1 Ne biakalua ne ku ntuadijilu wa tshidimu tshitanu tshia dikôkesha diabu dikokangana diakabanga kuikala munkatshi mua bantu; bualu muntu kampanda, uvua ubikidibua ne Amelisi, ne uvua muntu wa budimu menamena, eyowa, muntu wa lungenyi bu ku lungenyi lua ba pa buloba, ne uvua wa ku mulongu wa muntu wakashipa Gideona ku muela wa mvita, wakashipabu bilondeshila ku mikenji—

2 Mpindiewu Amelisi ewu, ku budimu buenda, uvua mukoka bantu ba bungi panyima penda; ba bungi mena ne bakabanga kuikala ne bukola bupita; ne bakabanga kukeba bua kushikika Amelisi bua kuikalaye mfumu pa mutu pa bantu.

3 Mpindiewu etshi tshiakatuala bôwa kudi bantu ba mu ekelezia, ne kabidi kudi bonsu bavua kabayi bakokibua ku disuisha dia Amelisi to; bualu bavua bamanya ne bilondeshila ku mikenji yabu bintu bia nanku bivua ne tshia kushikikibua ku dîyi dia bantu.

4 Bua nanku, bu biobi bikala bikumbana bua Amelisi apeta dîyi dia bantu, yeya, bualu uvua muntu mubi, uvua kubapala manema abu ne diakalengela diabu bia mu ekelezia; bualu kipatshila kenda kavua ka kunyangakaja ekelezia wa Nzambi.

5 Ne biakalua ne bantu bakadisangisha pamua mu bulaba bonsu, muntu yonsu bilondeshila ku meji enda, ne divua dia kulonda Amelisi anyi dia kumubenga, mu bisumbu bia bantu bitapulukangana, ne bavua ne ditandangana divula ne makokangana a dikema kudi muntu ne mukuabu.

6 Ne ki muakadisangishabu pamua nanku bua kufilabu mêyi abu bitangila muanda ewu; ne bakâteka kumpala kua balumbuluishi.

7 Ne biakalua ne dîyi dia bantu diakabenga Amelisi, ne kabakamuteka mfumu wa bantu to.

8 Mpindiewu biakafila disanka dia bungi mu mitshima ya bavua bamubenga; kadi Amelisi wakasonsola bavua basanka nenda ku tshiji tshia bavua kabayi basanka nenda to.

9 Ne biakalua ne bakadisangisha pamua, ne bakajidila Amelisi bua kuikalaye mfumu wabu.

10 Mpindiewu pakatekabu Amelisi mfumu pa mutu pabu, wakabelela mukenji ne bambula biluilu bua kuluishabu bana babu; ne wakenza nanku bua kubatekaye ku bukôkeshi buenda.

11 Mpindiewu bantu ba Amelisi bavua basunguludibua bua dîna dia Amelisi, ne bavua bababikila ne Bena Amelisi; ne bavua bashala bavua bababikila ne Bena Nefi, anyi bantu ba Nzambi.

12 Bua nanku bantu ba Bena Nefi bavua bamanya kipatshila ka Bena Amelisi, ne bua nanku bakadilongolola bua kutuilangana nabu; eyowa, bavua badipaya ne miela ya mvita, ne ne tuela tua mvita, ne ne mata, ne ne miketa, ne ne mabua, ne ne bieledi, ne ne biluilu bia mvita bia mushindu onsu.

13 Ne ki mua kadilongololabu nanku bua kutuilanganabu ne Bena Amelisi diba dia dilua diabu. Ne kuvua tupita, ne tupita tubandila, ne tupita tunena tuvua tusungudibua, bilondeshila ku bungi buabu.

14 Ne biakalua ne Amelisi wakapaya bantu benda ne mishindu yonsu ya biluilu bia mvita bia bujitu bonsu; ne bakasungula kabidi bakôkeshi ne balombodi pa bantu benda, bua kubalombola ku mvita kudi bana babu.

15 Ne biakalua ne Bena Amelisi bakabanda pa kakuna ka Aminihu, kavua ku esete kua musulu wa Sidona, uvua upitshila pabuipi ne bulaba bua Zalahemela, ne bakabangila kuluanganyinapu mvita ne Bena Nefi.

16 Mpindiewu Alama, bualu uvua mulumbuluishi munena ne ngovena wa bantu ba Nefi, bua nanku wakabanda ne bantu benda, eyowa, ne tupita tuenda, ne tupita tunena, eyowa, ku mutu kua misumba yenda ya basalayi, kuluisha Bena Amelisi mvita.

17 Ne bakabanga kushipa Bena Amelisi pa kakuna ka ku esete kua Sidona. Ne Bena Amelisi bakakokangana ne Bena Nefi ne makanda a bungi, mua ne ba bungi ba ku Bena Nefi bakapona kumpala kua Bena Amelisi.

18 Nansha nanku Mukalenga wakakolesha tshianza tshia Bena Nefi, mu mushindu ne bakashipa Bena Amelisi ne dishibeya dikola, mu mushindu ne bakabanga kunyema kumpala kuabu.

19 Ne biakalua ne Bena Nefi bakalondakaja Bena Amelisi dituku adi dijima, ne bakabashipa ne dishibeya dia bungi, mua ne kuvua bantu binunu dikumi ne bibidi ne nkama itanu ne makumi asatu ne babidi ba ku Bena Amelisi bavuabu bashipa; ne kuvua bantu binunu bisambombo ne nkama itanu ne makumi asambombo ne babidi ba ku Bena Nefi bavuabu bashipa.

20 Ne biakalua ne pavua Alama kayi mua kulondakaja kabidi Bena Amelisi to, wakashisha bantu benda ntenta yabu mu tshibanda tshia Gideona, tshibanda tshivua tshinyikila Gideona awu wakashipabu kudi Neholo ku tshianza tshienda ne muela wa mvita; ne Bena Nefi bakâsa ntenta yabu mu tshibanda etshi bua butuku.

21 Ne Alama wakatuma batentekedi bua kulondabu Bena Amelisi bavua bashala, bua kumanya bulongolodi buabu ne bifufu biabu, bua kumonaye mua kudilama kudibu, bua kukubaye bantu benda ku dibutuka.

22 Mpindiewu bavuaye mutuma bua kutentekela tshitudilu tshia Bena Amelisi bavua babikidibua ne Zelama, ne Amenolo, ne Manti, ne Limihele; ki bobu aba bakapatuka ne bantu babu bua kutentekela tshitudilu tshia Bena Amelisi.

23 Ne biakalua ne pakatshiabu bakapingana lubilu lukola ku tshitudilu tshia Bena Nefi, ne bavua bakema bikola, ne bôwa bukola buvua bubakuata, bamba ne:

24 Monayi, tuvua tulonda tshitudilu tshia Bena Amelisi, ne ku dikema dietu dinena, mu bulaba bua Minona, ku mutu kua bulaba bua Zalahemela, mu njila wa ku bulaba bua Nefi, tuakamona musumba munena wa Bena Lamana; ne monayi, Bena Amelisi bavua badisangisha kudibu;

25 Ne badi babunda bana betu mu bulaba ebu; ne badi banyema kumpala kuabu ne bisumbu bia bimuna biabu, ne bakaji babu, ne bana babu, balua batangila ku tshimenga tshietu; ne amu tuetu benza lukasa badi bangata tshimenga tshietu, ne batatuetu, ne bakaji betu, ne bana betu nebashipibua.

26 Ne biakalua ne bantu ba Nefi bakangata ntenta yabu, ne bakapatuka mu tshibanda tshia Gideona balua batangila ku tshimenga tshietu, tshidi tshimenga tshia Zalahemela.

27 Ne monayi, bu mudibu basabuka musulu wa Sidona, bena Lamana ne Bena Amelisi, bikala ba bungi, bu mudi lusenga lua mbuwa, babaluila bua kubashipa.

28 Nansha nanku, tshianza tshia Mukalenga tshivua tshikolesha Bena Nefi, muvuabu bamusambila ne bukitu bua abapatuisha ku bianza bia bena lukuna babu, bua nanku Mukalenga wakumvua mbila yabu, ne wakabakolesha, ne Bena Lamana ne Bena Amelisi bakapona kumpala kuabu.

29 Ne biakalua ne Alama wakaluangana ne Amelisi ne muela wa mvita, ku mpala ne mpala; ne bakakokangana ne bukitu, ewu ne mukuenda.

30 Ne biakalua ne Alama, muikala muntu wa Nzambi, muikala wenzejibua kudi ditabuija divula, wakabila, wamba: Ô Mukalenga, fua lusa ne epelesha moyo wanyi, bua ne ngikala tshiamu tshia mudimu mu bianza bieba bua kupandisha ne kukuba bantu aba.

31 Mpindiewu pavua Alama muamba mêyi â wakakokanga kabidi ne Amelisi; ne uvua mukoleshibua, mua ne wakashipa Amelisi ne muela wa mvita.

32 Ne wakakokangana ne mfumu wa Bena Lamana; kadi mfumu wa Bena Lamana wakanyema kumpala kua Alama ne wakatuma balami benda bua kukokangana ne Alama.

33 Kadi Alama, ne balami benda, wakakokangana ne balami ba mfumu wa Bena Lamana tô ne pa kamushibeyayi ne kubapingaja tshianyima.

34 Ne nanku wakakomba buloba, anyi muelelu wa musulu, uvua ku wesete wa musulu wa Sidona, usumbula bitalu bia Bena Lamana bavua bashipa mu mâyi a Sidona, nanku bua bantu benda bapeta kaba bua kusabuka ne kukokangana ne Bena Lamana ne Bena Amelisi ku luseka lua wesete lua musulu wa Sidona.

35 Ne biakalua ne pavuabu basabuka musulu wa Sidona Bena Lamana ne Bena Amelisi bakabanga kunyema kumpala kuabu, nansha muvuabu bapita bungi ne kabavua mua kubadibua.

36 Ne bakanyema kumpala kua Bena Nefi tshipela tshivua ku wesete ne ku node, kula kupita mikalu ya bulaba; ne Bena Nefi bakabalondakaja ne bukola buabu, ne bakabashipa.

37 Eyowa, bakasambakena ne Bena Nefi ku luseka lonsu, ne bakashipibua ne kunyemeshibua, tô ne pakatangaladibuabu ku wesete, ne ku node, tô ne pakafikabu tshipela, tshivua tshibikidibua ne Helemunta; ne tshivua tshitupa tshia tshipela atshi tshivua ne nyama ya muitu ne ya lonji.

38 Ne biakalua ne ba bungi bakafua mu tshipela bua mputa yabu, ne nyama ayi ne kabidi mikanku ya mûlu yakabakusula; ne bantu bakasangana mifuba yabu ne bakayiwuja mushiki pa buloba.