Chapit 17
Alma ak pèp li a chape
Yon jou pandan pèp Alma a t ap travay nan jaden yo, yon lame Lamanit te travèse fwontyè a antre nan peyi yo a.
Nefit yo te panike epi yo te kouri al nan vil la pou yo t al abrite yo. Alma te di yo pou yo sonje Bondye epi li t ap ede yo. Nefit yo te kòmanse priye.
Senyè a te adousi kè Lamanit yo, epi yo pa t fè Nefit yo anyen. Lamanit yo te pèdi pandan yo t ap chèche pèp Wa Limi an.
Lamanit yo te pwomèt Alma ke yo pa t ap deranje pèp li a si l te di yo kijan pou yo te retounen al nan peyi yo. Alma te montre yo wout la.
Men Lamanit yo pa t kenbe pwomès yo. Yo te mete gad antoure peyi a, epi Alma ak pèp li a pa t gen libète yo ankò.
Wa Lamanit la te mete Amilon kòm gouvènè pèp Alma a. Amilon sete yon Nefit epi l sete youn nan prèt mechan Wa Nowe yo.
Amilon te fè pèp Alma a travay di. Yo te priye pou yo te jwenn èd, men Amilon te di l t ap touye nenpòt moun li kenbe k ap priye. Moun yo te kontinye priye nan kè yo.
Bondye te tande priyè yo epi l te fòtifye pèp la pou travay yo te parèt fasil. Moun yo te fè kè yo kontan epi yo te pran pasyans.
Bondye te kontan paske pèp li a te rete fidèl. Li te di Alma ke l t ap ede yo chape anba men Lamanit yo.
Pandan nuit la, pèp la te rasanble manje ak bèt yo. Nan demen maten, Bondye te kenbe Lamanit yo nan somèy pandan Alma ak pèp li a te kite vil la.
Apre yo te fin vwayaje pandan 12 jou, pèp la te rive nan Zarayemla, kote Wa Mozya ak pèp li a te akeyi yo.