Chapit 1
Kijan nou te jwenn Liv Mòmon an
Lè Joseph Smith te gen 14 zan, anpil legliz te pretann ke yo te gen laverite, epi li pa t konnen nan kiyès pou l te rantre.
Yon jou Joseph te li Jak 1:5 nan Bib la: “Si nenpòt moun manke bon konprann, se pou l mande Bondye.” Joseph te bezwen konnen ki legliz ki te vrè a, konsa li te deside pou l te mande Bondye.
Yon jou maten sezon prentan, Joseph te ale nan yon boskè toupre lakay li pou l te priye.
Pandan li te mete l ajenou epi l te kòmanse priye, Satan te eseye bloke li. Joseph te priye pi rèd, kote l te mande Pè Selès la pou ede li.
Pè Selès la avèk Jezikri te parèt devan Joseph nan yon kolòn limyè. Pè Selès la te lonje dwèt li sou Jezi epi l te di: “Sa se Pitit Gason Byenneme m nan. Koute l!”
Joseph te mande nan ki legliz pou l te rantre. Jezi te di li pou l pa t rantre nan okenn nan yo paske yo tout te nan erè.
Lè Joseph te rakonte kèk moun kisa l te wè ak sa l te tande, yo te ri li. Dirijan nan anpil legliz nan lokalite a te pèsekite li.
Twazan te pase. Yon jouswa, Joseph t ap priye pou l jwenn padon pou peche li epi pou l te konn kisa pou l te fè.
Yon zanj ki rele Mowoni te parèt epi l te pale Joseph de yon liv ki te ekri sou plak lò. Joseph te gen pou l te tradui plak sa yo an Anglè.
Lè Mowoni te fin ale, Joseph te reflechi sou sa Mowoni te di l yo. Mowoni te retounen de lòt fwa nan nuit sa a.
Nan demen, Joseph te ale sou tèt Kolin Kimora a, ke l te wè nan yon vizyon. La li te jwenn yon gwo wòch. Li te soulve wòch la avèk yon bout bwa.
Anba wòch la te gen yon bwat anwòch. Lè Joseph te gade andedan bwat la, li te wè plak lò yo.
Mowoni te parèt epi l te di Joseph pou l pa t pran plak yo men pou l te retounen nan menm jou a chak ane pandan katran. Chak fwa Joseph t ale, Mowoni te anseye li.
Apre katran, Joseph te finalman jwenn otorizasyon pou l te pran plak lò yo. Li te itilize Ourim ak Toumim nan pou l te tradui kèk nan yo.
Te gen sekretè ki te ede Joseph nan ekri pawòl yo pandan l t ap tradui yo apati plak lò yo.
Joseph te pote pawòl li te tradui yo nan yon enprimri epi l te fè yon enprime yo vin fè yon liv.
Istwa Legliz la 1:71.
Liv la rele Liv Mòmon an. Li pale de moun ki t ap viv nan Amerik la sa gen dèzane. Li pale de Jezikri, Pitit Gason Bondye a tou.