1 Mpindiewu biakalua ne kunyima kua nshikidilu wa Koliholo, bualu Alama uvua mupeta ngumu ne Bena Zolama bavua banyangakaja njila ya Mukalenga, ne Zolama, uvua mulombodi wabu, uvua ukoka mitshima ya bantu bua kuinamina mpingu ya kamama, mutshima wenda wakabanga kabidi kukenga bua malu mabi a bantu.

2 Bualu tshivua tshiena bualu tshia kanyinganyinga kakola ka Alama bua kumvua ne kuvua malu mabi munkatshi mua bantu; bua nanku mutshima wenda uvua munyingalala menamena bua ditapuluka dia Bena Zolama kudi Bena Nefi.

3 Mpindiewu Bena Zolama bakadisangisha pamua mu bulaba buvuabu babikila ne Antionuma, buvua ku esete wa bulaba bua Zalahemela, buvua buikala pabuipi ne mikalu ne muelelu wa mbuwa, buvua ku sude wa bulaba bua Yeleshona, buvua kabidi ne mikalu ne tshipela ku sude, tshipela tshivua tshiwula ntenta ne Bena Lamana.

4 Mpindiewu Bena Nefi bavua batshina bikola ne Bena Zolama bavua mua kubuela mu diumvuangana ne Bena Lamana, ne ne bivua mua kuluija dijimija dinena ku luseka lua Bena Nefi.

5 Ne mpindiewu, bumuvua kuyisha kua dîyi ne bukola bua bungi budi mua kukoka bantu bua kuenza malu adi makana—eyowa, kuvua kupeta mudimu mukola pa meji a bantu kupita muela wa mvita, anyi tshintu tshikuabu tshionsu, tshivua tshibafikila—bua nanku Alama wakela meji ne bivua bikengedibua bua batêta buimpa bua dîyi dia Nzambi.

6 Bua nanku wakangata Amona, ne Alona, ne Omenele; ne wakashiya Himini mu ekelezia wa ku Zalahemela; kadi wakaya ne basatu aba, ne Amuleke ne Zêzeloma kabidi, bavua bikala ku Meleke; ne wakangata kabidi babidi ba ku bana benda ba baluma.

7 Mpindiewu kakaya ne muana wa kumpala wenda wa baluma to, ne dîna dienda divua Helamana; kadi mêna a bakayaye nabu avua Shibulona ne Koliantona; ne â avua mêna a bakaya nenda munkatshi mua Bena Zolama, bua kubayisha dîyi.

8 Mpindiewu Bena Zolama bavua batapuluki ba ku Bena Nefi; bua nanku dîyi dia Nzambi dikavua dibayisha.

9 Kadi bavua bapona mu matupakana manena, bualu bakabenga batangila bua kulama mikenji ya Nzambi, ne mikandu yenda, bilondeshila ku mikenji ya Mose to.

10 Anyi kabavua balonda midimu ya ekelezia, bua kutungunuka mu disambila ne milombu kudi Nzambi dituku dionsu, bua kababuedi mu ditêtshibua to.

11 Eyowa, mu tshikosu, bavua banyangakaja njila ya Mukalenga misangu ya bungi menamena; bua nanku, bua tshiena bualu etshi, Alama ne bana babu bakaya mu bulaba bua kubayisha dîyi.

12 Mpindiewu, pakaluabu mu bulaba, monayi, bakakema bua kusangana ne Bena Zolama bavua bibaka nsunagoga ya bungi, ne ne bavua badisangisha pamua mu dituku dimua dia lumingu, divuabu babikila ne dituku dia Mukalenga; ne bavua batendelela bilondeshila mushindu uvua Alama ne bana babu kabavua banji kumona to;

13 Bualu bavua bibaka muaba munkatshi-nkatshi mua nsunagoga, muaba wakuimana, uvua kûlu kupita mutu; ne amu muntu umua uvua mua kuimana pa mutu pawu.

14 Bua nanku, ewu yonsu uvua ujinga kutendelela uvua ne tshia kuya ne kuimana pa mutu pawu, ne kôlola bianza bienda mu diûlu, ne kubila ne dîyi dikola, wamba:

15 Nzambi munsantu, munsantu; tudi tuitabuija ne udi Nzambi, ne tudi tuitabuija ne udi munsantu, ne uvua nyuma, ne udi nyuma, ne newikala nyuma bua kashidi.

16 Nzambi Munsantu, tudi tuitabuija ne wakatutapulula kudi bana betu; ne katuena tuitabuija ngikadilu wa bana betu, uvua mubashila bua kupanga kua lungenyi kua batatuabu, to; kadi tudi tuitabuija ne uvua mutusungula bua kuikala bana beba bansantu; ne udi kabidi mutumanyisha ne kakuakuikala Kilisto to.

17 Kadi udi momumua makelela mushala, lelu, ne bua kashidi; ne uvua mutusungula bua tupandishibua, padi bonsu badi batunyungulula badi basungudibua bua kuimanshibua mu ngena bua tshiji tshieba; bualu bunsantu ebu, Ô Nzambi, tudi tukuela tuasakidila; ne tudi tukuela kabidi tuasakidila bualu udi mutusungula, bua katupambuishibu bua kulonda ngikadilu misenji ya bana betu, idi mibasuika ku ditabuija dia Kilisto, idi milaluka mitshima yabu kula neba, Nzambi wetu.

18 Ne kabidi tudi tukuela tuasakidila, Ô Nzambi, bualu tudi basungudibua ne bantu bansantu. Amena.

19 Mpindiewu biakalua ne kunyima kua Alama ne bana babu ne bana benda ba baluma bumvua masambila â, bakatamba kukema.

20 Bualu monayi, muntu yonsu uvua uya ne wenza masambila a momumua â.

21 Mpindiewu bavua babikila muaba ewu ne Lameumpetoma, tshidi mu diandamuna dia miakulu tshiamba ne tshîmanyinu tshia tshijila.

22 Mpindiewu, ku muaba awu bavua, muntu yonsu, benza disambila dia momumua edi kudi Nzambi, bela Nzambi wabu tuasakidila bualu uvua mubasungula, ne bualu kavua mubapambula bua kulonda ngikadilu wa bana babu to, ne bualu mitshima yabu kayivua midingibua bua kuitabuija bintu bidi bilua to, bidibu kabayi bamanya nansha.

23 Mpindiewu, kunyima kua kutendelela ku mushindu ewu, bavua bapingana ku mbelu, kabayi bakula bua Nzambi kabidi tô ne badibu badisangisha pamua kabidi ku tshîmanyinu tshia tshijila, bua kutendelela bilondeshila mushindu wabu.

24 Mpindiewu pakamona Alama nanku mutshima wenda wakanyingalala; bualu wakamona ne bavua bantu babi ne ba tshitshu; eyowa, wakamona ne mitshima yabu ivua miteka ku ngolo, ne pa mpalata, ne pa mishindu yonsu ya bintu bia mushinga.

25 Eyowa, ne wakamona ne mitshima yabu mibandishibua ne ku didiamba dikola, ne diditambisha diabu.

26 Ne wakabandisha dîyi dienda mu diûlu, ne kubila, wamba: Ô, Mukalenga, mutantshi bula kayi uwalekela ne basadidi beba basomba panshi apa mu musunyi, bua kumona bubi bunena nanku munkatshi mua bana ba bantu?

27 Mona, Ô Nzambi, badi babila kûdi, ne kadi mitshima yabu idi midînyibua mu diditambisha diabu. Mona, Ô Nzambi, badi babila kûdi ne mikana yabu, padibu bikala buwulakana ne diditambisha, mena badimona bantu banena, bua bintu bia tshianana bia pa buloba.

28 Mona, Ô Nzambi, bilamba biabu bia mushinga mukola, ne tukanu tuabu, ne bikanu biabu bia ku maboku, ne bilenga biabu bia ngolo, ne bintu bionsu biabu bia mushinga mukola bidi bidibu badilengeja nabi; ne mona, mitshima yabu idi miteka kudibi, ne kadi badi babila kûdi ne bamba—Tudi tukuela tuasakidila, Ô Nzambi, bualu tudi bantu basungudibua kûdi, pafua bakuabu.

29 Eyowa, ne badi bamba ne udi mubamanyisha ne kakuakuikala Kilisto to.

30 Ô Mukalenga Nzambi, mutantshi bula kayi uwalekela ne bubi bua nanku ne kupanga lulamatu bikala munkatshi mua bantu aba? Ô Mukalenga, suaku umpesha makanda, bua ngikala mua kuambula bilema bianyi. Bualu ndi mulema, ne bubi bua nanku munkatshi mua bantu aba budi bukengesha anyima wanyi.

31 Ô Mukalenga, mutshima wanyi udi ne dibungama dipita; suaku usamba moyo wanyi mu Kilisto. Ô Mukalenga, suaku unganyishila ne ngikala ne makanda, ne nkenga ne ditukija ntatu eyi yanduila, bua bualu bua malu mabi a bantu aba.

32 Ô Mukalenga, suaku usamba anyima wanyi, ne umpesha diakalengela, ne basadidi nanyi badi nanyi kabidi—eyowa, Amona, ne Alona, ne Omenele, ne Amuleke ne Zêzeloma, ne bana banyi ba baluma babidi—eyowa, ubasamba mena bonsu aba, Ô Mukalenga. Eyowa, suaku usamba anyima yabu mu Kilisto.

33 Suaku ubanyishila ne bikala ne makanda, ne bitaba ntatu yabu yabaluila bualu bua malu mabi a bantu aba.

34 Ô Mukalenga, suaku utuanyishila ne tuikala ne diakalengela dia kulua nabu kabidi mu Kilisto.

35 Mona, Ô Mukalenga, mioyo yabu idi ne mushinga mukola, ne ba bungi babu badi bana betu; bua nanku, Ô Mukalenga, utupesha bukola ne lungenyi bua tupingaja bana betu aba kabidi kûdi.

36 Mpindiewu biakalua ne pakamba Alama mêyi â, ne wakatenteka bianza bienda pa mutu pa bonsu bavua nenda. Ne monayi, pakatentekaye bianza pa mutu pabu, bakuwula ne Nyuma wa Tshijila.

37 Ne kunyima bakatapulukangana muntu ne muntu, kabayi bela meji buabu nkayabu bua tshiadiabu, anyi tshianuabu, anyi tshiavualabu to.

38 Ne Mukalenga wakabapesha bua majinga abu bua kabumvu nzala to, anyi bua kabumvu nyota to; eyowa, ne wakabapesha makanda, bua kabakengi ntatu wa bishi to, amu yoyi midînyibua kudi disanka dia Kilisto. Mpindiewu ebi bikenzeka bilondeshila ku disambila dia Alama; ne ebi bualu wakasambila ne ditabuija.