1 Ne biakalua ne bakimana ne bakabashila kaba ka tshidia tshimua. Ne Moloni wakambila Zelahemena ne: Mona, Zelahemena, katuena tujinga bua kuikala bantu ba mashi to. Udi mumanya ne nudi mu bianza bietu, kadi katuena tujinga bua kunushipa to.

2 Mona, katuena balua kunuluisha bua kumatshisha mashi enu bua kupeta bukalenga to; anyi katuena tujinga kuluisha tshikokedi tshia bupika kudi muntu nansha umua to. Kadi ebu ki bualu bunudi baluila kutuluisha; eyowa, ne nudi batufîkila tshiji bua ntendelelu wetu.

3 Kadi mpindiewu, nudi numona ne Mukalenga udi netu ; ne nudi numona ne uvua munufila mu bianza bietu. Ne mpindiewu, ndi musua ne numvua ne bidi bituenzela nanku bua ntendelelu wetu ne ditabuija dietu mu Kilisto. Ne mpindiewu nudi numona ne kanuena mua kunyagakaja ditabuija dietu edi to.

4 Mpindiewu nudi numona edi didi ditabuija dilelela dia Nzambi; eyowa, nudi numona ne Nzambi neatukuatshisha, ne atulama, ne atukuba, diba dionsu dituikala ne lulamatu kudiye, ne ku ditabuija dietu, ne ntendelelu wetu; ne Mukalenga kakulekela ne tubutuka nansha, pa kumbusha bituapona mu disambuka mikenji ne bavila ditabuija dietu.

5 Ne mpindiewu, Zelahemena, ndi nkupesha mukenji, mu dîna dia Nzambi wa bukola bonsu, udi mukolesha maboku etu mu ne tudi bapeta bukola pa nuenu, ku ditabuija dietu, ku ntendelelu wetu, ne ku ngenzedi yetu ya kutendelela, ne ku ekelezia wetu, ne ku dikuatshisha dia tshijila ditudi bua kupesha kudi bakaji betu ne bana betu, ku budishikaminyi adi budi butusuika ku malaba etu ne ku ditunga dietu; eyowa, ne kabidi ku dilama dia dîyi dia tshijila dia Nzambi, kutudi bapetela disanka dietu dionsu; ne ku bionsu bidi bikala ne mushinga kutudi—

6 Eyowa, ne ebi ki mbionsu to; ndi nkupesha mukenji bu munudi ne dijinga dionsu dia kuikala ne moyo, ne nutupesha biluilu bienu bia mvita, ne katuakukeba mashi enu to, kadi netuepelesha mioyo yenu, panuendela njila wenu ne kanuakulua kabidi kutuluisha mvita to.

7 Ne mpindiewu, panuikala kanuyi benza nanku to, monayi, nudi mu bianza bietu, ne nempesha bantu banyi mukenji bua badiela kunudi, ne banutapa mputa ya lufu pa mibidi yenu, bua nubutuka; ne pashisha netumona ne nganyi wikala pa mutu pa bantu aba; eyowa netumona ne nganyi wabuejabu mu bupika.

8 Ne mpindiewu biakalua ne pakumvua Zelahemena mêyi â, wakasemena kumpala ne wakafila muela wenda wa mvita ne kela kenda ka mvita, ne buta buenda mu bianza bia Moloni, ne wakamuambila ne: Mona, biluilu bietu bia mvita mbiobi ebi; netubifila kunudi, kadi katuakulekela ne tuditshipa mutshipu kunudi, utudi bamanya ne netushipa, ne bana betu kabidi; kadi angatayi biluilu bietu bia mvita, ne lekelayi ne tuya mu tshipela; tshianana netulama miela yetu ya mvita, ne netufua anyi netutshimuna.

9 Mona, katuena bena ditabuija dienu to; katuena tuitabuija ne Nzambi ki uvua mutufila mu bianza bienu to; kadi tudi tuitabuija ne mbudimu buenu buvua bunupandisha ku miela yetu ya mvita. Mona, mbibuikilu bienu bia pa tshiadi ne ngambu yenu bivua binupandisha.

10 Ne mpindiewu pakajikija Zelahemena kuamba mêyi â, Moloni wakapingajila Zelahemena muela wa mvita ne biluilu bia mvita bivuaye mumupesha, wamba ne: Mona, netushikija ditshintakanyi.

11 Mpindiewu ntshiena mua kupinganyina mêyi amvua muakula to, bua nanku bu mudi Mukalenga ne moyo, kanuakuya to pa kumbusha nuenu baya ne mutshipu ne kanuakutupinganyina kabidi bua kutuluisha mvita to. Mpindiewu bu munudi mu bianza bietu netumuangalaja mashi enu panshi, anyi nenukôkela ku mikenji indi munupesha.

12 Ne mpindiewu pakamba Moloni mêyi â, Zelahemena wakalama muela wenda wa mvita, ne wakafîkila Moloni tshiji, ne wakalua lukasa bua kushipa Moloni; kadi pakajulaye muela wenda wa mvita, monayi, umua wa ku basalayi ba Moloni wakawutûta ne mena kuwukuluisha panshi, ne wakakoseka pabuipi ne tshilabi; ne wakatûta kabidi Zelayemena ne wakamutula tshiseba tshia ku mutu ne tshiakapona panshi. Ne Zelahemena wakumbuka kumpala kuabu ne wakaya munkatshi mua basalayi benda.

13 Ne biakalua ne musalayi uvua muimana pabuipi, uvua mukosa tshiseba tshia ku mutu tshia Zelahemena, wakambuila tshiseba tshia ku mutu atshi panshi ku nsuki, ne wakatshiteka ku lusongu lua muela wenda wa mvita, ne wakawôlola kudibu, ubambila ne dîyi dikola ne:

14 Mena bu mudi tshiseba tshia ku mutu etshi, tshidi tshikala tshiseba tshia ku mutu tshia kapita kenu, tshipona panshi, bia momumua nenupona panshi pa kumbusha nuenu bafila biluilu bienu bia mvita ne baya ne tshipungidi tshia ditalala.

15 Mpindiewu kuvua ba bungi, pakumvuabu mêyi â ne pakamonabu tshiseba tshia ku mutu tshivua ku muela wa mvita, bôwa bua kabakuata; ne ba bungi bakasemena kumpala ne bakimansha biluilu biabu bia mvita panshi ku makasa a Moloni, ne bakabuela mu tshipungidi tshia ditalala. Ne bonsu bakabuela mu tshipungidi bakalekela bua baya mu tshipela.

16 Mpindiewu biakalua ne Zelahemena wakafîka tshiji menamena, ne wakasonsola basalayi benda bavua bashala ku tshiji, bua kukokangana ne Bena Nefi ne bukola kupita.

17 Ne mpindiewu Moloni wakafîka tshiji, bua mutu mukola wa Bena Lamana; bua nanku wakapesha bantu benda mukenji ne badiela kudibu ne babashipa. Ne biakalua ne bakabanga kubashipa ; eyowa, ne Bena Lamana bakakokangana ne miela yabu ya mvita ne bukola buabu.

18 Kadi monayi, mibidi yabu ya butaka ne mitu yabu mitupu bivua bilekelela patoka ku miela ya mvita mitua ya Bena Nefi; eyowa, monayi bakatubudibua ne bakatûtshibua, eyowa, ne bakapona lukasa menamena ku miela ya mvita ya Bena Nefi; ne bakabanga kubakomba panshi, mena bu muvua musalayi wa Moloni muamba ku Nyuma.

19 Mpindiewu Zelahemena, pakamonaye ne bavua pabuipi ne kubutuka bonsu, wakabila ne bukitu kudi Moloni, ulaya ne neenza nabu tshipungidi, ne bantu benda pabu, bikalabu bepelesha mioyo ya bavua bashala, ne kabakulua kabidi kubaluisha mvita nansha to.

20 Ne biakalua ne Moloni wakimakaja kabidi mudimu wa lufu munkatshi mua bantu. Ne wakangata biluilu bia mvita kudi Bena Lamana; ne kunyima kua babuela nenda mu tshipungidi tshia ditalala bakalekedibua bua baya mu tshipela.

21 Mpindiewu bungi bua bafua babu kabuvua bubala to bua bunena bua bungi; eyowa, bungi bua bafua babu buvua bunena menamena, bonsu ku Bena Nefi ne ku Bena Lamana.

22 Ne biakalua ne bakimansha bafua babu mu mâyi a Sidona, ne bakaya ne badi bajîkibua mu ndondu ya mbuwa.

23 Ne misumba ya basalayi ya Bena Nefi, anyi ya Moloni, yakapingana ne yakalua ku nzubu yabu ne ku malaba abu.

24 Ne ki muakajika tshidimu tshia dikumi ne muanda mukulu tshia dikôkesha dia balumbuluishi pa mutu pa bantu ba Nefi nanku. Ne ki muakajika miandiku ya Alama, ivua mifunda pa bitata bia Nefi, nanku.