1 Ne biakalua ne ku ntuadijilu wa tshidimu tshia makumi asatu ne tshisambombo tshia dikôkesha dia balumbuluishi pa mutu pa bantu ba Nefi, Shibulona wakangata bintu bia tshijila bivua Alama mupesha Helamana.

2 Ne uvua muntu muakana, ne uvua wenda bôloloka kumpala kua Nzambi; ne uvua mutangila bua kuenza bimpa diba dionsu, bua kulama mikenji ya Mukalenga Nzambi wenda; ne muanabu wa baluma penda.

3 Ne biakalua ne Moloni wakafua penda. Ne ki muakajika tshidimu tshia makumi asatu ne tshisambombo tshia dikôkesha dia balumbuluishi nanku.

4 Ne biakalua ne mu tshidimu tshia makumi asatu ne tshia muanda muteketa tshia dikôkesha dia balumbuluishi, kuvua tshisumbu tshinena tshia bantu, mena bafika tô ne ku bungi bua binunu bitanu ne nkama inayi ya bantu baluma, ne bakaji babu ne bana babu, tshiakumbuka ku bulaba bua Zalahemela batangila ku bulaba bua ku node.

5 Ne biakalua ne Hagota, yeya muikala muntu wa lutangilu menamena, bua nanku wakaya ne wakibaka buatu bupita bunena menamena, ku mikalu ya ku bulaba bua Buvula, pabuipi ne ku bulaba bua Kabutu, ne wakabuela pa mbuwa wa ku wesete, pabuipi ne tshitupa tshibumbakana tshivua tshilombola ku bulaba bua node.

6 Ne monayi, kuvua Bena Nefi ba bungi bakabuelamu ne bakenda pa mâyi ne biakudia bia bungi, ne bantu bakaji ba bungi ne bana; ne bakangata njila wa ku node. Ne ki muakajika tshidimu tshia makumi asatu ne tshia muanda muteketa nanku.

7 Ne mu tshidimu tshia makumi asatu ne tshia muanda mukulu, muntu ewu wakenza mâtu makuabu. Ne buatu bua kumpala buakapingana pabu, ne bantu bakuabu ba bungi bakabuelamu; ne bakangata pabu biakudia bia bungi, ne bakâsa luendu kabidi batangila ku bulaba bua ku node.

8 Ne biakalua ne kabakumvua kabidi bualu buabu nansha. Ne tudi tutshinka ne bavua bafua mu ndondu ya mbuwa. Ne biakalua ne buatu bukuabu bumua buakenda pa mâyi kabidi; ne katuena bamanya kuakayawu to.

9 Ne biakalua ne mu tshidimu etshi kuvua bantu ba bungi bakaya ku bulaba bua ku node. Ne ki muakajika tshidimu tshia makumi asatu ne tshia muanda mukulu nanku.

10 Ne biakalua ne mu tshidimu tshia makumi asatu ne tshia tshitema tshia dikôkesha dia balumbuluishi, Shibulona wakafua penda, ne Koliantona uvua muya mu buatu ku bulaba bua ku node, bua kuambuila bantu bavua baya ku bulaba ebu biakudia.

11 Bua nanku biakakengedibua ne Shibulona, kumpala kua lufu luenda, ambikila muanenda wa baluma wa Helamana bintu bia tshijila ebi, uvua ubikidibua ne Helamana, uvuayi muinyika dîna dia tatuenda.

12 Mpindiewu monayi, mikanunu eyi yonsu ivua milamibua kudi Helamana ivua mifundibua ne mitumibua munkatshi mua bana ba bantu mu bulaba bonsu, pa kumbusha bitupa bivua Alama muela mukenji ne kabitumibu to.

13 Nansha nanku, bavua balama bintu ebi ne tshijila, ne bivua bishila lukongu lua bantu lumua kudi lukuabu: bua nanku, mu tshidimu etshi, bivua biambikila Helamana, kumpala kua lufu lua Shibulona.

14 Ne biakalua kabidi mu tshidimu atshi ne kuvua bamua batapuluki bakaya kudi Bena Lamana; ne bakasonsodibua kabidi ku tshiji bua Bena Nefi.

15 Ne kabidi mu tshidimu tshina etshi bakapueka ne musumba wa basalayi ba bungi bua kuluisha bantu ba Moloniha mvita, anyi bua kuluisha musumba wa basalayi wa Moloniha, mvita yakabatambabu ne yakabapingajabu kabidi ku malaba abu nkayabu, ne muakapetakanabu ne dijimija dikola.

16 Ne ki muakajika tshidimu tshia makumi asatu ne tshia tshitema tshia dikôkesha dia balumbuluishi pa mutu pa bantu ba Nefi nanku.

17 Ne ki muakajika mulubu wa Alama nanku, ne Helamana muanenda wa baluma, ne Shibulona uvua muikala penda muana wa baluma wa Alama.