1 Monayi, mpindiewu biakalua ne katataka kunyima kua Moloni mutuma mukanda wenda kudi ngovena munena, wakapeta mukanda wa Paholana, ngovena munena. Ne eyi ki miaku yakapetaye:

2 Mema, Paholana, udi muikala ngovena munena wa bulaba ebu, ndi ntuma miaku eyi kudi Moloni, kapita kanena udi ku mutu kua musumba wa basalayi. Mona, ndi nkuambila, Moloni, ne ntshiena nsanka bua ntatu yenu mikola to, eyowa, bidi bibungamija anyima wanyi.

3 Kadi mona, kudi badi basanka bua ntatu yenu, eyowa, mu mushindu wa ne mbatombokela, ne batombokela bantu banyi kabidi badi bikala bantu-badishikaminyi, eyowa, ne badi batomboka abu badi ba bungi menamena.

4 Ne bobu bavua bakeba bua kunyenga nkuasa wa tshilumbuluilu ki bavua bikala tshiena bualu tshia bualu bubi bunena ebu; bualu bavua benzela lubombu lukola, ne badi bapambuisha mitshima ya bantu ba bungi, tshialua kuikala tshiena bualu tshia ntatu mikola munkatshi muetu; bavua batupala biakudia bietu, ne bavua batshingisha bantu-badishikaminyi betu bua ne kabavua balua kunudi to.

5 Ne mona, bavua bangipata kumpala kuabu, ne mvua munyemena ku bulaba bua Gideona, ne bantu bonsu bamvua mua kupeta.

6 Ne mona, mvua mutuma dimanyisha mu tshitupa etshi tshionsu tshia bulaba; ne mona, badi balua mu bisumbu kutudi dituku dionsu, bua kuambula biluilu biabu, bua kusungidila ditunga diabu ne budishikaminyi buabu, bua kutusombuela ku bubi buvua butuenzela.

7 Ne badi balua kutudi, mua ne bavua batutombokela abu bashikidi, eyowa, mu mushindu wa badi batutshina ne kabena bakima kulua kutuluisha mvita to.

8 Badi bangata bulaba, anyi tshimenga tshia Zalahemela; badi bateka mfumu ku mutu kuabu, ne udi mufundila mfumu wa Bena Lamana mukanda, mudiye muenza diumvuangana nenda; mu diumvuangana mudiyi muitaba bua kukuba tshimenga tshia Zalahemela, dikuba didiye utshinka ne nediambuluisha Bena Lamana bua kutshimuna tshishadi tshia bulaba, ne nebamuteka mfumu pa mutu pa bantu aba pâtshimunyibuabu ku bukôkeshi bua Bena Lamana.

9 Ne mpindiewu, mu mukanda weba udi mumpesha tshilema, kadi kabiena ne bualu to; ntshiena mufîka tshiji to, kadi ndi nsanka bua bunena bua mutshima weba. Mema, Paholana, ntshiena nkeba bukalenga to, amu pa kumbusha bua kulama nkuasa wa tshilumbuluilu bua nkuba manema ne budishikaminyi bia bantu banyi. Anyima wanyi udi mukankamana mu budishikaminyi abu buakatufikisha Nzambi badikadila.

10 Ne mpindiewu, mona, netukolela ku bubi mena tô ne ku dimatshisha dia mashi. Katuakuitshikija mashi a Bena Lamana pikalabu bashala mu bulaba buabu nkayabu to.

11 Katuakumatshisha mashi a bana betu to biatutombokelabu ne kutuambuilabu muela wa mvita bua kutuluisha to.

12 Tuvua tudibatshika ku tshikokedi tshia bupika bu bululama bua Nzambi buikala bukengedibua nanku, anyi bu yeya mutupesha mukenji bua kuenza nanku.

13 Kadi mona kena mutupesha mukenji ne tudibatshika kudi bena lukuna betu to, kadi ne tueyemena kudiye, ne neatupatuisha.

14 Bua nanku, muanetu wa baluma munanga, Moloni, tukandamenayi bubi, ne bubi bonsu butudi katuyi mua kubukandamena ne miaku yetu, eyowa, bu mudi buntomboji ne matapuluka, lekelayi tubikandamena ne miela yetu ya mvita bua tulama budishikaminyi buetu, bua tusanka bua diakalengela dinena dia kuikala ne ekelezia wetu, ne bua bualu bua Musungidi wetu ne Nzambi wetu.

15 Bua nanku, luaku kundi lubilu ne bungi bukesa bua bantu beba, ne shiya badi bashala ku bulombodi bua Lehi ne Teyankuma; bapesha bukôkeshi bua kulombola mvita mu tshitupa tshia bulaba atshi, bilondeshila ku Nyuma wa Nzambi, udi kabidi muikala nyuma wa budishikaminyi udi muikala munda muabu.

16 Mona ndi mubatumina biakudia bikesa, bua kabafu to tô ne ne pawudi mua kulua kudi.

17 Sangishayi pamua tshisumbu tshionsu tshia basalayi tshinudi mua kukunguija panudi nulua kuneku, ne netuye lukasa bua kuluisha batapuluki abu, ne makanda a Nzambi wetu bilondeshila ku ditabuija didi munda muetu.

18 Ne netuangata tshimenga tshia Zalahemela, bua kupeta biakudia bikuabu bia kutumina Lehi ne Teyankuma; eyowa, netuye kubaluisha ne makanda a Mukalenga, ne netujikija bualu bubi ebu.

19 Ne mpindiewu, Moloni, ndi ne disanka dia kupeta mukanda weba, bualu mvua ne disumpakana dikesa bitangila tshituvua ne bua kuenza, ne bikalabi biakana kutudi bua kuya kuluisha bana betu.

20 Kadi wambi ne, pa kumbusha bobu bakudimuna mutshima Mukalenga udi mukupesha mukenji ne uya kubaluisha.

21 Tangila ne ukolesha Lehi ne Teyankuma mu Mukalenga; ubambila bua kabatshinyi to, bualu Nzambi neabapatuisha, eyowa, ne kabidi bonsu badi bakankamana mu budishikaminyi abu buakabafikisha Nzambi badikadila. Ne mpindiewu, ngajikiji mukanda wanyi kudi muanetu wa baluma munanga, Moloni.