Chapit 37

Nefi ak Leyi nan prizon

Nefi ak Leyi sete pitit gason Elaman. Elaman te vle yo rete jis tankou Leyi ak Nefi ki te kite Jerizalèm yo.

Elaman 5:4–7

Elaman te anseye pitit gason l yo pou yo te kwè nan Jezikri. Yo te aprann ke padon vini atravè lafwa ak repantans.

Elaman 5:9–12

Nefi ak Leyi t ale anseye Nefit yo ak Lamanit yo pawòl Bondye a. Dè milye moun te batize.

Elaman 5:14–19

Lè Nefi ak Leyi te rive nan peyi Nefi a, yon lame Lamanit te jete yo nan prizon epi yo pa t ba yo manje pandan plizyè jou.

Elaman 5:20–22

Lamanit yo te antre nan prizon an pou yo te touye Nefi ak Leyi men yo pa t kapab paske yo te pwoteje pa yon sèk dife ki t ap boule tout moun ki te eseye touche yo.

Elaman 5:22–23

Nefi ak Leyi pa t boule nan dife a. Yo te di Lamanit yo ke sete pouvwa Bondye ki t ap pwoteje yo.

Elaman 5:24–26

Tè a ak miray prizon yo te kòmanse souke. Yon nyaj sonb te antoure moun yo nan prizon an, epi yo te pè.

Elaman 5:27–28

Yon vwa ki te soti anwo te pale nan fènwa a. Li te trankil tankou yon chichotman, men tout moun te ka tande li.

Elaman 5:29–30

Vwa a te di moun yo pou yo te repanti epi sispann eseye touye Nefi ak Leyi.

Elaman 5:29–30

Vwa a te pale twa fwa, epi tè a ak miray prizon yo te kontinye souke. Lamanit yo pa t ka kouri paske l te twò fènwa epi yo te twò pè.

Elaman 5:33–34

Yon Nefit ki sete yon manm Legliz la te wè figi Nefi ak Leyi ki te klere nan mitan fènwa a.

Elaman 5:35–36

Nefi ak Leyi t ap gade nan direksyon syèl la epi yo t ap pale. Mesye a te di Lamanit yo pou yo te gade. Yo t ap mande ak kimoun Nefi ak Leyi t ap pale.

Elaman 5:36–38

Mesye a, ki te rele Aminadab, te di Lamanit yo ke Nefi ak Leyi t ap pale avè zanj.

Elaman 5:39

Lamanit yo te mande Aminadab kijan pou yo te fè nyaj tenèb la ale. Li te di yo pou yo te repanti epi priye jiskaske yo te gen lafwa nan Jezikri.

Elaman 15:40–41

Lamanit yo te priye jiskaske nyaj tenèb la te disparèt.

Elaman 5:42

Lè tenèb yo te disparèt, moun yo te wè yon kolòn dife antoure yo nèt. Dife a pa t boule yo ni miray prizon an.

Elaman 5:43–44

Lamanit yo te santi gwo lajwa, epi Lespri Bondye te ranpli kè yo.

Elaman 5:44–45

Yon vwa te chichote, ki t ap di yo ke yo ta pral jwenn konsolasyon akoz lafwa yo nan Jezikri.

Elaman 5:46–47

Lamanit yo te leve je yo pou yo te wè ki kote vwa a te soti. Yo te wè zanj ki t ap desann soti nan syèl la.

Elaman 5:48

Apeprè 300 moun te wè ak tande sa k te pase nan prizon an. Yo te ale epi yo te rakonte lòt moun yo.

Elaman 5:49–50

Pifò nan Lamanit yo te kwè yo epi yo te depoze zàm yo.

Elaman 5:50–51

Lamanit yo te sispann rayi Nefit yo epi yo te remèt yo peyi yo te pran yo. Lamanit yo te vin pi jis pase Nefit yo.

Elaman 5:50, 52

Anpil Lamanit te akonpaye Nefi avèk Leyi epi yo te anseye ni Nefit ni Lamanit .

Elaman 6:1, 6–7