« ការបង្ហាញអំពីអាជីវកម្មរបស់ខ្ញុំ ៖ រៀន » ការចាប់ផ្ដើម និងការពង្រីកអាជីវកម្មរបស់ខ្ញុំសម្រាប់ភាពខ្លួនទីពឹងខ្លួន ( ឆ្នាំ ២០១៧ )
« ការបង្ហាញអំពីអាជីវកម្មរបស់ខ្ញុំ ៖ រៀន »
រៀន
ម៉ោងជាអតិបរមា ៖ ១០៥ នាទី
១. ការបន្តក្រុមភាពខ្លួនទីពឹងខ្លួនរបស់ខ្ញុំ
អាន ៖
បន្ទាប់ពីចប់វគ្គសិក្សា ការចាប់ផ្ដើម និងការពង្រីកអាជីវកម្មរបស់ខ្ញុំ សម្រាប់ភាពខ្លួនទីពឹងខ្លួន ក្រុមមួយចំនួនជ្រើសរើសបន្តជួបគ្នា ប៉ុន្តែមិនសូវញឹកដូចមុន ។ ពួកគេស្វែងរកតម្លៃនៅក្នុងការបន្តរៀនជាមួយគ្នា គាំទ្រគ្នានៅក្នុងការពង្រីកអាជីវកម្មរបស់ពួកគេ និងធ្វើការដើម្បីយកឈ្នះឧបសគ្គ ។
ប្រសិនបើអ្នកជ្រើសរើសបន្តប្រជុំ សូមជ្រើសរើសអ្នកដឹកនាំក្រុមមួយ ហើយបង្កើតកាលវិភាគការប្រជុំមួយ ។ អ្នកសម្របសម្រួលបច្ចុប្បន្នពុំចាំបាច់ត្រូវធ្វើជាអ្នកដឹកនាំក្រុមឡើយ ។ អ្នកដឹកនាំនោះទាក់ទងក្រុម និងធ្វើការដើម្បីប្រាកដថា ការប្រជុំត្រូវបានរៀបចំ និងមានប្រយោជន៍ដល់សមាជិកម្នាក់ៗ ។ អ្នកដឹកនាំនោះគួរតែដាក់ផែនការអំពីប្រធានបទ និងបង្កើតរបៀបវីរៈសម្រាប់ការប្រជុំនីមួយៗ ដោយផ្អែកលើមតិយោបល់មកពីក្រុមនោះ ។ របៀបវីរៈនោះអាចរួមមានសកម្មភាព ដូចជាការស្តាប់ភ្ញៀវដែលអញ្ជើញឲ្យមកនិយាយ, ការពិភាក្សាអំពីសៀវភៅដែលទាក់ទងនឹងអាជីវកម្ម ដែលសមាជិកក្រុមបានអានជាមុន ឬការធ្វើការជាមួយគ្នាដើម្បីអភិវឌ្ឍជំនាញអាជីវកម្ម ។
ក្រុមខ្លះក៏រៀបចំការផ្ញើសារជាក្រុម ដើម្បីពួកគេអាចទាក់ទងគ្នាជាទៀងទាត់ ។ ពួកគេផ្តល់ការលើកទឹកចិត្ត ចែកចាយអត្ថបទ វីដេអូ និងមាតិកាដទៃទៀត និងណែនាំអំពីទំនាក់ទំនងអាជីវកម្ម និងធនធាន ។ ដើម្បីសម្របសម្រួលបទពិសោធន៍បណ្តាញបន្ថែមទៀត អ្នកគួរតែសហការជាមួយអ្នកឯកទេសភាពខ្លួនទីពឹងខ្លួនប្រចាំស្តេក ដើម្បីរៀបចំការប្រជុំសម្រាប់សមាជិកក្នុងក្រុមរបស់អ្នក និងសមាជិកដទៃនៅក្នុងស្តេកដែលបានបញ្ចប់វគ្គសិក្សានោះ ។
ពិភាក្សា ៖
តើអ្នកចង់បន្ដជួបជាក្រុមឬទេ ? ប្រសិនបើចង់ សូមពិភាក្សាអំពីរបៀបដែលអ្នកចង់បន្តទាក់ទងដើម្បីគាំទ្រគ្នានៅក្នុងការពង្រីកអាជីវកម្មរបស់អ្នក ។
២. មាគ៌ារបស់ខ្ញុំឆ្ពោះទៅកាន់ភាពខ្លួនទីពឹងខ្លួន
អាន ៖
អំឡុងពេល ១២ សប្តាហ៍កន្លងទៅ អ្នកបានបង្កើតទម្លាប់ថ្មីៗ ហើយប្រែកាន់តែមានភាពខ្លួនទីពឹងខ្លួន ។ ព្រះអម្ចាស់សព្វព្រះទ័យឲ្យអ្នកបន្តស្ថាបនានៅលើសមត្ថភាពទាំងនេះ ហើយអភិវឌ្ឍសមត្ថភាពថ្មីៗ ។ នៅពេលអ្នកអធិស្ឋាន ហើយស្តាប់ នោះព្រះវិញ្ញាណបរិសុទ្ធអាចជួយអ្នកឲ្យដឹងនូវអ្វីដែលជីវិតអ្នកត្រូវការកែលម្អ ។
ពិភាក្សា ៖
តើមានការផ្លាស់ប្តូរអ្វីខ្លះដែលអ្នកបានឃើញនៅក្នុងជីវិតរបស់អ្នកអំឡុងពេល ១២ សប្តាហ៍នេះ ពេលអ្នកបានចូលរួមប្រជុំក្រុម រក្សាការតាំងចិត្ត ហើយធ្វើការដើម្បីប្រែកាន់តែមានភាពខ្លួនទីពឹងខ្លួន ?
អាន ៖
មានមធ្យោបាយជាច្រើន ដែលអ្នកអាចបន្តធ្វើការដើម្បីប្រែកាន់តែមានភាពខ្លួនទីពឹងខ្លួន ។ អ្នកអាច ៖
-
សិក្សា និងបន្តរស់នៅតាមគោលការណ៍ទាំង ១២ នៃ « មូលដ្ឋានគ្រឹះរបស់ខ្ញុំ » និងទម្លាប់នៃភាពខ្លួនទីពឹងខ្លួន ។
-
បន្តជួយសមាជិកក្រុមរបស់អ្នក ។
-
ចែកចាយអ្វីដែលអ្នកបានរៀន និងទីបន្ទាល់របស់អ្នកអំពីភាពខ្លួនទីពឹងខ្លួនជាមួយអ្នកដទៃនៅព្រះវិហារ និងក្នុងសហគមន៍របស់អ្នក ។
-
ធ្វើជាអ្នកសម្របសម្រួលសម្រាប់ក្រុមភាពខ្លួនទីពឹងខ្លួនថ្មីមួយ ។
-
កសាងសមត្ថភាពរបស់អ្នក តាមរយៈការចូលរួមក្រុមភាពខ្លួនទីពឹងខ្លួនមួយផ្សេងទៀត ។
-
សិក្សាគោលការណ៍ខាងគោលលទ្ធិនៃភាពខ្លួនទីពឹងខ្លួនខាងក្រោម ។
គោលការណ៍ខាងគោលលទ្ធិនៃភាពខ្លួនទីពឹងខ្លួន | ||
---|---|---|
ភាពខ្លួនទីពឹងខ្លួនគឺជាបទបញ្ញត្តិមួយ |
គោលបំណងរបស់ព្រះអម្ចាស់គឺដើម្បីផ្គត់ផ្គង់ដល់ពួកបរិសុទ្ធរបស់ទ្រង់ ហើយទ្រង់មាននូវព្រះចេស្តាទាំងអស់ដើម្បីធ្វើដូច្នោះ |
រឿងខាងសាច់ឈាម និងខាងវិញ្ញាណគឺតែមួយ |
គោលលទ្ធិ និង សេចក្ដីសញ្ញា ៧៨:១៣–១៤; ម៉ូសេ ២:២៧–២៨ |
គោលលទ្ធិ និង សេចក្ដីសញ្ញា ១០៤:១៥; យ៉ូហាន ១០:១០; ម៉ាថាយ ២៨:១៨; កូឡូស ២:៦–១០ |
គោលលទ្ធិ និង សេចក្ដីសញ្ញា ២៩:៣៤; អាលម៉ា ៣៤:២០–២៥ |
ពិភាក្សា ៖
-
តើអ្នកអាចធ្វើអ្វីខ្លះដើម្បីបន្តរីកចម្រើននៅលើផ្លូវនៃភាពខ្លួនទីពឹងខ្លួនរបស់អ្នក ?
-
តើអ្នកអាចធ្វើអ្វីខ្លះដើម្បីជំរុញកម្មវិធីភាពខ្លួនទីពឹងខ្លួននៅក្នុងស្តេក និងសហគមន៍របស់អ្នក ?
អាន ៖
នៅពេលអ្នកបន្តនៅលើផ្លូវនៃភាពខ្លួនទីពឹងខ្លួនរបស់អ្នក សូមនឹកចាំពីការទូន្មានខាងក្រោមមកពីអែលឌើរ ម៉ាវីន ជេ អាស្តុន ៖ « ព្រះអម្ចាស់ខ្វល់ព្រះទ័យគ្រប់គ្រាន់អំពីយើង ដើម្បីប្រទានការណែនាំសម្រាប់ការបម្រើ និងឱកាសសម្រាប់អភិវឌ្ឍភាពខ្លួនទីពឹងខ្លួន ។ គោលការណ៍របស់ទ្រង់គឺខ្ជាប់ខ្ជួន ហើយមិនផ្លាស់ប្តូរ » ( « Give with Wisdom That They May Receive with Dignity » Ensign ខែ វិច្ឆិកា ឆ្នាំ ១៩៨១ ទំព័រ ៩១ ) ។
ព្យាការីនីហ្វៃបានទូន្មានថា ៖ « ហើយឥឡូវនេះ ឱបងប្អូនជាទីស្រលាញ់របស់ខ្ញុំអើយ បន្ទាប់ពីអ្នកបានចូលតាម…ផ្លូវនេះហើយខ្ញុំសួរថាតើបានសម្រេចសព្វគ្រប់ហើយឬនៅ ? មើលចុះ ខ្ញុំសូមនិយាយទៅអ្នកថា ទេ ដ្បិតអ្នករាល់គ្នាមិនបានមកដល់នេះទេ លើកលែងតែដោយព្រះបន្ទូលនៃព្រះគ្រីស្ទ ដោយមានសេចក្ដីជំនឿដ៏រឹងប៉ឹងដល់ព្រះអង្គ ដោយពឹងផ្អែកទាំងស្រុង ទៅលើបុណ្យគុណរបស់ទ្រង់ ដែលមានឥទ្ធិឫទ្ធិដើម្បីសង្គ្រោះ ។… អ្នករាល់គ្នាត្រូវតែឈានទៅមុខដោយខ្ជាប់ខ្ជួននៅក្នុងព្រះគ្រីស្ទ » ( នីហ្វៃទី ២ ៣១:១៩–២០ ) ។
៣ ៖ ការបង្ហាញអំពីអាជីវកម្មរបស់ខ្ញុំ
កំណត់ចំណាំសម្រាប់អ្នកសម្របសម្រួល ៖ ប្រសិនបើអ្នកពុំបានធ្វើដូច្នោះទេ សូមណែនាំភ្ញៀវដែលនឹងផ្តល់មតិកែលម្អអំឡុងពេលធ្វើបទបង្ហាញឲ្យសមាជិកស្គាល់ ។
អាន ៖
ជំនាញអាជីវកម្មគន្លឹះមួយរបស់យើងគឺការលក់ ។ ម្ចាស់អាជីវកម្មជោគជ័យនិយាយជាមួយអ្នកដែលអាចក្លាយជាអតិថិជន—ទាំងផ្លូវការ និងមិនផ្លូវការ—ដើម្បីចែកចាយសារលិខិតអាជីវកម្មរបស់ពួកគេ ទទួលមតិកែលម្អ និងធ្វើឲ្យមានការលក់បានច្រើនបំផុត ។ ថ្ងៃនេះ យើងនឹងចែករំលែកបទបង្ហាញអាជីវកម្មដល់សមាជិកក្រុមរបស់យើង និងភ្ញៀវដែលបានចូលរួមជាមួយយើង ។
គោលបំណងនៃការធ្វើបទបង្ហាញអាជីវកម្មរបស់អ្នកគឺដើម្បីទាក់ទងឲ្យច្បាស់នូវតម្លៃដែលអាជីវកម្មរបស់អ្នកបានផ្តល់ឲ្យ ។ អ្នកសម្របសម្រួល ភ្ញៀវ និងសមាជិកក្រុមពុំគួរលូកដៃចូលជំនាញនៃបទបង្ហាញរបស់អ្នកទេ ប៉ុន្តែគួរផ្តល់យោបល់ស្តីពីការអភិវឌ្ឍ ឬកែលម្អធាតុផ្សេងៗនៃអាជីវកម្មរបស់អ្នក ។ ការបន្តឆ្ពោះទៅមុខទៀត អ្នកទំនងជាមានឱកាសបន្ថែមទៀតដើម្បីជំរុញអាជីវកម្មរបស់អ្នក នៅពេលអ្នកលក់ បង្កើនទំនាក់ទំនង ចុះឈ្មោះរកដៃគូ ឬអ្នកវិនិយោគទុន ឬស្វែងរកហិរញ្ញវត្ថុ ។
បទបង្ហាញរបស់អ្នកគួរបញ្ចូលនូវព័ត៌មានអំពី ៖
-
តម្រូវការរបស់អតិថិជនដែលអាជីវកម្មរបស់អ្នកនឹងដោះស្រាយ ។
-
សេវាកម្ម ឬផលិតផលដែលអ្នកនឹងផ្តល់ជូន ។
-
អត្ថប្រយោជន៍នៃការប្រកួតប្រជែងរបស់អ្នក ។
-
អតិថិជនដែលជាគោលដៅរបស់អ្នក ។
-
ផែនការរបស់អ្នកដើម្បីទទួលបានអតិថិជនដែលជាគោលដៅរបស់អ្នក ។
-
ធនធាននានាដែលអ្នកនឹងត្រូវការសម្រាប់អាជីវកម្មរបស់អ្នក ។
-
ភស្តុតាងដែលបង្ហាញថា អាជីវកម្មរបស់អ្នកអាចបានចំណេញ ។
-
ជំហានបន្ទាប់គឺ អ្នកនឹងធ្វើឲ្យអាជីវកម្មរបស់អ្នកឆ្ពោះទៅមុខ ។