1 Ne mpindiewu biakalua ne ku ntuadijilu kua tshidimu tshia makumi abidi ne tshitanu tshia dikôkesha dia balumbuluishi pa mutu pa bantu ba Nefi, kunyima kua bobu bashikika ditalala pankatshi pa bantu ba Lehi ne bantu ba Moliantona bitangila malaba abu, ne kunyima kua bobu batuadija tshidimu tshia makumi abidi ne tshitanu mu ditalala;

2 Nansha nanku, kabakakuba ditalala dijima mu bulaba to, bualu kuakabanga kuikala dikokangana munkatshi mua bantu bitangila mulumbuluishi munena Paholana; bualu monayi, kuvua tshitupa tshia bantu tshivua tshijinga ne amua malu masunguluka a mikenji akudimunyibua.

3 Kadi monayi, Paholana wakabenga kukudimuna mikenji anyi kuyilekela ikudimunyibua; bua nanku, kakateleja kudi bavua batuma mêyi abu ne malomba abu bua dikudimuna dia mikenji to.

4 Bua nanku, bavua bajinga ne mikenji ikudimunyibua bakamufîkila tshiji, ne bakajinga bua kikadi kabidi mulumbuluishi munena ku mutu kua bulaba to; bua nanku kuakajuka ditandangana dikola bitangila bualu ebu, kadi kabiakafika ku dimatshisha dia mashi to.

5 Ne biakalua ne bavua bajinga ne Paholana umbushibua mu nkuasa wa tshilumbuluilu abu bavua bababikila ne bantu-ba-mfumu, bualu bavua bajinga ne mikenji ikudimunyibua mu mushindu wa kutonkola bukalenga bua budishikaminyi ne bua kushikika mfumu ku mutu kua bulaba.

6 Ne bavua bajinga ne Paholana ashala mulumbuluishi munena ku mutu kua bulaba bakadiangatshila dîna dia bantu-badishikaminyi; ne nanku ditapuluka divua munkatshi muabu, bualu bantu-badishikaminyi bavua baditshipa anyi benza tshipungidi bua kulaminyina manema abu ne diakalengela dia ntendelelu wabu ku bukalenga bua budishikaminyi.

7 Ne biakalua ne dîyi dia bantu diakakosa bualu bua dikokangana diabu. Ne biakalua ne dîyi dia bantu diakalua mu disungula dia bantu-badishikaminyi, ne Paholana wakalama nkuasa wa tshilumbuluilu, tshiakenzeja disanka dia bungi munkatshi mua bana babu ne Paholana ne ba bungi ba ku bantu ba budishikaminyi kabidi, bakapuwisha kabidi bantu-ba-mfumu, bualu kabakakima kubenga to kadi bakabenzeja bua kukuba kipatshila ka budishikaminyi.

8 Mpindiewu aba bavua bananga bamfumu bavua aba baledibua ku mêku manena, ne bavua bakeba bua kuikala bamfumu; ne bavua bakuatshishibua kudi bavua bakeba bukalenga ne bukôkeshi pa mutu pa bantu.

9 Kadi monayi, edi divua diba dikola bua makokangana a nanku avua munkatshi mua bantu ba Nefi; bualu monayi, Amalikia uvua musonsola mitshima ya bantu ba Bena Lamana bua kuluisha bantu ba Bena Nefi, ne uvua usangisha basalayi bumbukila ku bitupa bionsu bia bulaba buenda, ne uvua ubapaya ne biluilu, ne uvua ulongolola mvita ne dinanukila dionsu; bualu uvua muditshipa bua kunua mashi a Moloni.

10 Kadi monayi, netumona ne dilaya dienda divuaye muenza divua dia tshimpitshimpi; nansha nanku, wakadilongolola nkayenda ne misumba yenda ya basalayi bua kuluisha Bena Nefi.

11 Mpindiewu misumba yenda ya basalayi kayivua ya bungi bu muvuayi ku kala to, bualu binunu bia bungi bivua bishipibua ku tshianza tshia Bena Nefi; kadi nansha bua dijimija diabu dinena, Amalikia uvua musangisha musumba munena wa dikema wa basalayi pamua, ki bua bualu kayi kakatshina bua kupueka bulaba bua Zalahemela to.

12 Eyowa, Amalikia mena nkayenda wakapueka, ku mutu kua Bena Lamana. Ne bivua mu tshidimu tshia makumi abidi ne tshitanu tshia dikôkesha dia balumbuluishi; ne bivua diba dia momumua divuabu babanga kukosa nsambu ya makokangana abu bitangila mulumbuluishi munena, Paholana.

13 Ne biakalua ne pakumvua bantu bavua babikidibua ne bantu-ba-mfumu ne Bena Lamana bavua bapueka bua kuluisha Bena Nefi, bakasanka mu mitshima yabu; ne bakabenga bua kuambula biluilu, bualu bavua bafîkila mulumbuluishi munena tshiji tshipita, ne bantu ba budishikaminyi kabidi, ki bua tshinyi bakabenga kuambula biluilu bua kusungidila ditunga diabu.

14 Ne biakalua ne pakamona Moloni nanku, ne pakamonaye kabidi ne Bena Lamana bavua balua ku mikalu ya bulaba, wakafîka tshiji menamena bua bualu bua mutu mukola wa bantu bavuaye mukuatshila mudimu ne dinanukila dia bungi bua kubakuba; eyowa, wakafîka tshiji menamena; anyima wenda uvua muwula ntenta ne tshiji kudibu.

15 Ne biakalua ne wakatuma dilomba, ne dîyi dia bantu, kudi ngovena wa mu bulaba, ujinga ne adibala, ne amupesha (Moloni) bukôkeshi bua kuenzeja batapuluki abu ku bukola bua kusungidila ditunga diabu anyi kubashipa.

16 Bualu ki tshivua lusumpakenu luenda lua kumpala bua kujikija makokangana a nanku ne matapuluka a nanku munkatshi mua bantu; bualu monayi, etshi tshivua tô ne tshikala tshiena bualu tshia dinyanguka diabu dionsu. Ne biakalua ne ngovena wakamuanyishila ne enza bilondeshila ku dîyi dia bantu.

17 Ne biakalua ne Moloni wakapesha musumba wenda wa basalayi mukenji ne uya kuluisha bantu-ba-mfumu abu, bua kupûta diditambisha diabu ne kunema kuabu panshi ne kubakepesha bu mudi buloba, anyi ne bambula biluilu ne bakuatshisha bualu bua budishikaminyi.

18 Ne biakalua ne misumba ya basalayi yakaya kuluisha bantu-ba-mfumu; ne bakashimbula diditambisha diabu ne kunema kuabu, mua ne pakajulabu biluilu biabu bia mvita bua kuluisha bantu ba Moloni bakupudibua ne bakakepeshibua bu mudi buloba.

19 Ne biakalua ne kuvua binunu binayi bia batapuluki bavuabu bupudibua ku muela wa mvita; ne ba ku balombodi babu bavuabu kabayi bashipa mu mvita to abu bakangatshibua ne kuedibua mu buloko, bualu kakuvua diba malumbulula abu mu tshikondu etshi to.

20 Ne tshishadi tshia batapuluki abu, pamutu pa kukuluishibua panshi pa buloba ku muela wa mvita, bakadifila ku dibendela dia budishikaminyi, ne bakabenzeja ku bukola bua kubandisha mukanda wa budishikaminyi pa tuleya tuabu ne mu bimenga biabu, ne bua kuambula biluilu biabu bua kusungidila ditunga diabu.

21 Ne nanku Moloni wakajikija bualu bua bantu-ba-mfumu abu, bualu kakuvua kabidi tshibikidilu tshia bantu-ba-mfumu to; ne nanku wakajikija mutu mukola ne diditambisha dia bantu bavua bakula bua mashi a bunema abu; kadi Moloni wakabafikisha ku didipuekesha bu muvua bana babu, ne kuluangana ne bukitu bua budishikaminyi buabu ku bupika.

22 Monayi, pavua Moloni ujikija mvita ne makokangana munkatshi mua bantu benda nkayenda nanku, ne ubabambikidila ditalala ne nshidimukilu, ne ufila mikandu bua kudilongolola bua kuluangana mvita ne Bena Lamana, monayi, Bena Lamana bavua babuela mu bulaba bua Moloni, buvua ku mikalu pabuipi ne ku muelelu wa mbuwa.

23 Ne biakalua ne Bena Nefi kabavua ne bukola bukumbana mu tshimenga tshia Moloni to; bua nanku Amalikia wakabanyemesha, ne wakashipa ba bungi. Ne biakalua ne Amalikia wakangata tshimenga, eyowa miaba yabu mikolesha yonsu.

24 Ne bakanyema tshimenga tshia Moloni abu bakaya ku tshimenga tshia Nefiha; ne bantu ba mu tshimenga tshia Nefi bakadisangisha pabu pamua, ne bakenza didilongolola ne bavua badikumbaja bua kusambakena ne Bena Lamana bua mvita.

25 Kadi biakalua ne Amalikia kakalekela ne Bena Lamana baya kuluisha tshimenga tshia Nefiha to, kadi wakabalama kuinshi pabuipi ne ku muelelu wa mbuwa, ushiya bantu mu tshimenga tshionsu bua kutshikuba ne kutshisungidila.

26 Ne nanku wakatungunuka, wangata bimenga bia bungi, tshimenga tshia Nefiha, ne tshimenga tshia Lehi, ne tshimenga tshia Moliantona, ne tshimenga tshia Omenele, ne tshimenga tshia Gidi, ne tshimenga tshia Muleke, bivua bionsu ku mikalu ya ku esete pabuipi ne ku muelelu wa mbuwa.

27 Ne nanku Bena Lamana bavua bapeta, ku budimu bua Amalikia, ku misumba yabu ya basalayi ya bungi kayiyi kubala to, bimenga bia bungi menamena, bionsu bivua bikolesha bikola ku mushindu wa dikolesha dia Moloni; bionsu bivua bikala miaba mikolesha bua Bena Lamana.

28 Ne biakalua ne bakaya ku mikalu ya bulaba bua Buvula, banyemesha Bena Nefi kumpala kuabu ne bashipa ba bungi.

29 Ne biakalua ne bakasambakena ne Teyankuma, uvua mushipa Moliantona ne uvua mukosa bantu benda njila mu dinyema dienda.

30 Ne biakalua ne wakakosa Amalikia njila kabidi, pavuaye uya ne musumba wenda wa basalayi ba bungi bua kuangata bulaba bua Buvula, ne kabidi bulaba bua ku node.

31 Kadi monayi wakasambakena ne diteketa dia maboku mu dipingajibua dienda kunyima kudi Teyankuma ne bantu benda; bualu bavua baluanganyi ba mvita banena; bualu muntu yonsu wa Teyankuma uvua mupita Bena Lamana ku bukola buabu ne ku bumanyi buabu bua mvita, ki bua bualu kayi bakatamba Bena Lamana bukola.

32 Ne biakalua ne bakababambakaja, mua ne bakabashipa mena tô ne pakîlabu. Ne biakalua ne Teyankuma ne bantu benda bakâsa ntenta yabu ku mikalu ya bulaba bua Buvula; ne Amalikia wakâsa ntenta yenda ku mikalu pa kukala kua lusenga pabuipi ne ku muelelu wa mbuwa, ne ku mushindu ewu bakanyemeshibua.

33 Ne biakalua ne pakîla butuku, Teyankuma ne musadidi wenda bakaya mu musokoku ne bakapatuka butuku, ne bakabuela mu tshitudilu tshia Amalikia; ne monayi, tulu tuvua tubatamba bukola bua dipungi diabu dia bungi, uvua mufumina ku midimu ne luya lua munda munya.

34 Ne biakalua ne Teyankuma wakadibueja mu musokoku mu ntenta wa mfumu ne wakamutua difuma ku mutshima wenda; ne wakenzeja lufu lua mfumu lukasa mu mushindu ne kakabisha basadidi benda to.

35 Ne wakapingana mu musokoku ku tshitudilu tshienda, ne monayi, bantu benda bavua balala, ne wakababisha ne wakabalondela bintu bionsu bivuaye muenza.

36 Ne wakenzeja ne misumba yenda ya basalayi idilongolola, bua Bena Lamana kabalu kubika ne balua kubabunda.

37 Ne tshidimu tshia makumi abidi ne tshitanu tshia dikôkesha dia balumbuluishi pa mutu pa bantu ba Nefi tshiakajika nanku; ne matuku a Amalikia akajika nanku.