Chapit 23
Amon: yon gwo sèvitè
Kat pitit gason Mozya yo te kite Zarayemla pou yo t al anseye Lamanit yo levanjil la. Yo chak te ale nan yon vil diferan.
Amon te ale nan peyi Izmayèl la. Lè l te antre nan vil la, Lamanit yo te mete l anba kòd epi yo te mennen l devan wa yo a, Lamoni.
Amon te di Wa Lamoni ke l te vle viv nan mitan Lamanit yo. Lamoni te kontan epi l te fè mesye l yo demare Amon.
Amon te di li ta p vin youn nan sèvitè wa yo. Wa a te mete l kòm gadyen twoupo l yo.
Yon jou pandan Amon ak lòt sèvitè yo ta p mennen twoupo yo al bwè dlo, vòlè Lamanit yo te gaye bèt yo epi yo te eseye vòlè yo.
Sèvitè ki te avèk Amon yo te panike. Wa Lamoni te konn touye lòt sèvitè ki te konn pèdi bèt vòlè sa yo te konn pran yo.
Amon te konnen sa sete chans li pou l te itilize pouvwa Senyè a pou touche kè Lamanit yo. Apresa yo t ap dispoze pou yo te tande mesaj li a.
Amon te di sèvitè yo ke si yo te rasanble bèt ki te gaye yo, wa a pa t ap touye yo.
Amon ak lòt sèvitè yo te rapidman jwenn bèt yo epi yo te mennen yo retounen nan zòn dlo a.
Lamanit vòlè yo te retounen. Amon te di lòt sèvitè yo pou yo te siveye twoupo yo pandan li t apral konbat vòlè yo.
Lamanit vòlè yo pa t pè Amon. Yo te panse yo te ka touye l fasilman.
Pouvwa Bondye te avèk Amon. Li te frape epi l te touye kèk nan vòlè yo avèk wòch, sa k te fè rès vòlè yo fache anpil.
Yo te eseye touye Amon avèk baton yo, men chak fwa yon vòlè te leve yon baton pou frape Amon, li te koupe bra vòlè a. Vòlè yo te kraponnen epi yo te kouri ale.
Sèvitè yo te pote bra k te koupe yo bay Wa Lamoni epi yo te rakonte l sa Amon te fè.
Wa a te etone devan gran pouvwa Amon. Li te vle wè Amon men li te pè paske l te panse Amon sete Gran Espri a.
Lè Amon te antre pou vin wè li, Wa Lamoni pa t konnen kisa pou l te di. Li pa t pale pandan inèdtan.
Sentespri a te ede Amon konnen kisa wa a t ap panse. Amon te eksplike ke li pa t Gran Espri a. Li sete yon moun.
Wa a te ofri pou l te bay Amon tout sa l te vle si l ta di l ki pouvwa l te itilize pou l te venk vòlè yo epi konnen panse wa a.
Amon te di ke sèl bagay li te vle pou Wa Lamoni te fè sete kwè sa l ta pral di l yo. Wa a te di l te pare pou l te kwè tout bagay Amon te di li.
Amon te mande Wa Lamoni si l te kwè nan Bondye. Wa a te di li kwè nan yon Gran Espri.
Amon te di ke Gran Espri a se Bondye, ke l te kreye tout bagay nan syèl la ak sou tè a, epi li konnen panse tout moun.
Amon te di moun te kreye dapre imaj Bondye. Li te di tou ke Bondye te aple l pou l te anseye Lamoni ak pèp li a levanjil la.
Pandan l te itilize ekriti yo, Amon te anseye Wa Lamoni konsènan Kreyasyon an, Adan, ak Jezikri.
Wa Lamoni te kwè Amon epi l te priye pou l te jwenn padon pou peche li. Apresa li te tonbe atè epi sanble l te mouri.
Sèvitè yo te mennen wa a bay madanm ni epi yo te mete l kouche sou yon kabann. Apre de jou sèvitè yo te panse l te mouri epi yo te deside antere li.
Rèn nan pa t kwè ke mari l te mouri. Apre l te enfòme sou gran pouvwa Amon, li te mande l pou l te ede wa a.
Amon te konnen Lamoni te anba pouvwa Bondye. Li te di rèn nan ke Lamoni t ap reveye nan jou apre a.
Li te rete avèk Lamoni pandan tout nuit la. Nan jou apre a Lamoni te reveye epi l te di l ke l te wè Jezikri. Wa a ak rèn nan te ranpli avèk Sentespri a.
Lamoni te anseye pèp li a konsènan Bondye ak Jezikri. Moun ki te kwè yo te repanti pou peche yo epi yo te batize.