1 Mpindiewu biakalua ne mu tshidimu tshisambombo tshia dikôkesha dia balumbuluishi pa mutu pa bantu ba Nefi, kakuvua makokangana anyi mvita mu bulaba bua Zalahemela to;

2 Kadi bantu bavua batatshishibua, eyowa, batatshishibua bikola bua dijimija dia bana babu, ne kabidi bua dijimija dia bisumbu bia bimuna bikesa ne binena biabu, ne kabidi bua dijimija dia madimi abu a nteta, avua madiata ne makasa ne manyangakaja kudi Bena Lamana.

3 Ne ntatu yabu ivua mikola ki bua tshinyi anyima yonsu uvua udila; ne bakitabuija ne tshivua bitungu bia Nzambi bivua bituma pa mutu pabu bua bualu bua bubi buabu ne malu mapita bubi abu; bua nanku bakasakibua ku divuluka dia bujitu buabu.

4 Ne bakabanga kushikika ekelezia bikola bipita kabidi; eyowa, ne ba bungi bakatambuishibua mu mâyi a Sidona ne bakabuela mu ekelezia wa Nzambi; eyowa, bakatambuishibua kudi Alama, uvua mujididibua muakuidi munena wa bantu ba mu ekelezia, ku tshianza tshia tatuenda Alama.

5 Ne biakalua ne mu tshidimu tshia muanda muteketa tshia dikôkesha dia balumbuluishi bantu binunu bitanu yakabuela mu ekelezia wa Nzambi ne bakatambuishibua. Ne ki muakajika tshidimu tshia muanda muteketa tshia dikôkesha dia balumbuluishi pa mutu pa bantu ba Nefi; ne kuvua ditalala ditungunuka diba dionsu.

6 Ne biakalua ne mu tshidimu tshia muanda mukulu tshia dikôkesha dia balumbuluishi, bantu ba mu ekelezia bakabanga kulua baditambishi, bualu bua mabanji abu mapita, ne bilulu bia busu biabu bimpa, ne lin muluka bimpa wabu, ne bualu bua bisumbu bia bimuna bikesa ne binena biabu bia bungi, ne ngolo yabu ne mpalata yabu, ne mishindu yonsu ya bintu bia mushinga mukola, bivuabu bapeta ku dienza dia mudimu diabu dikola; ne bavua badibandisha mu diditambisha ku mesu abu mu bintu bionsu ebi, bualu bakabanga kuvuala bilamba bia mushinga mukola.

7 Mpindiewu ebi bivua tshiena bualu tshia lutatu lua bungi lua Alama, eyowa, ne bantu ba bungi bavua Alama mujidila balongeshi, bakuidi, bakulu ba mu ekelezia; eyowa, ba bungi babu bavua babungama bikola bua bubi buakamonabu bubanga kuikala munkatshi mua bantu.

8 Bualu bakatentekela ne bakamona ne kanyinganyinga kakola ne bantu ba mu ekelezia bakabanga kudibandisha mu diditambisha ku mesu abu, ne kuteka mitshima yabu ku mabanji abu ne ku bintu bia tshianana bia pa buloba, ne bakabanga kulua babuidianganyi, muntu kudi mukuabu, ne bakabanga kukengesha bavua kabayi bitabuija bilondeshila disua ne disanka biabu nkayabu.

9 Ne nanku, mu tshidimu tshia muanda mukulu tshia dikôkesha dia balumbuluishi, kuakabanga makokangana munkatshi mua bantu ba mu ekelezia; eyowa, kuvua malakana, ne luntûta, ne budimu, ne dikengeshangana, ne diditambisha, mena kupita diditambisha dia bavua kabayi ba mu ekelezia wa Nzambi to.

10 Ne tshidimu tshia muanda mukulu tshia dikôkesha dia balumbuluishi tshiakajika nanku; ne bubi bua mu ekelezia buvua dibua dia kulendukila dinena bua bavua kabayi ba mu ekelezia to; ne nanku ekelezia wakabanga kupanga mu dikola dienda.

11 Ne biakalua ne ku ntuadijilu wa tshidimu tshia tshitema, Alama wakamona bubi bua ekelezia, ne wakamona ne tshilejilu tshia ekelezia tshiakabanga kusaka bavua kabayi ne ditabuija kudienza bubi bumua kunyima kua bukuabu, nanku bituala dibutuka dia bantu.

12 Eyowa, wakamona dishilangana munkatshi mua bantu, bamua badibandisha mu diditambisha, bapetula bakuabu, bakudimuna nyima yabu kudi bakengi ne bavua butaka ne bavua ne nzala, ne bavua ne nyota, ne bavua babêdi ne batatshishibua.

13 Mpindiewu etshi tshivua tshiena bualu tshia miadi ivua munkatshi mua bantu, pavua bakuabu badipuekesha, bambuluishi bavua ne dijinga dia diambuluisha diabu, bu mudi kuabanyinangana kua bintu biabu kudi bapela ne bakengi, kudisha bavua ne nzala, ne bakenga ne mishindu yonsu ya ntatu, bua bualu bua Kilisto, walua bilondeshila nyuma wa buambi;

14 Bavua bindila dituku adi, ne nanku bakalama dilekedibua dia mibi yabu; ne bavua buwula ntenta ne disanka bua dibika dia bafua, bilondeshila ku disua ne bukola bia Yezu Kilisto ne dipatuisha dienda mu mionji ya lufu.

15 Ne mpindiewu biakalua ne Alama, bualu uvua mumona ntatu ya balondi badipuekeshi ba Nzambi, ne makengeshibua avua mabafuisha nawu kudi tshishadi tshia bantu benda, ne bualu uvua mumona dishilangana diabu dionsu, wakabanga kuikala ne kanyinganyinga kakola; nansha nanku Nyuma wa Mukalenga kakamulekelela to.

16 Ne wakasungula muntu wa lungenyi uvua munkatshi mua bakulu ba mu ekelezia, ne wakamupesha bukôkeshi bilondeshila ku dîyi dia bantu, bua ikala ne bukôkeshi bua kuela mikenji bilondeshila ku mikenji ivua mipeshibua, ne kuyilondeshisha bilondeshila ku bubi ne mibi bia bantu.

17 Mpindiewu dîna dia muntu ewu divua Nefiha, ne bavua bamusungula bu mulumbuluishi munena; ne wakasomba pa nkuasa wa tshilumbuluilu bua kulumbuluisha ne kulombola bantu.

18 Mpindiewu Alama kakamupesha mudimu wa kuikala muakuidi munena ku mutu kua ekelezia to, kadi wakalama mudimu wa muakuidi munena buenda nkayenda; kadi wakafila nkuasa wa tshilumbuluilu kudi Nefiha.

19 Ne wakenza nanku bua kuyayi nkayenda munkatshi mua bantu benda, anyi munkatshi mua bantu ba Nefi, bua kubayishaye dîyi dia Nzambi, bua kubasonsolaye ku divuluka dia bujitu buabu, ne bua kukuluishaye, ku dîyi dia Nzambi, diditambisha ne dikazamuka dionsu ne makokangana onsu bivua munkatshi mua bantu benda, bualu kavua mumona mushindu nansha umua wa kubangatulula to pa kumbusha amu bua kubajadikila patoka bubi buabu.

20 Ne nanku ku ntuadijilu wa tshidimu tshia tshitema tshia dikôkesha dia balumbuluishi pa mutu pa bantu ba Nefi, Alama wakafila nkuasa wa tshilumbuluilu kudi Nefiha, ne wakadifila yonsu ku buakuidi bunena bua mulongu wa tshijila wa Nzambi, ku dijadiki dia dîyi, bilondeshila ku nyuma wa dibuluila ne buambi.