1 Ne biakalua ne Bena Nefi bavua kabayi bashipibua ku biluilu bia mvita to, kunyima kua kujîka bavua bashipibua—mpindiewu bungi bua bavua bashipibua kabuvua bubala to, bua bunena bua bungi buabu—bakapingana bonsu ku bulaba buabu, ne ku nzubu yabu, ne kudi bakaji babu, ne kudi bana babu, kunyima kua kujîka bafua babu.

2 Mpindiewu bakaji ne bana ba bungi bavua bashipibua ku muela wa mvita, ne kabidi bisumbu bia bimuna bikesa ne binena biabu bia bungi; ne kabidi madimi abu a bungi a nteta avua manyangakajibua, bualu avua madiatshibua kudi misumba ya bantu.

3 Ne mpindiewu ba bungi ba ku Bena Lamana ne Bena Amelisi bavua bashipibua ku muelelu wa musulu wa Sidona bavua bimanshibua mu mâyi a Sidona; ne monayi mifuba yabu idi mu ndondu wa mbuwa, ne idi ya bungi.

4 Ne Bena Amelisi bavua basunguludibua ku Bena Nefi, bualu bavua baditeka tshimanyinu tshikunza pa mpala yabu ku mushindu wa Bena Lamana; nansha nanku kabavua bakungula mitu yabu bu Bena Lamana to.

5 Mpindiewu mitu ya Bena Lamana ivua mikungula; ne bavua butaka, pa kumbusha tshiseba tshivua tshisuika ku bimonu biabu, ne kabidi biluilu biabu, bivua bisuika pambidi pabu, ne mata abu, ne miketa yabu, ne mabua abu, ne bieledi biabu, ne bintu bikuabu.

6 Ne dikoba a Bena Lamana divua difîkuluka, bilondeshila tshimanyinu tshivua Mukalenga muteka pambidi pa batatuabu, tshivua mutshipu pa mutu pabu bua disambuka diabu dia mikenji ne buntomboji buabu kudi bana babu, bavua bikala Nefi, Yakoba, ne Yosefe, ne Sama, bavua bantu balulama ne bansantu.

7 Ne bana babu bakakeba mua kubashipa, bua nanku bavua batshipibua; ne Mukalenga Nzambi wakateka tshimanyinu pambidi pabu, eyowa, pambidi pa Lamana ne Lemuele, ne kabidi bana ba baluma ba Yishemaela, ne bakaji ba Bena Yishemaela.

8 Ne bivua bienza nanku bua basungulula ndelanganyi yabu ku ndelanganyi ya bana babu, nanku bua Mukalenga Nzambi akuba bantu benda, bua kabasambakenyi ne kabitabuiji ngikadilu idi kayiyi miakana to, biatuala dibutuka diabu.

9 Ne biakalua ne ewu yonsu wakasangisha ndelanganyi yenda ne ya Bena Lamana wakadituadila mutshipu wa momumua pa mutu pa ndelanganyi yenda.

10 Bua nanku, ewu yonsu wakadilekela bua kupambuishibua kudi Bena Lamana bantu bakamubikila ne mu dîna adi, ne Mukalenga Nzambi wakateka tshimanyinu pambidi penda.

11 Ne biakalua ne ewu yonsu uvua ubenga kuitabuija ngikadilu ya Bena Lamana, kadi uvua witabuija miandiku ayi ivua mituadibua kumbukila ku bulaba bua Yelushalema, ne kabidi ngikadilu wa batatuabu, uvua muakana, bitabuija mikenji ya Nzambi ne bayitumikila, bavua babikidibua Bena Nefi, anyi bantu ba Nefi, katshia ku diba adi—

12 Ne bobu bavua balama miandiku idi mikala ya bushuwa ya bantu babu, ne kabidi ya bantu ba Bena Lamana.

13 Mpindiewu netupingana kabidi kudi Bena Amelisi, bualu bavua ne tshimanyinu tshiteka pambidi pabu; eyowa, bavua baditeka tshimanyinu pambidi, eyowa, mena tshimanyinu tshikunza pa mpala yabu.

14 Nanku dîyi dia Nzambi diakakumbajibua, bualu â avua mêyi enda akambilaye Nefi: Monayi, ngatshipi Bena Lamana, ne nenteka tshimanyinu pambidi pabu bua bobu ne ndelanganyi yabu batapulukibua kûdi ne ndelanganyi yeba, katshia diba edi tô ne bua kashidi, amu bobu bakudimuna mutshima ne bapingana kundi bua mbafuila lusa.

15 Ne kabidi: Nenteka tshimanyinu pambidi pa udi usangisha ndelanganyi yenda ne bana benu, bua ne batshipibua pabu.

16 Ne kabidi: Nenteka tshimanyinu pambidi pa udi ukuluisha ne udi uluisha ndelanganyi yeba.

17 Ne kabidi, ndi ngamba ewu udi umbuka kûdi kakuikala kabidi ndelanganyi weba to; ne nenkubenesha, ne ewu yonsu wikala ndelanganyi weba, mpindiewu tô ne bua kashidi; ne ebi bivua milayi ya Mukalenga kudi Nefi ne ndelanganyi yenda.

18 Mpindiewu Bena Amelisi kabavua bamanya to ne bavua bakumbaja mêyi a Nzambi pakabangabu kuditeka tshimanyinu pa mpala yabu; nansha nanku bakapatuka patoka mu buntomboji kudi Nzambi; bua nanku bivua bikengedibua ne mutshipu apona pa mutu pabu.

19 Mpindiewu ndi musua ne numona ne bakadituadila nkayabu mutshipu; ne mena nanku muntu yonsu udi mutshipibua mmudituadila dipîshibua dienda nkayenda.

20 Mpindiewu biakalua ne matuku a bungi kâyi mapita kunyima kua mvita ivua miluangana mu bulaba bua Zalahemela, kudi Bena Lamana ne Bena Amelisi to, ne kuvua musumba mukuabu wa basalayi mupatukila bantu ba Nefi, mu muaba wa momumua uvua musumba wa basalayi wa kumpala musambakena ne Bena Amelisi.

21 Ne biakalua ne kuvua musumba wa basalayi mutuma bua kubipata pambelu pa bulaba buabu.

22 Ne Alama nkayenda muikala utatshishibua ne mputa kakabanda ku mvita musangu ewu bua kuluisha Bena Lamana to;

23 Kadi wakatuma musumba wa basalayi munena kubaluisha; ne bakaya ne bakashipa Bena Lamana ba bungi, ne bakipata bishadi biabu dinsambu dia mikalu ya bulaba buabu.

24 Ne pashisha bakapingana kabidi ne bakabanga kushikika ditalala mu bulaba, bualu kabavua kabidi bakengeshibua kudi bena lukuna babu to bua mutantshi wa diba mukesa.

25 Mpindiewu bintu bionsu ebi bivua bienjibua, eyowa, mvita yonsu eyi ne makokangana bivua bituadijibua ne bijikijibua mu tshidimu tshitanu tshia dikôkesha dia balumbuluishi.

26 Ne mu tshidimu tshimua anyima binunu ne makumi a binunu ivua mitumibua ku buloba bua tshiendelela, bua ipeta mafutu ayi bilondeshila ku midimu yayi, bivuayi mimpa anyi bivuayi mibi, bua ipeta disanka dia tshiendelela anyi dikenga dia tshiendelela, bilondeshila nyuma uvuabu basungula bua kutumikila, bivuayi nyuma muimpa anyi mubi.

27 Bualu muntu yonsu udi upeta difutu kudi uvuaye musungula kutumikila, ne nanku bilondeshila mêyi a nyuma wa buambi; bua nanku bienjibua bilondeshila bulelela. Ne tshidimu tshitanu tshia dikôkesha dia balumbuluishi tshiakajika nanku.