« ការគ្រប់គ្រងលំហូរសាច់ប្រាក់អាជីវកម្មរបស់ខ្ញុំ ៖ រៀន » ការចាប់ផ្ដើម និងការពង្រីកអាជីវកម្មរបស់ខ្ញុំសម្រាប់ភាពខ្លួនទីពឹងខ្លួន ( ឆ្នាំ ២០១៧ )
« ការគ្រប់គ្រងលំហូរសាច់ប្រាក់អាជីវកម្មរបស់ខ្ញុំ ៖ រៀន »
រៀន
ម៉ោងជាអតិបរមា ៖ ៦០ នាទី
១. ភាពខុសគ្នារវាងប្រាក់ចំណេញ និងលំហូរសាច់ប្រាក់
អាន ៖
អ្នកបានរៀនថា អាជីវកម្មជោគជ័យតម្រូវឲ្យរក្សាកំណត់ត្រាប្រចាំថ្ងៃ ។ គ្រប់ពេលដែលអាជីវកម្មរបស់អ្នកទទួល ឬធ្វើការចំណាយ នោះអ្នកត្រូវតែកត់ត្រាវាទុក ។ អ្នកក៏បានរៀនអំពីរបៀបដើម្បីបង្កើតរបាយការណ៍លទ្ធផល ដែលបង្ហាញអំពីសេចក្តីសង្ខេបនៃប្រាក់ចំណេញ ( ឬខាត ) ដែលសម្រេចបានតាមរយៈអាជីវកម្មរបស់អ្នកនៅក្នុងអំឡុងពេលជាក់លាក់មួយ ។ ប្រាក់ចំណេញ ត្រូវបានផ្តល់និយមន័យឲ្យថា ជាប្រាក់ដែលសល់សម្រាប់អាជីវកម្មរបស់អ្នក បន្ទាប់ពីអ្នកដកចំណាយពីប្រាក់ចំណូលរបស់អ្នក ។
ដោយសារប្រាក់ចំណេញគឺជារង្វាស់ដ៏សំខាន់មួយ វាពុំមែនគ្រាន់តែជារឿងតែមួយដែលតម្រូវឲ្យអ្នកផ្តោតចិត្តទុកដាក់ក្នុងនាមជាម្ចាស់អាជីវកម្មឡើយ ។ លំហូរសាច់ប្រាក់ គឺជារង្វាស់ដែលផ្តោតទៅលើពេលវេលានៃចលនាសាច់ប្រាក់ចូល និងចេញនៅក្នុងអាជីវកម្មរបស់អ្នករៀងរាល់ថ្ងៃ ។ លំហូរសាច់ប្រាក់គឺជាអ្វីដែលអាជីវកម្មរបស់អ្នកពឹងលើយ៉ាងខ្លាំង ។ នៅពេលអាជីវកម្មរបស់អ្នកមានប្រាក់ នោះអ្នកអាចជ្រើសរើសដើម្បីបន្ដពង្រីក ធ្វើការវិនិយោគ ហើយសន្សំប្រាក់សម្រាប់ស្ថានភាពដែលពុំបានរំពឹងទុក ឬគ្រាអាសន្ន ។
របាយការណ៍ប្រាក់ចំណូលរបស់អ្នកអាចបង្ហាញថា អាជីវកម្មរបស់អ្នកគឺអាចចំណេញបាន ប៉ុន្តែវានឹងក្ស័យធន ប្រសិនបើវាគ្មានសាច់ប្រាក់គ្រប់គ្រាន់ដើម្បីបង់នូវអ្វីដែលវាជំពាក់នោះទេ ។ បញ្ហាលំហូរសាច់ប្រាក់គឺជាបញ្ហាមួយដែលបណ្តាលឲ្យអាជីវកម្មបរាជ័យ ។
២. ការយល់អំពីលំហូរសាច់ប្រាក់
អាន ៖
មានលំហូរសាច់ប្រាក់ចំនួនពីរប្រភេទ ៖
លំហូរសាច់ប្រាក់វិជ្ជមាន កើតឡើងនៅពេលចំនួនសរុបនៃសាច់ប្រាក់ចូលអាជីវកម្មរបស់អ្នក អំឡុងពេលជាក់លាក់ណាមួយច្រើនជាង ចំនួនសរុបនៃសាច់ប្រាក់ចេញពីអាជីវកម្មរបស់អ្នកអំឡុងពេលតំណាលគ្នានោះ ។ នេះគឺជាអ្វីដែលអ្នកចង់បាន ៖ វដ្តលំហូរសាច់ប្រាក់វិជ្ជមាន ។
លំហូរសាច់ប្រាក់អវិជ្ជមាន កើតឡើងនៅពេលចំនួនសរុបនៃសាច់ប្រាក់ចេញពីអាជីវកម្មរបស់អ្នក អំឡុងពេលជាក់លាក់ណាមួយច្រើនជាង ចំនួនសរុបនៃសាច់ប្រាក់ចូលអាជីវកម្មរបស់អ្នកអំឡុងពេលតំណាលគ្នានោះ ។ នេះគឺជាការប្រថុយប្រថាន ជាស្ថានភាពដែលមិនគួរឲ្យប្រាថ្នា ដែលអ្នកគួរតែដោះស្រាយភ្លាមជាមួយសកម្មភាពដែលបង្កើតសាច់ប្រាក់ឲ្យបានលឿនតាមដែលអាចធ្វើបាន ហើយបន្ថយចំណាយថ្លៃដើម ។
សូមពិនិត្យមើលឧទាហរណ៍បីខុសគ្នាដើម្បីយល់អំពីសំពាធលំហូរសាច់ប្រាក់ និងរបៀបដែលម្ចាស់អាជីវកម្មអាចដោះស្រាយវា ។ សូមស្រមៃថា អាជីវកម្មនោះចាប់ផ្តើមដើមខែដោយមានសាច់ប្រាក់ ៣០០ ។ ជាទូទៅ អាជីវកម្មទទួលការបង់ជាសាច់ប្រាក់ ២០០ រៀងរាល់ថ្ងៃចន្ទ និង ២០០ រៀងរាល់ថ្ងៃពុធ ។ អាជីវកម្មចំណាយសាច់ប្រាក់ ៣០០ រៀងរាល់ថ្ងៃសុក្រ ។ ឧទាហរណ៍ខាងក្រោមបង្ហាញវដ្តលំហូរសាច់ប្រាក់សម្រាប់អាជីវកម្មនេះក្នុងរយៈពេលបីសប្តាហ៍ ។ ប្រាក់ចូល និងចេញពីអាជីវកម្មនៅក្នុងលំនាំមួយដែលអាចទាយដឹង ។
ឧទាហរណ៍ ក ៖ លំហូរសាច់ប្រាក់សុក្រិត្យ
ជាអកុសល អាជីវកម្មនីមួយៗជួបបទពិសោធន៍ដែលគួរឲ្យភ្ញាក់ផ្អើល និងលំបាក ។ ឧទាហរណ៍ ខ ខាងក្រោមបង្ហាញអំពីអ្វីដែលកើតឡើង ពេលអាជីវកម្មពុំបានរៀបចំខ្លួនសម្រាប់លំហូរសាច់ប្រាក់អវិជ្ជមាន ។ នៅក្នុងករណីនេះ អតិថិជនពីរនាក់ពុំបង់វិក្ក័យបត្ររបស់ពួកគេទេ នាំឲ្យមានប្រាក់ដែលត្រូវទទួលបាន មិនអាចប្រមូលចំនួន ៤០០ ( ក៏អាចហៅបានថា បំណុលអាក្រក់ ) ។ ម្ចាស់អាជីវកម្មអាស្រ័យលើប្រាក់នោះដើម្បីបង់ថ្លៃនិយោជិត ។ អាជីវកម្មក៏មានចំណាយអាសន្នដែលត្រូវបង់ភ្លាមៗផងដែរ ។
ឧទាហរណ៍ ខ ៖ លំហូរសាច់ប្រាក់អវិជ្ជមាន—ពុំបានរៀបចំ
ឧទាហរណ៍ គ ខាងក្រោមបង្ហាញពីភាពភ្ញាល់ផ្អើល និងការលំបាកដូចគ្នានឹងឧទាហរណ៍ ខ ។ ប៉ុន្តែនៅក្នុងករណីនេះ ម្ចាស់អាជីវកម្មបានរៀបចំខ្លួន ។ គាត់បានពឹងផ្អែកលើបន្ទាត់ឥណទានរបស់គាត់ដើម្បីរក្សាអាជីវកម្មឲ្យមានប្រតិបត្តិការ ។ គាត់បង់សងសមតុល្យបន្ទាត់ឥណទានរបស់គាត់ឲ្យបានលឿនតាមដែលអាចធ្វើបាន ។
ឧទាហរណ៍ គ ៖ លំហូរសាច់ប្រាក់អវិជ្ជមានដែលអាចមាន—បានរៀបចំ
ពិភាក្សា ៖
តើឧទាហរណ៍ទាំងនេះបង្រៀនអ្នកអ្វីខ្លះអំពីឧបសគ្គនានានៃការគ្រប់គ្រងលំហូរសាច់ប្រាក់ ?
អាន ៖
វាជារឿងធម្មតាសម្រាប់ម្ចាស់អាជីវកម្មដែលមានឧបសគ្គលំហូរសាច់ប្រាក់ ។ ឧបសគ្គទាំងនេះរួមមាន ៖
-
មានភាពថ្មីថ្មោងក្នុងអាជីវកម្ម ដែលវាធ្វើឲ្យលំបាកដើម្បីទទួល និងបង់តាមឥណទាន ។
-
ឱកាសរីកចម្រើន ដែលអាចកាត់បន្ថយចំនួនសាច់ប្រាក់ដែលមាន ។
-
ការមានបញ្ជីសារពើភ័ណ្ឌ ច្រើនដែលចងសាច់ប្រាក់ទុក ។
-
អតិថិជនបង់តាមឥណទាន ដែលពន្យារចំនួនសាច់ប្រាក់ចូល ។
-
ការលក់ទៅឲ្យអាជីវកម្មផ្សេងទៀតដែលបង់តាមឥណទាន ដែលពន្យារចំនួនសាច់ប្រាក់ចូល ។
-
ការលក់មិនទៀងទាត់ដោយសារតែរដូវកាល ឬកត្តាផ្សេងៗទៀត ដែលអាចបង្កើតកម្រិតខ្ពស់ និងទាបនៅក្នុងសាច់ប្រាក់ដែលអ្នកមាន ។
-
ចំណាយពុំបានរំពឹងទុក ។
-
អតិថិជនពុំបង់ថ្លៃអ្វីដែលពួកគេជំពាក់ ( បំណុលអាក្រក់ ) ។
ពិភាក្សា ៖
តើឧបសគ្គដែលអាចមានអ្វីខ្លះដែលអ្នកលៃលកទុកជាមុនជាមួយនឹងលំហូរសាច់ប្រាក់នៃអាជីវកម្មរបស់អ្នក ?
៣. យុទ្ធសាស្ត្រក្នុងការកែលម្អលំហូរសាច់ប្រាក់
អាន ៖
មានអ្វីៗជាច្រើនដែលអ្នកអាចធ្វើដើម្បីបង្កើតឲ្យមានវដ្តលំហូរសាច់ប្រាក់វិជ្ជមានមួយសម្រាប់អាជីវកម្មរបស់អ្នក និងដើម្បីរៀបចំសម្រាប់ភាពភ្ញាក់ផ្អើល និងការលំបាកដែលអាចកើតមាន ។ ឧទាហរណ៍ អ្នកអាចស្រាវជ្រាវលក្ខខណ្ឌចំណាយជាបទដ្ឋានសម្រាប់ឧស្សាហកម្មរបស់អ្នក ។ នៅក្នុងឧស្សាហកម្មមួយចំនួន អ្នកលក់អាចរង់ចាំ ៩០ ថ្ងៃ ឬយូរជាងនោះ ពីមុនពួកគេត្រូវបង់ថ្លៃ ។ ជារឿយៗ ឧស្សាហកម្មផ្សេងទៀតតម្រូវឲ្យបង់ថ្លៃក្នុងរយៈពេល ៣០ ថ្ងៃ ។ នៅពេលអ្នកយល់អំពីលក្ខខណ្ឌចំណាយជាបទដ្ឋានសម្រាប់ឧស្សាហកម្មរបស់អ្នក នោះអ្នកអាចធ្វើការចរចារនូវលក្ខខណ្ឌដែលពេញចិត្តបន្ថែមទៀតសម្រាប់អាជីវកម្មរបស់អ្នកផ្ទាល់ ។
ពិភាក្សា ៖
ជាទូទៅម្ចាស់អាជីវកម្មចង់ទទួល ឬប្រមូលសាច់ប្រាក់ឲ្យកាន់តែឆាប់កាន់តែល្អ ហើយទុកការបង់សាច់ប្រាក់រហូតទាល់តែពួកគេតម្រូវឲ្យធ្វើដូច្នោះ ។ ជាដំបូង គោលការណ៍នេះហាក់ដូចជាផ្ទុយនឹងការបង្រៀនរបស់ព្រះអង្គសង្គ្រោះដែលបង្រៀនថា « ដូច្នេះ អស់ទាំងការអ្វីដែលអ្នករាល់គ្នាចង់ឲ្យមនុស្សលោកប្រព្រឹត្តនឹងខ្លួន នោះត្រូវឲ្យអ្នកប្រព្រឹត្តនឹងគេដូច្នោះដែរ » ( ម៉ាថាយ ៧:១២ ) ។ ក្នុងនាមជាម្ចាស់អាជីវកម្ម តើអ្នកស្រុះស្រួលនឹងគោលការណ៍ទាំងនេះដោយរបៀបណា ?
អាន ៖
នៅពេលអ្នកធ្វើការដើម្បីបង្កើតវដ្តលំហូរសាច់ប្រាក់វិជ្ជមានសម្រាប់អាជីវកម្មរបស់អ្នក វាសំខាន់ដើម្បីធ្វើវាដោយភាពថ្លៃថ្នូរ ។ សូមខិតខំស្វែងយល់អំពីលក្ខខណ្ឌចំណាយជាបទដ្ឋានសម្រាប់ឧស្សាហកម្មរបស់អ្នក ។ សូមមានភាពវៃឆ្លាតក្នុងការបង្កើតយុទ្ធសាស្ត្របង់ប្រាក់របស់អ្នក ។ សូមបង្កើតលក្ខខណ្ឌចំណាយដែលពេញចិត្តសម្រាប់អាជីវកម្មរបស់អ្នក ។ នៅពេលអ្នកបានកំណត់យុទ្ធសាស្ត្របង់ប្រាក់របស់អ្នករួច សូមបញ្ជាក់ពីការរំពឹងទុករបស់អ្នកឲ្យបានច្បាស់ ហើយរក្សាការតាំងចិត្តទាំងអស់របស់អ្នក ។
៤. ការគ្រប់គ្រងលំហូរសាច់ប្រាក់យ៉ាងសកម្ម
អាន ៖
វាមិនគ្រប់គ្រាន់ទេដោយគ្រាន់តែពិនិត្យមើលគណនីធនគារអាជីវកម្មរបស់អ្នកមួយខែម្តង ហើយសង្ឃឹមថា ចំនួននោះវាដំណើរការដោយខ្លួនវានោះ ។ អ្នកត្រូវតែគ្រប់គ្រងលំហូរសាច់ប្រាក់អាជីវកម្មរបស់អ្នកយ៉ាងសកម្ម ។
ក្នុងនាមជាម្ចាស់អាជីវកម្មជោគជ័យម្នាក់ អ្នកគួរតែដឹងថា តើសាច់ប្រាក់អាជីវកម្មរបស់អ្នកមានប៉ុន្មាននៅគ្រប់ពេលវេលាទាំងអស់ ។ សូមកុំពឹងផ្អែកទៅលើរបាយការណ៍ធនាគារដើម្បីគ្រប់គ្រងលំហូរសាច់ប្រាក់របស់អ្នកឡើយ ។ ជារឿយៗ សមតុល្យគណនីរបស់អ្នកមិនរួមបញ្ចូលនូវចំណាយដែលកំពុងដំណើរការទេ ដូចជាបង់ប្រាក់ឲ្យទៅអ្នកផ្គត់ផ្គង់ ឬទទួលប្រាក់ចូលមកពីអតិថិជន ។
អ្នកត្រូវតែបង្កើត និងបន្តធ្វើបច្ចុប្បន្នភាពលើការប៉ាន់ប្រមាណទុកនៃលំហូរសាច់ប្រាក់របស់អ្នក ។ ដូចបានពន្យល់ពីដើមមក លំហូរសាច់ប្រាក់គឺជាពេលវេលា និងចំនួនសាច់ប្រាក់ចូល និងចេញនៅក្នុងអាជីវកម្មរបស់អ្នកអំឡុងពេលជាក់លាក់ណាមួយ ។ ការប៉ាន់ប្រមាណទុករបស់អ្នកគួរតែបង្ហាញការរពឹងទុកលំហូរសាច់ប្រាក់របស់អ្នកសម្រាប់ពីរ ឬបីខែបន្ទាប់ ។ ការប៉ាន់ប្រមាណទុករបស់អ្នកពុំត្រឹមត្រូវ ១០០ ភាគរយនោះទេ ប៉ុន្តែវាគឺជាការចាំបាច់ដែលអ្នកត្រូវបង្កើតការវាយតម្លៃដែលពុំលើសលុប ប៉ុន្ដែជាប់លាប់មួយសម្រាប់ចំណូលប្រចាំខែរបស់អ្នក ទាំងចំណាយអថេរ និងចំណាយថេររបស់អ្នក ។
លំហូរសាច់ប្រាក់វិជ្ជមានពុំមែនកើតឡើងដល់អាជីវកម្មដោយឯកឯងឡើយ ។ វាសម្រេចបានតាមរយៈការខិតខំ និងដាក់ផែនការដោយយកចិត្តទុកដាក់ ។ ប្រសិនបើអ្នកដឹងអំពីតួនាទីនៃសាច់ប្រាក់បច្ចុប្បន្នរបស់អ្នក និងការប៉ាន់ប្រមាណទុកនៃលំហូរសាច់ប្រាក់របស់អ្នក នោះអ្នកអាចធ្វើការសម្រេចចិត្តដែលនឹងជួយអាជីវកម្មរបស់អ្នកឲ្យជោគជ័យ និងរីកចម្រើន ។ ម្ចាស់អាជីវកម្មជោគជ័យរក្សាទុកសាច់ប្រាក់ដែលបានត្រឡប់មកវិញ សម្រាប់ចំណាយពុំអាចរំពឹងទុក ហើយជារឿយៗទទួលបានធនធាននៃឥណទាន ដោយផ្អែកទៅលើតម្រូវការការប៉ាន់ប្រមាណទុកនៃលំហូរសាច់ប្រាក់របស់ពួកគេ ។