Chapit 7
Konstwi bato a
Apre fanmi Leyi te fin tabli kan yo bò lanmè a pandan plizyè jou, Senyè a te pale avèk Nefi. Li te di l pou l te konstwi yon bato pou l te ka mennen fanmi l nan tè pwomiz la.
Nefi pa t konn kijan pou l te fè yon bato, men Senyè a te di li t ap montre li. Li te di Nefi kikote pou l te jwenn metal pou l te fè zouti l t ap bezwen yo.
Laman ak Lemyèl te pase Nefi nan betiz paske l te vle konstwi yon bato. Yo pa t kwè ke Senyè a te montre Nefi kijan pou l te fè sa. Yo te refize ede l.
Nefi te di Laman ak Lemyèl pou yo te repanti epi pa fè rebèl. Li te raple yo ke yo te wè yon zanj. Li te di yo tou ke Bondye gen pouvwa pou l fè tout bagay.
Laman ak Lemyèl te fache kont Nefi epi yo te vle voye l jete nan lanmè a.
Lè yo te pwoche kot Nefi, li te kòmande yo pou yo pa t touche li paske l te ranpli avèk pouvwa Bondye. Laman ak Lemyèl te pè pandan plizyè jou.
Apresa Senyè a te di Nefi pou l te touche Laman ak Lemyèl. Lè Nefi te fè sa, Senyè a te souke yo. Laman ak Lemyèl te konnen pouvwa Bondye te avèk Nefi.
Nefi te di Laman ak Lemyèl pou yo obeyi paran yo ak obeyi Bondye. Li te di si yo te fè sa, yo t ap beni.
Laman ak Lemyèl te repanti epi yo te ede Nefi konstwi bato a.
Nefi t ale sou montay la plizyè fwa pou l te priye pou èd. Senyè a te anseye l kijan pou l te konstwi bato a.
Lè Nefi ak frè l yo te fin konstwi bato a, yo te konnen li te yon bon bato. Yo te remèsye Bondye paske l te ede yo.