1 აჰა, ახლა იყო ასე, მას შემდეგ, რაც ამონის ხალხი დამკვიდრდა იერშონის მიწაზე, დიახ, ასევე მას შემდეგ, რაც ლამანიელები განდევნეს ამ მიწიდან და მათი დახოცილები დამარხა ამ მიწის ხალხმა –

2 ახლა, მათი დახოცილები არ იქნა დათვლილი, დიდი რაოდენობის გამო; არც ნეფიელთა დახოცილები დათვალეს, მაგრამ, მოხდა ასე: გლოვის, მარხვისა და ლოცვის დღეების შემდეგ, მათ დამარხეს თავიანთი დახოცილები (და ეს იყო ნეფის ხალხზე მოსამართლეთა მმართველობის მეთექვსმეტე წელს) იქ დაისადგურა ხანგრძლივმა მშვიდობამ მთელს მიწაზე.

3 დიახ; და ხალხი გულმოდგინედ იცავდა უფლის მცნებებს; და ისინი მკაცრნი იყვნენ ღმერთის წეს-ჩვეულებების დაცვაში, მოსეს რჯულის შესაბამისად; რადგან მათ ასწავლიდნენ მოსეს რჯულის დაცვას, სანამ ის არ აღსრულდება.

4 და ასე, ნეფის ხალხზე მოსამართლეთა მმართველობის მთელი მეთექვსმეტე წლის განმავლობაში, ამ ხალხში არ ჰქონია ადგილი მღელვარებას.

5 და იყო ასე, რომ მოსამართლეთა მმართველობის მეჩვიდმეტე წლის დასაწყისში, იქ სუფევდა ხანგრძლივი მშვიდობა.

6 მაგრამ იყო ასე, რომ მეჩვიდმეტე წლის ბოლოს, ზარაჰემლას მიწაზე მოვიდა ადამიანი და იგი იყო ანტიქრისტე, რადგან დაიწყო ხალხში ქადაგება იმ წინასწარმეტყველებების წინააღმდეგ, რომლებზეც ლაპარაკობდნენ წინასწარმეტყველები იესო ქრისტეს მოსვლის შესახებ.

7 ახლა, არ იყო კანონი ადამიანის რწმენის შესახებ; რადგან ეს იყო ღმერთის მცნებების საწინააღმდეგო, რათა ყოფილიყო კანონი, რომელიც ადამიანებს უთანასწორო პირობებში ჩააყენებდა.

8 რადგან წმინდა წერილი ასე მეტყველებს: დღეს აირჩიეთ, ვის ემსახურებით.

9 ახლა, თუ ადამიანს სურდა ღმერთისათვის მსახურება, ეს იყო მისი უპირატესობა; უფრო სწორად, თუ მას სწამდა ღმერთი, ეს იყო მისი უპირატესობა – ემსახუროს მას; მაგრამ, თუ მას იგი არ სწამდა, არ არსებობდა კანონი მის დასასჯელად.

10 მაგრამ, თუ იგი ვინმეს მოკლავდა – სიკვდილით დაისჯებოდა; და თუ გაძარცვავდა და იქურდებდა – დაისჯებოდა; და თუ მრუშობას ჩაიდენდა, – დაისჯებოდა; დიახ, ყველა ამ სიბოროტისთვის ისინი ისჯებოდნენ.

11 რადგან იყო კანონი, რის მიხედვითაც ადამიანებს განსჯიდნენ საკუთარი დანაშაულებისამებრ. მიუხედავად ამისა, არ იყო კანონი ადამიანის რწმენის წინააღმდეგ, ამიტომ ადამიანს სჯიდნენ მხოლოდ იმ დანაშაულებებისათვის, რომლებსაც ჩაიდენდა; ამიტომ, ყველა ადამიანი იყო თანასწორი.

12 და ამ ანტიქრისტემ, რომლის სახელიც იყო ყორიჰორი (და კანონით ვერ დაისჯებოდა) დაიწყო ქადაგება ხალხში, რომ ქრისტე არ იქნება. და ამგვარად ქადაგებდა იგი სიტყვებით:

13 თქვენ, რომლებიც შებოჭილნი ხართ უგუნური და ამაო იმედით, რატომ ებმებით უღელში ამ უგუნურობით? რატომ მოელით ქრისტეს? რადგან არცერთ ადამიანს არ შეუძლია იცოდეს რაიმე იმაზე, რაც მოვა.

14 აჰა, ყველაფერს, რასაც უწოდებთ წინასწარმეტყველებებს, რასაც ამბობთ, რომ გადმოგეცათ წმინდა წინასწარმეტყველების მიერ, აჰა, ესენი არის თქვენი მამების უგუნური ჩვეულებები.

15 საიდან იცით, რომ ისინი არის მართალი? აჰა, თქვენ არ შეგიძლიათ იცოდეთ იმის შესახებ, რასაც ვერ ხედავთ; ამიტომ, არც ის გეცოდინებათ, რომ იქნება ვინმე ქრისტე.

16 თქვენ მომავლისკენ იყურებით და ამბობთ, რომ ხედავთ თქვენი ცოდვების მიტევებას, მაგრამ, აჰა, ეს არის შეშლილი გონების შედეგი და ეს შეშლილობა თქვენი გონებისა მოდის თქვენი მამების ჩვეულებებიდან, რომლებსაც მიჰყავხართ იმის რწმენისაკენ, რაც არ არის მართალი.

17 და მან კიდევ ბევრი ასეთი რამ უთხრა მათ, ეუბნებოდა, რომ არ მოხდებოდა გამოსყიდვა ადამიანების ცოდვებისა, არამედ ყოველი ადამიანი ამ ცხოვრებაში იღებს საკუთარი ქმედებების თანახმად; ამიტომ, ყოველი ადამიანი აღწევს საკუთარი შესაძლებლობების შესაბამისად და რომ ყოველი ადამიანი იმარჯვებს საკუთარი ძალის შესაბამისად; და რაც არ უნდა გააკეთოს ადამიანმა – არ ჩაითვლება დანაშაულებად.

18 და ასე ქადაგებდა მათ წინაშე, გზა აუბნია მრავალთა გულებს, უბიძგებდა, თავი აღემართათ თავიანთ სიბოროტეში, დიახ, აიყოლია მრავალი ქალი და ასევე მამაკაცი, რათა ჩაედინათ მრუშობა, ეუბნებოდა რა, რომ როდესაც ადამიანი კვდება, ეს არის მისი დასასრული.

19 ახლა, ეს კაცი ასევე მივიდა იერშონის მიწაზე, რათა ექადაგა ეს ყველაფერი ამონის ხალხში, რომელიც ოდესღაც ლამანიელთა ხალხი იყო.

20 მაგრამ, აჰა, ისინი მეტად ბრძენნი იყვნენ, ვიდრე მრავალი ნეფიელი; რადგან შეიპყრეს იგი და შებოჭეს და მიიყვანეს ამონის წინაშე, რომელიც იყო ამ ხალხის მღვდელმთავარი.

21 და იყო ასე, რომ მან ბრძანა, გაეყვანათ იგი მიწიდან. და იგი მივიდა გიდეონის მიწაზე და მათაც დაუწყო ქადაგება; და აქ არ ჰქონდა დიდი წარმატება, რადგან იგი შეიპყრეს და შებოჭეს და მიიყვანეს მღვდელმთავრისა და იმ მიწის მთავარი მოსამართლის წინაშე.

22 და იყო ასე, რომ მღვდელმთავარმა მას უთხრა: რატომ დადიხარ ყველგან და ამრუდებ უფლის გზას? რატომ ასწავლი ამ ხალხს, რომ ქრისტე არ იქნება, რათა შეწყვიტო მათი სიხარული? რატომ ლაპარაკობ ყველა წმინდა წინასწარმეტყველთა წინასწარმეტყველების საწინააღმდეგოდ?

23 ახლა, მღვდელმთავრის სახელი იყო გიდონა; და ყორიჰორმა მას უთხრა: რადგან მე არ ვასწავლი თქვენი მამების უგუნურ ჩვეულებებს და რადგან მე არ ვასწავლი ამ ხალხს, შეიბოჭონ თავი უგუნური წეს-ჩვეულებებითა და ადათ-წესებით, რომლებიც გადმოცემულ იქნა უძველესი მღვდლების მიერ, რათა მათზე მიიტაცონ ხელისუფლება და უფლებამოსილება, რათა ჰყოლოდათ ისინი უმეცრებაში, რათა არ აეწიათ თავი, არამედ დამცირებულნი ყოფილიყვნენ შენი სიტყვების შესაბამისად.

24 თქვენ ამბობთ, რომ ეს ხალხი არის თავისუფალი. აჰა, მე ვამბობ, რომ ისინი არიან მონობაში. თქვენ ამბობთ, რომ ეს უძველესი წინასწარმეტყველებები ჭეშმარიტია. აჰა, მე გეუბნებით, თქვენ არ იცით, რომ ისინი ჭეშმარიტია.

25 თქვენ ამბობთ, რომ ეს ხალხი არის დამნაშავე და დაცემული, მათი მშობლის შეცოდების გამო. აჰა, მე გეუბნებით, რომ შვილი არ არის დამნაშავე თავისი მშობლების გამო.

26 და თქვენ ასევე ამბობთ, რომ ქრისტე მოვა. მაგრამ, აჰა, მე ვამბობ, რომ თქვენ არ იცით, რომ იქნება ქრისტე; და ასევე ამბობთ, რომ მას მოკლავენ ამა ქვეყნის ცოდვებისათვის.

27 და ამრიგად, თქვენ მიგყავთ ეს ხალხი თქვენი მამების უგუნური ჩვეულებების კვალდაკვალ და თქვენი საკუთარი სურვილების თანახმად; და თქვენ ისინი დამორჩილებულნი გყავთ, როგორც მონობაში, რათა დატკბეთ მათი ხელის შრომით, რომ ვერ გაბედონ უშიშრად ამოხედვა და ვერ დატკბნენ თავიანთი უფლებებითა და უპირატესობებით.

28 დიახ, ისინი ვერ ბედავენ იმის გამოყენებას, რაც მათ ეკუთვნით, რათა არ შეურაცხყონ თავიანთი მღვდლები, რომლებიც უღელში აბავენ ადამიანებს სურვილისამებრ და აიძულებენ ირწმუნონ, საკუთარი ჩვეულებებით, სიზმრებით, ახირებებით, ხილვებითა და მოგონილი საიდუმლოებებით, რომ თუ არ მოიქცევიან მათი სიტყვების შესაბამისად, შეურაცხყოფენ უცნობ არსებას, რომელსაც უწოდებენ ღმერთს, იმ არსებას, რომელიც არასდროს არც უნახავთ და არც იცნობდნენ, რომელიც არასდროს იყო და არც არასდროს იქნება.

29 ახლა, როდესაც მღვდელმთავარმა და მთავარმა მოსამართლემ იხილეს მისი გულქვაობა, დიახ, როდესაც მათ იხილეს, რომ იგი ღმერთის წინააღმდეგაც ილანძღებოდა, არაფერი უპასუხეს მის სიტყვებს; მაგრამ ბრძანეს, იგი შეებოჭათ; და გადასცეს გუშაგებს ხელში და გააგზავნეს ზარაჰემლას მიწაზე, რათა მიეყვანათ ალმასა და მთავარი მოსამართლის წინაშე, რომელიც მმართველობდა მთელ იმ მიწაზე.

30 და იყო ასე, რომ როდესაც იგი ალმასა და მთავარი მოსამართლის წინაშე მიიყვანეს, მან იგივე გაიმეორა, რაც გიდეონის მიწაზე; დიახ, მან გმობა გააგრძელა.

31 და ალმას წინაშე წარმოთქვა მაღალფარდოვანი სიტყვები და ილანძღებოდა მღვდლებისა და მასწავლებლების წინააღმდეგ, ბრალს სდებდა მათ იმაში, რომ ხალხი მიჰყავდათ მათი მამების უგუნური ჩვეულებების კვალდაკვალ, რათა ხალხის შრომით გამძღარიყვნენ.

32 ახლა, ალმამ მას უთხრა: შენ იცი, რომ ჩვენ ამ ხალხის შრომით არ ვძღებით, რადგან, აჰა, მე ვშრომობდი მოსამართლეთა მმართველობის დასაწყისიდან აქამდე, ჩემი საკუთარი ხელით, თავის გამოსაკვებად, მიუხედავად ჩემი მრავალი მოგზაურობებისა ამ მიწის ირგვლივ, რათა ღვთის სიტყვა მეუწყებინა ჩემი ხალხისადმი.

33 და დიდი შრომის მიუხედავად, რომელიც მე ეკლესიაში გავწიე, ჩემი შრომისთვის არასდროს მიმიღია ერთი სენინიც კი; არც ჩემს რომელიმე ძმას, მოსამართლის სავარძელში სამსახურის გარდა; და მაშინ ჩვენ ვიღებდით საფასურს მხოლოდ კანონის შესაბამისად, ჩვენ მიერ დახარჯულ დროში.

34 და ახლა, თუ არაფერს არ ვიღებთ ეკლესიაში ჩვენი შრომისათვის, რისთვის ვშრომობთ ეკლესიაში, გარდა საუწყებლად ჭეშმარიტებისა, რათა ვიხაროთ ჩვენი ძმების სიხარულით?

35 მაშინ, რატომ ამბობ, რომ სარგებლის მისაღებად ვქადაგებთ ამ ხალხის წინაშე, რადგან შენ თვითონ არ იცი, რომ არ ვიღებთ სარგებელს? და ახლა, ნუთუ გწამს, რომ ჩვენ ვატყუებთ ამ ხალხს, ვიწვევთ რა ასეთ სიხარულს მათ გულებში?

36 და ყორიჰორმა უპასუხა: დიახ.

37 და შემდეგ, ალმამ მას უთხრა: გწამს ღმერთის არსებობა?

38 და მან უპასუხა: არა.

39 და ალმამ მას უთხრა: ნუთუ კვლავ უარყოფ ღმერთის არსებობას და ასევე უარყოფ ქრისტეს? რადგან, აჰა, გეუბნები: მე ვიცი, რომ ღმერთი არსებობს და ასევე ის, რომ ქრისტე მოვა.

40 და ახლა, რა მტკიცებულება გაქვს, რომ ღმერთი არ არსებობს ან რომ არ მოვა ქრისტე? მე გეუბნები, რომ არ გაქვს, გარდა შენი სიტყვისა.

41 მაგრამ, აჰა, მე მაქვს ყველაფერი, როგორც მოწმობა იმისა, რომ ყოველივე ეს ჭეშმარიტებაა; და შენც გაქვს ყველაფერი, როგორც მოწმობა შენთვის, რომ ეს ჭეშმარიტებაა; და ნუთუ უარყოფ ამას? გწამს, რომ ეს ყველაფერი არის ჭეშმარიტი?

42 აჰა, მე ვიცი, რომ გწამს, მაგრამ შეპყრობილი ხარ მატყუარა სულით და ღმერთის სული მოიშორე, რათა არ ჰქონდეს მას ადგილი შენში; არამედ ეშმაკს აქვს შენზე ძალა და დაჰყავხარ ყველგან, აწყობს რა გეგმებს, რომ შეძლოს ღმერთის შვილების განადგურება.

43 და ახლა, ყორიჰორმა ალმას უთხრა: თუ დამანახებ ნიშანს, რომ დავრწმუნდე ღმერთის არსებობაში, დიახ, დამანახე, რომ მას შესწევს ძალა, მაშინ მე დავრწმუნდები შენი სიტყვების ჭეშმარიტებაში.

44 მაგრამ, ალმამ მიუგო: შენ გქონდა საკმარისი ნიშნები; ნუთუ სცდი შენს ღმერთს? ნუთუ იტყვი: დამანახე ნიშანი, როდესაც გაქვს შენი ყველა ძმის დამოწმება, ასევე ყველა წმინდა წინასწარმეტყველის? წმინდა წერილები დევს შენ წინაშე, დიახ, ყველაფერი მიუთითებს, რომ ღმერთი არსებობს, დიახ, თვით დედამიწა და ყველაფერი, რაც არის დედამიწის პირზე, დიახ, მისი მოძრაობა, დიახ, ყველა პლანეტა, რომელიც მოძრაობს თავისი ჩვეული წესით, არის მოწმე, რომ არსებობს უზენაესი შემქმნელი.

45 და მაინც, დადიხარ ყველგან და ამ ხალხის გულები სწორი გზიდან გადაგყავს, მათ წინაშე მოწმობ, რომ ღმერთი არ არსებობს? და მაინც, ნუთუ უარყოფ ყველა ამ დამოწმებას? და მან უთხრა: დიახ, მე უარვყოფ, თუ არ დამანახებ ნიშანს.

46 და ახლა, იყო ასე, რომ, ალმამ მას უთხრა: აჰა, მე ვწუხვარ შენი გულქვაობის გამო, დიახ, რომ შენ ჯერ კიდევ ეწინააღმდეგები ჭეშმარიტების სულს, რაც გაანადგურებს შენს სულს.

47 მაგრამ, აჰა, სჯობს, რომ სული დაკარგო, ვიდრე გახდე მრავალი სულის განადგურების მიზეზი, შენი სიცრუითა და პირფერული სიტყვებით; ამიტომ, შენ თუ კვლავ უარყოფ, აჰა, ღმერთი დაგსჯის ისე, რომ დამუნჯდები, რომ მეტად ვეღარ გახსნა ბაგე, რომ ეს ხალხი მეტი ვეღარ მოატყუო.

48 ახლა, ყორიჰორმა მას უთხრა: მე არ უარვყოფ ღმერთის არსებობას, მაგრამ არ მწამს, რომ არის ღმერთი; და ასევე ვამბობ: შენ არ იცი, რომ ღმერთი არსებობს; და თუ არ დამანახებ ნიშანს – არ დავიჯერებ.

49 ახლა, ალმამ მას უთხრა: მე შენ იმას მოგცემ ნიშნად, რომ დამუნჯდები, ჩემი სიტყვებისამებრ; და მე ვამბობ, რომ ღმერთის სახელით შენ დამუნჯდები, რომ ვეღარ შეძლებ მეტყველებას.

50 ახლა, როდესაც ალმამ ეს სიტყვები წარმოთქვა, ყორიჰორი დამუნჯდა ისე, რომ წაერთვა მეტყველება, ალმას სიტყვების შესაბამისად.

51 და ახლა, როდესაც მთავარმა მოსამართლემ ეს იხილა, მან გაიწოდა ხელი და ყორიჰორს დაუწერა: დარწმუნდი ღმერთის ძალაში? ვისზე ისურვებდი ალმას ეჩვენებინა მისი ნიშანი? გსურდა, რომ სხვები დაეტანჯა, რათა შენთვის ნიშანი დაენახებინა? აჰა, მან გაჩვენა ნიშანი, კიდევ გსურს კამათი?

52 და ყორიჰორმა ხელი გამოიწოდა და დაწერა სიტყვები: ვიცი, რომ ვარ მუნჯი, რადგან ვერ ვლაპარაკობ; და ვიცი, რომ ვერაფერი ვერ მოავლენდა ამას ჩემზედ, ღმერთის ძალის გარდა; დიახ, მე ყოველთვის ვიცოდი, რომ ღმერთი არსებობდა.

53 მაგრამ, აჰა, ეშმაკმა შემაცდინა, რადგან ანგელოზის სახით მომევლინა და მითხრა: წადი და ჭეშმარიტებისკენ მოაბრუნე ეს ხალხი, რადგან იგი ყველა გზას ასცდა, მიჰყვა რა უცხო ღმერთს. და მან მითხრა: არ არსებობს ღმერთი; დიახ, მან მასწავლა ის, რაც უნდა მელაპარაკა. და ვასწავლიდი მის სიტყვებს; და ვასწავლიდი მათ, რადგან საამო იყო ხორციელი ჭკუისათვის; და ვასწავლიდი იქამდე, სანამ არ მივაღწიე საკმაო წარმატებას, ასე რომ, მე ნამდვილად დავიჯერე, რომ ისინი იყო ჭეშმარიტი; და ამ მიზეზით ვეწინააღმდეგებოდი ჭეშმარიტებას იქამდე, სანამ არ მოვავლინე ჩემს თავზედ ეს დიდი წყევლა.

54 ახლა, როდესაც ეს თქვა, იგი შეევედრა, რომ ალმას ელოცა ღმერთისადმი, რათა წყევლა მოხსნილიყო მისგან.

55 მაგრამ ალმამ მიუგო: ეს წყევლა რომ მოგხსნოდა, შენ კვლავ აიყოლიებდი ამ ხალხის გულებს, ამიტომ, უფლის ნების შესაბამისად იქნება შენთვის.

56 და იყო ასე, რომ ეს წყევლა არ მოეხსნა ყორიჰორს; მაგრამ ის გააძევეს და დადიოდა სახლიდან სახლში საკვების სამათხოვროდ.

57 ახლა, ამბავი იმის შესახებ, რაც მოუვიდა ყორიჰორს, დაუყოვნებლივ გავრცელდა მთელს მიწაზე; დიახ, მიწის მთელი ხალხისადმი მოწოდება გაიგზავნა მთავარი მოსამართლის მიერ, აუწყებდა რა მათ, ვისაც სწამდა ყორიჰორის სიტყვები, რომ უნდა სწრაფად მოენანიებინათ, რათა მათზეც არ მოვლენილიყო იგივე სასჯელი.

58 და იყო ასე, რომ ისინი ყველანი დარწმუნდნენ ყორიჰორის სიბოროტეში, ამიტომ კვლავ უფლისაკენ მოიქცნენ; და ამან მოუღო ბოლო ყორიჰორის წესის ურჯულოებას და ყორიჰორი დადიოდა სახლიდან სახლში, მათხოვრობდა რა საჭმელს თავის სარჩენად.

59 და იყო ასე, რომ როდესაც წავიდა ხალხში, დიახ, იმ ხალხს, რომელიც გამოეყო ნეფიელებს და უწოდა თავის თავს ზორამიელები, წინამძღოლობდა კაცი, რომელსაც ერქვა ზორამი; და როდესაც იგი მათთან მივიდა, აჰა, იგი ფეხქვეშ გათელეს, თანაც იმდენჯერ, სანამ არ მოკვდა.

60 და ამგვარად, ვხედავთ იმის დასასრულს, ვინც ამრუდებს უფლის გზებს; და ამგვარად ვხედავთ, რომ უკანასკნელ დღეს ეშმაკი არ ამოუდგება მხარში თავის შვილებს, არამედ სწრაფად ჩაითრევს მათ ჯოჯოხეთში.