Chapit 46
Jezikri anseye Nefit yo epi l priye avèk yo
Nefit ki te wè Jezikri yo t al di zanmi yo ke l t ap tounen nan demen. Anpil moun te fè anpil efò pou yo t ale kote Jezi ta pral ye a.
Nan demen maten Nefi ak lòt disip yo te anseye gwoup ki te reyini yo. Apresa disip yo te priye pou yo te ka resevwa Sentespri a.
Nefi te antre nan dlo a epi l te batize. Apresa li te batize lòt disip yo.
Apre yo te fin batize, disip yo te resevwa Sentespri a. Sete kòmsi dife te antoure yo, epi zanj te desann soti nan syèl la epi yo te sèvi yo.
Pandan zanj yo te avèk disip yo, Jezi te vini nan mitan yo.
Kris la te di tout Nefit yo pou yo te mete yo ajenou. Li te di disip li yo pou yo te priye.
Pandan yo t ap priye, Jezi te fè yon ti deplase ale lwen moun yo epi li te mete l ajenou epi l te priye Pè Selès la.
Jezi te remèsye Pè Selès la paske li te bay disip li yo Sentespri a. Apresa li te mande pou tout moun ki te kwè nan pawòl disip yo te resevwa Sentespri a.
Jezi te beni disip li yo pandan yo t ap priye a. Li te souri ba yo, epi yo te vin blan menmjan ak figi li ak rad li.
Jezi te priye ankò pou disip li yo. Li te kontan pou gwo lafwa yo.
Kris la te di moun yo pou yo te sispann priye men pou yo te kontinye priye nan kè yo. Apresa li te ba yo sentsèn.
Pèsonn pa t pote pen ni diven, men Sovè a te founi yo nan yon fason mirakile.
Jezikri te di Nefit yo ke levanjil li a t ap gen pou l retounen sou tè a nan dènye jou yo.
Li te di yo pou te etidye ekriti yo, epi li te fè Nefi ekri akonplisman rès pwofesi Samyèl, Lamanit la, te bay yo nan anal yo.
Apresa Jezi te anseye moun yo nan ekriti yo. Li te di yo pou youn te anseye lòt bagay li te anseye yo.
Jezi te retounen nan syèl la, epi disip li yo te anseye moun yo. Moun ki te kwè yo te batize epi yo te resevwa Sentespri a.
Nefit yo te kòmanse obeyi tout kòmandman yo.