20 Ne mfumu wakamba ne: Munyi muwudi mumanya meji a mutshima wanyi? Udi mua kuakula ne dikima, ne kungambila bitangila bintu ebi; ne kabidi kungambila bukola kayi buvua mushipa nabu bana betu bavua batangalaja bisumbu bia bimuna bianyi ne mukosa maboku abu—

21 Ne mpindiewu, pawangambila bitangila bintu ebi, nenkupesha tshionsu tshiwudi ujinga; ne bu biobi bikengedibua, nenkulama ne misumba yanyi ya basalayi; kadi ndi mumanya ne udi ne bukola bua bungi kupita bonsu buayi; nansha nanku, nenkupesha bionsu biwudi ujinga kundi.

22 Mpindiewu bualu Amona uvua ne mutalama, kadi kayi bua kuenzela muntu bibi to, wakambila Lamoni ne: Ne uteleja mêyi anyi, bu mema mukuambila bukola kayi bundi ngenza nabu bintu ebi anyi? Ne etshi ki tshindi njinga kuwudi.

23 Ne mfumu wakamuandamuna, ne wakamba ne: Eyowa nengitabuija mêyi eba onsu. Ne nanku wakakuatshibua ne budimu.

24 Ne Amona wakabanga kuakula kudiye ne dikima, ne wakamuambila ne: Udi witabuija ne kudi Nzambi anyi?

25 Ne wakandamuna, ne wakamuambila ne: Ntshiena mumanya tshiditshi tshiumvuija to.

26 Ne pashisha Amona wakamba ne: Udi witabuija ne kudi Nyuma Munena anyi?

27 Ne wakamba ne: Eyowa.

28 Ne Amona wakamba ne: ki Nzambi awu. Ne Amona wakamuambila kabidi ne: Udi witabuija ne Nyuma Munena ewu, udi muikala Nzambi, wakafuka bintu bionsu bidi mu diûlu ne pa buloba anyi?

29 Ne wakamba ne: Eyowa, ndi ngitabuija ne wakafuka bintu bionsu bidi pa buloba; kadi ntshiena mumanya diûlu to.

30 Ne Amona wakamuambila ne: Diûlu didi muaba udi Nzambi usombela ne banjelu benda bansantu bonsu.

31 Ne mfumu Lamoni wakamba ne: Nkulu kua buloba anyi?

32 Ne Amona wakamba ne: Eyowa, ne udi utangidila bana ba bantu bonsu panshi; ne udi mumanya meji ne majinga onsu a mutshima; bualu nku tshianza tshienda bivua bionsu bifukibua kumbukila ku mbangilu.

33 Ne mfumu Lamoni wakamba ne: Ndi ngitabuija bintu bionsu ebi biwudi muamba. Udi mutumibua kudi Nzambi anyi?

34 Amona wakamuambila ne: Ndi muntu; ne muntu ku mbangilu uvua mufukibua ku tshimfuanyi tshia Nzambi, ne ndi mubikidibua Nyuma wenda wa Tshijila bua kulongesha bintu ebi kudi bantu aba, bua kufikishibuabu ku dimanya dia tshidi tshiakana ne tshilelela;

35 Ne tshitupa tshia ndambu wa Nyuma ewu udi munda muanyi, udi umpesha dimanya, ne kabidi bukola, bilondeshila ku ditabuija dianyi ne majinga anyi adi a kudi Nzambi.

36 Mpindiewu pakamba Amona mêyi â, wakabangila katshia ku bufuki bua buloba, ne kabidi bufuki bua Adama, ne wakamuambila bintu bionsu bidi bitangila dipona dia muntu, ne wakamulondela ne wakamuleja miandiku ne mifundu ya tshijila ya bantu, ivua miambibua kudi bambi, tô ne ku tshikondu tshiakumbuka tatuabu, Lehi, ku Yelushalema.

37 Ne wakabalondela kabidi (bualu bivua bilondeshila muvua mfumu ne basadidi benda basua) ngendu yonsu ya batatuabu mu tshipela, ne makenga abu onsu akapetakanabu nawu bua nzala ne nyota, ne mudimu wabu mukola, ne makuabu onsu avua kâyi ajika to.

38 Ne wakabalondela kabidi buntombonji bua Lamana ne Lemuele, ne bana ba Yishemaela, eyowa, wakabalondela buntombonji buabu bonsu; ne wakabumvuija miandiku ne mifundu yonsu katshia ku tshikondu tshiakumbuka Lehi ku Yelushalema tô ne ku tshikondu etshi.

39 Kadi ebi ki mbionsu to; bualu wakabumvuija dilongolola dia disungila, divua dilongolodibua kumbukila ku tshishimikidi tshia buloba; ne wakabamanyisha kabidi bitangila dilua dia Kilisto, ne wakabamanyisha midimu yonsu ya Mukalenga.

40 Ne biakalua ne kunyima kua kuambaye bintu bionsu ebi, ne kubiumvuija mfumu, ne mfumu wakitabuija mêyi enda onsu.

41 Ne wakabanga kuela lubila kudi Mukalenga, wamba ne: Ô Mukalenga, fua lusa; bilondeshila ku lusa lueba lua bungi luwuvua nalu kudi bantu ba Nefi, ngumvuila lusa, mema, ne bantu banyi.

42 Ne mpindiewu, pakambaye nanku, wakapona pa buloba, bu uvua mufua.

43 Ne biakalua ne basadidi benda bakamuangata ne bakaya nenda kudi mukaji wenda, ne bakamuladika pa bulalu; ne wakashala bu ne uvua mufua bua mutantshi wa matuku abidi ne butuku bubidi; ne mukaji wenda, ne bana benda ba baluma, ne bana benda ba bakaji bakamudila, ku mushindu wa Bena Lamana, badilakana bikola bua dijimina dienda.