1 Monayi, biakalua ne mfumu wa Bena Lamana wakatuma dimanyisha munkatshi mua bantu benda bonsu, ne kabatu Amona bianza to, anyi Alona, anyi Omenele, anyi Himini, anyi nansha umua wa ku bana babu bâya bua kuyisha dîyi dia Nzambi to, mu muaba onsu wikalabu, mu tshitupa tshionsu tshia bulaba buabu.

2 Eyowa, wakatuma mukenji muela munkatshi muabu, ne kababatu bianza biabu bua kubasuika to, anyi bua kubela mu buloko to; anyi kababatuidi mata to, anyi kababatûtshi to, anyi kababipatshi mu nsunagoga yabu to, anyi kababakumi mfimbu to; anyi kababâshi mabua to, kadi ne njila wa ku nzubu yabu, ne kabidi ku ntempelo yabu, ne ku bitendelelu biabu ikala munzuluka.

3 Ne nanku baya ne bayisha dîyi bilondeshila ku majinga abu, bualu mfumu uvua mukudimuna moyo kudi Mukalenga, ne nzubu wenda mujima; bua nanku wakatuma dimanyisha dienda mu bulaba bonsu kudi bantu benda, bua dîyi dia Nzambi kadipetshi dipumbisha to, kadi bua diya mu bulaba bonsu, ne bantu benda bitabujijibua bitangila ngikadilu mibi ya batatuabu, ne bitabujijibua ne bavua bonsu bana ba muntu, ne kabena bua kushipa bantu to, anyi kupawula to, anyi kuiba to, anyi kuenda masandi to, anyi kuenza mushindu nansha umua wa bubi to.

4 Ne mpindiewu biakalua ne pakatuma mfumu dimanyisha edi, ne Alona ne bana babu bakaya ku tshimenga ne ku tshimenga, ne ku nzubu wa ditendelela umua ne ku mukuabu, bashikika ma’ekelezia, ne bajidila bakuidi ne balongeshi mu bulaba bonsu munkatshi mua Bena Lamana, bua kuyisha ne kulongesha dîyi dia Nzambi munkatshi muabu; ne nanku bakabanga kupeta tshipeta tshinena.

5 Ne bakaluisha binunu bia bantu ku dimanya dia Mukalenga, eyowa, bakaluisha binunu bia bantu ku ditabuija ngikadilu ya Bena Nefi; ne bakabalongesha miandiku ne mambi avuabu babashila mena tô ne ku tshikondu etshi.

6 Ne bushuwa bu mudi Mukalenga ne moyo, bushuwa mena bonsu bakitabuija, anyi bonsu bakaluishibua ku dimanya dia bulelela, ku diyisha dia Amona ne bana babu, bilondeshila ku nyuma wa dibuluila ne wa buambi, ne bukola bua Nzambi buenza bishima ku njila wabu—eyowa, ndi nnuambila ne, bu mudi Mukalenga ne moyo, bonsu ba ku Bena Lamana bakitabuija diyisha diabu, ne bakakudimuna moyo kudi Mukalenga, kabakapambuka nansha.

7 Bualu bakalua bantu bakana; bakateka biluilu bia buntomboji buabu panshi, bualu kabakaluisha kabidi Nzambi to, anyi nansha umua wa ku bana babu to.

8 Mpindiewu, aba ki bavua bakudimuna moyo kudi Mukalenga:

9 Bantu ba Bena Lamana bavua mu bulaba bua Yishemaela;

10 Ne kabidi bamua ba ku bantu ba Bena Lamana bavua mu bulaba bua Midoni;

11 Ne kabidi bamua ba ku bantu ba Bena Lamana bavua mu tshimenga tshia Nefi;

12 Ne kabidi bamua ba ku bantu ba Bena Lamana bavua mu bulaba bua Shiloma, ne bavua mu bulaba bua Shemelona, ne mu tshimenga tshia Lemuele, ne mu tshimenga tshia Shiminiloma.

13 Ne â ki mêna a bimenga bia Bena Lamana bivua bikudimuna moyo kudi Mukalenga; ne ebi ki bobu bakateka panshi biluilu bia mvita bia buntomboji buabu, eyowa, biluilu biabu bia mvita biabu bionsu; ne bavua bikala bonsu Bena Lamana.

14 Ne Bena Amaleki kabavua bakudimuna moyo to, amu umua: anyi muntu nansha umua wa Bena Amulona; kadi bakapapisha mitshima yabu, ne kabidi mitshima ya Bena Lamana mu tshitupa tshia bulaba konsu kuvuabu basomba, eyowa, ne misoku yabu yonsu ne bimenga biabu bionsu.

15 Bua nanku, tuatêdi bimenga bia Bena Lamana mua kakudimunabu mutshima ne muakaluabu ku dimanya dia bulelela, ne kukudimuna moyo.

16 Ne mpindiewu biakalua ne mfumu ne bavua bakudimuna moyo wabu bakajinga kuikala ne dîna, bua kudidi babasungulula ku bana babu; bua nanku mfumu wakebeja Alona ne ba bungi ba ku bakuidi babu, bitangila dîna diangatabu pa mutu pabu, bua basunguludibua.

17 Ne biakalua ne bakadibikila dîna ne Bena Anti-Nefi-Lehi; ne bakababikila mu dîna edi ne kabavua kabidi bababikila ne Bena Lamana to.

18 Ne bakabanga kuikala bantu benji ba mudimu bikola; eyowa, ne bavua ne kalolu kudi Bena Nefi; bua nanku, bakabanga diumvuangana nabu, ne mutshipu wa Nzambi kawakabalonda kabidinansha.