« ការគ្រប់គ្រងប្រាក់ចំណេញអាជីវកម្មរបស់ខ្ញុំ ៖ រៀន » ការចាប់ផ្ដើម និងការពង្រីកអាជីវកម្មរបស់ខ្ញុំសម្រាប់ភាពខ្លួនទីពឹងខ្លួន ( ឆ្នាំ ២០១៧ )
« ការគ្រប់គ្រងប្រាក់ចំណេញអាជីវកម្មរបស់ខ្ញុំ ៖ រៀន »
រៀន
ម៉ោងជាអតិបរមា ៖ ៦០ នាទី
១. សារៈសំខាន់នៃការរក្សាកំណត់ត្រាសរសេរ
អាន ៖
« តើអាជីវកម្មរបស់ខ្ញុំមានសភាពយ៉ាងណាដែរ ? » ( សូមមើលអត្ថបទវីដេអូនៅចុងវគ្គនេះ )
ពិភាក្សា ៖
តើអ្នកបានរៀនមេរៀនអ្វីខ្លះមកពីបទពិសោធន៍អាជីវកម្មរបស់ចាក ?
អាន ៖
ម្ចាស់អាជីវកម្មដែលជោគជ័យរៀបចំឯកសារឲ្យមានរបៀបរៀបរយ ហើយតាមដានភាពលម្អិតនៃហិរញ្ញវត្ថុរបស់ពួកគេ ។ ដើម្បីឲ្យអាជីវកម្មរបស់អ្នកទទួលបានជោគជ័យ វាចាំបាច់ឲ្យអ្នកត្រូវរក្សាកំណត់ត្រាហិរញ្ញវត្ថុឲ្យបានល្អ ។ បើគ្មានកំណត់ត្រាទេ តើអ្នកដឹងថា អាជីវកម្មរបស់អ្នកទទួលប្រាក់បានចំណេញយ៉ាងដូចម្ដេច ? តើអ្នកនឹងដឹងថា អតិថិជនទាំងអស់របស់អ្នកបានបង់ប្រាក់ឲ្យអ្នកដោយរបៀបណា ? តើអ្នកនឹងដឹងពីចំណាយសរុបរបស់អ្នកយ៉ាងដូចម្ដេច ?
នៅក្នុងជំពូកនេះ យើងនឹងរៀនអំពីសារៈសំខាន់នៃការរក្សាកំណត់ត្រាហិរញ្ញវត្ថុឲ្យបានល្អ ។ យើងនឹងរៀនអំពីពាក្យថា ចំណូល ដែលសំដៅទៅលើប្រាក់អាជីវកម្មដែលទទួលបានពីការលក់សេវាកម្ម ឬផលិតផលឲ្យទៅអតិថិជន ។ យើងក៏នឹងរៀនអំពីពាក្យថា ចំណាយ ដែលសំដៅទៅលើប្រាក់ដែលចំណាយដោយអាជីវកម្មដើម្បីទទួលបានសេវាកម្ម ឬផលិតផល ។ នៅអំឡុងសប្ដាហ៍ យើងនឹងតាមដានអំពីចំណូល និងចំណាយអាជីវកម្មរបស់យើង ដើម្បីឃើញថា យើងកំពុងបានប្រាក់ចំណេញឬអត់ ។
២. ទម្លាប់នៃការរក្សាកំណត់ត្រា
អាន ៖
ម្ចាស់អាជីវកម្មជោគជ័យរក្សាកំណត់ត្រាប្រចាំថ្ងៃ ។ សម្រាប់ម្ចាស់អាជីវកម្មថ្មី ចំណុចនេះអាចជាទម្លាប់ពិបាកធ្វើ ប៉ុន្តែវាមានសារៈសំខាន់ណាស់ ។ នេះគឺជាយុទ្ធសាស្ត្រប្រាំយ៉ាងសម្រាប់ការរក្សាកំណត់ត្រាជោគជ័យ ៖
-
ការចាំពី « មូលហេតុ » ៖ អ្នកអាចរកឃើញនូវការជំរុញចិត្ត ដោយការគិតអំពីអត្ថប្រយោជន៍យូរអង្វែង ដែលនឹងកើតឡើងមកពីប្រតិបត្តិការនៃអាជីវកម្មដែលមានរបៀបរៀបរយក្នុងការរក្សាកំណត់ត្រាល្អ ។
-
បង្កើតជំនាញថ្មី ៖ អ្នកត្រូវតែបង្កើតជំនាញថ្មីៗដើម្បីទទួលបានជោគជ័យក្នុងការរក្សាកំណត់ត្រា ។ ការពិភាក្សារបស់យើងថ្ងៃនេះនឹងជួយអ្នកឲ្យរៀនជំនាញទាំងនោះ ។
-
ជ្រើសរើសមិត្តភក្ដិ ដែលពុំមែនអ្នកផ្សំគំនិតទេ ៖ មិត្តភក្ដិគឺជាមនុស្សម្នាក់ដែលជួយអ្នកឲ្យធ្វើរឿងត្រឹមត្រូវ ។ អ្នកផ្សំគំនិតគឺជាមនុស្សម្នាក់ដែលជួយអ្នកឲ្យធ្វើរឿងខុសឆ្គង ។ សូមសួរមិត្តភក្តិដែលគួរឲ្យទុកចិត្ត អ្នកផ្តល់ប្រឹក្សា ស្វាមី ឬភរិយារបស់អ្នក ដើម្បីជួយអ្នកឲ្យរក្សាកំណត់ត្រាឲ្យបានជាប់លាប់ ។
-
ប្រើរង្វាន់ ៖ ផ្តល់រង្វាន់ដល់ខ្លួនឯងសម្រាប់ការរក្សាកំណត់ត្រាប្រចាំថ្ងៃ ។
-
មានឧបករណ៍ត្រឹមត្រូវ ៖ ត្រូវប្រាកដថា អ្នកមានឧបករណ៍ដើម្បីរក្សាកំណត់ត្រានោះឲ្យបានត្រឹមត្រូវ ។ យើងនឹងរៀនអំពីឧបករណ៍មួយចំនួន ដែលមានប្រសិទ្ធភាពក្នុងការរក្សាកំណត់ត្រានៅពេលក្រោយក្នុងការប្រជុំនេះ ។
ពិភាក្សា ៖
តើយុទ្ធសាស្ត្រាណាមួយដែលបានរៀបរាប់ខាងលើនឹងមានប្រយោជន៍ខ្លាំងបំផុតដល់អ្នក នៅពេលអ្នកបង្កើតទម្លាប់នៃការរក្សាកំណត់ត្រាហិរញ្ញវត្ថុប្រចាំថ្ងៃនោះ ?
៣. ការរក្សាកំណត់ត្រាចំណូល និងចំណាយ
អាន ៖
កំណត់ត្រាចំណូល និងចំណាយ គឺជាបែបបទអាជីវកម្មទូទៅ និងសំខាន់មួយ ។ គោលបំណងចម្បងនៃកំណត់ត្រានេះ គឺកត់ត្រាពេលប្រាក់ចូល និងចេញពីអាជីវកម្មរបស់អ្នក ។ គោលបំណងមួយទៀត គឺដើម្បីជួយអ្នកទុកហរិញ្ញវត្ថុអាជីវកម្ម និងផ្ទាល់ខ្លួនរបស់អ្នកឲ្យនៅដាច់ដោយឡែកពីគ្នា ( សូមមើលជំពូកទី ៧ ) ។ សូមសម្រេចចិត្តថា តើរក្សាកំណត់ត្រានេះនៅលើក្រដាស ឬនៅកម្មវិធីកុំព្យូទ័រ ។ វាសំខាន់ថា អ្នកប្រើវារៀងរាល់ថ្ងៃ ។
៤. ការរក្សារបាយការណ៍លទ្ធផល
អាន ៖
បន្ទាប់ពីអ្នកបានបង្កើតកំណត់ត្រាចំណូល និងចំណាយ នោះអ្នកអាចបង្កើត របាយការណ៍លទ្ធផល ។ របាយការណ៍លទ្ធផលក៏ត្រូវបានហៅថា របាយកាណ៍ចំណេញ និងខាត ឬ ច.&ខ. ដែរ ។
មានចាំទេថា តើវាលំបាកប៉ុណ្ណា ដើម្បីគណនាប្រាក់ចំណេញតាមការចងចាំនៅក្នុងសកម្មភាពនៅវគ្គទី ១ ដែរឬទេ ? របាយការណ៍លទ្ធផលនេះនឹងមានប្រយោជន៍ ។ វាបូកនូវការដាក់បញ្ចូលមកពីកំណត់ត្រាចំណូល និងចំណាយ ដើម្បីសង្ខេបប្រភពនានានៃចំណូល និងចំណាយសម្រាប់រយៈពេលមួយជាក់លាក់ ដូចជាមួយសប្តាហ៍ មួយខែ មួយត្រីមាស ឬមួយឆ្នាំ ។ របាយការណ៍លទ្ធផលនេះបង្ហាញថា តើអាជីវកម្មរបស់អ្នកទទួលបានប្រាក់ចំណេញអំឡុងគ្រានោះដែរឬទេ ។
របាយការណ៍លទ្ធផលបង្ហាញដូចជា ៖
-
ចំណូល
-
ចំណាយ
-
ចំណេញ ( ឬខាត)
អាន ៖
សូមកត់សម្គាល់អំពីរបៀបដែលគោលបំណងនៃរបាយការណ៍លទ្ធផល គឺដើម្បីប្រមូលបញ្ចូលគ្នានូវចំណូល និងចំណាយទាំងអស់ដាក់ទៅជាផ្នែកផ្សេងៗ ។ អ្នកអាចមានការសរសេរបញ្ចូលច្រើនរាប់រយ រាប់ពាន់ពីកំណត់ត្រារបស់អ្នក ដែលត្រូវបានសង្ខេបនៅក្នុងរបាយការណ៍លទ្ធផល ។ នៅពេលអ្នកយល់អំពីរបៀបដែលរបាយការណ៍លទ្ធផលត្រូវបានរៀបចំឡើង នោះអ្នកអាចចាប់ផ្តើមសិក្សា និងវិភាគអំពីវា ដើម្បីទទួលបានការយល់ដឹងដែលនឹងជួយអ្នកឲ្យកែលម្អអាជីវកម្មរបស់អ្នក ។
ពិភាក្សា ៖
តើអ្នកអាចទទួលបានការយល់ដឹងអ្វីខ្លះមកពីការសិក្សារបាយការណ៍លទ្ធផល ?
៥. ការបង្កើតកំណត់ត្រាចំណូល និងចំណាយ ព្រមទាំងរបាយការណ៍លទ្ធផល
អាន ៖
ដើម្បីដឹងថា អាជីវកម្មរបស់អ្នកទទួលបានប្រាក់ចំណេញឬអត់ នោះអ្នកត្រូវតែបង្កើតរបាយការណ៍លទ្ធផល ។ ដើម្បីបង្កើតរបាយការណ៍លទ្ធផល ដំបូងអ្នកត្រូវមានកំណត់ត្រាចំណូល និងចំណាយ ។
ពិភាក្សា ៖
ម្ចាស់អាជីវកម្មជោគជ័យពឹងលើអំណាចនៃការរក្សាកំណត់ត្រា ។ តើមាននរណាម្នាក់នៅក្នុងក្រុមរក្សាទុកកំណត់ត្រាចំណូល និងចំណាយ ឬបង្កើតរបាយការណ៍លទ្ធផលបច្ចុប្បន្នដែរឬទេ ? ប្រសិនបើមាន សូមចែកចាយអំពីរបៀបដែលការធ្វើបែបនេះបានជួយដល់អ្នក ។
អាន ៖
ឥឡូវនេះ អ្នកបានរៀនអំពីសារៈសំខាន់នៃការរក្សាកំណត់ត្រាចំណូល និងចំណាយ ព្រមទាំងមូលដ្ឋានគ្រឹះនៃការរៀបចំរបាយការណ៍លទ្ធផលទៀងទាត់សម្រាប់អាជីវកម្មរបស់អ្នក ។ នៅពេលអាជីវកម្មរបស់អ្នករីកចម្រើន របាយការណ៍លទ្ធផលរបស់អ្នកទំនងជានឹងប្រែកាន់តែស្មុគស្មាញឡើង ។ របាយការណ៍ទាំងនោះត្រូវតែដាក់បញ្ចូលនូវចំណូល និងចំណាយផ្សេងទៀត ដូចមានរៀបរាប់ខាងក្រោមនេះ ៖
-
ចំណូលការប្រាក់
-
ចំណាយលើនិយោជិតដែលមិនមែនជាប្រាក់ខែ ( ដូចជា ធានារ៉ាប់រងសុខភាព និងពន្ធ )
-
ទីផ្សារ និងពាណិជ្ជកម្ម
-
ថ្លៃជួលផ្ទះ
-
ទឹកភ្លើង
-
ថ្លៃរំលស់សម្ភារ
-
ធានារ៉ាប់រង
-
ចំណាយការប្រាក់
សូមកុំបារម្ភ ប្រសិនបើអ្នកពុំទាន់ស្គាល់ពាក្យមួយចំនួននេះ ។ អ្នកអាចមើលបញ្ជីពាក្យសម្រាប់ព័ត៌មានបន្ថែម ។ នៅពេលអាជីវកម្មរបស់អ្នករីកចម្រើន នោះអ្នកចង់ស្គាល់ពាក្យទាំងនេះ និងរបៀបដោះស្រាយវានៅក្នុងរបាយការណ៍លទ្ធផលរបស់អ្នក ។
៦. ឧបករណ៍សម្រាប់គ្រប់គ្រងភាពលម្អិតនៃហិរញ្ញវត្ថុអាជីវកម្មរបស់ខ្ញុំ
អាន ៖
អ្នកត្រូវតែប្រើប្រាស់ឧបករណ៍ដ៏ទូលំទូលាយដើម្បីគ្រប់គ្រងភាពលម្អិតនៃហិរញ្ញវត្ថុអាជីវកម្មរបស់អ្នក ។ សូមប្រើប្រាស់ឧបករណ៍នេះដើម្បីកត់ត្រារាល់ដំណើរការនៃចំណូល និងចំណាយអាជីវកម្មរបស់អ្នក ។ ប្រាកដណាស់ ឧបករណ៍នោះគួរតែមានសមត្ថភាពក្នុងការធ្វើកំណត់ត្រាដើម្បីសង្ខេបចំណូល ចំណាយ និងចំណេញ ។ ដើម្បីជួយអ្នកឲ្យធ្វើវាក្លាយជាទម្លាប់ប្រចាំថ្ងៃក្នុងការរក្សាឲ្យអាជីវកម្មរបស់អ្នកមានការរៀបចំ នោះឧបករណ៍របស់អ្នកគួរតែងាយស្រួលប្រើប្រាស់ និងងាយរកបាន ។
ម្ចាស់អាជីវកម្មមួយចំនួនចាប់ផ្តើមប្រើសៀវភៅកំណត់ហេតុ និងសៀវភៅបញ្ជីដើម្បីកត់ត្រាវិក្កយបត្រប្រចាំថ្ងៃរបស់ពួកគេ ។ ម្ចាស់អាជីវកម្មទាំងនេះយកសៀវភៅកំណត់ហេតុ និងវិក្កយបត្ររបស់ពួកគេ ហើយសរសេរចំណូល និងចំណាយទៅក្នុងសៀវភៅនោះរៀងរាល់យប់ ។ ម្ចាស់អាជីវកម្មភាគច្រើនឈានទៅដល់ការប្រើឧបករណ៍រក្សាកំណត់ត្រាដែលមានកម្រិតខ្ពស់ ដូចជាឧបករណ៍ដែលប្រើកម្មវិធីឌីជីថល (apps) និងកម្មវិធីកុំព្យូទ័រ នៅពេលអាជីវកម្មរបស់ពួកគេរីកចម្រើនឡើង ។ ម្ចាស់អាជីវកម្មមួយចំនួនក៏ជួលគណនេយ្យករដើម្បីគ្រប់គ្រងហិរញ្ញវត្ថុរបស់ពួកគេផងដែរ ។
ពិភាក្សា ៖
-
តើអ្នកស្គាល់ឧបករណ៍អ្វីខ្លះ ដែលអាចជួយគ្រប់គ្រងភាពលម្អិតនៃហិរញ្ញវត្ថុអាជីវកម្មរបស់អ្នក ?
-
តើលក្ខណៈពិសេសនៃឧបករណ៍ដ៏មានប្រយោជន៍បំផុតណាខ្លះដែលអ្នកផ្តល់ជាអនុសាសន៍នោះ ?
អាន ៖
ក្នុងនាមជាម្ចាស់អាជីវកម្ម អ្នកត្រូវតែសម្រេចចិត្តថា តើឧបករណ៍ ឬធនធានណាមួយនឹងជួយអ្នកបានល្អបំផុតដើម្បីកត់ត្រាចំណូល និងចំណាយរបស់អ្នក ។ ទោះបីជាឧបករណ៍ ឬគណនេយ្យករនឹងជួយបានច្រើនជាមួយនឹងការរក្សាកំណត់ត្រាក្តី ក៏អ្នកត្រូវតែយល់អំពីកំណត់ត្រាហិរញ្ញវត្ថុនៃអាជីវកម្មរបស់អ្នក ហើយពិនិត្យមើលវាឡើងវិញជានិច្ច ។ នៅពេលអាជីវកម្មរបស់អ្នករីកចម្រើន អ្នកចង់យល់ដឹងឲ្យកាន់តែស៊ីជម្រៅអំពីបញ្ហាហិរញ្ញវត្ថុ ។
ដោយចាប់ផ្តើមពីថ្ងៃនេះទៅ សូមកត់ត្រាចំណូល និងចំណាយរបស់អ្នករៀងរាល់ថ្ងៃ ។ នៅចុងសប្តាហ៍ សូមបង្កើតរបាយការណ៍លទ្ធផលមួយសម្រាប់អាជីវកម្មរបស់អ្នក ។ ( ប្រសិនបើមានប្រយោជន៍ សូមប្រើប្រាស់បែបបទទទេនៅក្នុង « ធនធាននានា » នៅចុងវគ្គនេះ ) ។ ប្រសិនបើអាជីវកម្មរបស់អ្នកពុំទាន់មានទិន្នន័យហិរញ្ញវត្ថុនៅឡើយ សូមបង្កើតទិន្នន័យសម្រាប់អាជីវកម្មប្រឌិតមួយ ។ ទម្លាប់នៃការកត់ត្រាចំណូល និងចំណាយទាំងអស់របស់អ្នកនឹងផ្តល់ប្រយោជន៍ដល់អាជីវកម្មរបស់អ្នក ។