Chapit 4

Plak Eren yo

Leyi te di Nefi ke Senyè a te vle pou limenm ak frè l yo retounen Jerizalèm. Yo te dwe al chèche plak eren yo nan men yon mesye ki te rele Laban.

1 Nefi 3:2–4

Plak eren yo sete rejis enpòtan. Yo te pale de zansèt Leyi yo epi yo te gen pawòl Bondye te revele atravè pwofèt yo.

1 Nefi 3:3, 20

Laman ak Lemyèl pa t vle retounen al chèche plak eren yo. Yo te di sa t ap twò difisil pou fèt. Yo pa t gen lafwa nan Senyè a.

1 Nefi 3:5

Nefi te vle obeyi Senyè a. Li te konnen Senyè a t ap ede limenm ak frè l yo pou jwenn plak eren yo nan men Laban.

1 Nefi 3:7

Laman, Lemyèl, Sam, ak Nefi te vwayaje tounen Jerizalèm pou yo t al chèche plak eren yo.

1 Nefi 3:9

Laman te ale kote Laban epi l te mande l pou plak yo.

1Nefi 3:11–12

Laban te fache epi l pa t vle bay Laman plak eren yo. Laban te vle touye Laman, men Laman te chape.

1Nefi 3:13–14

Laman te di frè l yo sa k te pase a. Li te pè epi l te vle lage sa epi retounen kote papa yo nan dezè a.

1 Nefi 3:14

Nefi te di yo pa t ap ka retounen san plak eren yo. Li te mande frè l yo pou yo te gen plis lafwa nan Senyè a epi yo t ap kapab jwenn plak eren yo.

1 Nefi 3:15–16

Nefi ak frè l yo te retounen nan ansyen kay yo a nan Jerizalèm epi yo te rasanble lò ak ajan yo te genyen yo pou yo te bay kòm echanj pou plak yo.

1 Nefi 3:22

Yo te montre Laban richès yo epi yo te ofri pou l te twoke yo kont plak yo. Lè Laban te wè lò ak ajan yo, li te vle yo pou limenm epi l te mete yo deyò.

1 Nefi 3:24–25

Laban te di mesye l yo pou yo te touye pitit gason Leyi yo. Nefi ak frè l yo te kouri epi yo t al kache nan yon touwòch. Laban te kenbe lò ak ajan yo.

1 Nefi 3:25–27

Laman ak Lemyèl te fache kont Nefi. Yo te bat Nefi ak Sam avèk yon baton.

1 Nefi 3:28

Yon zanj te parèt epi l te di Laman ak Lemyèl pou yo sispann. Li te di yo Senyè a t ap ede yo jwenn plak yo. Li te di yo tou ke Nefi t ap vin yon dirijan sou tèt frè l yo.

1 Nefi 3:29

Nefi te di frè l yo pou yo te gen lafwa nan Senyè a epi pou yo pa t pè Laban ak mesye l yo. Li te ankouraje frè l yo pou yo te retounen Jerizalèm.

1Nefi 4:1–4

Jouswa sa a, frè Nefi yo te kache andeyò vil la pandan Nefi te glise antre. Li te pran direksyon lakay Laban.

1 Nefi 4:5

Lè Nefi te preske rive lakay Laban, li te wè yon mesye sou ki te kouche atè a. Sete Laban.

1 Nefi 4:6–8

Nefi te wè epe Laban an epi l te ranmase li. Sentespri a te di Nefi pou l touye Laban, men Nefi pa t vle touye li.

1 Nefi 4:9–10

Sentespri a te di Nefi ankò pou l te touye Laban pou Nefi te ka jwenn plak eren yo. Fanmi Leyi te bezwen plak yo pou yo te ka aprann levanjil la.

1 Nefi 4:12, 16–17

Nefi te obeyi Sentespri a epi l te touye Laban. Apresa Nefi te mete rad Laban yo ak pwoteksyon l yo sou li.

1 Nefi 4:18–19

Nefi te rantre andedan kay Laban an epi li te rankontre Zoram, sèvitè Laban an. Nefi te gen aparans Laban epi l te pale tankou li.

1 Nefi 4:20

Li te di Zoram pou l t al chèche plak eren yo. Zoram te panse Nefi sete Laban, konsa li te ba l plak yo. Nefi te di Zoram pou l te suiv li.

1 Nefi 4:21, 24–25

Laman, Lemyèl, ak Sam te wè Nefi ap vini epi yo te pè; yo te panse sete Laban. Yo te kòmanse kouri men yo te kanpe lè Nefi te rele yo.

1 Nefi 4:28–29

Apresa Zoram te reyalize ke Nefi se pa t Laban, epi li te eseye sove. Nefi te kenbe Zoram epi l te pwomèt li ke l pa t ap fè l anyen si l te vle ale avèk Nefi nan dezè a.

1 Nefi 4:30–33

Zoram te dakò. Nefi ak frè l yo te pran Zoram ak plak eren yo epi yo te retounen al jwenn Leyi ak Sarya.

1 Nefi 4:35, 38

Yo te remèt Leyi plak eren yo. Limenm ak Sarya te kontan paske pitit gason yo te byen retounen. Yo te rejwi epi yo te remèsye Bondye.

1 Nefi 5:1, 9

Leyi te li plak eren yo. Yo te pale konsènan Adan ak Ev ak Kreyasyon mond lan. Yo te gen pawòl anpil pwofèt.

1 Nefi 5:10–11, 13

Leyi ak Nefi te kontan paske yo te obeyi Senyè a epi yo te kapab jwenn plak eren yo.

1 Nefi 5:20–21

Fanmi Leyi te vlope plak yo pou yo te pote yo avèk yo nan vwayaj yo a pou yo te kapab anseye pitit yo kòmandman ki te ekri sou plak yo.

1 Nefi 5:21–22