1 Ne mpindiewu biakalua ne ku ntuadijilu kua tshidimu tshia makumi asatu tshia dikôkesha dia balumbuluishi, mu dituku dibidi dia ngondu wa kumpala, Moloni wakapeta mukanda wa Helamana, ulonda malu a bantu mu tshitupa tshia bulaba atshi.

2 Ne eyi ki miaku yakafundaye, wamba ne: Moloni, muanetu munanga bikola kupita wa mu Mukalenga ne wa mu mpaji yetu ya ku mvita yetu; mona, muanetu munanga, ndi ne kakesa ka kukuambila bitangila mvita yetu mu tshitupa tshia bulaba etshi.

3 Mona, binunu bibidi bia bana ba baluma ba bantu bavua Amona mupatuisha ku bulaba bua Nefi abu—mpindiewu udi mumanya aba tudi tunkanunuina tua Lamana, uvua muikala muana wa kumpala wa baluma wa tatuetu Lehi;

4 Ntshiena ne dijinga dia kukuambuluila bidi bitangila ngikadilu yabu anyi dipanga ditabuija diabu to, bualu udi mumanya bitangila bintu bionsu ebi—

5 Bua nanku buanyi mema mema bidi bikumbana ne nkuambila ne binunu bibidi bia bansongaluma aba bavua bangata biluilu biabu bia mvita, ne bavua basua ne ngikala mulombodi wabu; ne tudi balua kusungidila ditunga dietu.

6 Ne mpindiewu udi kabidi mumanya bitangila tshipungidi tshiakenza batatuabu, ne bakabenga kuambula biluilu biabu bia mvita bua kuluisha bana babu bua kumatshisha mashi abu.

7 Kadi mu tshidimu tshia makumi abidi ne tshisambombo, pakamonabu ntatu yetu ne mpaji yetu buabu, bavua pabuipi ne kushipa tshipungidi tshivuabu bapunga ne kuambula biluilu biabu bia mvita bua kutusungidila.

8 Kadi ntshivua mulekela ne bashipa tshipungidi etshi tshivuabu benza to, bualu ngakatshinka ne Nzambi neatukolesha, mu mushindu wa ne katukengi kabidi to bua dikumbaja dia mutshipu uvuabu bela.

9 Kadi mona, kudi tshintu tshimua kutudi mua kupetela disanka dinena. Bualu mona, mu tshidimu tshia makumi abidi ne tshisambombo, mema, Helamana, ngakaya kumutu kua bansongaluma binunu bibidi aba batangila ku tshimenga tshia Yudaya, bua kuambuluisha Antipu, uwuvua musungula bu mulombodi ku mutu kua bantu ba mu tshitupa tshia bulaba atshi.

10 Ne ngakasangisha kudi bana banyi ba baluma binunu bibidi, (bualu badi bakumbana bua kubabikila ne bana banyi ba baluma) ku musumba wa basalayi wa Antipu, makanda akasanka nawu Antipu menamena; bualu mona, Bena Lamana bavua bakepesha musumba wenda wa basalayi bualu musumba wenda wa basalayi uvua mushipa bungi bunena bua bantu betu, bualu butudi ne bua kukudila.

11 Nansha nanku, tudi mua kudisamba ku bualu ebu, ne badi bafua bua bualu bua ditunga diabu ne bua Nzambi wabu, eyowa, ne badi basangala.

12 Ne Bena Lamana pabu bavua bakuata bena lukanu ba bungi, bonsu buabu badi bikala tupita tunena, bualu kabavua bepelesha moyo wa muntu mukuabu to. Ne tudi tutshinka ne badi diba edi mu bulaba bua Nefi; bidi nanku pikalabu kabayi babashipa to.

13 Ne mpindiewu ebi ki bimenga bidi Bena Lamana bangata ku dimatshisha dia mashi a bantu betu ba bungi ba bukitu:

14 Bulaba bua Manti, anyi tshimenga tshia Manti, ne tshimenga tshia Zêzeloma, ne tshimenga tshia Kumeni, ne tshimenga tshia Antipala.

15 Ne ebi ki bimenga biakangatabu pangakafika ku tshimenga tshia Yuda; ne ngakasangana Antipu ne bantu benda bakuata mudimu ne bukola buabu bua kukolesha tshimenga.

16 Eyowa, ne bavua bapungila mu mubidi ne mu nyuma, bualu bavua baluangana ne bukitu munda munya ne bavua bakuata mudimu butuku bua kukuba bimenga biabu; ne bavua bafua ne ntatu mikola ya mushindu onsu.

17 Ne mpindiewu bavua bapangadika bua kutshimunabu mu muaba ewu anyi bua kufuabu; bua nanku udi mua kutshinka bimpa ne musumba mukesa ewu undi mulua nawu, eyowa, bana banyi ba baluma abu, bakabapesha ditekemena dinena ne disanka dia bungi.

18 Ne mpindiewu biakalua ne pakamona Bena Lamana ne Antipu uvua mupeta makanda mapita bungi bua musumba wenda wa basalayi, Amolona wakabenzeja ku bukola ku dîyi dienda ne kabalu kubunda tshimenga tshia Yuda, anyi kutubunda, bua kutuluisha to.

19 Ne nanku tuakasuibua kudi Mukalenga; bualu bu bobu balua kutubunda patuvua bapanga makanda nanku awu, bavua pamuapa mua kubutula musumba wetu mukesa wa basalayi; kadi ki mua katukuba Mukalenga nanku.

20 Bavua bapeshibua mukenji kudi Amolona bua kukuba bimenga bivuabu bangata. Ne ki muakajika tshidimu tshia makumi abidi ne tshisambombo nanku. Ne ku ntuadijilu wa tshidimu tshia makumi abidi ne tshia muanda muteketa tuvua balongolola tshimenga tshietu ne tuetu bina bua kudisungidila.

21 Mpindiewu tuvua bajinga ne Bena Lamana balua kutubunda; bualu katuvua bajinga bua kubabundila munda mua miaba yabu mikolesha to.

22 Ne biakalua ne tuakalama batentekedi ku miaba yonsu, bua kutentekela dipitakana dia Bena Lamana, bua kabalu kutupita butuku anyi munda munya bua kubundabu bimenga bietu bikuabu bivua ku node.

23 Bualu tuvua bamanya ne mu bimenga abi kabavua ne makanda makumbana bua kutuilangana nabu to; bua nanku tuvua bajinga ne tubaponela kunyima kuabu, bobu bapita pabuipi netu, ne nanku kubakuatshila panyima mu diba dimua divuabu batuilangana nabu kumpala. Tuakatshinka ne tuvua mua kubatamba bukola; kadi, mona, tuakateketa maboku bua dijinga dietu edi.

24 Kabakakima kupita pabuipi netu ne musumba wabu mujima wa basalayi to, kabakakima kupita ne tshitupa tshiawu to, bua kabalu kuikala kabayi ne makanda kâyi makumbana to, ne badishinda.

25 Anyi kabakakima kupueka bua kuluisha tshimenga tshia Zalahemela to; anyi kabakakima kusabuka mpokolo wa musulu wa Sidona, bua kuya ku tshimenga tshia Nefiha to.

26 Ne nanku, ne bisumbu biabu bia basalayi, bavua bikala bapangadika bua kukuba bimenga bivuabu bangata.

27 Ne mpindiewu biakalua ne mu ngondu muibidi wa tshidimu etshi, kuvua biakudia bia bungi biakatuluilabu nabi bifuma kudi batatuenda ba bana banyi ba baluma binunu bibidi abu.

28 Ne kabidi kuvua bantu binunu bibidi batutumina bafuma ku bulaba bua Zalahemela. Ne nanku tuvua badilongolola ne bantu binunu dikumi, ne biakudia buabu, ne bua bakaji babu ne bana babu kabidi.

29 Ne Bena Lamana, bualu bakamona nanku ne bisumbu bietu bia basalayi bivua bivulangana dituku dionsu, ne biakudia bivua bifika bua didikuatshisha dietu, bakabanga kumvua bôwa bikola, ne bakabanga kulopoka, bua ne pikalabi bua kukumbana bakandika ditufikila dia biakudia bietu ne dia makanda etu.

30 Mpindiewu patuakamona ne Bena Lamana bakabanga kusumpakana mushindu ewu, kuenza bulongolodi buvua bua kubakuata; bua nanku Antipu wakafila dîyi bua nya ne bana banyi baluma ba bateketa ku tshimenga tshituvua natshi mutumba, bikala bu ne tuvua tuya ne biakudia ku tshimenga tshituvua natshi mutumba.

31 Ne tuvua ne tshia kuyila pabuipi ne ku tshimenga tshia Antipala, bikala bu ne tuvua tuya ku tshimenga tshia tshivua tshilonda, ku mikalu ya pabuipi ne ku muelelu wa mbuwa.

32 Ne biakalua ne tuakaya, bikala bu ne biakudia bietu, bua kuya ku tshimenga atshi.

33 Ne biakalua ne Antipu wakaya ne tshitupa tshia musumba wenda wa basalayi, ne wakashiya tshishadi tshiawu bua kukuba tshimenga. Kadi kakaya to tô ne pangakaya ne musumba wanyi mukesa wa basalayi, ne pangakalua pabuipi ne ku tshimenga tshia Antipala.

34 Ne mpindiewu, musumba mutamba makanda wa basalayi wa Bena Lamana uvua musombela mu tshimenga tshia Antipala; eyowa, wa bungi kupita.

35 Ne biakalua ne pakabamanyishabu kudi batentekedi babu, bakalua ne musumba wabu wa basalayi ne bakalua kutubunda.

36 Ne biakalua ne tuakanyema kumpala kuabu, batangila ku node. Ne nanku tuakapambuisha musumba wa basalayi wa Bena Lamana uvua mupita bukola;

37 Eyowa, mena bua mutantshi mula, mu mushindu wa pakamonabu musumba wa basalayi wa Antipu ubalondakaja, ne bukitu buabu, kabakakudimuka ku dia baluma anyi ku dia bakaji to, kadi bakatungunuka ne luendu luabu mu njila mululama bua kutukuatabu; ne, bu mutudi tutshinka, divua dijinga diabu bua kutushipabu kumpala kua Antipu kubakuata, ne nanku bua bantu betu kababanyunguludi to.

38 Ne mpindiewu Antipu, pakamonaye njiwu yetu, wakakolesha luendu lua musumba wenda wa basalayi. Kadi mona, bivua butuku; bua nanku kabakatukuata to, nansha Antipu kakabakuata to; bua nanku tuakatudila bua butuku.

39 Ne biakalua ne, mu dinda kumpala kua patshiatshia, mona, Bena Lamana bavua batulondakaja. Mpindiewu katuvua ne makanda makumbana bua kukokangana nabu to; eyowa, ntshivua mulekela ne bana banyi ba baluma bateketa bapona mu bianza biabu to; bua nanku tuakatungunuka ne luendu luetu, ne tuakâsa luendu luetu batangila mu tshipela.

40 Mpindiewu kabakakima kukudimuka ku dia baluma anyi ku dia bakaji to bua kabalu kubanyunguluka; anyi ntshiakukudimuka ku dia baluma anyi ku dia bakaji to, bua kabalu kunkuata, ne katuvua mua kubakandamena to, kadi bavua bua kutushipa, ne bavua bua kunyema; ne nanku tuakanyema dituku dijima mu tshipela, mena tô ne pakîlabu.

41 Ne biakalua kabidi ne, pakalua bukenka bua mu dinda tuakamona Bena Lamana bakadi pabuipi netu, ne tuakanyema kumpala kuabu.

42 Kadi biakalua ne kabakatulondakaja kula to kumpala kua kuimanabu; ne bivua mu dinda dia dituku disatu dia ngondu wa muanda muteketa.

43 Ne mpindiewu, katuvua bamanya to ne bavua babakuata kudi Antipu, kadi ngakambila bantu banyi ne: Monayi, katuena bamanya to ne badi bimana ne kipatshila ka ne tuya kubabunda, bua batukuata mu diteyi diabu;

44 Bua nanku nudi nuamba tshinyi, bana banyi ba baluma, nenuya kubaluisha mvita anyi?

45 Ne mpindiewu ndi nkuambila ne, muanetu munanga wa baluma Moloni, ne ntshivua muanji kumona dikima dinena nanku to, tô, nansha munkatshi mua Bena Nefi bonsu.

46 Bualu bu mumvua mbabikila diba dionsu ne bana banyi ba baluma (bualu bavua bonsu bansonga) mena bia momumua bakangambila ne: Tatu, mona Nzambi wetu udi netu, ne kakulekela ne tudishinda to; bua nanku lekela tuya; katuakushipa bana betu to biatulekelabu talala; bua nanku lekela tuya, bua kabalu kutamba musumba wa basalayi wa Antipu bukola.

47 Mpindiewu kabavua banji kuluangana nansha, kadi kabavua batshina lufu to; ne bavua bela meji bikola ku budishikaminyi bua batatuabu kupita mioyo yabu; eyowa, bavua babalongesha kudi bamamuabu ne, pikalabu kabayi bela mpata to, Nzambi neabapatuisha.

48 Ne bakangambuluila mêyi a bamamuabu, bamba ne: Katuena tuela mpata to ne bamamuetu bavua bamanya nanku.

49 Ne biakalua ne ngakapingana ne binunu bianyi bibidi bua kubunda Bena Lamana bavua batulondakaja aba. Ne mpindiewu mona, misumba ya basalayi ya Antipu ivua mibakuata, ne mvita ivua itshinyisha ivua mituadija.

50 Musumba wa basalayi wa Antipu uvua mutshioka, bua luendu luabu lula mu mutantshi mukesa wa diba, uvua pabuipi ne kupona mu bianza bia Bena Lamana; ne bu ntshivua mupingana ne binunu bianyi bibidi to, Bena Lamana bavua bua kupeta kipatshila kabu.

51 Bualu Antipu uvua mufua ku muela wa mvita, ne balombodi benda ba bungi, bua ditshioka diabu, divua dienzeka bua lukasa lua luendu luabu—bua nanku bantu ba Antipu, bualu bavua babuelakana mu meji bua dipona dia balombodi babu, bakabanga kupingana panyima kumpala kua Bena Lamana.

52 Ne biakalua ne Bena Lamana bakapeta dikima, ne bakabanga kubalondakaja; ne nanku Bena Lamana bavua babalondakaja ne bukola bua bungi pakabaluila Helamana panyima pabu ne binunu bienda bibidi, ne wakabanga kubashipa menamena, mu mushindu wa ne musumba mujima wa basalayi wa Bena Lamana wakimana ne wakakudimukila Helamana.

53 Mpindiewu pakamona bantu ba Antipu ne Bena Lamana bavua bakudimuka panyima, bakasangisha bantu babu pamua ne bakabundila kabidi Bena Lamana panyima pabu.

54 Ne mpindiewu biakalua ne tuetu, bantu ba Nefi, bantu ba Antipu, ne mema ne binunu bianyi bibidi, tuakanyungulula Bena Lamana, ne tuakabashipa; eyowa, bua ne tuakabenzeja bua kufilabu biluilu biabu bia mvita ne kudifilabu kabidi bu bena lukanu ba mvita.

55 Ne mpindiewu biakalua ne pakadifilabu kutudi, mona, ngakabala bavua baluangana nanyi abu, bualu mvua ntshina ne kakuikadi ba bungi babu bafua.

56 Kadi mona, disanka dianyi divua dinena, bualu muntu wabu nansha umua kavua mupona panshi to; eyowa, ne bavua baluangana bu mudi ne makanda adi afuma kudi Nzambi; eyowa, kakuvua bantu bamanyika bakaluangana ne makanda a tshishima nanku to; ne bakadiela kudi Bena Lamana ne bukola bupita, mu mushindu wa bakabumvuija bôwa bikola; ne bua bualu ebu Bena Lamana bakadifila bu bena lukanu ba mvita.

57 Ne bu mutuvua katuyi ne muaba bua bena lukanu betu ba mvita to, mua tuetu kubalama kula ne misumba ya basalayi ya Bena Lamana, bua nanku tuakabatuma ku bulaba bua Zalahemela, pamua ne tshitupa tshia bantu ba Antipu bavuabu kabayi bashipa to; ne ngakangata bavua bashala ne ngakabasangisha bitenda bianyi bia Bena Amona, ne tuakâsa luendu luetu tupingana ku tshimenga tshia Yudaya.