1 Mpindiewu biakalua ne kunyima kua Amuleke mujikija mêyi â, bakashiya musumba wa bantu ne bakaya ku bulaba bua Yeleshona.

2 Eyowa, ne bashadila ba bana babu, pakayishabu dîyi kudi Bena Zolama, bakaya pabu ku bulaba bua Yeleshona.

3 Ne biakalua ne kunyima kua tshitupa tshia Bena Zolama tshivua tshimanyika bikola kutuilangana pamua bua kudiebeja bitangila mêyi avuabu babayisha, bakafîka tshiji bua dîyi, bualu diakanyangakaja didinga diabu; bua nanku bakabenga kumvuila mêyi âs.

4 Ne bakatuma lumu mu bulaba bonsu ne bakasangisha bantu bonsu pamua, ne bakabebeja bitangila mêyi avua makula.

5 Mpindiewu bakôkeshi babu ne bakuidi babu ne balongeshi babu kabavua bambila bantu majinga abu to; bua nanku bakamanyina meji a bantu bonsu mu musokoku.

6 Ne biakalua ne kunyima kua bamanyina meji a bantu bonsu, bonsu bavua bananga mêyi avua makudibua kudi Alama ne bana babu ba baluma bakipatshibua mu bulaba; ne bavua ba bungi; ne bakaya kabidi ku bulaba bua Yeleshona.

7 Ne biakalua ne Alama ne bana babu ba baluma bakabalongesha.

8 Mpindiewu bantu ba Bena Zolama bakafîkila bantu ba Amona bavua mu Yeleshona tshiji, ne mukokeshi munena wa Bena Zolama, muikala muntu mubi bikola, wakatuma mukenji kudi bantu ba Amona ujinga bua bipata mu bulaba buabu bonsu bavua bafumina kudibu ku bulaba buabu.

9 Ne wakabakanyina bikola. Ne mpindiewu bantu ba Amona kabakatshina mêyi enda to; bua nanku kabakabipata to, kadi bakakidila bapela bonsu ba Bena Zolama bakalua kudibu; ne bakabadisha, ne bakabavuadika, ne bakabapesha malaba a bupianyi buabu; ne bakabapesha bilondeshila ku majinga abu.

10 Mpindiewu ebi biakasonsola Bena Zolama ku tshiji kudi bantu ba Amona, ne bakabanga kudisangisha ne Bena Lamana ne kubasonsola ku tshiji kudibu.

11 Ne nanku Bena Zolama ne Bena Lamana bakabanga kudilongolola bua kuluisha bantu ba Amona, ne Bena Nefi kabidi.

12 Ne ki muakajika tshidimu tshia muanda muteketa tshia dikôkesha dia balumbuluishi pa mutu pa bantu ba Nefi nanku.

13 Ne bantu ba Amona bakapatuka mu bulaba bua Yeleshona, ne kuya ku bulaba bua Meleke, ne bakashiya muaba mu bulaba bua Yeleshona bua misumba ya basalayi ya Bena Nefi, bua ne bakokangana ne misumba ya basalayi ya Bena Lamana ne misumba ya basalayi ya Bena Zolama; ne ki muakatuadija mvita pankatshi pa Bena Lamana ne Bena Nefi nanku, mu tshidimu tshia dikumi ne muanda mukulu tshia dikôkesha dia balumbuluishi; ne mulubu wa mvita yabu neulondibua panyima apa.

14 Ne Alama, ne Amona, ne bana babu, ne bana ba baluma babidi ba Alama bakapingana ku bulaba bua Zalahemela, kunyima kua bikala biamua bia mudimu mu bianza bia Nzambi bu kuvuija bangi ba ku Bena Zolama ku dikudimuna dia mutshima; ne bonsu bavua bakudimuna mutshima bavua bipatshibua ku bulaba buabu; kadi bavua ne malaba a bupianyi buabu mu bulaba bua Yeleshona, ne bakambula biluilu bia mvita bua kudisungidila, ne kusungidila bakaji babu, ne bana babu, ne malaba abu.

15 Mpindiewu Alama, muikala ne kanyinganyinga bua malu mabi a bantu benda, eyowa, bua mvita, ne dimatshisha dia mashi, ne makokangana avua munkatshi muabu; ne mumana kuya kubambila dîyi, anyi mutuma bantu bua kuamba dîyi, munkatshi mua bantu bonsu ba mu tshimenga tshionsu; ne mumona ne mitshima ya bantu yakabanga kukola mu dipapa, ne bakabanga kufika munda bua bukola bua dîyi, mutshima wenda wakanyingalala menamena.

16 Bua nanku, wakasangishisha bana benda pamua, bua abambila muntu ne muntu mudimu wenda, nkayenda, bitangila bintu bia buakana. Ne tudi ne mulubu wa mikenji yenda, yakabapeshaye bilondeshila miandiku yenda nkayenda.