1 Monayi, mpindiewu biakalua ne kunyima kua bantu ba Amona bashikikibua mu bulaba bua Yeleshona, eyowa, ne kabidi kunyima kua Bena Lamana banyemeshibua mu bulaba, ne bafua babu bajîkibua kudi bantu ba mu bulaba—

2 Mpindiewu kabakabala bafua babu to bua bunena bua bungi buabu; anyi kabakabala bafua ba Bena Nefi pabu to—kadi biakalua ne kunyima kua kujîkabu bafua babu, ne kabidi kunyima kua matuku a dijila, ne a madilu, ne disambila, (ne bivua mu tshidimu tshia dikumi ne tshisambombo tshia dikôkesha dia balumbuluishi pa mutu pa bantu ba Nefi) kuakabanga kuikala ditalala ditungunuka mu bulaba bonsu.

3 Eyowa, ne bantu bakatangila bua kulama mikenji ya Mukalenga; ne bavua balama mêyi a Nzambi ne bushuwa menamena, bilondeshila ku mikenji ya Mose; bualu bavua babalongesha bua kulama mikenji ya Mose tô ne muakumbajibuayi.

4 Ne nanku bantu kabakapeta disalu mu tshidimu tshia dikumi ne tshisambombo tshionsu tshia dikôkesha dia balumbuluishi pa mutu pa bantu ba Nefi to.

5 Ne biakalua ne mu ntuadijilu wa tshidimu dikumi ne tshia muanda muteketa tshia dikôkesha dia balumbuluishi, kuvua ditalala dia munanunanu.

6 Kadi biakalua ku nshikidilu wa tshidimu tshia dikumi ne muanda muteketa, kuakalua muntu mu bulaba bua Zalahemela, ne uvua mubengi wa Kilisto, bualu wakabanga kuyisha bantu kushilangana ne mambi avua bambi bamba, bitangila dilua dia Kilisto.

7 Mpindiewu kakuvua mukenji uvua mubenga ditabuija dia muntu to; bualu bivua bikandikibua menamena mu mêyi a Nzambi ne kuikala mukenji udi uteka bantu mu dishilangana.

8 Bualu mifundu ya tshijila idi yamba nanku: Sungulayi lelu, nganyi unudi basua kusadila.

9 Mpindiewu muntu yeya mujinga bua kusadila Nzambi, tshivua bunema buenda; anyi yeya muitabuija Nzambi tshivua bunema buenda bua kumusadila; kadi yeya kayi mumuitabuija to, kakuvua mukenji wa kumupesha dinyoka to.

10 Kadi bu yeya mushipa muntu bavua bamupesha dinyoka dia lufu; ne bu yeya munyengangana bintu bia bienda bavua kabidi bamupesha dinyoka; ne bu yeya muiba bavua kabidi bamupesha dinyoka; ne bu yeya muenda masandi bavua kabidi bamupesha dinyoka; eyowa, bua bubi bonsu ebu, bavua babapesha manyoka.

11 Bualu kuvua mukenji wa ne bantu balumbuluishibua bilondeshila mibi yabu. Nansha nanku, kakuvua mukenji uvua mukandikisha ditabuija dia muntu to; bua nanku, muntu uvua unyokibua amu bua mibi ivuaye muenza; bua nanku bantu bonsu bavua pa momumua.

12 Ne mubengi wa Kilisto ewu, muena dîna dia Koliholo, (ne mikenji kayivua bua kumukuata to) wakabanga kuyisha bantu ne kakuakuikala Kilisto to. Ne wakayisha ku mushindu ewu, wamba:

13 Ô nuenu badibu baputa panshi ne ditekemena disenji ne dia tshianana, bua tshinyi nudi badibatshika ku tshikokedi tshia bintu bisenji buebi? Bua tshinyi nudi bindila Kilisto? Bualu muntu nansha umua kena mua kumanya tshintu nansha tshimua tshilualua to.

14 Monayi, bintu ebi binudi nubikila ne mambi, binudi nuamba ne bidi binushila kudi bambi bansantu, monayi, bidi ngikadilu misenji ya batatuenu.

15 Munyi munudi bushuwa buabi? Monayi, kanuena mua kumanya bintu binudi kanuyi numona to; bua nanku kanuena mua kumanya ne nekuikala Kilisto to.

16 Nudi bindila bitshilualua ne nudi numona dilekedibua dia mibi yenu. Kadi monayi, didi tshipeta tshia meji a ditomboka; ne ditompakana dia meji enu edi didi diluila ku ngikadilu ya batatuenu, idi inupambuisha mu ditabuija dia bintu bidi kabiyiku to.

17 Ne wakabambila bintu bikuabu bia bungi bia nanku awu, ubambila ne kakuvua mua kuikala bupikudi kuenjibua to bua mibi ya bantu, kadi muntu yonsu uvua mua kupeta dikasa dimpa anyi dikasa dibi pa buloba apa bilondeshila ku didilombola dienda; bua nanku muntu yonsu uvua ulubuluka bilondeshila ku meji enda, ne muntu yonsu uvua utshimuna bilondeshila ku makanda enda; ne tshionsu tshivua muntu wenza katshivua bubi to.

18 Ne wakabayisha nanku, upambuisha mitshima ya ba bungi, ubakolesha mutu mu bubi buabu, eyowa, upambuisha bantu bakaji ba bungi, ne bantu baluma kabidi, bua kuenda masandi—ubambila pavua muntu ufua, atshi tshivua ndekelu wenda.

19 Mpindiewu muntu ewu wakaya kabidi ku bulaba bua Yeleshona, bua kuyisha bintu ebi munkatshi mua bantu ba Amona, bavua kukala bikala bantu ba Lamana.

20 Kadi monayi bavua ne lungenyi kupita Bena Nefi ba bungi; bualu bakamukuata, ne bakamusuika, ne bakaya nenda kumpala kua Amona, uvua muikala muakuidi munena ku mutu kua bantu aba.

21 Ne biakalua ne bakamupatuisha pambelu pa bulaba. Ne wakaya ku bulaba bua Gideona, ne wakabanga kubayisha pabu; ne kakapeta tshimpa to, bualu bakamukuata ne bakamusuika ne bakalua nenda kumpala kua muakuidi munena, ne mulumbuluishi munena wa mu bulaba kabidi.

22 Ne biakalua ne muakuidi munena wakamuambila ne: Bua tshinyi udi wendakana mu kunyangakaja njila ya Mukalenga? Bua tshinyi udi ulongesha bantu aba kakuakuikala Kilisto to, bua kukosa disanka diabu? Bua tshinyi udi uluisha mambi onsu a bambi bansantu?

23 Mpindiewu dîna dia muakuidi munena divua Gidona. Ne Koliholo wakamuambila ne: Bualu ntshiena ndongesha ngikadilu misenji ya batatuenu to, ne bualu ntshiena ndongesha bantu aba bua kudisuika panshi ku milulu ne midimu misenji idi bakuidi ba kala bateka, bua kunyengabu bukalenga ne bukôkeshi pa mutu pabu, bua kubashiyabu mu dipanga, bua kabambuludi mitu yabu to, kadi bikala bapuwishibua bilondeshila ku mêyi eba.

24 Nudi nuamba bantu aba badi bantu badikadila. Monayi, ndi ngamba ne badi mu bupika. Nudi nuamba ne mambi a kala awu adi malelela. Monayi, ndi ngamba ne kanuena bamanya to ne adi malelela.

25 Nudi nuamba ne bantu aba badi bantu bapîla ne bapambuka bua disambuka mikenji dia muledi umua. Monayi, ndi ngamba ne muana muteketa kena upîla bua bualu bua baledi benda to.

26 Ne nudi nuamba kabidi ne Kilisto nealua. Kadi monayi, ndi ngamba ne kanuena bamanya to ne kuakuikala Kilisto. Ne nudi nuamba kabidi ne nebamushipa bua mibi ya ba pa buloba—

27 Ne nudi nupambuisha bantu aba nanku bua kulonda ngikadilu misenji ya batatuenu, ne bilondeshila ku dijinga majinga enu nkayenu; ne nudi bashala nabi, bu muvuabi mena mu bupika, bua nuenu kudidisha ne budiavi ku midimu ya ku bianza biabu, bua kabakimi kuambulula mesu ne dikima to, ne bua kabakimi kuenzela manema ne diakalengela biabu to.

28 Eyowa, kabena bakima kuenzela bintu bidi bikala biabu to bua kabalu kufîkisha bakuidi babu munda, badi bababatshika ku tshikokedi bilondeshila ku majinga abu, ne bavua babaluisha ku ditabuija, ku ngikadilu yabu ne bilota biabu ne majinga abu ne bimônyi biabu ne bivua bu mudi malu masokoka abu, ne bu bobu kabayi benza bilondeshila ku mêyi abu to bavua bafîkisha muntu udi kayi mumanyika to munda, udibu bamba ne Nzambi—muntu utu kayi muanji kumueneka anyi kumanyika to, utu kayi muanji kuikala anyi wikala nansha.

29 Mpindiewu pakamona muakuidi munena ne mulumbuluishi munena dipapa dia mutshima wenda, eyowa, pakamonabu ne uvua mena upenda Nzambi, bakabenga kufila diandamuna nansha dimua ku mêyi enda to; kadi bakamusuikisha; ne bakamufila mu bianza bia bampulushi, ne bakamutuma ku bulaba bua Zalahemela, bua kuluabu nenda kumpala kua Alama, ne mulumbuluishi munena uvua ngovena mu bulaba bonsu.

30 Ne biakalua ne pakaluabu nenda kumpala kua Alama ne mulumbuluishi munena, wakatungunuka mu mushindu wa momumua bu mu bulaba bua Gideona; eyowa, wakatungunuka kupenda Nzambi.

31 Ne wakajuka bua kuakula ne mêyi makola kumpala kua Alama, ne wakapenda bakuidi ne balongeshi, ubabanda bua kupambuisha kua bantu ku ngikadilu mitshimbakana ya batatuabu, bua kuikala ne budiavi ku midimu ya bantu.

32 Mpindiewu Alama wakamuambila ne: Udi mumanya ne katuena ne budiavi ku midimu ya bantu aba to; bualu mona mvua mukuata mudimu mena katshia ku mbangilu wa dikôkesha dia balumbuluishi tô ne mpindiewu, ne bianza bianyi nkayanyi bua didikuatshisha dianyi, nansha bua ngendu yanyi ya bungi miaba yonsu mu bulaba bua kumanyisha bantu banyi dîyi dia Nzambi.

33 Ne nansha bua midimu ya bungi imvua mukuata mu ekelezia, tshitu muanji kufutshibua nansha mena senina umua bua mudimu wanyi to; anyi umua wa ku bana betu to, kabiyi amu pa kumbusha bua nkuasa wa tshilumbuluilu; ne apu tuvua bafutshibua amu bilondeshila ku mikenji bua diba dietu.

34 Ne mpindiewu, bu mutudi katuyi bafutshibua tshintu nansha tshimua to bua midimu yetu mu ekelezia, tshipeta tshimpa kayi tshitudi tupeta bua kukuata mudimu mu ekelezia, amu pa kumbusha kabiyi bua kumanyisha bulelela, bua tuetu kusanka bua disanka dia bana betu?

35 Apu bua tshinyi udi wamba ne tudi tuyisha bantu aba bua kupeta makasa, pawudi mumanya, wewa nkayeba, ne katuena tupeta makasa to? Ne mpindiewu, udi witabuija ne tudi tudinga bantu aba, ne ki tshidi tshibapesha disanka nanku mu mitshima yabu anyi?

36 Ne Koliholo wakamuandamuna ne, Eyowa.

37 Ne pashisha Alama wakamuambila ne: Udi witabuija ne kudi Nzambi anyi?

38 Ne wakandamuna ne, To.

39 Mpindiewu Alama wakamuambila ne: Neuvila kabidi ne kudi Nzambi, ne neuvila kabidi Kilisto anyi? Bualu mona, ndi nkuambila ne, ndi mumanya ne kudi Nzambi, ne kabidi ne Kilisto nealua.

40 Ne mpindiewu tshijadikilu kayi tshiwudi natshi ne kakuena Nzambi to, anyi ne Kilisto kena ulua to? Ndi nkuambila ne kuena natshi nansha tshimua to, amu pa kumbusha muaku weba.

41 Kadi, mona, ndi ne bintu bionsu bu tshijadikilu ne bintu ebi bidi bilelela; ne wewa peba udi ne bintu bionsu bu bujadiki kûdi ne bidi bilelela; ne neubivila anyi? Udi witabuija ne bintu ebi bidi bilelela anyi?

42 Mona, ndi mumanya ne udi witabuija, kadi nyuma wa mafi udi mukukuata, ne udi mubenga Nyuma wa Nzambi bua kikadi ne muaba munda mueba to; kadi diabulu udi ne bukola kûdi, ne udi ukutuala eku ne eku, wenzela madimu adi mua kubutula bana ba Nzambi.

43 Ne mpindiewu Koliholo wakambila Alama ne: Wewa mundeja tshimanyinu, bua ngitabujijibua ne kudi Nzambi, eyowa, ndeja ne yeya udi ne bukola, ne pashisha nengitabujijibua bua bulelela bua mêyi eba.

44 Kadi Alama wakamuambila ne: Uvua mupeta bimanyinu bikumbana; neutêta Nzambi weba anyi? Newamba ne, Ndeja tshimanyinu, pawudi ne bujadiki bua bana benu bonsu aba, ne kabidi bambi bansantu bonsu? Mifundu idi miteka kumpala kueba, eyowa, ne bintu bionsu bidi bileja ne kudi Nzambi; eyowa, mena buloba, ne bintu bionsu bidi pa mpala wabu, eyowa, ne kunyunguluka kuabu, eyowa, ne kabidi mabulungu onsu adi enda mu tshibidilu tshiawu adi ajadika ne kudi Mufuki Mukulu.

45 Ne utshidi wendakana, mu kupambuisha mitshima ya bantu aba, mu kubajadikila ne kakuena Nzambi to? Ne neuvila kabidi majadiki onsu â anyi? Ne wakamba ne: Eyowa, nemvila, pa kumbusha wewa mundeja tshimanyinu.

46 Ne mpindiewu biakalua ne Alama wakamuambila ne: Mona, ndi ne kanyinganyinga bua dipapa dia mutshima weba, eyowa, bualu anyima weba neabutuka pawikala utshidi ukolela ku nyuma wa bulelela.

47 Kadi mona, bidi bipita bimpa ne anyima weba ajimina pamutu pa wewa kuikala njila wa kuluisha anyima ya bungi ku dinyanguka ku mafi eba ne mêyi eba a lubombu; bua nanku wewa muvila kabidi, mona Nzambi neakutûta, bua ulua kamama, bua kunzuludi kabidi mukana nansha, bua kudinga kabidi bantu aba to.

48 Mpindiewu Koliholo wakamuambila ne: Ntshiena mvila ne Nzambi udiku to, kadi ntshiena ngitabuija ne kudi Nzambi to; ne ndi ngamba kabidi ne, kuena mumanya ne kudi Nzambi to; ne pa kumbusha wewa mundeja tshimanyinu, ntshiakuitabuija to.

49 Mpindiewu Alama wakamuambila ne: Nekupesha etshi bu tshimanyinu: neuluishibua kamama, bilondeshila ku mêyi anyi; ne ndi ngamba ne, mu dîna dia Nzambi, neuluishibua kamama; bua kuakudi kabidi to.

50 Mpindiewu pakamba Alama mêyi â, Koliholo wakaluishibua kamama, bualu kavua mua kuakula kabidi to, bilondeshila ku mêyi a Alama.

51 Ne mpindiewu pakamona mulumbuluishi munena nanku, wakôlola tshianza tshienda ne wakafundila Koliholo, wamba ne: Udi muitabuijijibua bua bukola bua Nzambi anyi? Mudi nganyi muwuvua ujinga ne Alama aleja tshimanyinu tshienda? Udi musua ne atatshisha bakuabu bua kukuleja tshimanyinu anyi? Mona, wakuleji tshimanyinu; ne mpindiewu newela mpata kabidi anyi?

52 Ne Koliholo wakôlola tshianza ne wakafunda, wamba ne: Ndi mumanya ne ndi kamama, bualu ntshiena mua kuakula to; ne ndi mumanya ne kakuena tshintu nansha tshimua to tshidi mua kunduisha nanku awu to amu pa kumbusha bukola bua Nzambi; eyowa, ne mvua mumanya diba dionsu ne kuvua Nzambi.

53 Kadi monayi, diabulu wakandinga; bualu wakammuenekela mu tshimfuanyi tshia muanjelu, ne wakangambila ne: Ndâku ne pingaja bantu aba, bualu badi bonsu bapambuka bikala balonda Nzambi udi kayi mumanyika to. Ne wakangambila ne: Kakuena Nzambi to; eyowa, ne wakandongesha tshimvua ne bua kuamba. Ne mvua mulongesha mêyi enda; ne ngaka’alongesha bualu avua asankisha meji a mu mubidi; ne ngaka’alongesha mena tô ne pangakapeta tshipeta tshimpa tshia bungi, mua ne ngakitabuija bulelela ne avua malelela; ne bua bualu ebu ngakakolela ku bulelela, mena tô ne ngakadituadila mutshipu munena ewu pa mutu panyi.

54 Mpindiewu pakambaye nanku awu, wakatendekena Alama ne asambila Nzambi, bua mutshipu ewu umbushibua kudiye.

55 Kadi Alama wakamuambila ne: Biumbushibua mutshipu ewu bua kûdi neupambuisha kabidi mitshima ya bantu aba; bua nanku, nebikuenzekela mena bu muikala Mukalenga musua.

56 Ne biakalua ne mutshipu ewu kawakumbushibua kudi Koliholo to; kadi wakipatshibua ne wakendakana ku nzubu ne ku nzubu mu kulomba biakudia bienda.

57 Mpindiewu dimanya dia tshivua tshifikila Koliholo diakatangalaka katataka mu bulaba bonsu; eyowa, mulumbuluishi munena wakatuma dimanyisha kudi bantu bonsu mu bulaba, umanyisha bavua bitabuija mêyi a Koliholo ne bavua ne tshia kukudimuna mutshima lukasa, bua bitungu bia momumua kabilu kulua kudibu to.

58 Ne biakalua ne bakitabujijibua bonsu bitangila bubi bua Koliholo; bua nanku bavua bonsu bakakudimuna moyo kabidi kudi Mukalenga; ne etshi tshiakajikija malu mabi a ku mushindu wa Koliholo. Ne Koliholo wakendakana ku nzubu ne ku nzubu, mu kulomba biakudia bua kudikuatshisha.

59 Ne biakalua ne pakayaye munkatshi mua bantu, eyowa, munkatshi mua bantu bavua babulukangana ne Bena Nefi ne bavua badinyika ne Bena Zolama, bualu bavua balombodibua kudi muntu muena dîna dia Zolama—ne pavuaye uya munkatshi muabu, monayi, wakipatshishibua ne wakadiatshibua tô ne pakafuayi.

60 Ne nanku tudi tumona ndekelu wa ewu uvua unyangakajanjila ya Mukalenga; ne nanku tudi tumona ne diabulu kakukuatshisha bana benda ku dituku dia ndekelu to, kadi udi ubapulumuna panshi lubilu mu ngena.