Chapit 25
Aawon anseye papa Wa Lamoni
Lespri a te gide Aawon ak konpayon l yo al nan peyi Nefi a pou yo te anseye papa Lamoni, wa sou tout Lamanit yo.
Aawon te di wa a ke l sete frè Amon. Wa a t ap reflechi sou bonte Amon ak sou sa Amon te di l yo.
Aawon te mande wa a si l te kwè nan Bondye. Wa a te di li pa t sèten men, si Aawon te di l ke Bondye egziste, li t ap kwè. Aawon te asire wa a ke Bondye vivan.
Aawon te li ekriti yo pou wa a. Li te anseye li konsènan Kreyasyon tè a, Chit Adan an, ak misyon Jezikri.
Wa a te mande kisa l te bezwen fè pou l te ka gen Sentespri a epi pare pou l viv avèk Bondye. Wa a te dispoze pou l te fè nenpòt bagay, menm abandone wayòm ni an.
Aawon te di wa a li te bezwen repanti konplètman pou peche l yo. Li te bezwen priye epi gen lafwa nan Bondye.
Wa a te priye pou l te konnen si te gen yon Bondye vrèman. Li te di ke l t ap abandone tout peche li.
Wa a te tonbe atè epi sete kòmsi l te mouri. Lè rèn nan te wè li, li te panse ke Aawon ak konpayon l yo te touye wa a.
Rèn nan te bay sèvitè yo lòd pou yo te touye Aawon ak konpayon l yo, men sèvitè yo te pè fè sa. Li te voye yo al chèche moun ki pou te fè sa.
Anvan yon foul moun te gentan rasanble pou koze pwoblèm, Aawon te pran men wa a epi l te di l pou l te leve. Wa a te kanpe.
Wa a te kalme madanm ni ak sèvitè l yo ki te pè epi li te anseye yo levanjil la. Yo tout te kwè nan Jezikri.