Chapit 51
Jaredit yo vwayaje ale nan Tè Pwomiz la
Pandan Jaredit yo te tabli kan yo bò lanmè a, frè Jarèd la te bliye priye. Senyè a te vini nan yon nyaj pou l te di l pou l te repanti.
Frè Jarèd la te repanti epi l te priye. Senyè a te padone frè Jarèd la men li te di l ke l pa ta dwe peche ankò.
Senyè a te di frè Jarèd la pou l te konstwi bato pou te mennen pèp li a nan tè pwomiz la.
Senyè a te di frè Jarèd la kijan pou l te konstwi bato yo.
Yo te konstwi bato yo yon fason pou dlo pa t ap ka antre ladan yo.
Frè Jarèd la t ap mande tèt li kijan moun yo ta pral fè pou yo te respire andedan bato yo. Li te mande Senyè kisa pou l te fè.
Senyè a te di li pou l te fè yon twou anlè ak anba chak bato yo. Twou yo te ka louvri pou kite lè antre epi fèmen pou bloke dlo.
Frè Jarèd la te di Senyè a ke l te fènwa andedan bato yo. Senyè a te mande l pou l te reflechi sou yon fason pou te gen limyè andedan bato yo.
Limyè pou bato yo pa t ap ka soti nan dife ni nan fenèt yo paske yo t ap kraze.
Frè Jarèd la te ale sou yon montay epi l te koupe 16 ti wòch nan yon gwo wòch. Ti wòch yo te sanble ak kristal klè. Li te fè de tiwòch pou chak bato.
Frè Jarèd la te pote ti wòch yo sou tèt yon montay. La li te priye Senyè a.
Frè Jarèd la te mande Senyè a pou l te touche ti wòch yo pou yo te ka bay limyè andedan bato yo.
Senyè a te touche chak ti wòch avèk dwèt li.
Paske frè Jarèd la te gen gwo lafwa, li te wè dwèt Senyè a. Li te sanble avèk dwèt yon moun.
Apresa Senyè a te montre tèt li bay frè Jarèd la.
Jezi te di ke moun ki kwè nan li yo ap gen lavi etènèl.
Jezi te anseye frè Jarèd la epi l te montre l anpil bagay. Jezi te di l pou l te ekri sa l te wè ak tande yo.
Frè Jarèd la te pote tiwòch yo desann sou montay lan. Li te mete yon tiwòch nan pwent chak bato yo. Yo te bay limyè andedan bato yo.
Jaredit yo te antre andedan bato yo avèk bèt yo ak manje. Senyè a te fè yon gwo van soufle pou pouse bato yo nan direksyon tè pwomiz la.
Senyè a te pwoteje yo nan mitan lanmè ajite a. Yo te remèsye Senyè a epi yo te chante chan louwanj pou li.
Apre 344 jou sou dlo, bato yo te ateri sou bòdmè tè pwomiz la.
Lè Jaredit yo te soti nan bato yo, yo te mete ajenou epi yo te kriye ak lajwa.
Jaredit yo te bati kay epi yo te plante semans nan tè pwomiz la. Yo te anseye pitit yo pou yo te koute Senyè a ak obeyi pawòl li.