Chapit 10
Jakòb ak Cherèm
Avan Nefi te mouri, li te bay ti frè l Jakòb plak yo. Jakòb sete yon moun ki te jis.
Nefi te di Jakòb pou l te ekri bagay ki t ap ede moun yo kwè nan Jezikri.
Nefi te bay Jakòb pouvwa pou l te vin yon prèt nan Legliz la epi pou l te anseye Nefit yo pawòl Bondye a.
Apre Nefi te fin mouri, anpil nan Nefit yo te vin mechan. Jakòb te anseye moun yo epi l te di yo pou yo te repanti pou move bagay yo t ap fè yo.
Yon mesye mechan ki te rele Cherèm te ale nan mitan Nefit yo, ap anseye yo pou yo pa t kwè nan Jezikri.
Cherèm te di moun yo ke pa t ap gen okenn Kris. Anpil moun te kwè nan Cherèm.
Jakòb te anseye moun yo pou yo te kwè nan Kris la. Cherèm te vle diskite avèk Jakòb epi pèsyade li ke pa t ap gen okenn Kris.
Lafwa Jakòb nan Jezikri pa t ka ebranle. Li te wè zanj epi l te tande vwa Senyè a. Li te konnen Jezi t ap vini.
Sentespri a te avèk Jakòb pandan l t ap rann temwayaj li konsènan Jezikri pou Cherèm.
Cherèm te mande pou l te wè yon siy. Li te mande Jakòb pou l te pwouve l ke gen yon Bondye. Li te vle wè yon mirak.
Jakòb pa t vle mande Bondye yon siy. Li te di ke Cherèm te deja konnen sa Jakòb t ap anseye a sete verite.
Jakòb te di si Bondye te frape Cherèm, se t ap yon siy sou pouvwa Bondye.
Cherèm te tonbe imedyatman. Li pa t ka leve pandan plizyè jou.
Cherèm te fèb epi l te konnen li ta pral mouri. Li te mande pou moun yo te rasanble.
Li te di yo li te bayo manti. Li te di yo pou yo te kwè nan Jezikri.
Apre Cherèm te fin pale ak moun yo, li te mouri. Moun yo te santi pouvwa Bondye, epi yo te tonbe atè.
Moun yo te kòmanse repanti epi li ekriti yo. Yo te viv nan lapè ak lanmou. Jakòb te kontan epi l te konnen ke Bondye te reponn priyè l yo.