Chapit 22
Misyon Alma nan Amoniya
Alma te fè sousi pou mechanste Nefit yo, konsa, li te deside pase tout tan l ap preche levanjil la. Li te chwazi Nefiya pou ranplase l kom jij anchèf.
Alma te anseye levanjil la nan tout peyi a. Lè li te eseye preche nan Amoniya, moun yo pat vle tande. Yo te pouse do l soti nan vil la.
Alma te tris dèske pèp Amoniya a te si mechan. Li te kite yo pou l t al nan yon lòt vil.
Yon zanj te parèt devan Alma epi l te konsole li. Zanj lan te di l pou l te retounen nan Amoniya epi preche ankò. Alma te kouri retounen.
Alma te grangou. Lè l te antre nan vil la, li te mande yon mesye yon ti manje. Yon zanj te di mesye a ke Alma t ap vini epi Alma sete yon pwofèt Bondye.
Mesye sa a, Amilèk, te mennen Alma lakay li epi l te nouri li. Alma te rete avèk Amilèk ak fanmi li pandan anpil jou. Li te remèsye Bondye pou fanmi Amilèk epi l te beni yo.
Alma te pale avèk Amilèk de apèl li pou anseye moun Amoniya yo. Amilèk te ale avèk Alma pou preche moun yo. Sentespri a te ede yo.
Alma te di moun yo pou yo te repanti, san sa, Bondye t ap detwi yo. Li te di Jezikri ta pral vini epi li t ap sove moun ki te gen lafwa nan li epi ki repanti.
Moun Amoniya yo te vin fache. Yo te eseye mete Alma nan prizon, men Senyè a te pwoteje li.
Apresa Amilèk te kòmanse preche. Anpil moun te kwè Amilèk; li pa t yon etranje tankou Alma. Li te pale yo de zanj li te wè a.
Amilèk te di Alma sete yon pwofèt Bondye epi l te pale verite. Moun yo te etone pou tande temwayaj Amilèk.
Kèk nan moun yo te vin fache, espesyalman yon mesye mechan ki te rele Zizwòm. Yo te eseye pyeje Amilèk avèk kesyon, men li te di yo li te konnen plan yo te genyen an.
Zizwòm te vle detwi tout bagay ki te bon. Li te konn kreye pwoblèm, epi apresa moun yo te oblije peye l pou l te ka rezoud pwoblèm li te kreye yo.
Zizwòm pat kapab pyeje Amilèk, konsa li te ofri l lajan pou l te di pa gen Bondye. Amilèk te konnen Bondye vivan epi l te di Zizwòm te konn sa tou men, li te pi renmen lajan pase Bondye.
Apresa Amilèk te anseye Zizwòm konsènan Jezi epi konsènan Rezireksyon an ak lavi etènèl. Moun yo te etone. Zizwòm te kòmanse tranble anba lakrent.
Zizwòm te konnen Alma ak Amilèk te gen pouvwa Bondye paske yo te konn sa k te nan panse li. Zizwòm te poze kesyon epi l te koute pandan Alma t ap anseye l levanjil la.
Kèk moun te kwè Alma ak Amilèk epi yo te kòmanse repanti ak etidye ekriti yo.
Men pifò nan moun yo te vle touye Alma ak Amilèk Yo te mare de mesye yo epi yo te mennen yo devan jij anchèf la.
Zizwòm te regrèt ke l te konn fè mechanste epi l te konn anseye moun yo pou te bay manti. Li te sipliye moun yo pou yo te libere Alma ak Amilèk.
Yo te chase Zizwòm ak lòt moun ki te kwè nan ansèyman Alma ak Amilèk yo mete deyò. Moun mechan yo te voye wòch sou yo.
Apresa moun mechan yo te rasanble fi yo ak timoun ki te kwè yo epi yo te jete yo, ansanm ak ekriti yo, nan dife.
Yo te fòse Alma ak Amilèk gade fi yo ak timoun yo ki t ap boule nan dife a. Amilèk te vle itilize pouvwa Bondye pou sove yo.
Men Alma te di Amilèk ke li pa t ap anpeche yo touye yo paske moun k ap mouri yo ta pral jwenn Bondye lamenm epi moun mechan yo ta pral resevwa pinisyon yo.
Jij anchèf la te souflete Alma ak Amilèk plizyè fwa epi l te pase yo nan betiz paske yo pa t sove fi yo ak timoun ki tap boule yo. Apresa li te jete yo nan prizon.
Lòt mesye mechan yo te vin nan prizon an epi yo te maltrete Alma ak Amilèk nan plizyè fason, yo pa t ba yo manje yo te krache sou yo.
Jij anchèf la te di si Alma ak Amilèk te itilize pouvwa Bondye pou libere tèt yo, li t ap kwè. Li te souflete yo ankò.
Alma ak Amilèk te kanpe. Alma te priye epi l te mande Bondye pou l te ba yo fòs poutèt lafwa yo nan Kris la.
Pouvwa Bondye te ranpli Alma ak Amilèk, epi yo te kase kòd yo ki te mare yo a. Mesye mechan yo te pè epi yo te eseye kouri men yo te tonbe.
Tè a te tranble, epi miray prizon yo te tonbe sou mesye mechan yo. Senyè a te pwoteje Alma ak Amilèk, epi yo pa t blese.
Moun nan Amoniya yo te kouri vin wè sa k t ap pase. Lè yo te wè Alma ak Amilèk ap mache soti nan prizon kraze a, yo te vin pè epi yo te pete kouri.
Senyè a te di Alma ak Amilèk pou yo t ale Sidon. La, yo te jwenn moun jis yo. Zizwòm te la tou epi l te malad anpil.
Zizwòm te kontan wè Alma ak Amilèk. Li te pè pou yo pa t mouri akoz sa l te fè a. Li te mande yo pou yo geri li.
Zizwòm te kwè nan Jezikri epi l te repanti pou peche l yo. Lè Alma te priye pou li, Zizwòm te geri imedyatman.
Zizwòm te batize epi l te kòmanse preche levanjil la. Anpil lòt moun te batize.
Yon lame Lamanit te touye tout moun mechan yo nan Amoniya, jan Alma te pwofetize a.