« ការផ្តល់ហិរញ្ញវត្ថុដល់អាជីវកម្មរបស់ខ្ញុំ ៖ រៀន » ការចាប់ផ្ដើម និងការពង្រីកអាជីវកម្មរបស់ខ្ញុំសម្រាប់ភាពខ្លួនទីពឹងខ្លួន ( ឆ្នាំ ២០១៧ )
« ការផ្តល់ហិរញ្ញវត្ថុដល់អាជីវកម្មរបស់ខ្ញុំ ៖ រៀន »
រៀន
ម៉ោងជាអតិបរមា ៖ ៦០ នាទី
១. តើខ្ញុំមានសាច់ប្រាក់ដើម្បីពង្រីកអាជីវកម្មរបស់ខ្ញុំដែរឬទេ ?
អាន ៖
យើងបានរៀនថា ម្ចាស់អាជីវកម្មជោគជ័យធ្វើការដើម្បីបង្កើតវដ្តលំហូរសាច់ប្រាក់វិជ្ជមាន ។ តាមរយៈការដាក់ផែនការដោយយកចិត្តទុកដាក់ និងព្យាយាមតស៊ូ នោះពួកគេមានសាច់ប្រាក់គ្រប់គ្រាន់ដើម្បីរក្សា និងពង្រីកអាជីវកម្មរបស់ខ្លួន ។ ពួកគេដឹងអំពីតួនាទីនៃសាច់ប្រាក់បច្ចុប្បន្នរបស់ខ្លួន ហើយពួកគេធ្វើបច្ចុប្បន្នភាពការប៉ាន់ប្រមាណទុកនៃលំហូរសាច់ប្រាក់របស់ពួកគេជាទៀងទាត់ ។ ពួកគេ « ឃើញថា…ការណ៍ទាំងនេះត្រូវបានប្រព្រឹត្តឡើងក្នុងប្រាជ្ញា និងរបៀបរៀបរយ » ( ម៉ូសាយ ៤:២៧ ) ។
ក្រៅពីនេះទៀត ម្ចាស់អាជីវកម្មជាច្រើនស្វែងរកការផ្តល់ហិរញ្ញវត្ថុដើម្បីបន្តឱកាសរីកចម្រើនដូចអស់អ្នកដែលយើងបានរៀននៅក្នុង ជំពូកទី ៩ ។ ប្រសិនបើអ្នកសម្រេចចិត្តស្វែងរកការផ្តល់ហិរញ្ញវត្ថុសម្រាប់អាជីវកម្មរបស់អ្នក ដំបូងអ្នកត្រូវមានការយល់ដឹងឲ្យលម្អិតអំពីលំហូរសាច់ប្រាក់អាជីវកម្មរបស់អ្នកសិន ជាពិសេសសាច់ប្រាក់ដែលអាជីវកម្មរបស់អ្នកប្រើប្រាស់បច្ចុប្បន្ន និងការប៉ាន់ប្រមាណទុកដើម្បីប្រើប្រាស់ ។ វាចាំបាច់សម្រាប់អ្នកដើម្បីធានាថា អាជីវកម្មរបស់អ្នកមានសាច់ប្រាក់គ្រប់គ្រាន់ដើម្បីបន្តប្រតិបត្តិការ ដោះស្រាយស្ថានភាពដែលពុំបានរំពឹងទុក និងពង្រីកអាជីវកម្មស្របទៅតាមគោលដៅរបស់អ្នក ។
២. តើការខ្ចីប្រាក់ជារឿងល្អ ឬអាក្រក់ ?
អាន ៖
បំណុលផ្ទាល់ខ្លួន និងបំណុលអាជីវកម្មគឺផ្សេងគ្នា ។ ជារឿយៗ ប្រាក់កម្ចីផ្ទាល់ខ្លួនត្រូវបានប្រើដើម្បីចំណាយច្រើនជាងលទ្ធភាពដែលយើងអាចបង់សងវិញ ។ ប្រាក់កម្ចីអាជីវកម្មគួរត្រូវបានប្រើដើម្បីបង្កើតឲ្យបានច្រើនជាងអ្វីដែលយើងមានលទ្ធភាពបង្កើត ។ ថ្នាក់ដឹកនាំសាសនាចក្របានទូន្មានយើងឲ្យចៀសវាងពីបំណុលផ្ទាល់ខ្លួន ។ ដូចអែលឌើរ យ៉ូសែប ប៊ី វ៉ឺតលីន បានមានប្រសាសន៍ថា ៖ « បំណុលខ្លះ—ដូចជាសម្រាប់ទិញផ្ទះធំល្មមមួយ ចំណាយសម្រាប់ការអប់រំ ប្រហែលជាការចាំបាច់ទិញឡានដំបូងមួយ—អាចជាបំណុលដ៏ចាំបាច់ ។ ប៉ុន្តែយើងពុំគួរធ្លាក់ចូលទៅក្នុងទាសភាពនៃហិរញ្ញវត្ថុ តាមរយៈការប្រើប្រាស់បំណុលដោយពុំបានគិតថ្លឹងថ្លែងដោយយកចិត្តទុកដាក់ឡើយ » ( « Earthly Debts, Heavenly Debts » Ensign ឬ Liahona ខែ ឧសភា ឆ្នាំ ២០០៤ ទំព័រ ៤១ ) ។
ពិភាក្សា ៖
សូមគិតអំពីនរណាម្នាក់ដែលអ្នកស្គាល់ដែលបានខ្ចីប្រាក់សម្រាប់ការប្រើប្រាស់ផ្ទាល់ខ្លួន ។ តើការធ្វើបែបនេះជួយពួកគេ ឬបំផ្លាញពួកគេ ?
អាន ៖
យើងគួរតែប្រុងប្រយ័ត្ន នៅពេលពិចារណាអំពីបំណុលអាជីវកម្ម ។ ប៉ុន្តែនៅពេលចាត់ចែងដោយឈ្លាសវៃ « បំណុលអាជីវកម្មហាក់ដូចជាធាតុមួយនៃការរីកចម្រើន » ( Teachings of Presidents of the Church: Ezra Taft Benson [ ឆ្នាំ ២០១៤ ] ទំព័រ ២៧២ ) ។
អាជីវកម្មស្ទើរតែទាំងអស់តម្រូវឲ្យមានទុន ឬប្រាក់បន្ថែមដើម្បីរីកចម្រើន ។ ជាទូទៅ ម្ចាស់អាជីវកម្មទទួលទុនបន្ថែមតាមរយៈការសន្សំផ្ទាល់ខ្លួនរបស់ពួកគេ ឬតាមរយៈបំណុលហិរញ្ញវត្ថុ ឬហិរញ្ញវត្ថុភាគហ៊ុន ( មូលធនផ្ទាល់ ) ។ បំណុលហិរញ្ញវត្ថុ មានន័យថា ការទទួលយកកម្ចីអាជីវកម្ម ហើយក្រោយមកបង់សងវាវិញជាមួយនឹងការប្រាក់ ។ ហិរញ្ញវត្ថុភាគហ៊ុន ( មូលធនផ្ទាល់ ) មានន័យថា ទទួលបានប្រាក់ជាថ្នូរនឹងការលក់ចំណែកភាពជាម្ចាស់ក្រុមហ៊ុន ។
យូរៗម្តង ម្ចាស់អាជីវកម្មទទួលប្រាក់អនុប្បទានពីរដ្ឋាភិបាល ឬប្រាក់មកពីប្រភពផ្សេងទៀត ។ ជាទូទៅ មូលនិធិទាំងនេះពុំតម្រូវឲ្យបង់សងវិញឡើយ ។
៣. ជម្រើសនៃការផ្តល់ហិរញ្ញវត្ថុដល់អាជីវកម្មរបស់ខ្ញុំ
អាន ៖
ម្ចាស់អាជីវកម្មជោគជ័យមានការគិតគូរ និងច្នៃប្រឌិតនៅក្នុងការបង្កើនមូលនិធិដែលពួកគេត្រូវការដើម្បីពង្រីកអាជីវកម្មរបស់ខ្លួន ។ មានមធ្យោបាយជាច្រើនដែលអ្នកអាចទទួលបានមូលនិធិដែលអ្នកត្រូវការ ។ វគ្គនេះបែងចែករបៀបទាំងនោះជាបីផ្នែក ៖ ផ្នែកទី ១ រកមើលមូលនិធីដែលជារឿយៗត្រូវបានប្រើមុន ដូចជាប្រាក់សន្សំផ្ទាល់ខ្លួន ។ ផ្នែកទី ២ ស្វែងរកធនធានបំណុលហិរញ្ញវត្ថុផ្សេង ។ ផ្នែកទី ៣ សង្ខេបជម្រើសហិរញ្ញវត្ថុដែលពុំសូវមានជាទូទៅ ដែលអាចអនុវត្តចំពោះម្ចាស់អាជីវកម្មមួយចំនួន ។
ផ្នែកទី ១ ៖ ធនធានហិរញ្ញវត្ថុទូទៅ
អាន ៖
ម្ចាស់អាជីវកម្មភាគច្រើនចាប់ផ្តើមផ្តល់ហិរញ្ញវត្ថុអាជីវកម្មរបស់ពួកគេឲ្យរីកចម្រើន តាមរយៈការពឹងផ្អែកលើប្រាក់សន្សំរបស់ខ្លួនពួកគេផ្ទាល់ តាមរយៈធ្វើការតែឯង ( ធ្វើកិច្ចការដោយខ្លួនពួកគេ ហើយពុំពឹងផ្អែកលើជំនួយពីខាងក្រៅ ) និងតាមរយៈការទទួលបានកម្ចី ឬការវិនិយោគប្រាក់មកពីសមាជិកគ្រួសារ ឬមិត្តភក្តិស្និទ្ធស្នាល ។ ជម្រើសទាំងនេះអនុញ្ញាតឲ្យយើងធ្វើការសម្រេចចិត្តលឿន និងអាចបត់បែនបានក្នុងការចាត់ចែងឲ្យអាជីវកម្មរបស់ពួកគេរីកចម្រើន ។
ផ្នែកទី ២ ៖ ធនធានបំណុលហិរញ្ញវត្ថុ
អាន ៖
ក្រៅពីការប្រើប្រាស់ធនធានហិរញ្ញវត្ថុផ្ទាល់ខ្លួន នោះម្ចាស់អាជីវកម្មជាច្រើនស្វែងរកមូលនិធិតាមរយៈការខ្ចីប្រាក់ ឬបំណុលហិរញ្ញវត្ថុ ។ សំណួរខាងក្រោមអាចជួយដឹកនាំការសម្រេចចិត្តដើម្បីខ្ចីប្រាក់ ៖
-
តើខ្ញុំកំពុងខ្ចីប្រាក់ដើម្បីពង្រីកអាជីវកម្មរបស់ខ្ញុំ មិនមែនសម្រាប់ហេតុផលផ្ទាល់ខ្លួនឬទេ ?
-
តើខ្ញុំកំពុងខ្ចីប្រាក់ដើម្បីផ្គត់ផ្គង់អាជីវកម្មដែលទីបំផុតពុំអាចទ្រទ្រង់ដែរឬទេ ?
-
តើពេលវេលានេះត្រឹមត្រូវដើម្បីទទួលការប្រថុយប្រថាននេះឬទេ ?
-
តើខ្ញុំសុខចិត្តទទួលយកលក្ខខណ្ឌនៃប្រាក់កម្ចីដែលខ្ញុំនឹងទទួលឬទេ ?
-
តើខ្ញុំកំពុងខ្ចីប្រាក់ក្នុងចំនួនត្រឹមត្រូវឬទេ ?
-
តើខ្ញុំនឹងអាចបង់ប្រាក់សងបំណុល និងរក្សាប្រតិបត្តិការអាជីវកម្មរបស់ខ្ញុំ ដោយមានភាពប្រថុយប្រថានតិចតួចដើម្បីមានលំហូរសាច់ប្រាក់វិជ្ជមានដែរឬទេ ?
ពិភាក្សា ៖
សូមស្រមៃថា អ្នកកំពុងពិចារណាអំពីការខ្ចីប្រាក់សម្រាប់អាជីវកម្មរបស់អ្នក ។ សូមពិភាក្សាជាក្រុមអំពីរបៀបដែលសំណួរពីមុនៗអាចជួយអ្នកជាមួយនឹងការសម្រេចចិត្តនេះ ៖
អាន ៖
កាតឥណទានគឺជាធនធានទូទៅបំផុតមួយនៃបំណុលអាជីវកម្ម ប៉ុន្តែវាមានអត្រាការប្រាក់ខ្ពស់ ។ បន្ទាត់នៃឥណទានគឺជាជម្រើសដែលអាចបត់បែន ដែលអនុញ្ញាតឲ្យម្ចាស់អាជីវកម្មគ្រប់គ្រងតម្រូវការលំហូរសាច់ប្រាក់ឡើងចុះរបស់ពួកគេ ។ ប្រាក់កម្ចីធនាគារ ប្រាក់កម្ចីមីក្រូហិរញ្ញវត្ថុ និងកម្ចីប្រាក់ពីមនុស្សតាមអ៊ិនធើរណែតក៏ជាជម្រើស និងផ្តល់អត្ថប្រយោជន៍ជាច្រើន ប៉ុន្តែជាទូទៅកម្ចីទាំងនោះតម្រូវឲ្យមានដំណើរការអនុវត្តហ្មត់ចត់ ។
ផ្នែកទី ៣ ៖ ធនធានហិរញ្ញវត្ថុដែលកម្រមាន
អាន ៖
យូរៗម្តងម្ចាស់អាជីវកម្មអាចរកឃើញជម្រើសហិរញ្ញវត្ថុផ្សេងទៀត ដូចបង្ហាញនៅក្នុងតារាងខាងក្រោមនេះ ។ ជម្រើសទាំងនេះផ្សេងៗពីគ្នាអាស្រ័យទៅលើឧស្សាហកម្ម និងប្រភេទនៃឱកាសអាជីវកម្ម ។ វាពុំសូវមានជាទូទៅសម្រាប់ម្ចាស់អាជីវកម្មតូចតាចភាគច្រើនឡើយ ។
៤. ការស្រាវជ្រាវអំពីជម្រើសនៃការផ្តល់ហិរញ្ញវត្ថុ
អាន ៖
ការស្វែងរកធនធានហិរញ្ញវត្ថុល្អបំផុតសម្រាប់អាជីវកម្មរបស់អ្នកតម្រូវឲ្យមានកិច្ចខិតខំជាប់លាប់ ។ ធនធានហិរញ្ញវត្ថុមានលក្ខខណ្ឌខុសគ្នាច្រើនតាមទីតាំង ដូច្នេះវាសំខាន់ដើម្បីនិយាយជាមួយមនុស្សដែលអ្នកទុកចិត្តនៅក្នុងបណ្តាញផ្ទាល់ខ្លួន និងសហគមន៍ ។ ធនធាននៅតាមអ៊ិនធើរណែត រដ្ឋាភិបាល និងសហគមន៍ទំនងជាអាចជួយក្នុងការស្រាវជ្រាវរបស់អ្នក ។
ពិភាក្សា ៖
-
តើអង្គការក្នុងមូលដ្ឋាន ឬថ្នាក់ជាតិអ្វីខ្លះ ដែលអាចផ្តល់ការណែនាំ ឬធនធានហិរញ្ញវត្ថុដល់អាជីវកម្ម ?
-
តើមានធនធានតាមអ៊ិនធើរណែតអ្វីខ្លះ ដែលអាចផ្តល់ការណែនាំហិរញ្ញវត្ថុអាជីវកម្ម ?
៥. សេចក្តីទៀងត្រង់នៅក្នុងទំនាក់ទំនងផ្នែកហិរញ្ញវត្ថុ
អាន ៖
មាត្រាដប់បីនៃសេចក្ដីជំនឿចែងថា យើងខ្ញុំជឿលើការប្រព្រឹត្តដោយទៀងត្រង់ ។ ទំនាក់ទំនងហិរញ្ញវត្ថុគឺផ្អែកទៅលើទំនុកចិត្ត និងភាពទៀងត្រង់ផ្ទាល់ខ្លួន ។ ការប្រព្រឹត្តដោយទៀងត្រង់មានន័យថា យើងបំពេញតាមការព្រមព្រៀងរបស់យើង ហើយចៀសវាងពីការបោកប្រាស់ ។
ប្រសិនបើយើងខ្ចីប្រាក់ នោះយើងគួរតែប្រាកដថាយើងបង់សងវាវិញ ។ ដូចព្រះអម្ចាស់រំឭកយើងនៅក្នុងគោលលទ្ធិ និងសេចក្ដីសញ្ញា ដូច្នេះថា « បើសិនជាអ្នកខ្ចីអ្វីពីអ្នកជិតខាងរបស់ខ្លួន នោះអ្នកត្រូវសងនូវអ្វីដែលអ្នកបានខ្ចីនោះវិញ » ( គ.&និង ស. ១៣៦:២៥ ) ។
ប្រសិនបើយើងទទួលប្រាក់សម្រាប់អាជីវកម្មរបស់យើងតាមរយៈប្រាក់កម្ចី មកពីអ្នកវិនិយោគទុន ឬតាមរយៈប្រាក់អនុប្បទាន នោះយើងគួរតែប្រើប្រាក់នោះក្នុងគោលបំណងដែលវាត្រូវបានផ្តល់ឲ្យ ពុំមែនក្នុងគោលបំណងផ្សេងឡើយ ។ នៅពេលបុគ្គលម្នាក់ៗ ឬអង្គការផ្តល់ប្រាក់ដល់អាជីវកម្មរបស់យើង នោះពួកគេគួរតែអាចទុកចិត្តបានថា យើងនឹងគោរពតាមកិច្ចព្រមព្រៀងរបស់យើង ។
យើងត្រូវបានទូន្មានថា ឲ្យចៀសវាងពីការរៀបចំហិរញ្ញវត្ថុដែលយើងពុំយល់ ដែលមើលទៅហាក់ដូចជាចំណេញច្រើនពេក ដែលបង្ហាញទំនាស់អត្ថប្រយោជន៍ ឬដាក់យើងនៅក្នុងស្ថានភាពដែលមានចម្ងល់ ឬគ្មានច្បាប់ទម្លាប់ជាតិពន្ធ ។
ពិភាក្សា ៖
តើអ្នកបានរៀនអ្វីខ្លះអំពីការមានភាពទៀងត្រង់នៅក្នុងបញ្ហាហិរញ្ញវត្ថុ និងចៀសវាងអំពីការបោកប្រាស់ ?