1 Ne biakalua ne bakaya, ne bakabanga kuyisha dîyi dia Nzambi kudi bantu, babuela mu nsunagoga yabu, ne mu nzubu yabu; eyowa, ne bakayisha mena dîyi mu misêsu yabu.

2 Ne biakalua ne kunyima kua kuenza mudimu mukola munkatshi muabu, bakabanga kupeta diakalengela munkatshi mua bapela ba mu bantu; bualu monayi, bavua bipatshibua mu nsunagoga yabu bua disunsuka dia bilamba biabu—

3 Bua nanku kabavua banyishibua bua kubuela mu nsunagoga yabu bua kutendelela Nzambi to, bualu bana babu bavua babamona bu bukoya; bua nanku bavua bapela; eyowa, bana babu bavua babamona ne bisota; bua nanku bavua bapela bu mudi ku bintu bia pa buloba; ne bavua bapela mu mitshima yabu.

4 Mpindiewu, bumuvua Alama ulongesha ne wakula kudi bantu pa mukuna wa Onida, musumba munena wa bantu wakalua kudiye, bavua bobu bavuaye wakula bualu buabu, bavua bapela mu mutshima, bua bupela buabu bu mudi ku bintu bia pa buloba.

5 Ne bakalua kudi Alama; ne umua uvua kumpala kuabu wakamuambila: Mona, bana betu aba nebenza tshinyi, bualu bantu bonsu badi babapetula bua bupela buabu, eyowa, ne nangananga bakuidi betu; bualu mbatuipata mu nsunagoga yetu ituvua benzela bikola bua kuyibaka ne bianza bietu; ne mbatuipata bua bupela buetu bupita; ne katuena ne muaba wa kutendelela Nzambi to; ne mona, netuenza tshinyi?

6 Ne mpindiewu pakumvua Alama nanku, wakakudimuka kudibu, mpala wenda mumutangila, ne wakatangila ne disanka dia bungi; bualu wakamona ne ntatu yabu ivua mibapuekesha bulelela, ne ne bavua balongolodibua bua kumvua dîyi.

7 Bua nanku kakakula kabidi kudi musumba mukuabu awu to; kadi wakôlola tshianza tshienda, ne wakabila kudi aba bakamonaye ne bavua bakudimuna mutshima, ne wakabambila:

8 Ndi mumona ne nudi ne didipuekesha mu mutshima ; ne pikalabi nanku, nudi babeneshibua.

9 Monayi muanenu wambi ne: Netuenza tshinyi?—bualu tudi bipatshibua mu nsunagoga yetu, ne katuena mua kutendelela Nzambi wetu to.

10 Monayi ndi nnuambila ne, nudi nuela meji ne kanuena mua kutendelela Nzambi amu pikalabi mu nsunagoga yenu anyi?

11 Ne menamena kabidi, ndi nuebeja ne, nudi nuela meji ne nudi ne kanuena ne tshia kutendelela Nzambi to amu musangu umua ku lumingu anyi?

12 Ndi nnuambila ne, bidi bimpa ne nudi bipatshibua mu nsunagoga yenu, bua nudipuekesha, ne bua nulonga lungenyi; bualu bidi bikengela ne nulonga lungenyi; bua bualu bua nudi bipatshibua ne bapetudibua kudi bana benu bua bualu bua bupela buenu bupita, nudi benzeja bua kudipuekesha mu mutshima; bualu biakakengela nuenzejibua bua kudipuekesha.

13 Ne mpindiewu, bualu nudi benzejibua bua kudipuekesha nudi babeneshibua; bualu muntu misangu mikuabu, padiye yeya muenzejibua bua kudipuekesha, udi ukeba dikudimuna dia mutshima; ne mpindiewu bushuwa, ewu yonsu udi ukudimuna mutshima neapeta lusa; ne udi upeta lusa ne unanukila tô ne ku ndekelu yeya neapandishibua.

14 Ne mpindiewu, bu mumvua munuambila, ne bualu nuvua benzeja bua kudipuekesha nudi babeneshibua, kanuena nuela meji ne badi badipuekesha nkayabu bua dîyi badi babeneshibua kupita anyi?

15 Eyowa, ewu udi udipuekesha nkayenda bulelela, ne ukudimuna mutshima ku mibi yenda, ne unanukila tô ne ku ndekelu, yeya neabeneshibua—eyowa, neabeneshibua bia bungi kupita aba badi benzeja bua kudipuekesha bua bupela buabu bupita.

16 Bua nanku, bobu badi badipuekesha kabayi benzeja bua kudipuekesha badi babeneshibua; anyi nanku, mu mêyi makuabu, mubeneshibua ngudi witabuija dîyi dia Nzambi, ne utambula kayi ne dipapisha dia mutshima to, eyowa, kayi uluishibua bua kumanya dîyi to, anyi mena wenzejibua bua kumanya, kumpala kua bobu kuitabuija.

17 Eyowa, kudi ba bungi badi bamba ne: Bu wewa musua kuteleja tshimanyinu tshia mu diûlu, apu netumanya bushuwa; pashisha netuitabuija.

18 Mpindiewu ndi ngebeja, etshi nditabuija anyi? Monayi, ndi nnuambila ne, To; bualu muntu yeya mumanya tshintu kena bualu bua kuitabuija to, bualu udi mutshimanya.

19 Ne mpindiewu, bu mudi mutshipibua mupita ewu udi mumanya disua dia Nzambi ne kayi udienza to, kupita udi amu witabuija, anyi amu udi muenzejiba kuitabuija, ne udi upona mu disambuka dia mikenji anyi?

20 Mpindiewu jingululayi bualu ebu. Monayi, ndi nnuambila, bualu ne bualu budi bushilangana; ne muntu yonsu neapeta bilondeshila ku mudimu wenda.

21 Ne mpindiewu bu mungambi bitangila ditabuija—ditabuija kadiena kuikala ne dimanya dijima dia malu to; bua nanku biwikala ne ditabuija udi ne ditekemena ku malu adi kâyi mamona to, adi mikala malelela.

22 Ne mpindiewu, monayi, ndi nnuambila ne, ndi musua ne nuvuluka, ne Nzambi udi ne lusa kudi bonsu badi bitabuija mu dîna dienda; bua nanku udi ujinga, diambedi, ne nuitabuija, eyowa, mena dîyi dienda.

23 Ne mpindiewu, udi upesha bantu dîyi dienda ku njila wa banjelu, eyowa, ba baluma nkayabu to kadi ne bakaji kabidi. Mpindiewu ebi nki bionsu to; bana bateketa badi bapeshibua mêyi misangu ya bungi, adi apuwisha bena lungenyi ne bantu balonga.

24 Ne mpindiewu, bana betu bananga, bu munudi nujinga bua kumanya kundi tshinyi tshinuenza bualu batatshishibua ne bipatshibua—mpindiewu ntshiena njinga bua nutshinka ne ndi musua kunulumbuluisha to, pa kumbusha bilondeshila ku tshidi bulelela—

25 Bualu ntshiena musua kuamba ne bonsu buenu nuvua benzeja bua kudipuekesha to; bualu ndi ngitabuija bulelela ne kudi bamua munkatshi muenu bavua mua kudipuekesha nkayabu, nansha mâlua abu mikala mushindu kayi.

26 Mpindiewu, bu mungambi bitangila ditabuija—ne kadivua dimanya dijima to—mena nanku bidi bua mêyi anyi. Kanuena mua kumanya bua bushuwa buawu musangu umua to, tô ne bujima, kupita tô ne ditabuija didi dikala dimanya dijima.

27 Kadi monayi, binuabika ne kujula makokeshi enu, mena ne ku didikija dia mêyi anyi, ne kuenzela kanungu ka ditabuija, eyowa, mena binuapanga kukeba kupita kujinga kuitabuija, lekelayi dijinga edi dienza mudimu munda muenu, mena tô ne panuitabuija mu mushindu unudi mua kushiya muaba bua tshitupa tshia mêyi anyi.

28 Mpindiewu, netufuanyikija dîyi ku dimînu. Mpindiewu, binuashiya muaba, bua ne dimînu dimona mua kukunyibua mu mutshima wenu, monayi, bikaladi dimînu dilelela, anyi dimînu dimpa, binuikala kanuyi badimansha to bua dipanga ditabuija dienu, mu mushindu wa ne nenukolela Nyuma wa Mukalenga, monayi, nedibanga kudiunda mu tshiadi tshienu; ne panumvua manyunganyi a didiunda â, nenubanga kuamba munda muenu ne—Dimînu edi didi ne tshia kuikala dimpa, anyi ne muaku udi muimpa, bualu diabangi kunenesha anyima wanyi; eyowa, diabangi kutokesha ngumvuilu wanyi, eyowa, diabangi kuikala dilenga kundi.

29 Mpindiewu monayi, etshi katshiakudiundisha ditabuija dienu anyi? Ndi nnuambila ne, Eyowa; nansha nanku kadiena dikola dilua dimanya dijima to.

30 Kadi monayi, bu mudi dimînu didiunda, ne ditoloka, ne dibanga kusasa, pashisha nudi ne tshia kuamba ne dimînu didi dimpa; bualu monayi didi didiunda, ne didi ditoloka, ne didi dibanga kusasa. Ne mpindiewu, monayi, etshi katshiakukolesha ditabuija dienu anyi? Eyowa, netshikolesha ditabuija dienu: bualu nenuamba ne ndi mumanya ne didi dimînu dimpa; bualu monayi didi ditoloka ne dibanga kusasa.

31 Ne mpindiewu, monayi, nudi bamanya bushuwa ne edi didi dimînu dimpa anyi? Ndi nnuambila ne, Eyowa; bualu dimînu dionsu didi dikuama bimuma bia momumua nadi.

32 Bua nanku, dimînu diodi disasa didi dimpa, kadi diodi kadiyi disasa to, monayi kadiena dimpa to, bua nanku didi dimanshibua.

33 Ne mpindiewu, monayi, bualu nuvua batêta didikija, ne nuvua bakuna dimînu, ne diadiundi, ne diatoloki, ne diabangi kusasa, nudi ne tshia kumanya ne dimînu didi dimpa.

34 Ne mpindiewu, monayi, dimanya dienu didi dijima anyi? Eyowa, dimanya dienu didi dijima ku bualu abu, ne ditabuija dienu didi dilala; ne didi nanku bualu nudi bamanya, bualu nudi bamanya ne dîyi ndidiundisha anyima yenu, ne nudi bamanya kabidi ne nditoloka, ne ngumvuilu wenu udi ubanga kutokeshibua, ne meji enu abanga kutanta.

35 Ô nanku, kadiena dilelela anyi? Ndi nnuambila ne, Eyowa, bualu didi muinda; ne tshionsu tshidi muinda, tshidi tshimpa, bualu tshidi tshijunguludibua, bua nanku nudi ne tshia kumanya ne tshidi tshimpa; ne mpindiewu monayi, kunyima kua nuenu balabula muinda ewu dimanya dienu didi dijima anyi?

36 Monayi ndi nnuambila ne, To; anyi nudi ne tshia kanuena nulekela ditabuija, bualu nudi benzela ditabuija dienu amu bua nuenu kutêta didikija bua kumanya dimînu ne didi dimpa.

37 Ne monayi, padi mutshi ubanga kusasa, nenuamba ne: Tuwudishayi ne ntema mikola, bua ulepesha miji, bua usasa, ne utukuamina bimuma. Ne mpindiewu monayi, panuawudisha ne ntema ya bungi neulepesha miji, ne neusasa, ne neukuama bimuma.

38 Kadi nuenu balengulula mutshi, ne kanuyi nuela meji bua kuwudisha to, monayi kawakulepesha muji nansha umua to; ne palua kapia ka diba ne kawôsha, neufubidila bualu kawena ne miji mila to, ne nenuwujula ne nenuwimansha.

39 Kadi, ebi kabiena ne bualu dimînu kadivua dimpa to, anyi mbualu bimuma biadi kabivua bijingibua to; kadi mbualu buloba buenu budi bua munanga, ne kanuena nubenga kudisha mutshi, bua nanku kanuena nupeta bimuma biawu to.

40 Ne nanku, panudi nubenga kudisha dîyi, nutekemena tshimuma tshiadi ne disu dia ditabuija, kanuena mua kupola bimuma bia mutshi wa moyo nansha.

41 Kadi panuadisha dîyi, eyowa, nudisha mutshi padiwu usasa, ku ditabuija dienu ne dinanukila dinena, ne ne ditukija, nutekemena tshimuma tshiawu, newela miji; ne monayi newikala mutshi udi ukola tô ne mu moyo wa kashidi.

42 Ne bualu bua dinanukila dienu ne ditabuija dienu ne ditukija dienu mu didisha dia dîyi, bua wela miji munda muenu, monayi, ku kakesa ku kakesa nenupola tshimuma tshiadi, tshidi mushinga mupita, tshidi tshilenga kupita bionsu bidi bilenga, ne tshidi tshitoka kupita bionsu bidi bitoka, eyowa, ne tshikezuka kupita bionsu bidi bikezuka; ne nenudia bimuma ebi bia bungi tô ne panûkuta, bua kanumvu nzala kabidi to, anyi kanumvu nyota to.

43 Pashisha, bana betu, nenupola mafutu a ditabuija dienu, ne dinanukila dienu, ne ditukija dienu, ne bulekelelu buenu, bikala bindila bua mutshi unukuamina bimuma.