1 Ne biakalua ne pakamanabu kushikika ekelezia mu bulaba ebu, mfumu Lamoni wakajinga Amona aya nenda ku bulaba bua Nefi, bua kumulejaye kudi tatuenda.

2 Ne dîyi dia Mukalenga diakalua kudi Amona, diamba ne: Kuakubanda ku bulaba bua Nefi to, bualu mona, mfumu neakeba bua kukushipa; kadi neuya ku bulaba bua Midoni; bualu mona, muanenu Alona, ne Muloki kabidi ne Ama badi mu buloko.

3 Mpindiewu biakalua ne pakumvua Amona nanku awu, wakambila Lamoni ne: Mona, muanetu wa baluma ne bana betu badi mu buloko mu Midoni, ne ndi nya bua kubapatuisha.

4 Mpindiewu Lamoni wakambila Amona ne: Ndi mumanya ne ku bukola bua Mukalenga udi mua kuenza bintu bionsu. Kadi mona, nenya neba ku bulaba bua Midoni; bualu mfumu wa ku bulaba bua Midoni, muena dîna ne Antiomono, udi mulunda wanyi; bua nanku ndi nya ku bulaba bua Midoni, bua mema kubomba mfumu wa bulaba, ne neapatula bana benu mu buloko. Mpindiewu Lamoni wakamuambila ne: Nganyi wakuambidi ne bana benu badi mu buloko?

5 Ne Amona wakamuambila ne: Muntu nansha umua kena mungambila to, amu pa kumbusha Nzambi; ne uvua mungambila ne—Ndâku ne patuisha bana benu, bualu badi mu buloko mu bulaba bua Midoni.

6 Mpindiewu pakumvua Lamoni nanku awu, wakenzeja ne basadidi benda balongolola tubalu tuenda ne makalu enda.

7 Ne wakambila Amona ne: Luaku, nempueka neba ku bulaba bua Midoni, ne aku nensengelela mfumu bua apatula bana benu mu buloko.

8 Ne biakalua ne pavua Amona ne Lamoni benza luendu koku, bakasambakena ne tatuenda wa Lamoni, uvua mfumu ku mutu kua bulaba bonsu.

9 Ne monayi, tatuenda wa Lamoni wakamuambila ne: Bua tshinyi kuvua mulua ku biakudia binena mu dituku dinena adi pamvua mulongoluela bana banyi ba baluma, ne bua bantu banyi biakudia binena to?

10 Ne wakamba kabidi ne: Udi uya penyi ne Muena Nefi ewu, udi muikala umua wa ku bana ba muena mafi?

11 Ne biakalua ne Lamoni wakamuambila kuvuaye uya, bualu uvua utshina bua kumufîkisha tshiji.

12 Ne wakamuambila kabidi tshiena bualu tshionsu tshivua tshimushadisha mu bukalenga buenda, bua ne kavua muya kudi tatuenda bua bidia binena bivuaye mulongolola to.

13 Ne mpindiewu pakamulondela Lamoni bintu bionsu ebi, monayi, wakakema, pakumona ne tatuenda wakamufîkila tshiji, ne wakamba ne: Lamoni, udi uya kupatuisha Bena Nefi aba, badi bikala bana ba muena mafi. Mona, wakanyenga bintu kudi batatuetu; ne mpindiewu bana benda badi pabu balua munkatshi muetu bua ne, ku budimu buabu ne mafi dishima diabu, batudinga, bua ne bobu pabu batunyenga bintu bietu.

14 Mpindiewu tatuenda wa Lamoni wakamupesha mukenji ne ashipa Amona ku muela wa mvita. Ne wakamupesha mukenji kabidi ne kayi ku bulaba bua Midoni to, kadi ne apingana nenda ku bulaba bua Yishemaela.

15 Kadi Lamoni wakamuambila ne: Ntshiakushipa Amona to, anyi ntshiakupingana ku bulaba bua Yishemaela nansha, kadi ndi nya ku bulaba bua Midoni bua kulekelesha bana babu ne Amona, bualu ndi mumanya ne badi bantu bakana ne bambi bansantu ba Nzambi mulelela.

16 Mpindiewu pakumvua tatuenda mêyi â, wakamufîkila tshiji, ne wakatula muela wenda wa mvita bua kumutûtaye panshi.

17 Kadi Amona wakasemena ne wakamuambila ne: Mona, kushipi muaneba to; nansha nanku, bidi bimpa kupita bua yeya kupona pamutu peba, bualu mona, udi mukudimuna mutshima ku mibi yenda; kadi bu wewa mufua diba edi, ne tshiji tshieba, anyima weba kena mua kupandishibua to.

18 Ne kabidi, bidi bikengedibua ne ulekela; bualu bu wewa mushipa muaneba, bualu kena ne bualu to, mashi enda neabila ku buloba kudi Mukalenga, Nzambi wenda, bua disombuela dilua pa mutu peba: ne pamuapa neujimija anyima weba.

19 Mpindiewu pakamuambila Amona mêyi â, wakamuandamuna, wamba ne: Ndi mumanya ne mema mushipa muananyi, ne ndi mmatshisha mashi adi kâyi ne bualu to; bualu wewa ki udi mukeba bua kumufuisha.

20 Ne wakôlola tshianza tshienda bua kushipa Amona. Kadi Amona wakakandamena mitûtu yenda ne wakamutûta kabidi pa diboku ne kavua kabidi mua kudienzela to.

21 Mpindiewu pakamona mfumu Amona uvua mua kumushipa, wakabanga kusengelela Amona bua kuepelesha moyo wenda.

22 Kadi Amona wakajula muela wenda wa mvita, ne wakamuambila ne: Mona, nenkutûta pa kumbusha wewa munganyishila ne bana betu bapatudibua mu buloko.

23 Mpindiewu mfumu, bualu uvua utshina bua kujimija moyo wenda, wakamba ne: Wewa mungepelesha, nenkupesha tshionsu tshiwalomba, nansha tô ne ku tshia bibidi tshia bukalenga buanyi.

24 Mpindiewu pakamona Amona ne uvua muenzeja mfumu mununu bilondeshila ku dijinga dienda, wakamuambila ne: Wewa muanyisha ne bana betu bapatudibua mu buloko, ne kabidi ne Lamoni alama bukalenga buenda, ne kuikadi nenda bibi to, kadi wanyisha ne enza bilondeshila ku majinga enda bitangila tshionsu tshidiye wela meji, apu nenkuepelesha; tshianana nenkutûta panshi.

25 Mpindiewu pakamba Amona mêyi â, mfumu wakabanga kusanka bua moyo wenda.

26 Ne pakamonaye ne Amona kavua ne dijinga dia kumushipa to, ne pakamonaye kabidi dinanga dinena divuaye nadi bua muanenda Lamoni, wakakema menamena, ne wakamba ne: Bualu ebi ki bionsu biwudi mujinga, ne ndekela bana benu, ne nganyisha muananyi wa baluma Lamoni alama bukalenga buenda, mona, nenkuanyishila ne muananyi alama bukalenga buenda kubangila diba edi ne bua kashidi; ne ne tshiakumukôkesha kabidi nansha—

27 Ne nenkuanyishila kabidi ne bana benu bapatudibua mu buloko, ne wewa ne bana benu nulua kundi, mu bukalenga buanyi; bualu nengikala ne dijinga dikola dia kukumona. Bualu mfumu uvua mukema bikola bua mêyi avuaye muakula, ne kabidi bua mêyi avua muanenda wa baluma, Lamoni, muakula, bua nanku uvua ujinga kuyilonga.

28 Ne biakalua ne Amona ne Lamoni bakatungunuka ne luendu luabu ku bulaba bua Midoni. Ne Lamoni wakasuibua ku mesu a mfumu wa mu bulaba; bua nanku bakapatula bana babu ne Amona mu buloko.

29 Ne pakabamona Amona wakanyingalala menamena, bualu monayi bavua butaka, ne makoba abu avua mûvuluka menamena bualu bavua babasuika ne mionji mikola. Ne bavua bafua ne nzala, nyota, ne mishindu yonsu ya ntatu; nansha nanku bavua bena ditukija mu makenga abu onsu.

30 Ne, bu muakenzekabi, tshivua wabu mpukapuka muakaponabu mu bianza bia bantu bapapa bikola ne ba nshingu mîminyina; bua nanku bakabenga kuteleja mêyi abu, ne bakabipata, ne bakatûta, ne bakabalondakaja ku nzubu ne nzubu, ne ku muaba ne ku muaba, tô ne muakafikabu ku bulaba bua Midoni; ne aku bakabakuata ne bakabela mu buloko, ne bakabasuika ne mionji mikola, ne bakabalama matuku a bungi mu buloko, ne bakapatuishibua kudi Lamoni ne Amona.