Potutusi
Aiga Atua

“Aiga Atua,” Autu ma Fesili (2023)

Tama Faalelagi ma Iesu Keriso

Taiala mo le Suesueina o le Talalelei

Aiga Atua

Talitonu i le Atua le Tama; Lona Alo Pele, o Iesu Keriso; ma le Agaga Paia

Pe a fai mai tagata, “Ou te talitonu i le Atua,” o le a le uiga o la latou tala? Atonu latou te faauigaina i le tele o mea eseese.

I le avea ai ma Au Paia o Aso e Gata Ai, “matou te talitonu i le Atua, le Tama Faavavau, ma Lona Alo, o Iesu Keriso, ma le Agaga Paia” (Mataupu Faavae o le Faatuatua 1:1). Tatou te ta’ua lenei faamatalaga o le mataupu faavae muamua o lo tatou faatuatuaga—muamua ona o le malamalama i nei tamalii paia e toatolu o se laasaga muamua lea i le malamalama po o ai i tatou, aisea ua tatou i ai, ma le tagata e mafai ona avea ai i tatou.

O Le A le Aiga Atua?

O le Aiga Atua e aofia ai ni tagata paia se toatolu: o le Tama Faalelagi, Iesu Keriso, ma le Agaga Paia. E ui ina eseese tagata, Latou te galulue faatasi i le lotogatasi atoatoa e faamanuia ma faaeaina fanau a le Tama Faalelagi.

Vaaiga aoao i autu: Aiga Atua

Taiala fesootai mo le suesueina o le talalelei: O le Atua le Tama, Iesu Keriso, Agaga Paia

Vaega 1

O Le Ala o loo Faamatalaina ai le Aiga Atua i Tusitusiga Paia

O Ioane le Papatiso o loo papatisoina Iesu Keriso

E finagalo le Atua le Tama, Iesu Keriso, ma le Agaga Paia ia e iloa e uiga ia i Latou. Latou te le mananao e foliga mamao pe faalilolilo. Ua Latou faaalia mai upumoni taua, e ala i tusitusiga paia ma aoaoga a perofeta o aso e gata ai, e fesoasoani e te iloa atili ai i Latou. E le gata i lea, ua valaaulia i tatou e le Atua e faalatalata atu ia te Ia taitoatasi ma iloa o Ia e ala i aafiaga patino ma Ia. E pei ona fetalai Iesu i se tatalo i le Atua le Tama mo Ona soo, “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane17:3).

Mea e mafaufau i ai

  • Taumafai e suesue fuaitau o mau o loo ta’ua ai le tele o sui o le Aiga Atua—mo se faataitaiga, Mataio 3:16–17; 17:5; Ioane 5:19; 14:6–10, 26; Galuega 7:55–56; 3 Nifae 11:10–11, 25–27, 35–36. O a ni mea o faaalia mai e fuaitau faapenei e uiga i sui o le Aiga Atua? O le a se mea ua e aoaoina e uiga i le Latou sootaga ma le tasi ma le isi?

  • Ua faaalia mai e le Atua upumoni taua e uiga i le Aiga Atua i o tatou aso e ala mai i le Perofeta o Iosefa Samita. Mo se faataitaiga, faitau le Iosefa Samita—Talafaasolopito 1:13–17 ma mafaufau i le fesili lenei: O le a se mea ua faaalia mai i le aafiaga o Iosefa e uiga i le Aiga Atua?

  • E mafai foi ona e faitau i mea na aoao mai e le Perofeta o Iosefa Samita e uiga i le Aiga Atua i le Mataupu Faavae ma Feagaiga 130:22. O nei aoaoga e eseese i auala taua mai mea o loo aoao mai e le faaKerisiano masani. Mafaufau pe aisea e taua ai ia te oe upumoni e pei o nei e uiga i le Aiga Atua.

Gaoioiga mo le aoaoina ma isi

  • E mafai ona e faitauina faatasi ma isi le Mataupu Faavae ma Feagaiga 130:22 ma vaavaai i se ata o le Uluai Faaaliga a Iosefa Samita. Talanoa faatasi e uiga i mea o loo aoao mai e le fuaiupu ma mea e vaai i ai tagata uma i le ata. Ia gauai atu i le mea moni e faapea, o le Tama Faalelagi ma Iesu Keriso e i ai tino e pei o i tatou—ua foafoaina i tatou i lo La’ua faatusa!

Ua faaali mai Iesu Keriso ma le Tama Faalelagi ia Iosefa Samita

Aoao atili

Vaega 2

Lotogatasi i le Faamanuiaina o i Tatou

E ui o loo i ai ni sui iloga e toatolu o le Aiga Atua, ae o i Latou o ni “Atua e tasi” i le tulaga ua tuufaatasia atoatoa ai i Latou i le faamoemoega. O le a la lena faamoemoega? Sa fetalai mai le Tama Faalelagi, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39). I se isi faaupuga, e galulue faatasi le Tama Faalelagi, Iesu Keriso, ma le Agaga Paia e faataunuu le fuafuaga o le faaolataga ma le faaeaga. E tofu le tagata ma se matafaioi patino e faia i lena fuafuaga, ae o lo Latou faamoemoega e tutusa lava—e fesoasoani ia te oe e toe foi atu e toe mau faatasi ma le Atua.

Mea e mafaufau i ai

Gaoioiga mo le aoao faatasi ma isi

  • E mafai ona e faapupulaina le lotogatasi o le Aiga Atua i se nofoa e tolu-vae, se tulaga vaetolu, po o se isi mea e mautu ma faagaoioia ona e tolu ona vae. Pe e mafai foi ona e mafaufau pe faapefea e tagata o se ’au po o se au faili ona galulue faatasi e ausia se sini se tasi. E mafai ona tatou mafaufau ia i latou o se nofoa e tasi, tasi le au, po o se faili e tasi—e pei lava o le Aiga Atua o se Atua e tasi—faatasi ai ma tagata taitoatasi e faataunuuina se matafaioi e ese mai ma galulue faatasi ma isi i le lotogatasi.

Aoao atili