1 Ne mpindiewu biakalua ne kunyima kua Alama mubambila mêyi â wakasomba panshi, ne Amuleke wakajuka ne wakabanga kubalongesha, wamba ne:

2 Bana betu, ndi ngela meji ne bidi bikola bua kuitaba ne nudi bapanga bintu bivua biamba bitangila dilua dia Kilisto, utudi balongesha ne udi Muana wa Nzambi; eyowa, ndi mumanya ne bintu ebi bivua binulongesha bia bungi kumpala kua ditapuluka dienu kutudi.

3 Ne bu munuajingi ne muanetu wa baluma munanga anumanyisha tshinudi ne bua kuenza, bua ntatu yenu; ne wanuambidi kakesa bua kulongolola meji enu; eyowa, ne wanukankamiji bua kuikala ne ditabuija ne ditukija—

4 Eyowa, nansha bua nuikala ne ditabuija dia bungi nansha mena bua kukuna dîyi mu mitshima yenu, bua nutêta didikija buimpa buadi.

5 Ne tuvua bamona ne lukonku lunena ludi mu meji enu ludi lua ne dîyi ne didi kudi Muana wa Nzambi, anyi ne kakuakuikala Kilisto to.

6 Ne nuakamona kabidi ne muanetu wa baluma uvua munushikija, misangu ya bungi, ne dîyi didi munda mua Kilisto bua lupandu.

7 Muanetu uvua mutêla mêyi a Zenose, ne disungila didi dilua ku njila wa Muana wa Nzambi, ne uvua mutela kabidi Zenoke; ne uvua muleja kabidi mêyi a Mose, bua kushikija ne bintu ebi bidi bilelela.

8 Ne mpindiewu, monayi, nennujadikila nkayanyi ne bintu ebi bidi bilelela. Monayi, ndi nnuambila, ne ndi mumanya ne Kilisto nealua munkatshi mua bana ba bantu, bua kuangataye mapanga a bantu benda pa mutu penda, ne neapikula bua mibi ya ba pa buloba; bualu Mukalenga Nzambi uvua muamba nanku.

9 Bualu bidi bikengedibua ne bupikudi buenzejibua; bualu bilondeshila ku dilongolola dinena dia Nzambi wa Tshiendelela bupikudi budi ne tshia kuenjibua, anyi bukua bantu bonsu budi ne tshia kufua kakuyi diepuka to; eyowa, bonsu mbapapa; eyowa bonsu mbapona ne badi bajimina, badi ne bua kufua pa kumbusha mu bupikudi budi bukengedibua bua kuenzejibua.

10 Bualu bidi bikengedibua ne kuikalaku mulambu munena ne wa ndekelu; eyowa, mulambu wa muntu to, anyi wa nyama to, anyi wa mishindu yonsu ya nyunyi to; bualu kawakuikala mulambu wa muntu to; kadi udi ne tshia kuikala mulambu udi kawuyi ndekelu ne wa tshiendelela.

11 Mpindiewu kakuena muntu udi mua kulambula mashi enda nkayenda apikula bua mibi ya mukuabu to. Mpindiewu, padi muntu mushipa muntu, monayi mikenji yetu, idi milulama, neyangata moyo wa muanabu anyi? Ndi nnuambila ne, To.

12 Kadi mikenji idi ilomba moyo wa udi mushipa; bua nanku kakuena mua kuikala tshintu nansha tshimua tshidi katshiyi tshikengela bupikudi budi kabuyi ndekelu tshiakumbana bua mibi ya ba pa buloba to.

13 Bua nanku, bidi bikengedibua ne kuikalaku mulambu munena ne wa ndekelu, ne pashisha ne kuikala, anyi bidi bikengedibua ne kuikala, dikandika dia kumatshisha kua mashi panshi; pashisha mikenji ya Mose neikumbajibua; eyowa, ne kaleta ne katoba konsu nekakumbajibua, ne nansha kamua kakakujimina to.

14 Ne monayi, etshi ki diumvuija dijima dia mikenji, katupa konsu katangila ku mulambu munena ne wa ndekelu awu; ne mulambu munena ne wa ndekelu awu newikala Muana wa Nzambi, eyowa, wa tshiendelela ne udi kawuyi ndekelu to.

15 Ne nanku neatuala lupandu kudi bonsu bitabuija mu dîna dienda; etshi tshidi kipatshila ka mulambu wa ndekelu ewu, bua kutuala munda mua lusa, udi mutamba bululama bukola, ne upesha bantu mushindu wa bobu kuleja ditabuija didi difila dikudimuna dia mutshima.

16 Ne nanku lusa ludi mua kukumbaja milombu ya bululama, ne kubanyungulula ne maboku a bulami, kadi muntu udi kayi uleja ditabuija didi difila dikudimuna dia mutshima to udi udifila ku mukenji mujima wa milombu ya bululama; bua nanku dilongolola dinena ne dia tshiendelela dia disungila didi difidibua amu bua muntu udi ne ditabuija didi difila dikudimuna dia mutshima.

17 Bua nanku Nzambi anuanyishila, bana betu, ne nubanga kuenzela ditabuija dienu bua kukudimuna mutshima, ne nubanga kubikila dîna dienda dia tshijila, bua anufuila lusa;

18 Eyowa, bilayi kudiye bua lusa; bualu udi ne bukitu bua kupandisha.

19 Eyowa, dipuekeshayi, ne tungunukayi mu disambila kudiye.

20 Bilayi kudiye panudi mu madimi enu, eyowa, bua bisumbu bia bimuna bienu.

21 Bilayi kudiye mu nzubu yenu, eyowa, bua ba mu nzubu yenu, mu dinda, munda munya, ne mu dilolo.

22 Eyowa, bilayi kudiye bua kuimanyina bukola bua bena lukuna benu.

23 Eyowa, bilayi kudiye bua kuimanyina diabulu, udi muena lukuna wa buakana bonsu.

24 Bilayi kudiye bua bikunyibua bia mu madimi enu, bua nulubuluka buabi.

25 Bilayi kudiye bua bisumbu bia bimuna bia mu madimi enu, bua bivula.

26 Kadi ebi kabiena bionsu to; nudi ne tshia kulomba ne anyima yenu mijima mu tuzubu tuenu tua tshisokomenu, ne mu miaba misokoka yenu, ne mu tshipela tshienu.

27 Eyowa, ne panudi kanuyi nubila kudi Mukalenga to, mitshima yenu ikala miwula, midifila kudiye mu disambila misangu yonsu bua diakalengela dienu, ne bua diakalengela dia bonsu badi pabuipi nuenu kabidi.

28 Ne mpindiewu monayi, bana betu bananga, ndi nnuambila ne, kanutshinki ne ebi ki bionsu to; bualu kunyima kua nuenu benza bintu bionsu ebi, nuenu babenga kuambuluisha bakengi, ne badi butaka, ne kanuyi nukumbula babêdi ne batatshishibua, ne kanuyi nuabanyinangana bintu bienu ne badi ne dikenga, panudi bikala nabi—ndi nnuambila ne, nuenu kanuyi tshintu nansha tshimua tshia ku bintu ebi to, monayi, kusambila kuenu kudi tshianana, ne kakuena kukuata mudimu to, ne nudi bantu ba mpala ibidi badi bavila ditabuija.

29 Bua nanku, nuenu kayi nuvuluka bua kuikala ne lusa to, nudi bu mudi bisota, bidi bapeluji ba biamua bimansha (bikala kabiyi ne mushinga to) ne bantu babidiata mu makasa.

30 Ne mpindiewu, bana betu, ndi musua ne, kunyima kua nuenu bapeta majadiki a bungi nanku, bualu mifundu ya tshijila idi ijadika bua bintu ebi, nubanga kulua ne nukuama bimuma bua dikudimuna dia mutshima.

31 Eyowa, ndi musua ne nulua ne kanutshipapishi mitshima yenu kabidi to; bualu monayi, mpindiewu ki diba ne dituku dia lupandu luenu; ne bua nanku, binuakudimuna mutshima ne kanuyi nupapisha mitshima yenu to, katataka dilongolola dinena dia disungila neenjibua buenu.

32 Bualu monayi, moyo ewu tshikondu tshia bantu kudilongolola bua kumonangana ne Nzambi; eyowa, monayi dituku dia moyo edi didi dituku dia bantu kukuata midimu yabu.

33 Ne mpindiewu, bu mumvua munuambila kumpala, bu munuvua bapeta bijadikilu bia bungi nanku, bua nanku, ndi nusengelela ne kanupumbishi dituku dia dikudimuna dia mutshima dienu tô ne ku ndekelu to; bualu kunyima kua dituku dia moyo edi, didi dipeshibua kutudi bua kudilongolola bua tshiendelela, monayi, bituapanga kudilengeja mu tshikondu tshietu patutshidi mu moyo ewu, pashisha butuku bua mîdima budi bulua mudi dikuata dia mudimu kadiyi mua kuenjibua kabidi to.

34 Kuena mua kuamba to, pawatuadibua ku bundu budi butshingisha bikola abu, ne nenkudimuna mutshima, ne nempingana kudi Nzambi wanyi. To, kuena mua kuamba nanku to; bualu nyuma wa momumua udi mukuata mibidi yenu tshikondu tshinudi nushiya moyo ewu, nyuma wa momumua awu neikala ne bukola bua kukuata mubidi weba mu buloba bua tshiendelela.

35 Bualu monayi, binuikala bapumbisha dituku dia dikudimuna mutshima mena tô ne ku lufu, monayi, nudi balua babatshikibua ku nyuma wa diabulu, ne udi unusuika nulua benda; bua nanku, Nyuma wa Mukalenga umbuki kunudi, ne kena ne muaba munda muenu to, ne diabulu udi ne bukola bonsu pa mutu penu; ne etshi tshidi ngikadilu wa nshikidilu wa bena bubi.

36 Ne ndi mumanya nanku, bualu Mukalenga uvua muamba ne kena usomba mu ntempelo idi kayiyi ya tshijila to, kadi udi usomba mu mitshima ya bantu bakana; eyowa, ne udi wamba kabidi ne bantu bakana nebasomba mu bukalenga buanyi, kabayi bapatuka kabidi to; kadi bilamba biabu nebitokeshibua ku mashi a Muana wa Mukoku.

37 Ne mpindiewu, bana betu bananga, ndi njinga ne nuvuluka bintu ebi, ne nukuata mudimu ne ditshina kumpala kua Nzambi bua lupandu luenu, ne kanuvidi kabidi dilua dia Kilisto to;

38 Ne kanukokanganyi kabidi ne Nyuma wa Tshijila to, kadi numuitaba, ne nunuangata dîna dia Kilisto; ne nudipuekesha tô ne ku lupuishi, ne nutendelela Nzambi, muaba onsu unuikala, mu nyuma ne mu bulelela; ne nuikala ne dianyisha dituku dionsu, bua midimu ya lusa ya bungi ne mabenesha a bungi bidiye unupesha.

39 Eyowa, ndi nnukankamija kabidi, bana betu, ne nuikala badimuka mu disambila diba dionsu, bua kanupambuishibu kudi matêtshibua a diabulu to, bua kanutambi bukola to, bua kanuikadi mu bukôkeshi buenda ku dituku dia ndekelu to; bualu monayi, kena unufuta difutu dimpa to.

40 Ne mpindiewu bana betu bananga, ndi nukankamija bua nuikala ne ditukija, ne nuambula mishindu yonsu ya ntatu; ne kanupendi badi banuipata bua bupela buenu to, bua kanulu kuikala benji ba mibi bu mudibu;

41 Kadi nuikala ne ditukija, ne ambulayi ntatu ayi, ne ditekemena dikamakana ne dituku dimua nenuikisha ku ntatu yenu yonsu.