1 Monayi, mpindiewu biakalua ne bantu ba Nefi bakasanka menamena, bualu Mukalenga uvua mubapatuisha kabidi ku bianza bia bena lukuna babu; bua nanku bakela Mukalenga Nzambi wabu tuasakidila; eyowa, ne bakajila bikola ne bakasambila bikola, ne bakatendelela Nzambi ne disanka dia bungi menamena.

2 Ne biakalua ne mu tshidimu tshia dikumi ne tshitema tshia dikôkesha dia balumbuluishi pa mutu pa bantu ba Nefi, ne Alama wakaya kudi muanenda wa baluma Helamana ne wakamuambila ne: Udi witabuija mêyi amvua mukuambila bitangila miandiku ivua milamibua anyi?

3 Ne Helamana ne wakamuambila ne: Eyowa, ndi ngitabuija.

4 Ne Alama wakamba kabidi ne: Udi witabuija kudi Yezu Kilisto, walua anyi?

5 Ne wakamba ne: Eyowa, ndi ngitabuija mêyi onsu awuvua muakula.

6 Ne Alama wakamuambila kabidi ne: Neulama mikenji yanyi anyi?

7 Ne wakamba ne: Eyowa, nendama mikenji yeba ne mutshima wanyi onsu.

8 Pashisha Alama wakamuambila ne: Udi mubeneshibua; ne Mukalenga neakulubuluja mu bulaba ebu.

9 Kadi mona, ndi ne kakesa ka kuamba ku Nyuma kûdi; kadi tshindi ngamba ku Nyuma kûdi kuakutshimanyishangana to; eyowa, tshindi ngamba ku Nyuma kûdi katshiakumanyishibua to, mena tô ne pa kumbajibua buambi ebu; bua nanku funda miaku ingamba.

10 Ne eyi ki mêyi awu: Mona, ndi mmona ne bantu bina aba, Bena Nefi, bilondeshila nyuma wa dibuluila udi munda muanyi, bidimu nkama inayi kunyima kua diba dikala Yezu Kilisto mudileja kudibu, ne nebashinguluka mu dipanga dia ditabuija.

11 Eyowa, ne pashisha nebamona mvita ne bipupu, eyowa, biyola ne dimatshisha dia mashi, mena tô ne pâbutuka bantu ba Nefi—

12 Eyowa, ne nanku bualu nebashinguluka mu dipanga dia ditabuija ne nebapona mu midimu ya mîdima, ne majinga a mubidi, ne mu mishindu yonsu ya malu mabi; eyowa, ndi nkuambila ne, bualu nebenza mibi kunyima kua bamana kupeta bukenka bua bungi ne dimanya, eyowa, ndi nkuambila ne kubangila dituku adi, mena lukongu lua bantu luinayi kalua kupita to kumpala kua bualu bubi bunena ebu kuluabu.

13 Ne palua dituku dinena adi, mona, diba didi dilua dikala bantu badi bikala mpindiewu, anyi ndelanganyi ya badibu babala mpindiewu munkatshi mua bantu ba Nefi, kabakubabala kabidi munkatshi mua ba Nefi to.

14 Kadi ewu yonsu udi ushala, ne udi kayi ushipibua mu dituku dinena ne didi dikuatshisha bôwa adi, nebamubala munkatshi mua Bena Lamana, ne nealua bu mudibu, bonsu, amu pa kumbusha bakesa bâbikidibua ne bayidi ba Mukalenga; ne bobu Bena Lamana nebabalondakaja mena tô ne pâbutukabu. Ne mpindiewu, buambi ebu nebukumbajibua bua malu mabi.

15 Ne mpindiewu biakalua ne kunyima kua Alama muamba bintu ebi kudi Helamana, wakamubenesha, ne bana benda ba baluma bakuabu kabidi; ne wakabenesha kabidi buloba bua bimpa bia bakana.

16 Ne wakamba ne: Mukalenga Nzambi udi wamba nanku—Bulaba nebuedibua mulawu, eyowa, bulaba ebu, bua tshisamba tshionsu, tshisa tshionsu, muakulu onsu, ne bantu bonsu, badi benza bubi, bua dibutuka, pikalabu baboba menamena; ne nebikala bu mumvua muamba; bualu etshi mulawu ne dibenesha dia Nzambi pa bulaba, bualu Mukalenga kena mua kutangila mibi ne tshipimu tshikesa tshia dianyisha to.

17 Ne mpindiewu, pakamba Alama mêyi â wakabenesha ekelezia, eyowa, bonsu bâkankamana mu ditabuija katshia ku tshikondu atshi.

18 Ne pakenza Alama nanku wakashiya bulaba bua Zalahemela, bu bua kuya ku bulaba bua Meleke. Ne biakalua ne kabakumvua kabidi bualu buenda nansha; katuena bamanya ne bua lufu luenda anyi bua dijîkibua dienda.

19 Monayi, tudi bamanya nanku, ne uvua muntu muakana; ne lumu lua katangalaka kula mu ekelezia ne Nyuma wakamuangata, anyi tshianza tshia Mukalenga tshiakamujîka, mena bu muvua Mose. Kadi monayi, mifundu ya Nzambi idi yamba ne Mukalenga wakangata Mose kudiye; ne tudi tutshinka ne wakakidila kabidi Alama mu nyuma, kudiye; nanku, bua bualu ebu katuena bamanya tshintu nansha tshimua bitangila lufu luenda anyi dijîkibua dienda to.

20 Ne mpindiewu biakalua ne ku ntuadijilu wa tshidimu tshia dikumi ne tshitema tshia dikôkesha dia balumbuluishi pa mutu pa bantu ba Nefi, ne Helamana wakaya munkatshi mua bantu bua kubamanyisha dîyi.

21 Bualu monayi, bua mvita yabu ne Bena Lamana ne matapuluka makesa makesa a bungi ne disalu uvua munkatshi mua bantu, biakalua bikengedibua ne dîyi dia Nzambi dimanyishibua munkatshi muabu, eyowa, ne bulongolodi buenzejibua mu ekelezia monsu.

22 Bua nanku, Helamana ne bana babu bakaya kushikika ekelezia kabidi mu bulaba bonsu, eyowa, mu tshimenga tshionsu mu bulaba bonsu buvua bantu ba Nefi basamu. Ne biakalua ne bakasungula bakuidi ne balongeshi mu bulaba bonsu, ku mutu kua ma’ekelezia onsu.

23 Ne mpindiewu biakalua ne kunyima kua Helamana ne bana babu basungula bakuidi ne balongeshi ku mutu kua ma’ekelezia kuakajuka ditapuluka munkatshi muabu, ne bakabenga kuteya ntema ku mêyi a Helamana ne bana babu to;

24 Kadi bakalua baditambishi, bikala badibandisha mu mitshima yabu, bua biuma biabu bia bungi menamena; bua nanku bakalua babanji ku mesu abu nkayabu, ne bakabenga kuteya ntema ku mêyi abu, bua kuenda bôloloka kumpala kua Nzambi to.