Chapit 32
Kapitèn Mowoni ak Etanda Libète a
Yon mesye mechan ki rele Amalikya te vle vin wa sou Nefit yo. Anpil Nefit te kite Legliz la pou yo te suiv li.
Si Amalikya te vin wa, li t ap detwi Legliz Bondye a epi retire libète pèp la.
Lè Kapitèn Mowoni, dirijan lame Nefit yo, te tande plan Amalikya pou l te vin wa a, li te fache.
Mowoni te chire vès li pou l te fè yon drapo. Sou li l te ekri yon mesaj pou te raple moun yo pou yo te defann relijyon yo, libète yo ak lapè yo.
Mowoni te mete drapo a sou yon bwa epi l te rele l etanda libète a. Apresa avèk gwo inifòm konba l sou li, li te ajenou pou l te priye.
Li te mande Bondye pou l te pwoteje moun ki te kwè nan Jezikri yo epi l te priye pou libète nan peyi a, ke l te rele yon peyi libète.
Mowoni te ale nan mitan pèp la. Pandan l ap brandi drapo a, li te rele yo pou yo te vin ede pwoteje libète yo.
Moun yo te vini soti tout kote nan peyi a. Yo te pwomèt pou yo te obeyi kòmandman Bondye yo epi pou yo te batay pou libète.
Lè Amalikya te wè kantite Nefit ki te ralye avèk Mowoni, li te kraponnen. Limenm ak moun ki t ap suiv li yo te kouri al ini yo avèk Lamanit yo.
Mowoni ak lame l la a te eseye bloke yo, men Amalikya ak kèk nan mesye l yo te chape.
Mowoni te mete yon etanda libète sou chak toudekontwòl nan peyi Nefit yo. Nefit yo te konsève libète yo epi yo te vin gen lapè ankò.