1 Ne biakalua ne wakafundila kabidi ngovena wa mu bulaba, uvua muikala Paholana, ne eyi ki miaku yakafundaye, wamba ne: Mona, ndi ntuma mukanda wanyi kudi Paholana, mu tshimenga tshia Zalahemela, udi muikala mulumbuluishi munena ne ngovena wa mu bulaba, ne kabidi kudi bonsu bavuabu basungula kudi bantu aba bua kulombola ne kuludika malu a mvita eyi.

2 Bualu monayi, ndi ne kakesa ka kubambila ku njila wa dipîshibua; bualu monayi, nudi bamanya nuenu bina nudi basungudibua bua kusangisha bantu pamua, ne kubapaya ne miela ya mvita, ne ne tuela tua mvita, ne ne mishindu yonsu ya biluilu bia mvita ya mushindu onsu, ne bua kubatuma bua kuluisha Bena Lamana, mu bitupa bionsu mualuilabu mu bulaba buetu.

3 Ne mpindiewu monayi, ndi nnuambila ne mema muina, ne bantu banyi kabidi, ne Helamana ne bantu benda kabidi, tudi bafua ne makenga manena menamena; eyowa, mena nzala, nyota, ne dipungi, ne mishindu yonsu ya ntatu ya mushindu onsu.

4 Kadi monayi, bu tuetu katuyi bakenga ne bionsu ebi to, katuakunungana anyi kudiwula to.

5 Kadi monayi, dishibeya divua dikala dikola munkatshi mua bantu betu; eyowa, binunu bidi bipona ku muela wa mvita, bavuabi mua kuikala mushindu mukuabu bu nuenu bapesha misumba yetu ya basalayi makanda ne diambuluisha bidi bikumbana. Eyowa, dilengulula dienu kutudi divua dikala dinena.

6 Ne mpindiewu monayi, tudi tujinga bua kumanya tshiena bualu tshia dilengulula dinena menamena edi; eyowa, tudi tujinga bua kumanya tshiena bualu tshia ngikadilu wenu wa dipanga dia lumvuilu.

7 Nudi mua kuela meji kusomba mu nkuasa yenu ya bukalenga mu ngikadilu wa dilembelela dia dipanga dia lumvuilu, padi bena lukuna benu batangalaja mudimu wa lufu ku mpenga yenu yonsu anyi? Eyowa, padibu bashipa binunu bia bana bena—

8 Eyowa, mena bavua banutangidila bua bukubi, eyowa, bavua banuteka pa muaba unuvua mua kubambuluisha, eyowa, nuvua mua kubatumina misumba ya basalayi bua kubakolesha, ne nuvua mua kupandisha binunu bia biabu bua kabaponyi ku muela wa mvita to.

9 Kadi monayi, ebi ki mbionsu to—nuvua babapala biakudia bienu, mua ne ba bungi bavua baluangana ne bakajimija mashi abu tô ne ku lufu bua dijinga diabu dinena divuabu nadi bua diakalengela dia bantu aba; eyowa, ne bavua benza nanku pavuabu pabuipi ne kufua bua nzala, bua dilengulula dienu dinena menamena kudibu.

10 Ne mpindiewu, bana betu bananga—bualu nuvua ne bua kuikala bananga; eyowa, ne nuvua ne bua kudisonsola bikola ne dinanukila bua diakalengela ne budishikaminyi bua bantu aba; kadi monayi, nuvua babalengulula mua ne mashi a binunu bia bantu neapona pa mitu yenu bua disombuela; eyowa, bualu Nzambi uvua mumanya bua mbila yabu yonsu ne makenga abu onsu—

11 Monayi, nuvua mua kutshinka ne nuvua mua kusomba mu nkuasa yenu ya bukalenga, ne bua buimpa bua Nzambi lupita kanuvua mua kuenza tshintu to ne neanupatuisha anyi? Monayi, panuikala nuvua nutshinka nanku nuvua nutshinka tshianana.

12 Nudi nutshinka ne, bualu bavua bashipa bana benu ba bungi bivua bua bubi buabu anyi? Ndi nnuambila ne, panuikala nuvua nutshinka nanku nuvua nutshinka tshianana; bualu ndi nnuambila ne, kudi ba bungi badi bapona ku muela wa mvita; ne monayi, mbua dipîshibua dienu;

13 Bualu Mukalenga udi ulekela bua bashipa bakana bua bululama buenda ne tshibawu tshienda bilua pa mutu pa bena bubi; bua nanku kanuena bua kutshinka ne bakana badi bajimina bualu badi bashipibua to; kadi monayi, badi babuela mu dikisha dia Mukalenga Nzambi wabu.

14 Ne mpindiewu monayi, ndi nnuambila ne, ndi ntshina menamena ne bitungu bia Nzambi nebilua pa mutu pa bantu aba, bua bufuba buabu bupita, eyowa, mena bufuba bua bantu badi mu bukalenga buetu, ne bua dilengulula diabu dinena menamena kudi bana babu, eyowa, bavua bashipibua abu.

15 Bualu bu ne kabivua bua bubi buakabangila kumpala ku mutu kuetu to, tuvua mua kukandamena bena lukuna betu bua ne kabavua mua kupeta nansha bumua kutudi to.

16 Eyowa, bu kabivua bua mvita yakapatuka munkatshi muetu nkayetu to; eyowa, bu kabivua bua bantu-ba-mfumu aba, bakenzeja dimatshisha dia mashi dia bungi munkatshi muetu nkayetu; eyowa, diba dituvua tukokangana munkatshi muetu nkayetu, bu tuetu basangisha makanda etu bu mutuvua benza tô ne mpindiewu; eyowa, bu kabivua bua dijinga dia bukola ne bukôkeshi bivua bantu-ba-mfumu abu nabi kutudi to; bu bikala badifila ku bualu bua budishikaminyi buetu, ne badisangisha netu, ne baya kuluisha bena lukuna betu, pamutu pa kuambula miela ya mvita bua kutuluisha, tshivua tshikala tshiena bualu tshia dimatshisha dia mashi mapita bungi munkatshi muetu nkayetu; eyowa, bu tuetu baya kubaluisha ne makanda a Mukalenga, tuvua bua kumuangalaja bena lukuna betu, bualu bivua bua kuenzeka, bilondeshila ku dikumbajibua dia dîyi dienda.

17 Kadi monayi, mpindiewu Bena Lamana badi balua kutubunda, badi bangata malaba etu, ne badi bashipa bantu betu ne muela wa mvita, eyowa, bantu bakaji betu ne bana betu, ne badi babakuata kabidi bakuatshibu, ne badi babakengesha mishindu yonsu ya ntatu, ne nanku bua bubi bukola bua badi bakeba bukola ne bukôkeshi abu, eyowa, mena bantu-ba-mfumu abu.

18 Kadi bua tshinyi ndi ne bua kuakula bia bungi bitangila bualu ebu? Bualu katuena bamanya to nuenu bina ne nudi nukeba bukôkeshi. Katuena bamanya to, kadi nudi kabidi bua kuikala bapangidi ba ditunga dienu.

19 Anyi bivua ne nuvua batulengulula bualu nudi munkatshi mua ditunga dietu ne nudi banyunguluka ne bukubi, ki bua tshinyi kanuena nututumishila biakudia to, ne bantu kabidi to bua kukolesha misumba yetu ya basalayi anyi?

20 Nudi bapua moyo mikenji ya Mukalenga Nzambi wenu anyi? Eyowa, nudi bapua moyo bukuatshibu bua batatuetu anyi? Nudi bapua moyo misangu bungi kayi ituvua bapatuishibua mu bianza bia bena lukuna betu anyi?

21 Anyi nudi nutshinka ne Mukalenga ne neikala amu utupatuisha, patudi basomba mu nkuasa yetu ya bukalenga ne patudi katuyi tuenzela bukola budi Mukalenga mutupesha to anyi?

22 Eyowa, nenusomba mu bufuba padibu banyunguludibua kudi binunu, eyowa, ne binunu makumi ne makumi, bidi bisomba pabi mu bufuba abi, padi binunu ne binunu ku mikalu ya bulaba bikala bapona ku muela wa mvita, eyowa, bikala batapibua mputa ne bamata mashi anyi?

23 Nudi nutshinka ne Nzambi neanutangila bu bapanga dipîla panudi basomba kanuyi nunyungana to ne batangila bintu ebi ne mesu anyi? Monayi ndi nnuambila ne, To. Mpindiewu ndi musua ne nuvuluka ne Nzambi uvua muamba ne bantu nebatokesha munda mua lupanza kumpala, ne pashisha nebatokesha pambidi pa lupanza kabidi.

24 Ne mpindiewu, pa kumbusha nuenu bakudimuna mutshima balekela binuvua benza, ne bajuka ne babanga kuenza mudimu, ne batuma biakudia ne bantu kutudi, ne kudi Helamana kabidi, bua kukuatshishaye bitupa bia ditunga dietu bidiye muangatulula, ne bua tuangatulula tshishadi tshia malaba etu mu bitupa ebi, monayi ne bikengedibua ne katukokanganyi ne Bena Lamana kabidi to tô ne patuikala kumpala batokesha munda mua lupanza luetu, eyowa, mena mutu menamena wa bukalenga buetu.

25 Ne pa kumbusha nuenu banganyishila tshindi mulomba mu mukanda wanyi, ne bapatuka patoka ne bandeja nyuma mulelela wa budishikaminyi, ne benza muenu monsu bua kukolesha ne kukankamija misumba yetu ya basalayi, ne babapesha biakudia bua didikuatshisha diabu, monayi nenshiya tshitupa tshia bantu-badishikaminyi banyi bua kukuba tshitupa tshia bulaba buetu etshi, ne nembashila makanda ne mabenesha a Nzambi, bua bukola bukuabu nansha bumua kabubenji tshintu to—

26 Ne ebi bua ditabuija diabu dipita, ne ditukija diabu mu mpaji yabu—

27 Ne nendua kunudi, ne pikalaku muntu munkatshi muenu udi muikala ne dijinga dia budishikaminyi, eyowa, pikalaku kushala nansha kantolantola wa budishikaminyi, monayi nensonsola tshimvundu munkatshi muenu tô ne pâbutuka badi ne dijinga dia kunyenga bukola ne bukôkeshi abu.

28 Eyowa, monayi ntshiena ntshina bukola buenu anyi bukôkeshi buenu to, kadi Nzambi wanyi ki undi ntshina; ne ndi ngangata muela wanyi wa mvita bua kusungidila bualu bua ditunga dianyi bilondeshila ku mikenji yenda, ne tudi bapeta dijimija dia bantu ba bungi bua malu mabi enu.

29 Monayi diba diakumbanyi, eyowa, diba didi mpindiewu pabuipi, pa kumbusha nuenu badikankamija bua kusungidila ditunga dienu ne bana benu, muela wa mvita wa bululama udi mulembelela pa mitu yenu; eyowa, ne neunukulukila ne neununyoka tô ne ku dibutuka dijima dienu.

30 Monayi, ndi ngindila diambuluisha kunudi; ne, pa kumbusha nuenu bapesha bua diambuluisha dietu, monayi, nendua kunudi, mena ku bulaba bua Zalahemela, ne nenutûta ne muela wa mvita, mua ne kanuakuikala kabidi ne bukola bua kukandika dilubuluka dia bantu bitangila bualu bua budishikaminyi buetu to.

31 Bualu monayi, Mukalenga kakulekela ne nuikala ne moyo ne nukolakana mu malu mabi enu bua kubutula bantu benda bakana to.

32 Monayi, nudi mua kutshinka ne Mukalenga neanuepelesha ne neakosela Bena Lamana tshibawu, padi ku ne ngikadilu wa batatuabu ki udi muenzeja lukinu luabu, eyowa, ne ludi luvudija misangu ibidi kudi aba badi batapuluka kutudi, padi malu mabi enu mikala bua dinanga dienu dia butumbi ne bintu bia tshianana bia pa buloba anyi?

33 Nudi bamanya ne nudi nusambuka mêyi a Nzambi, ne nudi bamanya ne nudi nu’adiatakaja mu makasa enu. Monayi, Mukalenga udi ungambila ne; Pikala banudi basungula bua kuikala bangovena benu abu kabena bakudimuna mutshima bua kulekela mibi yabu ne malu mabi abu to, nenuye kubaluisha mvita.

34 Ne mpindiewu monayi, mema, Moloni, ndi mukandikibua, bilondeshila ku tshipungidi tshimvua muenza bua kulama mikenji ya Nzambi wanyi; bua nanku ndi musua ne nutumikila dîyi dia Nzambi, ne nuntumina bimua bia ku biakudia bienu ne bamua ba ku bantu benu lukasa, ne nutumina Helamana kabidi.

35 Ne monayi, panuikala kanuyi benza nanku to nenuluila lukasa; bualu monayi, Nzambi kakulekela ne tufua ne nzala to; bua nanku neatupesha bimua bia ku biakudia bienu, nansha biobi ne tshia kuikala ku muela wa mvita. Mpindiewu tangilayi ne ukumbaja dîyi dia Nzambi.

36 Monayi, ndi Moloni, kapita kenu kanena. Ntshiena nkeba bukalenga to, kadi ndi nkeba kubushipa. Ntshiena nkeba lumu kudi ba pa buloba to, kadi ndi nkeba butumbi bua Nzambi wanyi, ne budishikaminyi ne diakalengela dia ditunga dianyi. Ne ngajikiji mukanda wanyi nanku.