1 და ახლა, იყო ასე, რომ როდესაც ალმამ მათ უთხრა ეს სიტყვები, იგი დაჯდა მიწაზე. ამულეკი კი წამოდგა და დაიწყო მათი სწავლება სიტყვებით:

2 ჩემო ძმებო, ვფიქრობ, შეუძლებელია არ იცოდეთ იმაზედ, რაც ითქვა ქრისტეს მოსვლის შესახებ, რომელიც, ჩვენი სწავლებისამებრ, იქნება ძე ღვთისა; დიახ, მე ვიცი, რომ ყოველივე ამას თქვენ უშურველად გასწავლიდნენ, სანამ ჩვენ გამოგვეყოფოდით.

3 და რადგან თქვენ მოისურვეთ ჩემი საყვარელი ძმისგან, გაცნობოთ, რა უნდა მოიმოქმედოთ თქვენი გაჭირვების გამო; და მან გითხრათ ცოტაოდენი რამ, რათა მოემზადებინა თქვენი გონება; დიახ, მან მოგიწოდათ რწმენისა და მოთმინებისკენ –

4 დიახ, იმდენი რწმენა მაინც რომ გქონოდათ, დაგეთესათ თქვენს გულში სიტყვა, რათა გამოგეცადათ მისი სიკეთე.

5 და ჩვენ ვიხილეთ, რომ დიადი შეკითხვა, რომელზეც ფიქრობთ, არის ასეთი: ღვთის ძეშია სიტყვა, თუ ქრისტე არ იქნება?

6 და თქვენ ასევე იხილეთ, რომ ჩემმა ძმამ დაგიმტკიცათ, მრავალი მაგალითით, რომ სიტყვა ქრისტეში არის ხსნისათვის.

7 ჩემმა ძმამ მიგითითათ ზენოსის სიტყვებზე, რომ გამოსყიდვა მოდის ღვთის ძის მეშვეობით და ზენოქის სიტყვებზეც; და ისიც ასევე მიუთითებდა მოსეზე, რათა დაემტკიცებინა, რომ ყოველივე ეს ჭეშმარიტია.

8 და ახლა, აჰა, მე თავად დაგიმოწმებთ, რომ ყოველივე ეს არის ჭეშმარიტი. აჰა, გეუბნებით, რომ ვიცი, ქრისტე მოვა ადამიანთა შვილებს შორის, რათა თავის თავზე აიღოს თავისი ხალხის შეცოდებანი და რომ ის გამოისყიდის ამა ქვეყნის ცოდვებს, რადგან უფალმა ღმერთმა თქვა ეს.

9 რადგან საჭიროა, რომ მოხდეს გამოსყიდვა; რადგან მარადიული ღმერთის დიდი გეგმის შესაბამისად, უნდა მოხდეს გამოსყიდვა, თორემ მთელი კაცობრიობა აუცილებლად დაიღუპება; დიახ, ყველა გულქვაობს, დიახ, ყველა დაცემულია და დაკარგული და უნდა დაიღუპოს, რომ არა გამოსყიდვა, რომელიც საჭიროა, რომ მოხდეს.

10 რადგან საჭიროა, რომ იყოს დიდი და უკანასკნელი მსხვერპლშეწირვა; დიახ, არა ადამიანის მსხვერპლშეწირვა, არც ცხოველის, არც რაიმე ფრინველის; რადგან ეს არ იქნება ადამიანის მსხვერპლშეწირვა; არამედ იქნება უსაზღვრო და მარადიული მსხვერპლშეწირვა.

11 ახლა, არ არსებობს ადამიანი, რომელსაც შეუძლია შესწიროს საკუთარი სისხლი, რომელიც გამოისყიდის სხვის ცოდვებს. ახლა, თუ ადამიანი მოკლავს, ნუთუ ჩვენი კანონი, რომელიც არის სამართლიანი, წაართმევს მის ძმას სიცოცხლეს? მე გეუბნებით – არა.

12 მაგრამ კანონი მოითხოვს იმის სიცოცხლეს, რომელმაც მოკლა; ამიტომ, ვერ იქნება ვერაფერი, რაც უსაზღვრო გამოსყიდვაზე ნაკლებია, რაც საკმარისი იქნება ამა ქვეყნის ცოდვების დასაფარად.

13 ამიტომ, საჭიროა, იყოს დიდი და უკანასკნელი მსხვერპლშეწირვა და შემდეგ იქნება ან უნდა იყოს ისე, რომ შეწყდეს სისხლისღვრა; მაშინ აღსრულდება მოსეს რჯული; დიახ, ის აღსრულდება ყოველი იოტითა და წერტილით და არცერთი არ გაქრება.

14 და აჰა, ამაშია რჯულის მთელი აზრი, ყოველი იოტი მიუთითებს იმ დიდსა და უკანასკნელ მსხვერპლშეწირვაზე; და ის დიდი და უკანასკნელი მსხვერპლშემწირავი იქნება ძე ღვთისა, დიახ, უსაზღვრო და მარადიული.

15 და ასე მოუტანს ხსნას ყველას, ვინც იწამებს მის სახელს; და მიზანი ამ უკანასკნელი მსხვერპლშეწირვისა არის – აღძრას წყალობის წიაღი, რომელიც დაძლევს სამართალს, რომელიც მისცემს ადამიანებს საშუალებას, იქონიონ რწმენა მოსანანიებლად.

16 და ასე, წყალობა დააკმაყოფილებს სამართლის მოთხოვნებს და მოაქცევს მათ უსაფრთხო ხელში, მაშინ როდესაც ის, რომელიც არ ავლენს რწმენას მონანიებისთვის, ექვემდებარება სამართლის ყველა მოთხოვნას; ამიტომ, მხოლოდ მათთვის, ვისაც აქვს რწმენა მონანიებისთვის, აღსრულებულია ეს დიდი და მარადიული გამოსყიდვის გეგმა.

17 ამიტომ, დაე, ღმერთმა ქნას, ჩემო ძმებო, რომ დაიწყოთ მონანიებისთვის რწმენის გამოვლენა, რომ დაიწყოთ წმინდა სახელის ხსენება, რათა მან შეგიწყალოთ;

18 დიახ, შეჰღაღადეთ წყალობისათვის; რადგან მას აქვს ხსნის ძალა.

19 დიახ, თავი დაიმდაბლეთ და იყავით მისადმი ლოცვაში.

20 შეჰღაღადეთ მას, როდესაც იქნებით თქვენს მინდვრებში, დიახ, მთელ თქვენს ფარებზე.

21 შეჰღაღადეთ მას თქვენს სახლებში, დიახ, თქვენი ოჯახის ყოველ წევრზე, დილით, შუადღესა და საღამოს.

22 დიახ, შეჰღაღადეთ მას, თქვენი მტრების ძალის საწინააღმდეგოდ.

23 დიახ, შეჰღაღადეთ მას ეშმაკის საწინააღმდეგოდ, რომელიც არის ყოველი სიმართლის მტერი.

24 შეჰღაღადეთ მას თქვენი ხორბლის მინდვრებზე, რათა მათში აყვავდეთ.

25 შეჰღაღადეთ თქვენი მინდვრების ფარებზე, რათა მათ იმრავლონ.

26 მაგრამ ეს არ არის ყველაფერი, უნდა გადმოღვაროთ სული თქვენს ოთახებში და საიდუმლო ადგილებში და თქვენს უდაბნოში.

27 დიახ, როდესაც არ შეჰღაღადებთ უფალს, დაე, აგევსოთ გულები მისადმი განუწყვეტელი ლოცვით თქვენი კეთილდღეობისათვის, ასევე მათი კეთილდღეობისათვის, ვინც თქვენს გარშემოა.

28 და ახლა, აჰა, ჩემო საყვარელო ძმებო, მე თქვენ გეუბნებით: არ გეგონოთ, რომ ეს არის ყველაფერი; რადგან მას შემდეგ, რაც თქვენ ყოველივე ამას შეასრულებთ, თუ გააგდებთ ღატაკსა და შიშველს და არ ეწვევით ავადმყოფსა და გაჭირვებულს და არ გაუზიარებთ თქვენს ქონებას, თუკი ის გაქვთ, მათ, ვინც გაჭირვებაშია, მე თქვენ გეუბნებით: თუ არ შეასრულებთ აქედან არცერთს, მაშინ, აჰა, თქვენი ლოცვა ამაოა და არაფერს არ გარგებთ; და ხართ თვალთმაქცებივით, რომელნიც რწმენას უარყოფენ.

29 ამიტომ, თუ არ გესმით, რომ უნდა იყოთ მოწყალენი, თქვენ ხართ როგორც ხენჯი, რომელსაც მებრძმედეები ყრიან (რადგან არაფრად არ ვარგა) რომელსაც ადამიანები ფეხქვეშ თელავენ.

30 და ახლა, ჩემო ძმებო, მე მსურს, რომ მას შემდეგ, რაც თქვენ მიიღეთ ამდენი დამოწმება, იხილეთ რა, რომ წმინდა წერილი მოწმობს ყოველივე ამის შესახებ, გამოხვიდეთ წინ და მოიტანოთ მონანიებისთვის ნაყოფი.

31 დიახ, მე მსურს, რომ წინ გამოხვიდეთ და მეტად აღარ გაიქვავოთ გული; რადგან, აჰა, ახლა არის თქვენი ხსნის დრო და დღე; ამიტომ, თუ მოინანიებთ და გულს არ გაიქვავებთ, დაუყოვნებლივ აღსრულდება თქვენთვის გამოსყიდვის დიდი გეგმა.

32 რადგან, აჰა, ეს ცხოვრება არის დრო ადამიანისათვის, მოემზადოს ღმერთთან შესახვედრად; დიახ, აჰა, ამ ცხოვრების დღე ადამიანისათვის არის დღე, როდესაც ადამიანმა უნდა აკეთოს საკუთარი საქმენი.

33 და ახლა, როგორც მე მანამდე გითხარით, მიიღეთ რა ამდენი დამოწმება, მე გევედრებით, არ გადადოთ დასასრულამდე თქვენი მონანიების დღე; რადგან ცხოვრების ამ დღის შემდეგ, რომელიც მოგვეცა მარადისობისათვის მოსამზადებლად, აჰა, თუ ჩვენ ამ ცხოვრებაში უკეთესად არ გამოვიყენებთ დროს, მაშინ მოვა ბნელეთის ღამე, როდესაც ვერანაირი საქმე ვერ გაკეთდება.

34 როდესაც მიყვანილნი იქნებით იმ საშინელ ზღვრამდე, თქვენ ვერ იტყვით: მე მოვინანიებ, დავუბრუნდები ჩემს ღმერთს. ვერა, ვერ იტყვით ამას, რადგან ის სული, რომელიც ფლობს თქვენს სხეულს ამ ცხოვრებიდან წასვლის ჟამს, იგივე სულს ექნება ძალა, დაეუფლოს თქვენს სხეულს მარადიულ სამყაროში.

35 რადგან, აჰა, თუ გადადეთ თქვენი მონანიების დღე გარდაცვალებამდე, აჰა, თქვენ დაექვემდებარეთ ეშმაკის სულს და ის თავისიანებად გამტკიცებთ; ამიტომ, უფლის სული დაგშორდათ და აღარ აქვს ადგილი თქვენში; და ეშმაკს აქვს ყოველი ძალა თქვენზედ; და ასეთია ბოროტთა საბოლოო მდგომარეობა.

36 და ეს ვიცი, რადგან უფალმა თქვა, რომ ის არ ცხოვრობს უწმინდურ ტაძრებში, არამედ მართალთა გულებში იმყოფება; დიახ, მან ასევე თქვა, რომ მართალნი დასხდებიან მის სასუფეველში, რათა აღარ გამოვიდნენ; მათი სამოსელი კი გათეთრდება კრავის სისხლის მეშვეობით.

37 და ახლა, ჩემო საყვარელო ძმებო, მე მსურს, რომ დაიმახსოვროთ ეს ყველაფერი, რომ ისწრაფოთ თქვენი ხსნისაკენ ღვთის შიშით, რომ აღარ უარყოთ ქრისტეს მოსვლა;

38 რომ აღარ დაუპირისპირდეთ სულიწმინდას, არამედ მიიღოთ იგი და საკუთარ თავზე აიღოთ ქრისტეს სახელი; რომ დაიმდაბლოთ თავი მტვრამდეც კი და თაყვანი სცეთ ღმერთს, სადაც არ უნდა იყოთ, სულითა და ჭეშმარიტებით და რომ ყოველი დღე იცხოვროთ მადლიერებით მრავალი წყალობისა და კურთხევებისთვის, რომლებსაც იგი თქვენზედ მოავლენს.

39 დიახ, ასევე მოგიწოდებთ, ჩემო ძმებო, განუწყვეტლივ იყავით ფხიზელნი ლოცვისათვის, რათა ვერ ჩაგითრიოთ ეშმაკის ცდუნებამ, რომ ვერ დაგძლიოთ, რომ ვერ გახდეთ მისი ქვედგომნი უკანასკნელ დღეს; რადგან, აჰა, იგი არაფრით კარგით არ გაჯილდოებთ.

40 და ახლა, ჩემო საყვარელო ძმებო, მოგიწოდებთ, იქონიოთ მოთმინება და გადაიტანოთ ყველანაირი გაჭირვება, რომ არ გალანძღოთ ისინი, რომლებიც გაძევებენ თქვენი განსაკუთრებული სიღარიბის გამო, რათა არ იქცეთ მათნაირ ცოდვილებად;

41 არამედ, რომ იქონიოთ მოთმინება და გადაიტანოთ ეს გაჭირვება მტკიცე იმედით, რომ ერთ დღეს დაისვენებთ ყოველი თქვენი გაჭირვებისგან.